Yosua 10 - Eipomek

Israel ninye arye, Amori ninye obik talak winibuk ning ati, nyabuk yupu

¹ Yosua ap, el mapu Israel nang ap arye, Yeriko mutuku ninye ap, sik deiyoknye ap, opmeka atonun, Ai mutuku ninye ap, sik deiyoknye ap, yanuka obuka sirya dakik. Winibikba, yuk nang arye, aning nirya lak nyabikura, Yerusalem mutuku talibuka ulamuk ninye deiyoknye, el si ara Adoni-Sedek birye, kekebuk. Tonda, Gibeon mutuku ninye ara, ‘Israel ninye arye olyasicak’ tenen, ‘Sik ap, nun ap, oldana kum diparyuk, teleb ubuka, neika unamabe’ tenen, Israel nang ap, Gibeon nang ap, yupu lipsisikuka, moupdeipdayik. Winibikopura, Gibeon ninye arye, Israel ninye wekmek damuk yanuka unmek. Aning winibik ning nirya ara, yuk nang kekebikce, Adoni-Sedek biti, laka nyabikba, kekebuk.

² Yerusalem mutuku ninye deiyoknye ap, el amu tam ulamik ninye ap, aning nirya kekebikopura, weik ilil ubuk. Ilil ubuk ning deiyok ara, Gibeon mutuku bira, weik asik dolamik mutuku atia. Tonda Gibeon mutuku ara, mitik mutuku kuma. Yerusalem mutuku ninye deiyoknye birye, taleamuk mutuku atonun ubuk. Ai mutuku ara, mitik weik mutuku bukni, Gibeon mutuku ara, pia weik koprop mutuku. Gibeon mutuku noutamak ulamik nang ara, weik kel deice arye, ninye mal olan nang ulamik. Atalak ara, sik Gibeon mutuku ninye ara, Israel ninye ap, neika unmeka ati, Adoni-Sedek ap, el mapu silip ap, ilil weik ubuk.

³ Yerusalem mutuku taleamuknye, Adoni-Sedek bira, Gibeon mutuku ninye ati, ilil weik ubukopura, yuk ninye deiyok nang dam, yupu dongobuka nyabuk. “Anggun nirya arye, yanuka melipnamnulume,” nyabuk. Sik yuk mutuku ninye deiyok nang si ara, ani. Hebron mutuku taleamuk deiyoknye, Sisinanye Raja Hoham ap, Yarmut mutuku taleamuk deiyoknye, Raja Piream ap, Lakis mutuku taleamuk deiyoknye, Raja Yapia ap, Eglon mutuku taleamuk deiyoknye, Raja Debir ap, sik nirya ati ayupu nyapdeibuk.

⁴ Yerusalem taleamuknye birye, aRaja nang nirya ati, yukubuk. “Gibeon mutuku ninye arye, Yosua ap, Israel nang ap, olana kumce, ansinibuka neika unmake. Ati ara, wini talak anggunda, na dam yanuka melipnumunyeba, Gibeon nang olbinamabe. Ara, Gibeon ninye ap, Israel ninye ap nyapdeipdakirye, ‘Ansinibuka, olyasicak,’ tenepmana ati nyapne,” nyabuk.

⁵ Nyabukopura, sik Amori tam taleamik ninye deiyok nang, Raja pangubarye nang nirya arye, kekebikce. Ara, Yerusalem mutuku taleamuk Raja ap, Hebron mutuku taleamuk Raja ap, Yarmut mutuku taleamuk Raja ap, Lakis mutuku taleamuk Raja ap, Eglon mutuku taleamuk Raja ap, kekebikce, adeiyok nang nirya ap, sik yin talin nang nirya ap, ‘Gibeon ninye nirya, obuka sirya daknamap’ tenen, Gibeon mutuku dam kintinibuka bulubikce, biyikopura, Gibeon mutuku ninye ara, obuka sirya dakik.

⁶ Winibikopura, Gibeon ninye arye, Yosua ap, el mapu silip ap, Gilgal mutuku unmekak nyalbiyik. Sikce nyabik, “Nunda, anggun amu tam unyap ninye ati, kum bataknamsilyame. Anggunce nunti, minop melilyasumunce, lyepnamsulume. Sik Amori tam deiyok nang nirya ap, sik yin talin nang nirya ap arye, tabakukabikirye, sik mutuku arye koulukuka yakirye, nun olyanamsiyaka ati, kintinipmake,” nyabik.

⁷ Nyabika ati ara, Yosua ap, el mapu silip ap, Gilgal mutuku unmeka kekebikce, el ap, el pia teleb yin talin nang nirya ap, mikip arye, mikip kibukba, Gilgal mutuku batakuka, sik Amori tam ninye olbana ati, kintinibuka bisik biyik.

⁸ Winibikopura, Allah el si Yahweh arye, Yosua biti nyabuk. “Anggunce, Amori tam ninye ati, ilil una meme. Narye, aninye dobuka, anggun taruk noutamak akunum deipsine. Ara, na mikip anggun nong deice deipsinyopura, aninye nirya obuka, sirya daknamlume. Narye melipsinyopura, sik aninye arye, tonoknye babye, an mapu silip ati, kum opnamsiyake,” nyabuk.

⁹ Allah arye, nyabukopura, Yosua el mapu silip ap, Gilgal mutuku arye mikip deibikce, alukunyan noutamak arye bisik banmeka ani, alukunyanuk, Gibeon mutuku dam biyik. Sik biyik talak ara, Amori tam ninye ara, talye mangkau kanye bobuka unmekce, kum tenepmekbuk, Yosua el tam nang arye, sik nirya talye karin arye, Amori tam ninye dam olbiyik.

¹⁰ Olbiyik talak ara, Allah el si Yahweh arye Amori tam ninye ati, walwal kanye bona ap, kanye bokoltona ap, weik arye arebukba, kanye moubuka tenepmanto kum ubik. Winibikba, Israel nang yayikce, Amori nang nirya ati, obuka sirya dakik. Gibeon mutuku noutam Israel ninye arye, Amori nang ati, weik obik. Obikba, Amori ninye ton, bikbik abuka biyikce, dipnin banmekba, Israel nang arye, sik aminyan tam bikbik abuka, yanganmekce, aninye weik arye ton, Bet-Horon mutuku bisik arye obik. Tonda, tuba opnin yanganmeka ani, amutuku noutamak bukni, otam mutuku opnin banmeka ani, mutuku si Aseka mutuku ap, Makeda mutuku ap, aninye olbiyik.

¹¹ Israel ninye arye aninye dobolbanmikba, ‘Aseka mutuku binuyap’ tenen, Amori nang arye, Bet-Horon mutuku arye, bikbik abuka, koulukuka banmek bukni, Allah el si Yahweh arye, weik mok purwu, im deice arye, keil duk atonun dopkwetebukba, sik banmek damuk sakukce, Amori tam ninye pia weik arye, obukba dibik. Tonda, Israel ninye arye, sik ya bobukabikce, Amori ninye mitik tonun obik bukni, Allah arye weik mok purwu dopkwetebukba, obuk ning ara, pia weik arye, obukba dibik.

¹² Allah el si Yahweh arye el mikip Israel nang deice deibukce, Amori ninye ati, dobuka arebukba, Israel ninye arye, anang obuka sirya dakik. Sik olbiyik sum ara, Yosua birye, Israel ninye kekenmeka arye, Allah el si Yahweh ati nyabuk. “Se, Gibeon mutuku noutamak aunmaka deice tam arye, keting baploptuba, dotalak kum wekelbinamale. Aning atouk, Ayalon mutuku noutamak ara, wala babye baplobuka, tonokak uk upnamale,” nyabuka, Allah ati morobuk.

¹³ “Nyabuka moropsa ati, Allah el si Yahweh arye arebukba, keting baplobuka tikamokce, pola kum wekelbinmok. Tonda, lukunyan ara, wala babye asukumuk tikmokce, kum kumamuk. Asukumuk tikmokbuk, Israel ninye arye, sik Amori ninye ati, olanmika ani, obuka sirya dakik. Winibikopura, keting ap, wala ap, tuba tamubuka tonap mitang upmoka ani, wekelbirik.” Yosua arye nyabuk. ‘Tonda awinibuk ning nirya tenipnamap’ tenen, tonoknye, el si ara Yasar, el buku noutamak sekeipsuk. Elce sekeibuk yupu ara, ani. Asum ara, keting weleyanganmoka ani, keting duk-dukan karin asukumuk upmoka ani, asukumuk baplobukce, kum ubuke. Tuba tamubuka, tonap bana kum, asukumuk upmoka ani, tuba tonap banmoka ani, otam wekelbalamle touk, wekelbiyukba, inibukce kunukuk.

¹⁴ Asum arye winibuk ning ara, minop talak arye diprongobuka, wini talak noutamak nirya, pia kum winilamuk. Aning ara, Israel ninye ap, Amori ninye ap, olanmek talakuk winibuk. Ara, Yosua birye, ‘Naio aning adiparyuk winipsutume,’ nyabuka morobuk touk, adiparyuk Allah el si Yahweh arye, talye tukwaknye bukni, Yosua moropmok touk, kekebukce winibuk. Atalak tonok aryuk winibuk. Winibuk ati ara, nun kele, atalak ara, dipkoprob Allah el si Yahweh arye, Israel ninye ati weik arye melibukba, sikce Amori ninye obuka, sirya dakik.

¹⁵ Yosua ap, el mapu yin talin nang ap nirya arye, Amori tam ninye obuka, sirya dakikopura, tamubukabikce, sik doltakna cang kain aik, Gilgal mutuku ulamikak, tamubuka biyik.

Yosua birye, Amori nang, sik deiyok nang pamubarye obuk yupu

¹⁶ Bukni, Amori yala nang, sik deiyok nang pamubarye, Raja nang bura saka biyik. Makeda mutuku keil deiya pum tam, binuka duknupmek.

¹⁷ Binuka duknupmikce, mapmekbuk, yuk ninye arye, akunum eipmeka ati, “Makeda mutuku keil deiya pum tam, asukumuk duknupmake,” nyabuka, Yosua dam lake nyabik.

¹⁸ Binuka laka nyabikura, Yosua birye nyabuk, “Akeil deiya pum tam, wekmak sukum ara, weik keil arye, kurukuka bongop dongopmunba, akeil deiya bublan, tirik dongopnamlume. Winipmunyopura, yuk nang ton wipdeipmunyeba, akeil deiya dam kalikil binamake,” nyabuk.

¹⁹ Bukni, anggun aunmalum nang, akeil deiya dam una meme. Nun mal olan nang ton, batakalongona meme. Nun mal olan nang ati, pia piribuka dobolbanamlume. Wininmamunya ani, adiparyuk bikbik abuka, dobolbimunce, anggun mal olan nang ara, sik aminyan tam dobolbimunce, olbinamlulume. Tonda, anggun mal olan nang ara, ‘Sik mutuku koprop tamubuka bikirye, sik asik domikak bindobicakʼ tenen, moubuka dinamalulume. Batakna kumce, anang nirya obuka, sirya daknamlume. Tonoknye babye, kum bataknamlume. Aning ara, talye ati kum nyapsine. Deiyok ara, Allah Yahweh el mikip anggun deice akunum deipmasil ati, anggun taruk deice aryuk, anggun mal olan nang nirya opnamlume,” nyabuk.

²⁰ Anyabuk touk, Yosua ap, sik Israel nang ap arye, Amori yala nang onmek talak ara, sik ninye aonmek kan-kan noutam arye, tonok-tonok nang ton, loplobuka bikbik abuka biyikba, daepra banmeka ani, mikip dobuka, amutuku nang nirya obuka, sirya dakik. Bukni, aninye mitik tonun aryuk, sik minop talak, weik asik domik sukum ara, pala weik keil yangapdeiamikce, cang poka arye dobuka, antanap dongamika ati, anang ara, anyasik akunum binuka wekikura, opman kum ati batakik.

²¹ Winibik ati, Yosua el yin talin nang nirya ap, sik Israel nang nirya ap ara, tamubuka, Yosua el unmokak, Makeda mutuku dam, sik tenda bol aik domikak, tamubuka yayik. Israel nang arye, Atam nang weik tonun opmeka ati, amutuku noutam nirya ara, tonoknye babye ton, sik Israel nang ati, malye kibuka, yupu mikip arye, pia ton kum nyabik. Yupu tapman kum ati, urdem wekik.

²² Israel nang, sik tia ati tenda, bol arye dopmek aik, tamubuka biyikopura, Yosua birye nyabuk. “Wini talak ara, akeil deiya pum tam, weik keil arye, kurukuka bublan tirikkdongopmaka ara, kuklulume. Kukeipmunyeba, sik pamubarye Raja nang aunmaka ara, dobuka na dam boyalulume,” nyabuk.

²³ Nyabukopura, elce nyapdeipmok touk, akeil pum tam tirikdongopmek ara, kamubuka kukeibikce, aninye deiyok nang pamubarye, doprobik. Doprobikce, ninye deiyok nang Raja ara, ani. Yerusalem mutuku deiyoknye Raja ap, Hebron mutuku deiyoknye Raja ap, Yamut mutuku taleamuk Raja ap, Lakis mutuku taleamuk Raja ap, Eglon mutuku deiyoknye Raja ap, sik nirya ara, akeil pum tam wekuka, tomobuka boyayik.

²⁴ Aninye deiyok nang nirya ara, akeil pum tam arye, dobuka boyayikopura, Yosua el damuk boyanuka deibik. Winibikopura, Yosua birye Israel nang nirya ati, “Bulubuka yalulume,” nyabukba bulubik. Akunum bulubikopura, Yosua birye, “Winiplulume. Sik anang akunum obuka, sirya dakmaluma ati, laka kina ati ara, sik ngang deice yaniptaplulume,” nyabukba, el ap melibuka mal olalbinmek yin talin nang nirya yayikce, apamubarye ninye deiyok nang, sik Raja-Raja nirya ara, sik ngang yan yaniltanmek. Israel nang ap, yin talin nang nirya ap arye, ‘Anang akunum obuka, sirya dakapeʼ tenen, Raja nang pamubarye nirya, sik ngang deice yaninauk unmek.

²⁵ Aning nirya akunum winibikopura, Yosua birye yin talin nang ap, Israel yala nang nirya ap ati, nyabuk. “Anggun ilil una ap, aning, ‘Kum winiptibyeʼ tenen, talima bokoltona ap ara, kum winipnamlume. Dipkoprob anyapmasin touk, ‘Nun mikip dip arye winipnuyabe,’ tenebuka, kanye mikip arye, tenilena kumce, winipnululume. Ara ani. Anggunce Raja-Raja nang ati, sik ngang deice yanipmalum touk, Allah Yahweh, mikip weik deice arye melipsiliba, anggun mal olan nang nirya ara, obuka kum daneipnamalulume,” nyabuk.

²⁶ Ayupu nirya nyapdeibukopura, Yosua birye aninye deiyok nang, sik Raja-Raja nang pamubarye nirya oplobuk. Apamubarye Raja nang nirya obukabukce, sik nong dobuka, tapu koubuka, amutuku tikamuk yo pamubarye, yo taramak tapu kitiplopmoka ani, keting kumupnuyuk talak ara, sik anang nong, tapu kitipmok ara, ila tamubuka lopdeibuk.

²⁷ Keting akunum kumubukopura, atalak Yosua birye, “Winiplulume,” nyapdeibukba, sik Israel nang arye, sik Raja-Raja pamubarye nang, sik nong dobuka, akeil deiya pum tam duknupmek sukumuk, bobinuka dongobuk. Tonda, akeil deiya bublan dam ara, pia weik keil arye, kurukuka deipmeka ani, akeil deiya bublan tirikdongobik. Akeil ara, atalak arye dipdongobuka, danoutam talak nirya awamuka ani, abuku sekik talak babye, tuba aubuk.

²⁸ Ati ara, asum noutam arye, Yosua birye, Makade mutuku nirya warikuka onmeka ani, obuka sirya dakukce, atam tuku nirya ap, amutuku uamuk ning nirya ap, doprobuk. Amutuku ulamik nang nirya ap, sik amutuku nang taleamukce, ninye deiyok kibuka, Raja ulamuknye ap ara, obuka kum danaibuk. Yosua birye nyapdeibukba, el tam nang arye, amutuku nang nirya, yu parang arye, obik. Makeda mutuku taleamuk, sik deiyoknye Raja babye, Yosua birye Yeriko mutuku taleamuk ninye deiyoknye biti, min arye oplomuk touk, Makeda Raja babye, awinyamuk touk, winibuka obuk.

Yosua birye, Amori mutuku nang ton, weik tonun olbalamuk yupu

²⁹ Aning nirya akunum winibikopura, Yosua ap, el yin talin nang ap nirya ara, mikip weik kibikce, Makeda mutuku dam bukni, Libna mutuku biyik. Biyikce, Libna mutuku binuka warekik.

³⁰ ‘Amutuku noutam ulamik nang nirya ara, opnuyakʼ tenen, Allah Yahweh el mikip dobuka, Israel nang sik deice deibuk. Ara, ‘Amutuku deiyok nang ap, amutuku ulamik nang ap, obikirye, sirya daknamakʼ tenen mikip arebuk. Allah mikip arebukba, Yosua ap, el yin talin nang nirya arye, amutuku ulamik nang nirya, parang ya arye obik. Tonoknye babye, kum batakdongobik. Amutuku noutam ulamik nang nirya, kum danaibik. Amutuku taleamuk deiyoknye, Raja Libna babye, Yosua min arye Yeriko mutuku Raja omuk touk, obuk.

³¹ Winibuka obikopura, Yosua ap, Israel yin talin nang ap nirya ara, Libna mutuku arye batakuka, bisik banmeka ani, Lakis mutuku biyik. Sik amutuku biyikce, ‘Lakhis mutuku nang bura saka bicakʼ tenen, amutuku asik dana-dana nirya warikuka kalikmekce, amutuku nirya warikuka obikce, malye kiplobik.

³² Ara, Allah Yahweh arye, ‘Israel ninye arye, Lakis mutuku nang opnuyakʼ tenen, el mikip dobuka, sik Israel nang nong deice deibuk. Yosua birye, amutuku warekuka, olbiyuk talak winibuk ning ara, like bitinye sum arye winibuk. Ara, amutuku noutam ulamik nang ap, Libna mutuku uamuk ning nirya ap ara, parang ya arye obukce, kum kipdeibuk. Tonda, Libna mutuku winyamuk touk, Lakis mutuku babye, atouk winibuk.

³³ Ura, Lakis mutuku tuba onmek talak ara, yuk mutuku nang, awininmek ning ati, Gezer mutuku taleamuka deiyoknye, Raja Harmon birye, el ap, el yin talin nang ap arye, ‘Lakhis mutuku nang melipnuyapʼ tenen, yanmek. Bukni, Yosua ap, el yin talin nang ap nirya arye, adeiyoknye ap, el yin talin nang ap nirya ara, oplobik. Tonoknye babye, ton kum batakik.

³⁴ Amutuku ninye nirya obikopura, Yosua ap, el yin talin nang ap, adiparyuk dukdongobuka, Lakis mutuku dam bukni, Eglon mutuku warikil biyik. Tonda, ‘Sik amutuku nang bura saka bicakʼ tenen, amutuku asik dolamika, kup-kup tam nirya, warikuka kalikmekce, amutuku ulamik nang nirya ara, parang ya arye, oltakna uk unmek.

³⁵ Amutuku warikil binmek sum aryuk, Eglon mutuku warikukabikce, amutuku noutam ulamik nang nirya ara, parang ya arye obikce, kum daneibik ning ap, obik ning ap ara, Lakis mutuku winipmek touk, winibik. Ninye tonok ton, kum batikik. Anirya obuka, sirya dakik.

³⁶ Eglon mutuku noutam akunum obikopura, Yosua ap, el yin talin nang ap, sik Israel nang nirya ap, amutuku tam arye, welebikce, Hebron mutuku biyik. Biyikopura, ‘Amutuku nirya ara, obuka sirya daknuyabʼ tenen, warikil biyik.

³⁷ Amutuku binuka warikuka obikopura, amutuku talibuka ulamik nang ap, ninye deiyok nang Raja ap, amutuku ulamik nang ap, amutuku ulamuk ning, yala-yala nirya ap, tonda amutuku arye taleamikba, ulamik deiyok nang Raja-Raja ap, tonda yuk mutuku mitik asik dolamikak nirya babye, yuk mutuku nirya, amutuku noutam ulamik nang nirya babye, anirya obuka kum danaibik. Yosua birye, amutuku nang nirya, parang ya arye obukce, kum kipdeibukopura, min arye Eglon mutuku opmokce, winyamuk touk winibuk. Tonoknye babye, ton tamubuka kam kum bukamik. Anirya diamik.

³⁸ Akunum winibikopura, Yosua ap, Israel yin talin nang ap, Israel nang nirya ap arye, tamubuka yayikce, Debir mutuku warikuka olbiyik. Amutuku nirya babye, obuka sirya dakik.

³⁹ Amutuku nang ap, sik ninye deiyok nang ap, amutuku uamuk ning nirya ap, amutuku arye taleamikba, ulamik mutuku nang nirya ara, parang ya arye obuka, sirya dakik. Yosua birye, Debir mutuku ulamik nang nirya ap, amutuku nang nirya ap, obuka ara, Hebron mutuku ap, Libna mutuku ap, Libna mutuku ninye deiyoknye ap, sik nirya obuka sirya dakmek touk, Debir mutuku ulamik nang ap, sik ninye deiyoknye ap ati, atouk winibik.

⁴⁰ Ura, winilamuka deice arye, Yosua birye, amutuku noutam ulamik nang nirya ara, akunum obuka sirya dakuk. Ara, ninye deiyok nang Raja-Raja babye, oltaknauk ubuke. Ara, Negeb mutuku, mek pu sukum ati, weik mutuku ap, mutuku bumang deice ap, amutuku taram kanimna uamuk mutuku ap, tonda amutuku noutam ulamik nang nirya ap, otam ulamik nang ap, tonda amutuku-amutuku noutam keting kumulban tam, eitam ulamik nang ap nirya ara, obik. Tonoknye babye, ton pia kum batakik, anirya obik. Ara, Israel nang talibuka ulul Allah, sik ni Yahweh arye, “Winipnamlyame,” nyapdeibuk touk winibik.

⁴¹ Yosua birye, amutuku-amutuku nirya akunum obuka ara, Kades-Barnea mutuku eitam arye dipdongobuka, Gasa mutuku dabu tam ap, Gosyen mutuku nirya ap, amutuku nirya ap, diprongobuka, utam Gibeon mutuku nirya ara, obuka sirya dakuk.

⁴² Yosua birye, tonok talak aryuk, amutuku noutam nirya ara, biyukce obuka ara, ninye deiyok Raja-Raja nang ap, sikce talilamik nang ap nirya ara, biyukce obuk. Israel nang nirya arye, amutuku noutam ulamik nang obik. Ara, sik mikip deice aryuk kume. Sik ni koproba Allah Yahweh arye, melibukce, el mikip sik Israel nang deice deibukba, obuka sirya dakik.

⁴³ Anirya akunum winibikopura, Yosua ap, el yin talin nang nirya ap ara, sik Israel nang nirya, adiparyuk tamubuka, sik mutuku koproba, Gilgal mutuku uk, tamubuka yayik. Ara, sik tenda arye memebuka dolamik aik domik sukumuk, tamubuka yayik.