Yoel 2 - Eipomek

“Allah Yahweh el tenebuk sum dam upliba, winipnamle ning ati, moubuka biknamlulume,” nyabuk yupu

¹ Allah arye, ‘Na tenen mutuku’ tenen, Sion mutuku wibuka, el si Yahweh nyabuka, Sion mutuku deice deibuka ati, elda amutuku ulule. Ati, yanuka tikmunce, pong-pong ana, el si terompet, lelim nyapmunyopura, amutuku ninye arye, ‘Se, mambul sum ati, pitin-pitin kinmake,’ tenepnamake. Se, anggun Yehuda yala ninye nirya ara, awinipnamle ning eipmunce, ilil upsiliba, yok sirim talipnamsile. Ara, urdem ati kume. Allah Yahweh arye, nun malye winin ning dekna ati, ‘Wenepnamne,’ tenebuk sum, akunum dam upmala ati, ‘Se, ikin ning nun dam upmale’ tenen, imun kanye bobuka unamlume.

² Asum ara, dua kunukmiting abuka, inipdopnamle. Dirina ton pia kum upnamle. Tonda yuk karin mutuku yin talin nang arye, sul kwising yupa weik ulamle atonun, yin talin nang babye atonun, yupa pia weika arye, mal olan dam bikirye, amutuku-amutuku nirya singipdongopnamake. Ara, winipmanto ning ara, dua sekdoba bobalirye, mutuku deice palilamla touk upnamake. Aning ara, minop talak arye, aning atonun ton kum winibukba, ninye arye eibuka, kum bikinyak ning winipnamle. Awinipnamle ning ara, yuk dotalak babye, pia tonap tamubuka kum winipnamle. Allah tenebuk talakuk, winipnamle.

³ Tonda, uku buk yalirye, dibuka sirya daklamle touk, sik ayin talin nang yakirye, aning-aning nirya, uku dongopnamake. Yanuka obikirye, akunum yukak banmace talak ara, uku buk dipliba, aning-aning nirya sirya dakalule. Ara, minop talak amutuku noutamak ulamuk ning nirya ara, Allah arye, Eden ban mutuku ara, aning-aning nirya kwepdeiamukba, pia teleb ulamuka atonun, uamuk mutuku bukni, sik yu yin talin nang arye, yanuka opsicopura, sul kwising arye nirya dibuka, sirya daksiliba, palamle ning nirya kum uplirye, pata mutuku ulamle touk, kiplopnamsiyake. Tonda, amutuku ubuk ning nirya ara, tonok ning babye, pia kum bataknamake. Tonda, sik ayin talin nang arye, amutuku yanuka warikice talak ara, tonoknye babye, ton kum bataknamake. Amutuku nang nirya opnamake.

⁴ Amutuku olyanamsiyak yin talin nang, sik urasin ara, kuda basam mal olan dam banuca ati, kuda basam balye deice bukikiba, pia bikbik abuka bakibuk, yan lelim weik arye lelamle atonun winibikirye, lelim weik lepnamake.

⁵ Sik ayin talin nang ara, mutuku dup arye kutukuka tikilyakirye, balsusunmakirye, dipdebinamake. Winibice talak, sik yan lelim nyapnamaka ara, winipmanto ara, kuda basam deice ninye buna ati, kintinibuka domikce ning deice, bukuka bakibuk, lelim weika arye nyalamle atonun upnamake. Tonda mikuka kel-kel alamle ninguk, uku buk weik dinmalirye, tin weik ulamle touk, upnamake. Tonda, anang sik bana ara, yin nang mal olan dam binukirye, nebuka kintinibikirye balamak touk, upnamake.

⁶ Ayin talin nang yakirye ninye ati, binuka warikuka opnamak talak ara, ninye nirya eibikirye, ‘Se’ tenen, ilil weik upliba, yok sirim talipnamle. Winiplirye, ninye sik urasin nirya ara, malye kanye bobikirye, uk din nang bol atonun bopnamake.

⁷ Sik mal olana deiyok nang, mal olalbinuce talak, bikbik abuka balamak touk upnamake. Tonda, ‘Weik cang poka domica pum tam ulamice nang ati, optibye’ tenen, pia pi dobuka, weik cang poka welelamak nang atonun, upnamake. Sik anang binamak bisik ara, diksukumuk nebuka kintinipmace deiceuk, binamake. Ton kum bataknamake. Nong bisik tonok binamake.

⁸ Tonda, sik bisik banmace talak ara, ‘Minopce balolulume,’ kum nyapdanamake. Sik banmace diksukumuk binamake. Winipmakirye, sikti, ‘Optibye’ tenen, kalikinyak sukum, binuka opyaknamake. ‘Olyanmasiak nang ati opnuyabe’ tenen, yin ap, mal ap, tace ning ap, parang ya ap nirya, kintiniptinga babye, ayin talin nang arye, amutuku ninye nirya obuka, sirya daknamake. Anang ara, sik mikip weik ati, tamubuka opmanto kum ati, malye kum kiptibye.

⁹ Sik yin talin nang arye, ninye weik asik dobuka ulamice mutuku binuka, wariknamak talak ara, winibuka binuka warikikirye, weik cang keil poka wiamica deice, bikbik abuka bindaknamake. Winibikirye, sik adiparyuk, ninye sik asik noutam nirya welepnamake. Aning winipmanto ara, ubula don nang arye, sik asik jendela pum bisik welebuka wekikirye, yuk ninye deiamice ning ubula dolamak touk, winibikirye, amutuku nang delilamice ning nirya, ubula dopropnamake.

¹⁰ Winibuka, ‘Olbinuyap’ tenen, deiyok koubikirye, banamak talak ara, mutuku nirya ap, im ap nirya ara, weik arye luluknamle. Luluklirye, wala ap, kurya ap, keting ap nirya ara, kunuknamle. Atalak kurya dirina babye, pia ton kum upnamle.

¹¹ Atalak, Allah Yahweh el yupu ara, liman oplirye, lelim lelamle atonun, lelim weik leplirye, el mapu mal olbanuce nang ati, ‘Winiplulume,’ nyabuka, yupu arepnamle. Ninye olbinamak nang ara, yupa pia weik, nukmanto kum upnamaka anya arye, sik anang ara, Allah elce nyaplye touk, ubuka mal olbinamake. Dipkoprop nyapne. Allah Yahweh arye, ‘Yehuda tam ninye malye ulamik ning dekna ati wenepnamne,’ tenebuk sum, akunum uplyopura, tonoknye babye, kum darapdongobuka dakeiyam asa, kum uptinge. Ara, pia kanye imun sum kipnamla ati, nyapsine. Nabi Yoel birye nyabuk.

“Israel ninye arye, ‘Nunda malye wininyabe,’ tenebikirye, ‘Nun ni Allah lyepsilyame,’ nyabuka moropnicopura, kekepsitinye,” nyabuk yupu

¹² Allah Yahweh arye, “Yehuda tam unyak ninye, weik arye wenepnamne,” nyabuk bukni, ayupu nyabuk talak ara, nyabuk. “Anggun malye winilulum ning nirya, batakmumce, anggun kanye talima nirya, na deiceuk deipmunce, ‘Se nunda malye winilamupu ninye’ tenen, din dina kum arye, si tebuka umunce, nati ngalukuka engepnumunce, moropnumunyopura, kekepsinirye, lyepropnamsine,” nyabuk. Nyabukce ayupu ton nyabuk.

¹³ “Anggunce, ‘Se, nun malye wininyap ning dekna ati, nun ni Allah arye wenepnamsil do?’ tenen, anggun baju bol deice ning, kwiribuka batakalulum ning ara, bataknamlulume. Talye bol deice ning kum bukni, anggun talima pum tam, malye tenemunye ning nirya batakmumce, ikin kanye bobuka, engepmunce, tamubuka anggun ni koproba Allah Yahweh, na dam anyuk yalulume. Ara, ‘Allah elce nun malye winibibye ning ati, adiparyuk kum opnamsil’ tenen, yanululume. Ara, urdem ati kum nyapsine. Nara, ninye malye wininyak ning ati, adiparyuk minopce wenepnirye, kum onune. Dipkoprop anggun malye winina dekna ati, adiparyuk wenebuka oplopsitinye bukni, ‘Sikce tamubuka, na dam yanamak do, kum do?’ tenen, disunune. Nara ninye ati kanye talima areniliba, bico tenen, nimalyap arye, anggunti disinirye, kalikuka tuba-tuba melisunune. Winisununa ati, anggun malye ululum ning batakmunyopura, ‘Narye aninye ati wenebuka opnamsine,’ tenepse ning ara, tuba ton batakname.” Allah arye nyabuk. Ayupu nyabukba, nabi Yoel arye nyabuk.

¹⁴ Yoel birye nyabuk. Nun ni koproba Allah arye nunti, bico tenesulul ning ara, yatanye birye, ton biktua kume. Allah elcuk teneplirye, ‘Aninye wenebuka opnune,’ tenebuk ning ara, batakturye, ‘Aning ara, kum winipnune,’ teneptu do? Bico tenepsuturye, namin kipnamsil do? Winiplirye, Allah elcuk tamubuka, weika arye anggun dam teleb ulinamsil do? Nun walwal bukni, ‘Winipsutu’ tenen ati, anggun nirya arye, Allah el si erena ati, anggur mek ap, gandum ap bobuka, arelyanamnulume.

¹⁵ Allah el ululak, Sion mutuku deice arye, pong-pong ana, el si terompet, lelim weik lepnamlulume. Nyapmunyopura, amutuku ninye nirya kekebikirye, utenepnamake. ‘E, bikilina ati, terompet nyanmaka anya arye, asum ara, weik mambul sum upmala ati, ‘Alelim nyanmak’ tenen, din dina kum deice arye, din si tebuka, bulang unmabirye, Allah moronamaba ati, nyanmak’ tenen, sik nirya bulubuka yanamake.

¹⁶ Israel ninye, anggun nirya bulubuka umunce, Allah el siuk erepmunce, telebuk ubuka unamlulume. Unamlum talak ara, anggunce yukupmunba, pia wisi nang nirya ap, mapu ap, mitik mapu ap, kwaknamne mapu ap, bulubuka yanamake. Tonda, ‘Sal taruk murupnamap’ tenen, kweirya dopmakirye, aik unmakce kilapu ap, sal ap nirya, bulubuka yanunyake. Aninye bulubuka yanamak talak ara, sik unyak mutuku ap, sik unyak aik ap, nirya batakuka, Allah ati morolyanganamake.

¹⁷ Tonda imam-imam nang, Allah Yahweh el si eren aik talibuka, pil donyak nang ati nyapnamalyame. “Anggun nirya arye, Allah el yupu nyan aik koproba noutamak ap, bai tam atolonga lalinak ap, wekmunce engebuka, Allah el tibuk moronamlulume. Ara, ‘Se, na ni Allah, an tenen ninye oltakana kume. Nun ti bico tenepsimince, melibuka lyepsilyame,’ nyabuka moronamlulume. Tonda, anggunce anggun ni Allah Yahweh ati, nyabuka moronamlulume. ‘Nunda an mapu koproba unyabe. Ance nun nirya opsiminyopura, yuk mutuku ninye nirya eibikirye, ‘Sik ni koproba Allah ara, dan mutuku ulul do? Yata ati aninye kum melilul do?’ nyabuka, malye nyapsikirye, yep-yep anamsiyake,’ nyabuka, Allah ati moronamlulume. ‘Yuk mutuku ninye nirya arye, malye nyapsicak’ tenen, Allah moronamlulume,” nyabuka, Yoel birye nyapdeibuk.

Allah arye tamubuka, el mapu koproba, Israel ninye ulamik mutuku tuku ati, teleb kipdeibuk yupu

¹⁸ Yoel birye nyabuk touk, Israel ninye nyabuka morobikopura, Allah Yahweh arye tamubuka, Israel ninye sik ulamik mutuku tuku ati, ‘Kume, yuk mutuku ninye arye, ‘Naʼ tenen, mutuku ati, malye nyabicak’ tenen, amutuku nirya ara, teleb kipdeibukce, sikti, ‘Na mapu koprop’ tenen, tamubuka pia bico tenebuk.

¹⁹ Allah arye, el mapu Israel ninye ati, tamubuka nyabuk yupu ara, ani. “Wini talak ara, anggun nirya ati, narye anggur mek ap, yagung ap, gandum ap, tonda minyak zaitun mek ap nirya, anggun dina ati arepsine. Arepsina ati ara, anggun nirya dipmunba, bounamsile. Tonda, narye anggunti, wenebuka bataksinirye, yuk mutuku ninye arye, nalibuka, aku kum tunamsiyake.

²⁰ Anggun wenena ati, sik lo ton arepneba, outam mutuku nang arye, anggun dam olyanamak yin talin nang nirya ara, aminyan talak, narye yakdonoknamne. Winibuka ton tam ara, yakniba tuku mikdobukce, malye ubuk mutuku uk, dopkwetepniba, yuk pera mutuku binuka unamake. Tonda, minopce menekuka, yanganamak nang yupa ara, narye nyapniba, keting yangan tam, weik laut mekwen deibuka duk-dukak ara, pia kum lulukulul sukum binamake. Tonda, aminyan tiknamak nang yupa ara, narye nyapniba, keting wekelban tam, weik laut mekwen deibuka, noutam dopkwetepnamne. Winipniba, weik laut mekwen arye, ayin talin ninye nirya diplyopura, sik nong lyuplirye, tong weik lenamle. Ara, sik yin talin nang arye, ‘Naʼ tenen, ninye ati, ‘Opnamabe’ tenenyak ninye ati, ikin ning, sik nong deice deipnamne. Dipkoprop anggun ni koproba, Allah Yahweh, narye anggun Israel ninye ati, weik mambul pil dosunune.” Allah arye nyabuk.

²¹ “Ati ara, anggun ilil una pia meme. Anggun wa wimunyak nirya ara, anggun kanye talima teleb deice aryuk, darapdongobuka unamlulume. Wininamlum talak nirya ara, ‘Se, Allah Yahweh arye, weik mambul pil dopsuke,’ tenepmunce, kanye deibuka unamlume.

²² Tonda, amutuku noutam, talye kam ulul ning nirya ati, ‘Se’ tenen, ilil una pia kume. Ara, wini talak sik din ning, maning palamle mutuku nirya ara, kolupdobuk bukni, tuba tamubuka imbik uk kipdeipnusine. Tonda, duk molul yo si ara, Ara, yo nirya ap, anggur tapu duk ap, tamubuka teleb kipdeipsiniba, duk weik mounamle. Winipsinya deice arye, sik duk nirya pia weika arye moupmalirye, pia weik unamle.

²³ Aning atonun, anggun Sion mutuku ululum ninye nirya, weik kanye deipmunce, pin-pin asa arye unamlume. Ara, anggun malye winin ning nirya kum kipdeipniba, teleb kibuka winimunya deice arye, na Allah disinirye, anggun nong deice kanye deibuka, teleb kilisunune. Tonda, narye li ning arisinye touk, dou arepmasinya ani, ton talak ara, mok aresunune. Aning atonun, ton talak ara, mok arepmasinye touk, dou li ton aresunune. Ara, min yuma talak, narye melibuka arelamse touk, wininamsine.

²⁴ Ati, anggun gandum wa wilulumak ara, weik arye yamubuka arenamsine. Winipsiniba, anggun gandum wena ati, sapi basam arye teikikopura, gandum duk delilulumak ara, gandum pia weika arye langdiknamsile. Tonda, anggur yo duk ap, zaitun yo duk ap ara, dakuka mek purubikiba, langdibuka minyak mek weik upnamle.”

²⁵ “Ara na Allah arye, anggun wenena ati, sul kwising arepsisiba, yata wiribuka keting tamun deice arye, anggun koumunye ning ayala-ayala nirya, dibuka sirya dakamsikba, kum danamsuka ati ara, aning nirya tamubuka punupnamsine. Ara, talye ati kume. Aning ara, narye anggun wenena ati arepsise. Winipmanto ara, sul kwising yupa weik dopkwetepsisa anya arye, sik yin talin nang, yupa weik yanuka, ninye olamak atonun, anggun dam sul kwising yanamikce, anggun koumunye ning nirya, sirya dakamik.”

²⁶ “Bukni, na dam tamubuka yamumnyopura, anggun din ara, ton kum patanamsile. Din ning aning-aning nirya delamunyeba, bounamsile. Boupsilirye, telebuk unamlume. Aning nirya akunum winipnyopura, anggunce anggun ni koproba Allah Yahweh nati, na si pia erenamnulume. Ara, na Allah anggun ni koproba unirye, anggun dam ara, ninye kum winipmanto ning nirya, mambul pil dosununa ati, na si erenamnulume. Pia teleb kipdeipsiniba, na mapu anggunti, yuk mutuku ninye arye, ton nalibuka aku kum tunamsiyake.

²⁷ Ati, narye melipsiniba, anggun Israel ninye nirya arye, ‘Se, dipkoprob Allah Yahweh ara, nun kan-kan ulule’ tenen, biknamlulume. Tonda, ‘Dipkoprop nun ni Allah Yahweh, el tonok ulule. Yuknye el Allah atonye ton, pia kum ulule. Allah ara, el tonoka’ tenen, biknamanulume. Na Allah Yahweh unun ati, na mapu anggunti, yuk mutuku nang arye, alye un ning, anggun nong deice, ton kum deipnamsiake. Tonda, na mapu anggunti, yuk mutuku ninye arye, ton nalibuka aku kum tunamsiake. Telebuk unamlume.” Allah arye nyabuk.

Allah el sum upliba, el Dib Kanye arenamle ning ati, nyabuk yupu

²⁸ Allah arye Israel ninye ati nyabuk. “Na tenepse talak, akunum dam uplyopura, narye anggun tukwak ninye nong deice, na Dib Kanye arepnamsine. Arepnamne talak, anggunce deipnamlum sal mapu ap, kilmapu ap nirya ara, na yupu nyapniba, kekebikirye, sikce laka nyanamake. Tonda, sik wisi-wisi nang unam noutamak arye, tonok-tonok nang ton, lengdar deice mabikirye, na arenamne ning lak kipniba, eibikirye, ayupu ton laka nyanamake. Tonda, wel nang, sik deice arye dotalak unamle ning, sik dam arepneba, sikce kel kibikirye, laka nyanamake.

²⁹ Atalak ara, na Dib Kanye dobukapnirye, na tenepnye touk, na pil don nang ap, na pil don kilapu ap, na Dib Kanye, sik deice arenamne. Yuk nang tomobuka, tapu koubikirye, ikin pil arukunyakba, dekna dolona kum diparyuk, yuk nang ati, talye pil donyak nang babye, kilapu babye, na Dib Kanye, sik nong deice arenamne.” Allah arye nyabuk.

³⁰ “Winipnirye, narye ninye kum winipmanto pil, weik mambul ning arepneba, anggun nirya arye, ‘Se, nun ni Allah Yahweh arye tenebuk talak, akunum upsile’ tenen, kel biknamlume. Ara, im deice ap, tukwak mutuku noutamak nirya ara, aning arepnamne. Anya arepnamne ning el si ani. Weik ining mekwen ap, weik uku buk ap, tonda weik tulum ara, dua bum bulamle atonun arepneba, aning nirya winipliba eipnamlume.

³¹ Winiplye talak ara, keting kunuknamle. Tonda, wala ara, ining bi atonun upnamle. Aning nirya wininamle ning ara, Allah Yahweh el tenebuk sum, min kum winipmalye talak bukni, dam uplye talak ati, wininamle. Atalak ara, pia weik mambul anya arye, ilil weik unamsile.” Allah arye nyabuk.

³² Bukni, atalak noutam ara, yatanye do nirya, Allah Yahweh el tibuk si erelirye, ‘Naio, na melibuka lyepnilyame,’ nyabukam morolulnye bira, Allah aryuk aninye nirya lyepnamle. Ara, urdem ati, kum nyapsine. Deiyok ara, minop talak arye, Allah Yahweh elce nyabuk touk, Sion mutuku ap, Yerusalem mutuku noutam ap ara, ton ninye lyepnamle. Kam tuba unamak ninye ara, Allah Yahweh elce wipdeiamuk ninye ati, nyapliba, kekebice ninyeuk, kam unamake. Yuk ninye ara, Allah arye oplopliba, dibikirye, sirya daknamake. Allah arye nyapdeibukba, nabi Yoel birye sekuk.