Yoel 1 - Eipomek

Israel ninye sik koulamik ning nirya, sul kwising arye dibukba malye kanye bobik yupu

¹ Allah el si Yahweh arye, Petuel el mi Yoel biti yanuka nyabuk yupu ara, ani.

² Se, Yudea tam deiyok nang, anggun pia wisi ululum nang ara, anggunda moubuka kekeplulume. Tonda, Yehuda yala nang ululum ninye nirya ara, aning moubuka kekeplulume. Ara, anggun ululum talak nirya, awininmalba elinmalum atonun ning ton, usulul do? Aning atonun, anggun apu yapu nang ulamik talak ara, awininmalto ning ton winilamukba, elilamik do? Kume, atalak wininmal ning ara, minop talak wininmana ak, kum elilamik touk, wini talak babye, kum elilulume.

³ Ati, awininmalba eipmalum ning ara, anggun mapu kekenak binuka nuknamlulume. Nukmunba, ‘Sikce deibiceba, dadeipdanin banamak mapu, kekenamak’ tenen, nukunamake. Winibikiba, sikce dodeipnamak mapu nirya ati, pia nukdeipdanin banamake.

⁴ Sul kwising yupa ara, pia nukmanto kum. Weik yayikce, Israel ninye sik wa wibuka koulamik ning, ayala-ayala nirya yanuka seklobikba, kolubuk. Min yuma yanmek sul kwising arye, koun ning nirya seklobikce, ton batakik ning ara, aminyan talak yayik sul kwising arye yanuka, dibuka sirya dakdongobik. Tonda, aning akunum winibukopura, aminyan talak yayik sul kwising, yupa pia weika arye yayik talak ara, nirya langdibukba, im tam laka ton eipmanto kum ubuk. Asul kwising yayik talak ara, sik Israel ninye koulamik ning nirya ara, dibuka sirya dakik. Tonda, aning akunum winibukopura, aminyan talak yayik sul kwising, yupa pia weika arye, deipdanin yangalamikce, Israel ninye koulamik ning, mitik tonun tuba uamuk bukni, aning nirya dibuka sirya dakik.

⁵ Se, anggun yu lelamle mek, ninye kanye wangalamak mekuk dibuka ululum nang ara, buklulume. Tonda, anggur mek yu ninguk dilulum nang ara, engenamlulume. Ara, anggun winiryuk anggur mek, anggun si bam bol dam arye akunum dopropmasila ati, engepnamlume.

⁶ Ara, ‘Naʼ tenen, ninye unyak mutuku olyanganamak nang ara, ninye yupa pia weik, nukmanto kum nang arye olyanganmake. Winipmanto ara, bai tam ulamle ning, el si ara singa kuse, el si yu weik ulamle touk, Israel mutuku olyanganamak nang ara, yu weik unyake. Winipmanto ara, kil singa kuse, el yang belebuka tiklamle touk kibuka, aninye arye Israel ninye ati, yu kanye bobuka olyanganmake.

⁷ Sikda talye ati kum yanmake. Nun anggur tapu ara, ‘Sekuka kwiniplopnamap’ tenen, yanmasiyake. Tonda, ara yo ara, ‘Duk kum moupnamle ati, webuka sirya daknuyap’ tenen, yanmasiyake. Ara, ‘Webuka sirya dakeipyeba, duk kum moupnamle’ tenen, yanmasiake. Aning nirya akunum dibicopura, yo sirika diamuk upnamsile. Winipsilyopura, yo bol nirya kobuka dibikirye, yo yok diamuk batakiceba, mikdoplirye, kolupnamle.

⁸ Ati, anggun Israel ninye nirya arye, ‘Se,’ tenebuka engenamlulume. Winipmanto ara, wel kil tonok, el dopnamne tenelamlinye dipliba, ‘Se, yata ati do?’ tenen, malye kanye boplirye engelamle touk, unamalume.

⁹ Tonda, sul kwising arye, aning-aning nirya akunum dipliba, yakong atonun ning el si ara, gandum ap, anggur tapu duk purubikiba, anggur mek nirya ap, Allah Yahweh el arena ati, el si eren aik delilbalamik ning nirya ara, akunum kum danamale. Winipmalba, Allah Yahweh el yupu nyan aik, pia talibuka tuba-tuba pil donyak nang, imam-imam ara, ‘Se, nun ni Allah ati, kum areptibye’ tenen, malye yupu nyabuka engenmake.

¹⁰ Wini talak wa win dam nirya ara, wa wibuka kouamik ning nirya, akunum malye kibuka kum danmale. Ati tuku babye malye kanye bobuka engelule. Ara, talye ati kume, yakong atonun ning gandum ap, anggur tapu duk ap nirya ara, akunum koluplirye, kum kipdeipnule. Tonda, nintong teleb leplirye, tilil weik ulul yo, el si zaitun yo babye, akunum kum dale nyabuk.

¹¹ Ati, se anggun wa wibuka yala koululum ninye nirya ap, anggur tapu talilulum ninye nirya ap ara, malye kanye bopmunce, ngalukuka engeplulume. Tonda, wa wina kel bikimunce, wilulum nang nirya babye, engeplulume. Ara, anggun kouamunye ning, gandum ap, jelai ap, duk moupliba lilulum ning nirya ara, malye kiplirye, kum lipnamlume ati, engenamlulume.

¹² Tonda, anggur tapu duk moulamle tapu nirya ap, wa win dam tikilye yo nirya ara, akunum koluprople. Ara, yo si ara yo ap, delima yo ap, kurma yo ap, tonda yo si apil yo duk ap, nirya kolupropleba, ninye nirya kanye deibuka kum unamakce, malye yupu nyabuka, engenauk unmake. Allah arye nyapdeibukba, nabi Yoel birye sekuk.

“Anggun malye winin ning batakmunce, Allah ati moronamlume,” nyabuk yupu

¹³ Nabi Yoel birye nyabuk. Se, Allah Yahweh el si eren aik koproba noutam talibuka, Allah si erena ati, kam ning obuka, uku dongolalum nang, imam-imam nang nirya arye, malye kanye bobuka engepnamlume. Anggun Allah si eren aik noutam, ongobuka pil dolulum baju kwiribuka batakmunce, malye baju arye, kisok kwatibuka malye yupu nyapmunce, engenamlulume. Ara, lukunyan noutam nirya ngalukuka, malye yupu nyabuka engenamlume. Deiyok ara, sul kwising arye, anggun wa kouamunye ning nirya, dibuka sirya dakanmaka ati, Allah arin ning ati, gandum ap, anggur mek ap, kum arelyanganamaka ati, malye yupu nyabuka, engenamlulume.

¹⁴ Ati, sik Israel ninye nirya ati nyapminyeba, din dina kumce, si tebuka ukirye, ‘Dipkoprop asum ara, weik mambul sum’ tenen, ninye weik bulubuka yakirye, yupu talipnamake. Atalak ara, amutuku ninye deiyok nang ap, wisi-wisi nang ap, tonda Yehuda yala nang ap nirya ati, yukupmunyeba, sik nirya arye, Allah el si eren aikuk bulubuka yakirye, Allah Yahweh el tibuk, ‘Se, nun ni Allah Yahweh, ance melipsilyame,’ nyabuka moronamake.

¹⁵ Dipkoprop sik nirya ara, bicoe. Allah el si Yahweh, elce ninye nirya, sik malye winin ning dekna ati, wenepnamle sum akunum dam uple. Ara, Allah aning-aning nirya talibuka, mikip weik ulinye birye, ikin ning deipsiliba, kanye imun upnamsile.

¹⁶ Aning ara, laka akunum upmasile. Nun asing arye eilinyap din ning nirya ara, akunum kum danin banmasile. Winipmala deice arye, nun ni Allah el si eren aik koproba ara, ton kanye deibuka, pil kum donyake. Malye kanye bobuka, engenauk unyake.

¹⁷ Tonda, yala ning nirya ara, wa wibuka kouptinga babye, ilim tuku deice anye arye, akunum sesal lebuka kolulonauk unamle. Tonda, gandum delina aik babye, moubuka kum deiptibye. Gandum nirya akunum kum danmala ati, adeice arye din ning delina aik ap, bon-bona delina aik ap ara, talye louk upmale. Winipmala ati, pia kanye imun upsile.

¹⁸ Tonda, kambing basam ap, sapi basam ap nirya ara, sik din ning nirya koluplirye, sesal lebuka koulupmale. Koulupmalba, maning kwapu kum dinmak arye, mikip kum upmalba, weik arye ngalukuka, malye yupu nyanmake. Aning atonun, domba basam babye, sik din ning kum danmala ati, ngalukuka malye yupu nyanmake.

¹⁹ Ati, na ni Allah Yahweh anti, ‘Ancuk melipsutume’ tenen, moropkine. Ara, maning palamle mutuku nirya ara, akunum sesal lebuka koluprople. Tonda, yo noutamak nirya ara, akunum koluprople. Winipmala ati, uku ina ibikiba, uku buk dilirye, buppu epmalye maning nirya kolubuka, sulsaklamle atonun, akunum winipmasile.

²⁰ Tonda winipmala ati, talye bai tam unyak kam ning nirya arye, Allah anti, ‘Melipsilyame,’ nyabuka moronmakiyake. Ara, sik aning arye dinyak mek nirya ara, akunum cebuka kum danmalba, sik din korokna nirya sesal sepropmala ati, nyanmake. Nabi Yoel birye, Allah ati nyabuka morobuk.