Yoel 3 - Eipomek

Allah arye, Israel yala kum ninye, yuk mutuku ninye, im sirya, mutuku sirya nirya ati, yupu lipsisikuka wenepnamla ati, nyabuk yupu

¹ Allah Yahweh arye nyabuk. “Na tenepse sum akunum dam uplyopura, Yehuda yala ninye ap, Yerusalem mutuku unyak ninye ap nirya, bulubuka deipnirye, sik ap, sik unamak mutuku nirya ara, teleb kipdeipnamne. Na Allah Yahweh arye nyapsina ati, dipkoprob nong upnamle.

² Winipnamne talak ara, yuk mutuku ninye, im sirya, mutuku sirya nirya, sik yin talin nang nirya ap, daunyak nang nirya ap, bulupdeipnirye, sik nirya bobuka, weik wenen aik bobinamne. Ara, weik lyu mutuku el si ara, Yosafat mutuku bobinamne. Winipnirye sik aninye nirya, yupu lipsisikuka bokeipnirye, wenepnamne. Ara, talye ati kume. Sikce na mapu koproba, Israel ninye ati, yu tenebuka malye kililamika dekna ati, yupu lipsisikuka bokeipnirye, wenepnamne. Tonda amutuku-amutuku ninye arye, na mapu Israel ninye obuka, sirya dakikce, tapu koubuka, yuk pera mutuku bobinamika ati, wenepnamne. Atonun, ‘Naʼ tenen, mutuku tuku nirya yanuka dalubuka bokdobikce, yuk ninye ati arelamika ati, wenepnamne. Yuk pera mutuku ninye arye, na mapu Israel nang yakuka donokamikba, yuk-yuk mutuku dabinuka ulamika ati, aninye weik wenepnamne.”

³ Tonda, sik malye winin nang aryuk, na mapu koproba, ‘Naʼ tenen, ninye Israel nang malye kibikce, tapu koubuka, sik wenen aik binuka deiamikce, win ning, el si ara undi, pil dopna arye, ‘Awena aik unyak nang kan-kan ara, yatanye dopropnamal do?’ tenen, winilelamikce, aninye dobuka, weik ikin pil aruklamikba, talye piluk dolamik. Winilamikce, wel nang doprobikce, ‘Talye-talye yolan kilapu dopropnun’ tenen, akilapu dekna ati, akilapu sik deiyok nang ati, dekna ning arelamik. Aning atonun, Israel yala wel kilapu doprobikce, yuk nang ati arebikba, yo bok dobukapna arye, sikce ayo bok deice arye, yu mek dekuka dilamik. Winibuka pia malye weik winilamika ati, amutuku-amutuku ninye weik arye wenepnamne. Allah arye nyabuk.

⁴ Allah arye ayupu ton nyabuk. Se, anggun Tirus mutuku ululum nang ap, Sidon mutuku ululum nang ap arye nati, ‘Elda mambulnye kume,’ tenenumunce, malye winilinululum do? Se anggun Sidon mutuku ululum nang ap, Tirus mutuku ululum nang ap, Pilistin tam ululum ninye nirya ap ara, narye yata malye ning arepsisiba, anggunce nati, malye ulinmanulum do? Anggun kanye ara, ‘Allah arye winipsuk ning ara, nunce ton kwang daknamabe,’ tenenumunce, ‘Naʼ tenen, ninye ati, malye winililulum do? Utenenumunya ati, narye anggun dam ikin ning, min yuma deipnamsin ning ara, adiparyuk dopropnamlume. Narye anggunti, kwang daknamsine.

⁵ Winipnamsina ara, urdem ati kume. Angguncuk na si eren aik pum tam deiamnik kat ning, dekna weik ning emas ap, perak ap, ‘Naʼ tenen ning, pia mambul ning nirya ara, anggunce ubula dopromnulume. Dopromlumce, anggun mutuku koproba tamubuka bobinuka, anggun Isa Mutuku Dongonye si eren aik noutam, bobinuka delilbinamlume.

⁶ Tonda, Yehuda mutuku ulamik ninye ap, Yerusalem mutuku ulamik ninye ap ara, malye kiplumce, sik mutuku koproba batakuka, pia pera weik mutuku bobinamlume. Na tenen ninye akunum bobuka bilum ning ara, sik Yunani ninye un dam bobuka, yo bok binuka dekamlume.

⁷ Winilamlum bukni, wini talak ara, na dipkoprob anggunce, ‘Deknamap’ tenen, na mapu bobinuka, dekamlum mutuku noutam arye dobukapnirye, amutuku arye batakuka, sik mutuku koproba, Yehuda mutuku tamubuka boyanamne. Winipyopura, anggunce aninye ati, malye weik winililamluma anya arye, tamubuka kwang daknamsine. Anggunce malye winilamlum ning ara, ila tamubuka, anggun bidamang kisok deice deipnamsine.

⁸ “Ara, talye ati kum nyapsine. Na tenen ninye tamubuka boyanyeura, kwang dakna ati, narye sik yuk pera mutuku ninye, sik sal mapu ap, sik kilmapu ap nirya dobukapnirye, Yehuda ninye damuk bobiniba, aninye arye, sik mapu nirya dekenamake. Dekicak arye, ila tamubuka, Israel ninye arye, sik mapu dopdobikirye, yuk weik pera mutuku, Syeba mutuku unyak nang damuk, bobinuka dekenamake. Syeba mutuku ninye arye, sik Tirus mutuku mapu ap, Sidon mutuku mapu ap, Pilistina mutuku mapu ap, dekikirye, pia ikin weik pil arukunamake. Ara, urdem ati, kum nyapsine. Nara, Allah Yahweh arye, nyapsina anya arye, aning ara dipkoprob nong upnamle.” Allah arye nyabuk.

Allah arye, yuk mutuku ninye ayala nang, ayala nang nirya ati, yupu lipsisikuka, wenepnamla ati, nyabuk yupu

⁹ Allah arye nyabuk. “Anyapdeipne yupu ara, ninye im sirya, mutuku sirya nirya unyakak binuka, laka nyalbinamlulume. Winipmunba, ninye nirya kekebikirye, sik yin talin nang nirya, kintinibuka delinamnyake. Tonda, mal olan ati, kel nang ap, yin talin nang, sik deiyok nang ap, binuka nyapmunyeba, kekebikirye, kintinibuka binunyake. ‘Na tenepse mutuku binunyak’ tenen, nyapne.

¹⁰ Ayupu kekebicopura, wa palibuka wina ati, memenyak ning ara, tamubuka ninye on ning ati, tace ketebuka kintinip deipnamake. Aning atonun, wa wina ati, kintineibuka pil donyak ning, sekukabikirye, ninye lukuka on ning kintinip deipnamake. Ara, parang ya ap, mitik topnong ap ara, ninye lukuka ona ati, cang tace yo ketebuka, lupdeipnamlulume. Winipmunye talak ara, pia mikip kum ulamlinye babye, ‘Nara, mikip weik arye ulamak yin talin nang atonun upnamne’ tenen, kintinipnamake.” Allah arye nyabuk.

¹¹ “Anggun amutuku-amutuku nirya, akunum winipmunyopura, ninye mutuku-mutuku nirya, dana-dana ululum ninye ara, minopce weik mutuku lyu ak, el si ara Yosafat mutuku, lyu mutuku, otam bulubuka wekelbinamlume. Ara, ‘Anggun obilulume,’ nyapdeipmunyeba, sik abulubuka weknamak nang nirya ara, yanganamake. Sik nirya bulubuka wekikcopura, na Allah Yahweh arye, abulubuka wekmace ninye, mutuku-mutuku nirya ati, yupu lipsisikuka bokeipnirye, wenepnamsine. Ati, na Allah arye, na yin talin nang ap, na yin talin malaikat ap, nirya boyanamne.

¹² Ati, anggun mutuku-mutuku nirya ululum ninye arye, ‘Nunda sirya yupu bokolin mutuku binamapca’ tenen, kintinibuka dinamlulume. Ara, mutuku si Yosafat mutuku lyu mutuku aryuk, na Allah Yahweh arye, na mapu koproba, Israel ninye, ‘Naʼ tenen, ninye ap, sik dam unyak ninye ayala-ayala nirya ati, yupu sirya bokeipnamne.

¹³ Sik dana-dana tam unyak ninye nirya ara, pia malye weik wininyak ninye unyaka ati, sik wenena talak akunum dam uplyopura, winipmanto ara, gandum wa wibuka kuamice wisiamlibuk, lipnuce talak ara, yu weik parang ya, el si sabit arye, sekuka lilamak touk winipnamne. Tonda, anggur tapu duk, wa wibuka kouamice wisipliba, dakukabikirye, mek purunak binuka deibuka yanibikiba, anggur mek weik deiplirye, langdibuka balamle touk, aninye weik arye wenepnamne.” Allah Yahweh arye nyabuk.

¹⁴ Yoel birye nyabuk. Allah Yahweh arye, ‘Sirya dakna talak ara, winibuka wekelbinamak,’ tenebukce, kintinibuka deibuk mutuku wekelbinamak ninye ara, ninye yupa pia weik, kum nukmanto beribu-ribu nang binuka unamake. Amutuku noutamak bulubuka wekelbinuce talak ara, talye talak kume. Ara, Allah Yahweh elce, tukwak ninye nirya, sik malye wininyak ning dekna ati, wenepnamle sum akunum dam uplyopura, adiparyuk yanamle.

¹⁵ Atalak ara, keting ap, wala ap ara, kunuknamle. Tonda kurye nirya ara, dirina kum danamle.

¹⁶ Atalak ara, Allah Yahweh el unamlak, Sion mutuku deice yanuka tiklirye, weik yupu arye nyapliba, ninye nirya kekenamake. Ara, Yerusalem mutuku noutamak arye, weik yupu nyapliba, tukwak ninye nirya kekenamake. El yupu nyapnamla ara, liman lelamle atonun, nyapliba kekepnamake. Atalak ara, Allah el yupu weik arye nyapliba, im deice ulul ning ap, mutuku-mutuku nirya ulul ning ap, luluknamle. Bukni, Allah Yahweh, el mapu koproba Israel ninye, sikda kum bataknamle. Elce sikti, pia melibuka kalikinamle ati, sikda ilil kum unamle. El damuk teleb ubuka pia aunamake. Nabi Yoel birye nyabuk.

Yehuda mutuku ap, Yerusalem mutuku ap, pia teleb kipdeipliba, telebuk unamla ati, nyabuk yupu

¹⁷ Allah arye nyabuk. “Se, anggun Israel ninye ara, anggunce atalak ara. na wininamne ning nirya, lakak eipnamluma ati, anggunda moubuka kel biknamlume. Ara, nara, anggun ni koproba Allah Yahweh unune. Nara Sion mutuku deice uk unune. Aununa ati amutuku ara, narye wibuka deiamsa ati, amutuku noutam, na dirina pia weika arye unamle. Tonda, Yerusalem mutuku noutam babye, ‘Naʼ tenen, mutuku ulula ati, narye teleb kipdeipniba, malye un ning tonok babye, amutuku noutamak ara, tonap pia kum unamle. Diksukum ninguk unamle. Ati, amutuku noutam ara, yuk ninye ayala-ayala nirya, narye wibuka kum deiamse ninye ara, ninye asik nang atonun ninye anya arye, amutuku noutam ton, pia kum weknamake.

¹⁸ Sion mutuku ap, Yerusalem mutuku ap, pia teleb kipdeipnye talak ara, amutuku deice nirya ara, anggur tapu duk wa wibikiba, weik unamle. Atalak ara, anggur tapu duk dakuka purubikiba, anggur du mek weika arye, kwebuka dinamake. Tonda, sikce talibuka weinamak kam un ning, ayala-yala nirya arye, amutuku dam teleb mutmutauk papliba, weika arye dibikirye, sapi basam ap, kambing basam ap arye, sik mapu ati, moum yung weik deipliba, arenamake. Tonda, Yehuda yala mutuku noutamak balamle mek nirya ara, pia kum cepropnamle. Pia teleb mek sakuka, apia banamle. Tonda, tonok mek ton, Allah Yahweh el si eren aik dam arye, mek pu doplirye banamle. Abanamle mek ara, mutuku si Akasia lyu mutuku arye banamle. Amek balirye, amutuku lyu nirya teleb upliba, kounamak ning, ayala-yala nirya babye, teleb ubuka papliba, kanye weik delinamake.

¹⁹ Bukni, aning nirya winipnamle talak ara, Mesir mutuku nirya ara, mutuku patauk kiploplirye, tuku nirya babye, mikdopnamle. Tonda, Edom mutuku nirya babye atonun, tuku sesal leplirye, mutuku patauk kiplibuk, pia malye mutuku kipnamle. Amutuku bitinye noutamak ara, ninye ton pia kum unamake. Ara, urdem ati kume. Sik amutuku ninye arye, Yehuda yala ninye nirya ati, yanuka olyangalamikba, sik ining talye saklamuka, dekna ati wenepnamne. Ara, malye winin ning ton, kum winilamik touk, Mesir mutuku nang ap, Edom mutuku nang ap arye, Israel ninye nirya olamika ati, wenebuka opnamne.

²⁰ Bukni, Yehuda mutuku unyak ninye ara, pia, Yehuda tam noutamak tuba aunamake. Tonda, Yerusalem mutuku noutamak ara, ‘Naʼ tenen, ninye babye pia, tuba aunamake.

²¹ Yehuda mutuku ulamik ninye ap, Yerusalem mutuku ulamik ninye ap olamikba, sik ining saklamuk ning dekna ati, na Allah Yahweh arye, ‘Sik aolamik ninye ati, kwang daknirye opnamne,’ tenepse ning ara, kum bataknamne. Sik malye winilamik ninye nirya ara, wenebuka opnamne. Na Allah Yahweh ara, Sion mutuku noutamakuk, kanye lamapdongobuka, apia unamne,” Allah arye nyapdeibukba, nabi Yoel birye sekuk.