Yohanes 10 - Eipomek

Yesus domon yupu deice arye, Domba Weina Deiyoknye ap, domba ap ati, nyabuk yupu

¹ Yesus arye ayupu nyabuk. “Dipkoprop nyapsine. Yatanye do nirya, domba basam poka buplan bisik kum bukni, duknubuka, yukak arye domba poka pum bisik wekelinye bira, ubula donanye ulule. Malye nang arye yuk nang ning dalubuka dololamak atonun ulule.

² Bukni, duknuna kumce, domba poka buplan bisikuk kukuka wekelinye bira, domba weina Deiyoknye ulule.

³ Anye birye, ‘Domba poka pum bisik weknun’ tenen, yalyopura, el domba kalekna ati melinanye birye, poka buplan kukulilule. Kukiplyopura, anye weklyopura, domba deiyoknye birye el yupu nyalyeba, el domba basam nirya el yupu akunum bikamica anya arye, kanye deibuka kekenyake. Domba deiyoknye birye, el domba nirya ati, sik si yuk-yuk sibuka yukuplyopura, kekenyake. El menekuka balyopura, sik aminyan dobolbikirye, bai tam banyake.

⁴ El domba basam nirya arye, el yuk ulul yupu akunum kel kiyamica ati, el talilye domba nirya boplirye, menekuka balyopura, sik aminyan dobolbanyake. Wininyaka deiyok ara, el yupu akunum kel kiyamica ati, el menekuka balyebuk dobolbanyake.

⁵ Elti kanye deibuka dobolbanyak bukni, yuk talye nang arye, el domba basam ati yukuptinga babye, dipkoprop kum yanganamake. Deiyok ara, sik kum kel kiyamik nang, yuk talye nang arye yukubice yupu ara, sik kekebuka kum kel kiyamica anya arye, menekuka batinga babye, adomba kum dobolyanamake. Ilil ati, bik-bik abuka bai tam bindopnamake,” Yesus arye nyabuk.

⁶ Yesus arye adomon yupu nyabukura, sik awekmekce, kekenmek ninye arye, ‘Deiyok anye’ tenen, moubuka kum bikik.

⁷ Moubuka kum kel kibika ati ara, Yesus arye tuba tamubuka tonap ayupu nong noutamak ara lak akarye, laka nyabuk. “Dipkoprop nyapsine. Nara, domba poka buplan bisik ara, na unune.

⁸ Na min kum yanamse talak arye, ‘Nun atia,’ nyabuka yayik nang nirya ara, ubula dolon nang atonun ulamike. Ubula nang ulamik bukni, na dipkoprop domba ara, anang nyalamik yupu ara kum kekelamike.

⁹ Tonda, nara domba poka buplan bisik atonun unune. Yata ninye do nirya, na deice aryuk, na bisikuk wekelbice ninye nirya ara, Allah arye lyepnamle. Lyeplirye, aninye ati kalekuka meliplyopura, telebuk unamake. Domba basam bai tam bakirye, dina teleb ak eibuka dibikirye, tuba tamubuka tonap poka pum bisik yangalamak touk, na mapu koprop ara, dabanmakirye telebuk unamake.

¹⁰ Ubula donanye arye, ubula dona ap, oltakana ap, domba basam kum danalina ap ati yanganyak bukni, nara adeiyok ati kum yase. Na domba nirya kam pia ubikirye, sik winin ning nirya ap, sik wininamak ning nirya ap, ‘Pia telebuk unamak’ tenen, yase.” Yesus arye nyabuk.

¹¹ Nyabukce ayupu ton nyabuk. Na Yesus ara, domba basam weina Deiyoknye atonun, pia telebnye unune. Teleb weina deiyoknye birye, el kam una ati, ‘Na ning,’ kum teneplirye, el domba ati el kanye talima ap, el kam un ning ap arilule. ‘Na domba kalikmanye talak ara, ikin weik kum unulule. ‘Opnikcak’ tenen, kum dukuldalule. ‘Opnicak babye, telebuk,’ tenelule.

¹² Domba weina ati, ‘Pil dopnamak’ tenen, yo bok arepmakibuk, talye pil melinang ara, domba weina deiyoknye ulye atonun kum unyake. Sik talye pil melinang arye, domba dipkoprop kum weinyaka anya arye, yu kam arye, ‘Domba obuka dipnun’ tenen, yangalye talak ara, atalye melinang eibikirye, domba nirya batakuka, bik-bik abuka banyake. Bik-bik abuka bindobikcopura, yu kam arye adomba basam bulubuka wekmakcak olyangaliba, domba nirya arye ilil ati, yuk-yuk bai tam sakuka bik-bik abuka banyake.

¹³ Domba basam weina ati, talye melinanye birye, adomba ati dipkoprop bico kum tenelule. Kanye kum delilule. Elda, ‘Kume, yo bok arepnikce deice arye, talye piluk donamne,’ tenelulnye binya arye, ‘Adomba ara bataklirye, dauplye’ tenen, domba batakuka, bik-bik abuka balule.

¹⁴ Sik talye pil dobuka unyak nang ara wininyak bukni, nara pia teleb Domba Weina Deiyoknye unune. Na talinun ninye nirya ara, akunum kel bikamsise. Sikda na domba atonun unyake. Aning atonun, na talinun ninye, na domba atonun ninye nirya arye, nati akunum kel bikamnike.

¹⁵ Aning nirya atonun, na Ni Koprop Allah arye kel bikamnuke. Tonda, narye na Ni Koprop Allah ati, akunum bikamse. Narye, na domba basam ati ara, na talima ap, na kam un ning ap arenune. Ati, ‘Opnikcak’ tenena kum arye, na domba ati, pia kalekuka melinune.

¹⁶ Adomba poka pum bisik na domba basam aunyak bukni, na talinun domba weik ton, yukak ton unyake. Apoka pum bisik kum unyake. Adomba basam babye, na adiparyuk dobuka boyanganamne. Adomba babye, na yupu nyabuka yukupnyopura, na yupu kekebikirye, na dam yanganamake. Sik ton akunum yakcopura, domba basam yupa tonok ansibikirye, neika unamake. Nara, sik weina deiyoknye tonok pia unamne.

¹⁷ Na Ni Koprop Allah arye kanye delinululce, kanye talima arinulula deiyok ara nyapnusine. Ara, narye na kam una ati, ‘Na ning,’ tenena kum arye, na domba atonun ninye lyena ati, na nong arepnukbuk, opnamniak bukni, aminyan ara tuba tamubuka tonap kam buknamne. Wininuna anya arye, na ni Allah arye kanye delinulule.

¹⁸ Na kam ununa ara, ninye arye dalubuka kum dopropnitinge. Bukni, na kanye aryuk, na nong arepnibuk, opnamniake. Na kam una ara, ninye lyena ati, arepnamniak ap, tuba tamubuka tonap na kam una dopropnamna ap ara, naryuk unamne. Adeiyok ning talibuka unune. Na Ni Koprop Allah arye, adeiyok ning arepnukbuk, dopropse. Na dipna ap, na kam una ap deiyok mikip ara, nauk talinune. Ninye arye na kam una dalubuka kum dopropnitinge. Yesus arye nyabuk.

¹⁹ Nyabukopura, sik Yahudi deiyok nang kekebikce, ayupu nyabuka deice arye, sik kanye yuk-yuk tenebik. Tonok kanye tenebuka, ansinibuka kum tenenmek.

²⁰ Kanye yuk-yuk tenenmekce, ton nang arye, “Anye bira, isa akunum talyamukba, luptalinanye ulula anya arye, yata ati el talye nyapmasil yupu kekepnuyap do? El yupu ara nong kum upnamle,” nyabik.

²¹ Nyabik bukni, ton nang ara, “Kume, amapo, elce nyapmasil yupu ara, isa arye ayupu atonun yupu kum nyaptue. Isa Mutuku Dongonye el mikip deice arye asing kuamuknye kweteptuba, teleb ubuka eiptu do? Kume. Anye bira isa talyamuknye kume,” nyabik.

Yahudi yala deiyok nang arye, Yesus ati dib kum tenebik yupu

²² Aminyan talak ara, sik Yahudi yala nang arye, weik kwalina talak ton kintinibik. Akwalina deiyok ara, ‘Allah el si eren aik teleb updeipnamsil’ tenen, Yerusalem mutuku domik aik ati, keting tamun nirya kwalilamik. Ara arukna li noutamak kwalilamik.

²³ Akwalina talak noutamak, Yahudi yala nang arye, Allah el si eren aik bukni, minop talak ulamuk Raja Salomo arye koak buna ati domuk aik, el si ara serambi, Yesus arye aning aik aruma amuak bisik banmok.

²⁴ Banmokba, sik Yahudi yala deiyok nang bulubuka yanmekce, Yesus neika banmek talak arye nyabik. “Ance lakak ton kum nyapsiminye arye, nunda tuba teniltonauk unyabe. Dan talak arye, tonap kunusa dona yupu atonun wininamsilam do? Allah arye, ‘Ninye lyepnamle’ tenen, wipdeiamuknye, Kristus ara anda aulyam do, kum do? Anda, Ninye Lyenanye, Kristus, dipkoprop unmaminyopura, lakak anyuk nyapsutume,” nyabik.

²⁵ Nyabikba, Yesus arye tamubuka anang ati nyabuk. “Na akunum nyapsise bukni, anggunda dib kum tenepnulume. Na ni koprop, el si deice arye, ninye kum winipmanto pil donuna ara, aning deice arye akunum laka upsile.

²⁶ Na ununa ara, akunum lakak upmasil bukni, anggunda, na domba atonun, na mapu kum ululuma ati, dib kum tenepmanulume.

²⁷ Na domba atonun ninye na mapu ara, na yupu kekebuka melininyake. Narye na domba ati bikamse. Sikce nati melininyake.

²⁸ Narye na mapu ati, kam pia una deiyok ning arepnibuk, pia kam unamake. Sik pia kum dipnamake, kume, kumdanamake. Yata nang do nirya, na mapu na taruk pum bisik talinibuk, yuk nang arye dalubuka kum dopropnitinge.

²⁹ Na Ni Koprop Allah arye nati aninye areamnuke. Allah elda, aning-aning deice tam ulirye, weik mikipnye ulula anya arye, na mapu el taruk pum bisik talilya ara, ninye arye dalubuka kum doproptinge.

³⁰ Na ap, na ni kopropa Allah ap nun tonoka.” Yesus arye nyabuk.

³¹ Yesus arye nyabukba, sik Yahudi deiyok nang kekebikce, yu weik ubukba, ‘Keil arye opnuyabe,’ tenebikce keil dobuka kintinibik bukni, Yesus arye sikti, nyabuk.

³² “Na ni koprop melyamnuka deice arye, ninye kum winipmanto ning weik arye pil dopsibuk, elinululume. Ninye kum winipmanto pil, weik mambul pil dolamse ning noutamak arye, yata malye pil dopsa ati, anggunce, ‘Opnuyap’ tenen, keil dobuka kintinibuka dinmanulum do?” nyabuk.

³³ Nyabukura, sikce, “Kume, ance ninye kum winipmanto ning pil doplum ning ati, keil arye kum opnukiayabe. Aning kum bukni, ance, ‘Na ni koprop ara Allah ulule, nunda tonoka,’ nyapmalam deice arye, pia malye wininmalame. Anda, talye tukwaknye ulyam bukni, ayupu nyapmalam deice arye, ‘Nara, Allah atonun unune,’ nyabuka, adeice arye Allah el si yanipmalame. Aning deiyok ati, ‘Opnuyap,’ tenepmakiyape,” nyabik. Nyabikba, Yesus arye tamubuka nyabuk.

³⁴ Anggun ton tenipdelulume. Anggunce, ‘Ayupu ara mambule’ tenen, taliplum yupu noutamak, buku Mazmur sekamik ning ara, anyapnusin yupu aupmal do, kum do? Abuku noutamak ara, Allah arye el yupu doprobik nang, ninye deiyok nang ati, ayupu nyabuk. ‘Anggunda Allah el mapu ululume.’ (Mazmur 82:6)

³⁵ Nun kele, Allah el yupu ara, kum kum danamle. Allah arye nyalul yupu nirya ara nong dipkoprop upnamle. Allah yupu dipkoprop aupmal noutamak ara, Allah arye el yupu aribukba, doprobik nang, tukwak mutuku ninye deiyok nang ati, “Anggunda, Allah el mapu ululume,” nyabuk.

³⁶ Anang ati, “Na mapu,” nyabuka anya arye, Allah arye, ‘Na kanye delinunye’ tenen, kanye deibukce, wipdeiamuknye, tukwak mutuku dopdeipnuknye ati ara, “Allah el Mi Koprop,” kum nyapdatinye do? Ati narye, “Allah el Mi Koprop unune,” nyapmanu deice arye, anggunce, “Allah el si yanipmalame,” nyanmanuluma ara, yata deiyok ati do?

³⁷ Na Ni Koprop Allah arye pil dolye ning kum winiptinyopura, nati, dib kum tenepnamnulume. Bukni, Allah el pil doptinyopura, nati dib tenepnamnulume. Yesus arye nyabuk.

³⁸ Nyabukce ayupu ton nyabuk. “Bukni, na Ni Koprop Allah arye, pil dolye ninguk pil dopnyopura, adeice arye adiparyuk dib tenepnulume. Anggunce nati ara, ‘Talinye binya,’ tenepnutum bukni, ninye kum winipmanto ning, weik mambul pil donuna ara, eipmunce, adeice arye dib tenepnululume. Apil donuna deice arye dib tenepnutumopura, aminyan kel biknamlume. Ara, na Ni Koprop Allah ap, na ap talima dukdongobuka ansinibuka unyame. El ap, na ap ara nun neika. Aning kel kipmunce, moubuka tenenamlume.” Yesus arye nyabuk.

³⁹ Nyabukura, sik Yahudi yala deiyok nang arye, adiparyuk yu ubukba, ‘Yesus opnuyaba ati, tomopnuyap’ tenen, piripdeyik bukni, Yesus pikiplobuka biyukba, kum talipmanto ubik.

⁴⁰ Anirya winibukopura, Yesus arye tuba tamubuka tonap, amutuku batakuka, Yordan mek koubuka, otam mutuku noutamak biyuk. Yesus biyuk mutuku ara, min arye Yohanes arye dib tenebik ninye dobuka, mek dongolamuk mutuku biyuk.

⁴¹ Amutuku noutamuk Yesus daulamuka ani, ninye yupa weik, el dam yangalamikba, neika ulamik. Atalak ara, aninye arye Yesus ati nyabik. “Kume, Yohanes arye ninye kum winipmanto ning, weik mambul pil kum dolamuk bukni, elce anye Yesus ati, laka nyalamsuk yupu nirya ara, dipkopropuk nyalamsuke,” nyabik.

⁴² Yesus amutuku noutamak ulamuk talak ara, ninye weik arye, elti, dib tenebikce yupa weik kipnin balamik.