Yosua 11 - Eipomek

Yosua birye, ninye deiyoknye, Raja Yabin ap, el melibuka pil don nang ati, obukabukce, Kanaan mutuku alabuka, doprobik yupu

¹ Hasor mutuku taleamuk ninye deiyoknye, Yabin bira, Yosua birye, ninye deiyok nang weik obuk ning ara, yuk nang arye, “Se, sik Israel nang arye, Amori mutuku talibuka unyak ninye deiyok nang ara, pamubarye akunum obuka, sirya dakmake,” nyanmek yupu kekebuk. Sikce lake nyabikura, kekebukce, sikce nyanmek yupu, el Raja Yabin kekebukopura, Yabin elda, ‘Kume, sik Israel nang olbinamapʼ tenen, el melina ati, mutuku si Madon mutuku nang morona ati, ninye ton wibuka dopdeibukba, Madon mutuku ninye deiyoknye, Raja Yobab dam morolbiyik. Awipdeibuk touk, Simron mutuku ninye deiyoknye ap, tonda Akhsaf mutuku ninye deiyoknye ap ati, ninye ton wipdeibukba, morolbiyik.

² Aninguk kum bukni, sikda iknapye tam ulamik nang dam ton morolbiyik. Tonda, utam dabu tam mutuku, ara Yordan mek dalbalamuk mutuku, Galilea diprongobuka, utam mutuku ulamik ninye deiyok nang ton morolbiyik. Tonda, otam iknapye tam ulamik nang bukni, iknapye mutuku tam ulamik nang ati morolbiyik. Tonda, keting wekelban tam, mutuku si Dor mutuku dam bukni, weik laut mekwen kup-kup tam, dabu mutuku lu tam ulamik nang ati ton, morolbiyik.

³ Atonun, el ninye deiyoknye, Yabin birye, Kanaan mutuku otam, keting kumulban tam ulamik nang ap, Yordan mek otam, keting panalyangan tam ulamik nang ap, sik kekena ati, ninye ton wipdeibukce, nyabuk. “Anggun nirya yamunyeura, melipsumunyeba, nun nirya arye, Israel nang olbinamabe,” nyabuka morolbiyik. Ara, sik Amori yala nang ap, Het yala nang ap, Feris yala nang ap, Yebus yala nang iknapye tam ulamik nang ap ati nyabuk. Tonda, sik Hewi yala nang bukni, Hermon mutuku arye, outam ulamik nang, ara Mizpa mutuku noutam ulamik nang nirya, sik kekena ati, ninye ton wipdeibukba, laka nyabik.

⁴ Elce wipdeibuk nang arye, laka nyalbiyikba, kekebikopura, aninye deiyok nang nirya, sik melina ati, yin talin nang weika arye, nukmanto kum laut mek dala ulamle keil wenenga atonun, kibuka yayik. Yanganmek talak ara, kuda basam arye bobuka, tuku deice balamle ning, ‘kereta kudaʼ nyalamik ning ton, kintinibuka boyayik. Tonda, ninye olban nang arye, kuda basam balye deice bukikirye, olbalamak ning ara, weika arye ton boyayik.

⁵ Sik aninye deiyok nang nirya ara, ‘Israel nang olbana ati, neika ansinibuka olbinamabeʼ tenen, biyik. Tonda mitik mek, Merom mek pudam yanuka, tenda aik tia ati dobik.

⁶ Winibikce, bulubuka neika wekikopura, Allah Yahweh arye, Yosua biti nyabuk. “Sik ti, an ilil una pia meme,” nyabuk. “Ambusum ara, awinipmal touk winipnamle. Dipkoprob, na Allah arye, aninye nirya ara, na si deice arye, anang nirya opnyopura, anggun Israel nang ati arepnamasine. Anggunce, anang obuka sirya daknamalume. Tonda, sik bukikirye ninye olbanyak kuda ara, ‘Yuk tam ton sakuka bicakʼ tenen ati, akuda basam kutam, amu tam milmil bulupnamlulume. Tonda, kereta-kereta ninye olanamace talak, bukikirye banyak ning nirya ara, dobuka, uku dapmunyeba, uku arye dipnamlule,” nyabuk.

⁷ Nyabukura, adiparyuk Yosua ap, el yin talin nang ap nirya, sik mal olan nang ati, bikna kum talak arye, mitik mek Merom mek pudam biyik. Merom mek pudam biyikopura, adiparyuk Yosua ap, el yin talin nang ap arye, sik ninye deiyok nang nirya ap, sik bulubuka yanganmek nang ap ati, mikip arye olbiyik.

⁸ Winibikura, sik ni Allah Yahweh arye, el mapu koproba Israel nang ati, mikip weik arebukba, sik mal olan nang ati olbiyik. Israel nang arye obuka, sikce dobolbanmeka ani, pia pera mutuku Misrefot-Maim mutuku ap, Sidon mutuku dabu tam ap, binuka bataklobik. Tonda, pia pera mutuku Mizpa, lu mutuku bukni, keting panalyangan tam biyik. Tupa pia opdanin banmeka ani, tonoknye babye, ton kum batikik. Anirya obuka sirya dakikura, nirya dibik.

⁹ Yosua birye, sik aninye nirya ati, Allah Yahweh arye nyapdeipmok touk, akunum winibuk. Winibukopura, Yosua birye el mal olan nang, sik ning kuda yan amu tam parang ya arye, milmil moubuka, akuda basam asukum batakukce, sik ninye olbana ati kereta ara, ninye buknarye olbalamik ning nirya ara, uku dongobuka, sirya dakuk.

¹⁰ Aning nirya, akunum winibukopura, Yosua tamubuka yayuk. Yosua tamubukura, bisik banmoka ani, Hasor mutuku yanuka doprobukce, amutuku ninye deiyoknye ton, parang ya arye oplobuk. Atalak ara, Kanaan mutuku nirya ara, asukumuk ulamikce, ninye deiyok nang weik tonun ton aulamikce, ninye deiyok nang talibuka, bun ning mutuku nirya awamuk bukni, Hasor bira, mambul weik mutuku uamuk.

¹¹ Amutuku ton obuka sirya dakukce, akunum doprobuk. Winibuka akunum doprobukopura, Hasor mutuku noutam ulamik ninye deiyok Raja nang ap, amutuku ulamik ninye nirya ara, obikce sirya dakik. Tonoknye babye, ton batakikba, kam ton kum ubik. Winibikopura, Hasor mutuku noutam weik asik dolamik ning ara, uku dongobukba, uku arye dibuk.

¹² Tonda, amutuku noutam talibuka ulamik mutuku nirya ara, Yosua birye doprobuk. Winibukopura, amutuku talibuka, ninye deiyok nang nirya babye, tomona uk ubuk. Winibuka tomobukce, Allah Yahweh el pil donanye, Musa birye nyapdeipmok touk, aninye nirya ara, parang ya arye, obuka sirya dakuk. Tonoknye babye, pia ton kum batakik.

¹³ Bukni, amutuku-amutuku nirya ara, mutuku dup arye, mitik aubuk ning uku kum dongobike. Ara, Israel ninye arye, tonok ning babye, uku kum dongobike. Bukni, Yosua elcuk Hasor mutuku ara, uku dongobuk.

¹⁴ Ura, amutuku-amutuku nirya aulamik noutam nirya ara, aulamik nang ara, parang ya arye obuka, sirya dakik. Tonoknye babye, pia ton kum batakik. Bukni, sikce, ‘Aninye batakmek bona ara, na ning koprobaʼ tenen, sik bona yala-yala nirya ap, Kanaan mutuku ulamik nang arye, weilamik domba basam ato ning ap nirya ara, Israel nang arye dobuka, sik ninguk kipdobike.

¹⁵ Allah Yahweh arye Musa biti, “Aning ara, ton winipnamlulume. Aning ton winipnamlulume,” nyabuka, arukamuk ning nirya ara, Allah Yahweh el pil donanye, Musa birye Yosua biti, lake nyapdeibuk. Nyabukura, Yosua birye anyabuk touk winibuk. Allah Yahweh arye, Musa biti nyabuk ning nirya ara, tonok ning babye, ton batakna kumce, anyapdeipmok touk, anirya ara winibuk.

Yosua birye, alabuka doprobuk mutuku ati, nyabuk yupu

¹⁶ Yosua birye, amutuku noutam nirya ara, iknapye tam nirya, doprobuk. Atonun, amutuku taram tam ap, tonda utam dabu tam Negeb mutuku ap, anyapce ubuka, iknapye tam ap, atouk Gosyen mutuku ap, tonda pata mutuku bukni, pata mutuku eitam, Israel mutuku iknapye tam ap, tonda Israel mutuku dam dabu tam ap, Yordan mek duman tam ap ara, Yosua birye, anang nirya obuka, sirya dakukce doprobuk.

^17-18 Amutuku noutam pala nirya ara, Gundul mutuku dam, otam iknapye dam tam, anyapce ubuka, outam selatan mutuku, Edom mutuku dam ap, anyapce ubuka, utam dabu tam ara, pia pera mutuku Libanon lu mutuku noutam uamuk mutuku, Bahal-Gad mutuku ap, anyapce ubuka, diprongobuka, otam iknapye tam mutuku, el si Hermon mutuku ap ara, weik tonun pala weik uamuk mutuku nirya ara, obuka sirya dakukce, doprobuk. Minop talak ara, dorapce dipdongobuka, keting tamun weik tonun, Yosua birye amutuku noutam talibuka, ulamik ninye deiyok nang nirya ara, el ap olana uk ulamik bukni, adiparyuk winilamuka ani, sirya ara, sik anang nirya, Yosua birye aninye deiyok nang nirya atouk nang, tonda tomobukce, adiparyuk anang nirya obuka, sirya dakuk.

¹⁹ Amutuku-amutuku nirya ulamikce, talilamik pala mutuku noutam nirya ara, tonok tam nang babye, Israel nang ati, ‘Aning ara, nun kayapu nang koprobaʼ tenen, “Teleb kibuka neika unamabe. Walana babye, pia kum unamabe,” nyabuka, nyalin yupu deice arye, kum nyalalamik bukni, Gibeon mutuku noutam ulamik nang, ara Hewi yala nang ulamik nang ara, sikda, ‘E, nun kayapu nang koproba,’ tenelamik. Bukni, yuk-yuk mutuku nirya ara, Israel ninye arye, amutuku nang olalamik talak arye, amutuku ulamik nang nirya ara, obuka sirya dakikce, sik mutuku tuku nirya dorobikce, talibuka ulamik.

²⁰ Tonda, awinibuk ning ara, talye ati kume. Deiyok ara, Allah Yahweh arye, ‘Israel nang ap, Kanaan mutuku noutam unyak nang ap, olana uk upnamak,’ tenebuka ati, sik Kanaan tam ulamik nang ara, sik talima mikip kipbukce arebuk. Winibukba, sikce amutuku-amutuku nang nirya ara, mikip ubuka yu ubukce, ‘Israel nang obuka sirya daknamabe,’ tenebikce, pirilelamik. Bukni, Allah Yahweh arye, Musa biti nyabuk ning ara, ‘Sik ap, amutuku noutam unyak nang ap ara, na kayapu nangʼ tenen, bico tenena pia kum aryuk, “Aninye nirya obuka, sirya daknamlume,” nyapdeipmok touk, anang nirya obikce, kum kipdeibik. Ara, Yahweh arye, Musa biti, “Winipnamlyame,” nyabuk touk, winibuka ati, Allah arye melibukba, Israel nang arye, amutuku ulamik nang nirya, ona uk ulamika ani, sirya dakik.

²¹ Atalak aryuk, Yosua birye, ninye si Ainakin nang, tonda Enak nang nyalamik ning ara, amutuku noutam ulamik ati, amutuku biyukce, aninye obuka, kum kipdeibuk. Ara, pala weik mutuku el si ara Raksasa, deiyok nyalamik mutuku ara, iknapye tam nirya, Hebron mutuku ap, Debir mutuku ap, Anab mutuku bukamuk noutam nirya ap, tonda Yudea noutam iknapye mutuku ulamik nang nirya ap, Israel tam iknapye mutuku ulamik nang nirya ap, Yosua birye, amutuku-amutuku nirya binuka olbiyuk. Sik amutuku noutam ulamik nang nirya ara, Yosua biryuk obuka, sirya dakuk. Tonda, sik talibuka ulamik weik asik dolamika nirya babye, kum kibikce, sirya dakuk.

²² Winibuk talak ara, tonoknye babye, Israel nang ulamik mutuku noutam ara, Enak mutuku nang ton, obikce sirya dakik ati, tonok ton kum batikik. Bukni, Kat tam noutam, mutuku si Gasa mutuku ap, tonda, mutuku si Asdod mutuku ap, asukumuk sirya ton batakikba, Ainakin (Enak) nang mitik tonun tuba aulamik.

²³ Yosua ap, el yin talin nang ap, sik Israel nang ap, amutuku-amutuku nirya binuka obukabikce, doprobik talak ara, yuk-yuk nang Kanaan tam noutam daulamikce, talibuka ulamik mutuku noutam nirya ara, doprobik. Ara, Allah Yahweh arye, Musa biti, “Winipnamlyame,” nyapdeiamuk touk, Yosua ap, el yin talena nang ap, sikcuk amutuku nirya doprobik. Winibikopura, dobuka sik Israel nang yala-yala nirya ati arebukba, sik mutuku koproba kipdobik. Adeiyok mutuku nirya ara, doprobikirye, asukumuk pia daunamake. Tonda, amutuku-amutuku yuk-yuk, Israel yala nang ulamik touk, yala yuk-yuk bukni, yala tonok-tonok kibuka bokdeibik. Israel mutuku noutam nirya, kanye deibuka teleb asa, ninye olbana kumce, amutuku noutama uk ulamik.