Yosua 13 - Eipomek

Aminyan talak arye dopropnamik mutuku ati, nyabuk yupu

¹ Aminyan talak ara, ninye deiyoknye Yosua bira, akunum wisi dayuk. Winibuk talak ara, Allah Yahweh arye, Yosua biti nyabuk. “Yosua anda, akunum wisi dalum bukni, na mapu koprop, Israel yala nang unamakak ati, mutuku ap, tuku ton ap, dopropmanto mutuku ara, weik anun ton, tuba aubuke.

² Dopropmanto mutuku ara, weik tonun tuba aupmal mutuku ara, ani. Ara, Pilistin yala nang ulamik mutuku weik tonun ton tuba aulule. Tonda, Gesu yala nang ulamik mutuku noutam nirya ap, tuba aulule.

³ Ura, Mesir mutuku nang unyakak arye, diprongobuka, otam arye ubuka, keting panalyangan tam balamle mek, el si Sikor mek, atam arye diprongobuka, deice tam (ara utam) balamuka ani, atam bokolalulak ara, Ekron mutuku eitam ulule. Atam noutam nirya ara, Kanaan yala ninye arye, taleamikce ulamik. Amutuku noutam ulamik ninye deiyok nang nirya, sik Pilistin deiyok nang ara, pamubarye nang ulamik. Ara, Gasa mutuku talilamuknye ap, Asdod mutuku talilamuknye ap, Askelon mutuku talilamuknye ap, Kat mutuku talilamuknye ap, Ekron mutuku talilamuknye ap, sik winibuka nang, amutuku talibuka ulamik.

⁴ Aning atouk bukni, outam (ara selatan) ulul mutuku ara, aning babye, tuba dopropmanto ulule. Aning babye, sik Kanaan yala ninye arye, taleamikce ulamik. Ton tam ara, Meara mutuku ton aulul bukni, amutuku tuku ara, sik Sidon yala ninye arye, talibuka ulamik. Anyapce dipdongobuka, binamuka ani, Afek mutuku ton aulule. Anyapce ubuka otam ara, sik Amori yala ninye arye, talibuka ulamik mutuku, amutuku wililongolamikak aulule.

⁵ Anyapce dipdongobuka, Gebal yala ninye arye, talibuka ulamik mutuku ton aulule. Amutuku arye dipdongobuka, eitam mutuku noutam bukni, keting panalyangan tam mutuku aulule. Ara, Libanon mutuku bukni, weik mutuku bukamukak, Hermon mutuku dam buk, utam mutuku ara, Bahal-Gad mutuku arye dipdongobuka binamuka ani, otam Hamat mutuku wekel bana ati, amutuku bisik balamikak uk aulule. Amutuku nirya babye, dopropnamake.

⁶ Ara Libanon mutuku arye, dipdongobuka binamuka ani, Misrefot-Maim mutuku noutam nirya ap bukukak ara, otam unyak nang ara, sik Sidon yala nang nirya babye, narye dokwetepnamsinarya. Ara, na Allah arye, anggun Sidon yala nang nirya ati, amutuku dam arye dokwetepnamsine. Winipnyeura, na mapu Sirika, sik Israel yala nang arye, amutuku-amutuku nirya dopropnamake. Winapnamne ati ara, wini talak ara, ancuk, amutuku noutam aubuk tuku nirya ara, ance bokuka, na mapu koproba, sik Israel nang ati, bokdeipminyeura, sik mutuku koproba kipropnamake. Ara, min talak arye, anti akunum lake nyapdeiamkise touk, wininamlyame.

⁷ Ati ara, wini talak aryuk, atuku ara minpola bokmince, sik Israel yala nang kan-kan bukni, toupne barye yala nang ara, sik unamak sukum bobinuka deipnulyame. Atonun, ton tam ara, bokminyeura, sik Manasye yala nang bukni, wilipdobikirye, dana tam nang ara, sik unamakak ton, bokdeipnulyame. Winipminyopura, amutuku tuku ara, sik mutuku koproba kipdopnamake. Aning nirya ara, na Allah arye, na mapu koproba ati, sik pia talibuka daunamakak ati, amutuku nirya, bokuka arenamlyame. Allah arye Yosua biti, ayupu nirya nyabuk.

Keting panalyangan tam, Yordan mek koubuka, otam tuku bokamika ati, nyabuk yupu

⁸ Ura, sik Ruben yala nang ap, Kat yala nang ap, tonda Manasye yala nang weik, Yordan mek koubuka, keting panalyangan tam ulamik nang ap, sik nirya ara, sik ulamik mutuku nirya, sik kum talak arye, Musa birye tuku akunum bokdeibukba, dopdopmik. Ara, Allah Yahweh el pil melibuka donanye, Musa birye, Yordan mek koubuka, otam keting panalyangan tam ulamik nang ati, akunum bokuka areamuk.

⁹ Sik aninye doprobikce, ulamik mutuku ara, Aroer mutuku arye, dipdongobuka binamuka ani, osirya tam ara, Dibon mutuku dam ubuke. Ura, Aroer mutuku, ara Arnon mek duman bukni, kup-kup tam uamuk. Tonda, amek duman mutuku noutam uamuk asik dolamik ning ap doprobik. Ton ning ara, mutuku konak ara, Medeba mutuku arye, dipdongobuka, binamuka ani, Dibon mutuku dam biyuk mutuku ton nirya ara, bokuka arebuk.

¹⁰ Tonda atouk, Amon mutuku arye, dipdongobuka, binamuka ani, ninye deiyoknye Sihon, elda Amori yala nang taleamukce, Raja ulamuknye, elce minop talak dolamuk asik nirya babye, Amori yala nang ulamik mutuku noutam nirya babye, Yosua birye bokukabukce, Yordan mek koubuka, keting panalyangan tam ulamik nang ati arebuk. Sihon bira, sik Amori yala nang taleamuk talak ara, Hesyebon mutuku ulamuk. Elce taleamuk mutuku nirya ara, Yosua birye, bokuka arebuk.

¹¹ Aning atouk, Gilead mutuku ap, Gezur yala nang ulamik mutuku noutam ap, Maakha yala nang ulamik mutuku ap, weik bukamuk mutuku, Hermon mutuku ap, amutuku kon dana-dana tam uamuk tuku ap, tonda Basan mutuku noutam nirya, dipdongobuka osirya ara, Salkha mutuku ap binuka uamuk. Amutuku nirya ara, Yosua birye, bokuka arebuk.

¹² Tonda, ninye deiyoknye Raja Og, elce taleamuk mutuku nirya babye, Yosua birye, bokuka arebuk. Og bira, amutuku taleamuk talak noutam ara, Asytarot mutuku ap, Ederei mutuku ap, ulamukce, amutuku taleamukce ulamuk. Ura, minop talak ulamuknye, el si Ederei, elda Refaim yalanye ulamuk bukni, Musa birye, el tam nang nirya obuka, sirya dakukce, yakwetebukopura, sik nirya yukak binuka, ulamik bukni, el tonokuk tuba anyaka uk ulamukce, sik yala kelesiryanye ulamuk.

¹³ Ura, Musa birye, sik Refaim yala nang nirya, obuka sirya dakukce, yakwetebuk bukni, sik Israel yala ninye arye, yuk yala nang ton, kum olbiyik. Ara, Gesur yala nang ap, Maakha yala nang ap, sik Israel ninye arye, kum yakuka dopkwetebik. Ati ara, amutuku noutam ara, sik ap, Israel nang ap, neika ulamik. Tonda, abuku sekupu talak ara, sik ayala bitinye nang ara, Israel nang taleamik mutuku noutamuk tuba neika unyake.

¹⁴ Sik Lewi yala nang ara, Musa birye, tuku ton bokuka, kum arebukba, sikda ton kum doprobik. Deiyok ara, Allah Yahweh arye, Musa biti nyapdeiamuk. Ara, sik Lewi yala nang arye, dopropnamaka ning ara, Israel nang nirya arye, domba ato ninguk, obuka boyakirye, Allah Yahweh el arena ati, arelyanganamak ninguk dopropnamake. Arin ning ara, Allah el si erena ati, weik pala keil arye, taplakuka deiamikce, domik ning, el si mesba deice, uku sekuka dongolyangalamik talak ara, sik Lewi yala nang arye, mitik tonun ton, sekuka dolamik. Tuba bataklamik ning ara, mesba deice, uku dongolamikba, uku arye dilamuk. Lewi yala ninye arye, “Tuku ton adiparyuk kum arepnamlyame,” nyapdeibuk deiyoknye bira, Allah Yahweh ulule. Elce, Musa birye, “Lewi yala nang ati, winibuka bokuka arenamlyame,” nyapdeibuk. Sik Israel nang ati melilamuk Allah, elce Musa biti, ayupu nyapdeiamuk.

Ruben yala nang ati, Yosua birye, tuku bokuka arebuk yupu

¹⁵ Allah arye, nyapdeipmok touk, Musa birye Israel nang kan-kan bukni, Ruben birye deiamukba, dadeipdanin, yangalamik nang nirya bukni, sik mapu silip yuk-yuk ulamik touk, tuku ton bokuka arebuk. Winibuk talak ara, sik mutuku koproba kipropbike.

¹⁶ Sik Ruben yala ninye arye kiprobik mutuku ara, ani. Ara, Aroer mutuku ara, Arnon mek duman bukni, kup-kup tam uamuk ning ara, bokuka arebuk. Tonda, amek duman mutuku noutam dolamik asik ap doprobik. Ton ning ara, mutuku konak ara, Medeba mutuku arye dipdongobuka, binamuka ani, Medeba mutuku deice uamuk mutuku nirya ara, bokukabukce, tabakuka, arebukba doprobik.

¹⁷ Aning atouk, Hesyebon mutuku ap, tonda amutuku dam mutuku bukamuka, lu tam nirya ara, Dibon mutuku ap, Bamot mutuku ap, Bahal mutuku ap, Bet-Bahal-Meon mutuku ap,

¹⁸ Yaal mutuku ap, Kedemot mutuku ap, Mefaat mutuku ap,

¹⁹ Kiryatim mutuku ap, Sibma mutuku ap, Zeret mutuku ap, Hazahar mutuku ap, winibuka mutuku nirya ara, bokuka arebukba, talibuka ulamik.

²⁰ Tonda, Beed-Peor mutuku ap, Pisga mutuku bukni, amutuku bukamuka irikna tam ap, Bet-Yesimot mutuku ap nirya ara, Musa birye dobuka, Israel nang kan-kan noutam, sik yala yuk-yuk ulamik touk, bokuka arebuk.

²¹ Anyapce dukdongobuka, amutuku noutam ara, cang mutuku kon bukamuk mutuku, dipdongobuka, deice tam nirya ara, sik Ruben yala nanguk kipdobik. Ara, minop talak ninye deiyoknye, Raja Sihon, elce sik Amori yala nang taleamuk talak ara, Hesyebon mutuku ulamukce, taleamuk. Winilamuk bukni, Musa birye, el ap el amu tam pil dolamik ninye deiyok nang ap ati, mal olbalamukce, obuka, sirya dakuk. Raja Sihon el amu tam deiyok nang ara, ani. Ara, Midian mutuku ap, Ewi mutuku ap, Rekem mutuku ap, Zur mutuku ap, Hur mutuku ap, tonda Reba mutuku ap, amutuku ninye deiyok nang, sik nirya ara, Musa birye olamukce, sik taleamik mutuku nirya, alubuka doprobuk. Amutuku-amutuku nirya ara, Musa birye dokuka, Israel nang ati arebuk.

²² Tonda, amutuku noutam bukni, Israel yala ninye arye omiknye bira, Beor elce deiamuknye, el si Bileam ton oplobuk. Bileam bira, isa si erelamuka arye, isa mikip deice arye, aminyan upnamuk ning ati, yupu lake nyalamuk. Anye Bileam babye, amutuku noutam ulamik Kanaan tam nang weik tonun ton, sik Israel ninye arye, yu weik parang arye olamik.

²³ Yordan mek kin, anirye ubuka keting kumulban tam ara, sik Ruben yala nang, wilinak uamuk. Amutuku noutam nirya ara, Musa birye bokuka arebukba, sik Ruben yala nang ap, sik mapu silip ap, sikce deiamikba, dadeipdanin yangalamik nang ap arye, amutuku tuku nirya ara, sik tuku koproba kipdobik.

‘Gat yala nang ara, amutuku unamakʼ tenen, nukuk yupu

²⁴ Allah Yahweh arye, el mapu koproba, Israel nang nirya ati, “Amutuku-amutuku bokuka arepnamsine,” nyabuka, nyalin yupu deice arye nyapdeipmok touk, tuku dana-dana babye, Musa birye, ton bokuka, sik mapu silip neika ulamik touk, kat yala nang ati, tuku ton bokuka arebuk. Sik bokuka arebukba, Kat yala nang ara, sik mutuku dem kipdobik.

²⁵ Amutuku noutam nirya ara, sik Kat yala nang ara, Yaezer mutuku dorobikce, sik mutuku koproba kipdobik. Tonda, Gilead mutuku noutam, asik dolamik ning nirya ap, Amon yala nang minop talak taleamik mutuku nirya bukni, noutam arye bokukabikce, dana tam ara, bokuka arebukba, Kat yala nang arye doprobik. Tonda, amutuku noutam arye dipdongobuka, otam pera mutuku, Aroer mutuku dam uamuk. Sik mutuku wilinak ara, keting panalyangan tam, Raba mutuku dam ton arebukba, doprobik.

²⁶ Aning atouk, Hesyebon mutuku arye dipdongobuka, otam Ramat-Mizpa mutuku ap, Betonim mutuku ap, atouk Manahanaim mutuku tam arye, dipdongobuka, Lodebar mutuku wililamik sukum ap, amutuku noutam nirya ara, Musa birye, bokuka arebukba, sik Kat yala nang arye doprobikce, sik mutuku dem kipdobik.

²⁷ Tonda, ninye deiyoknye Raja Sihon, elce amutuku-amutuku taleamuk talak ara, Hesyebon mutuku noutam ulamuk. Amutuku ara, Musa birye doprobukce, mitik tonunuk, bokuka arebuk. Amek kup-kup ara, asik si Bet-Haram mutuku ap, atouk Bet-Nimra asik ap, Sukot asik ap, tonda Zafon asik babye, bokuka arebukba, Kat yala nang arye doprobik. Tonda, Kat yala nang arye, doprobik mutuku bukni, keting kumulban tam ara, Yordan mek ton ounmok bukni, amutuku wililamik, eitam (tonda utam) mutuku ara, weik mek kwen Galilea ton deiamuk. Anyapce dipdongobuka, otam keting panalyangan tam ara, wililamik mutuku ton uamuk.

²⁸ Amutuku noutam nirya ara, Musa birye, bokuka arebukba, sik Kat yala nang ap, sik mapu silip ap, sikce deiamikba, dadeipdanin yangalamik nang arye, amutuku tuku ap, weik asik uamuk ning nirya ap, anyasik dana-dana tam mitik asik nirya ap ara, Kat yala nang dem, sik mutuku koproba kipdobik

‘Manasye yala nang amutuku unamakʼ tenen, Yordan mek koubuka, otam keting panalyangan tam, arebukce nyabuk yupu

²⁹ Allah Yahweh arye, el mapu koproba, Israel nang ati, “Winibuka arepnamsine,” nyapdeipmuk touk, Musa birye bokukabukce, anang ati arebuk. Ara, Manasye yala nang nirya kum bukni, Manasye yala nang bukni, dana tam dem, Yordan mek koubuka, keting kumulban tam ulamik nang ati arebuk. Sik dana tam nang ap, sik mapu ap, sik mapu silip ap, sikce deiamikba, dadeipdanin yangalamik nang ulamik touk, Musa birye amutuku ton bokuka, sikti, arebukba, sik mutuku kipdobik.

³⁰ Manasye yala nang, dana tam nang ara, sik neika upnin banmaca ani, sukdongopnamik mutuku wilinak ara, Mahanaim mutuku arye, dipdongobuka, Basan mutuku ton bokuka arebukba, doprobik. Bashan mutuku ara, ninye deiyoknye, Raja Og, elce taleamuk mutuku uamuk. Tonda, aning atouk, Bashan mutuku noutam bukni, Yair mutuku ulamik ninye arye, dolamik asik nirya ara, bokeibukce arebukba, Manasye yala nang arye doprobik. Anyasik yupa ara, enam puluh (60) mutuku bokuka arebukba, sik mutuku koproba kipdobik. Amutuku-amutuku babye, minop talak, Raja Og, elce taleamuk.

³¹ Anirya dukdongobuka neik touk, Gilead mutuku ara, dana tam ton wilibuka bokeibukce, arebuk. Atonun, weik asik si Asytarot ap, tonda weik asik si Ederei ap, abitinye mutuku ara, ninye deiyoknye Raja Og, elce Basan mutuku babye taleamukce, amutuku-amutuku nirya, taleamuk. Amutuku noutam ulamik mutuku nirya ara bokuka, Manasye birye deiamuk mi, Makhir birye deibukba, dadeipdanin yangalamik nang, sikce delilamik yala nang bukni, dana tam yala ati, amutuku nirya, bokuka arebukba, doprobikce, sik mutuku dem kibik.

³² Aning laka nyabuka, sekupu ning nirya ara, Musa birye, Moab mutuku, lu ulamuk talak arye, amutuku-amutuku nirya ara, Musa birye bokdeibuk. Ara, weik asik domikce, Yeriko mutuku tam uamuk bukni, otam keting panalyangan tam, nirya dobuka bokdeibuk. Amutuku ara, Yordan mek koubuka, otam uamuk mutuku ara, Musa birye bokdeibukba, sik Israel ninye arye, dopdakuka, asukum dem asik dobuka ulamik.

³³ Bukni, sik Lewi yala nang ara, Musa birye, tonok tuku babye, ton bokuka kum arebuk. ‘Sik Lewi yala nang ati, sik unamakʼ tenen, ton dobuka kum areamuk arye, tuku ton kum dopromik. Deiyok ara, Israel nang nirya, kalikuka melilamuk Allah, Yahweh arye, sik Lewi yala nang ara, “Winipnamsena ati, tuku ton kum dopropnamlum bukni, naryuk anggun patan ning ara, pia arenamsine. Anggunce dopropnamlum ning ara, na deice,” nyabuka, nyalilamuk touk, Musa birye sik Lewi yala nang ati, tuku ton bokuka, kum arebukba, ton kum doprobik.