Yesaya 9 - Eipomek

Ninye Lyena Deiyoknye, dotalak yanamuk ning ati, nyabuk yupu

¹ Allah arye nyapdeibukba, nabi Yesaya birye nyabuk. “Allah ati dib kum tenenyak ninye ara, ikin ning weik upliba, imun kanye bonamak bukni, aminyan talak ara, aning nirya, tamubuka teleb kipdeipnamsile. Min yuma ara, Zebulon yala ninye unyak mutuku ap, Naftali yala ninye unyak mutuku ap ara, amu tam kipdeipliba, ikin weik unamak bukni, aminyan doupnamle talak ara, yuk otam mutuku teleb kipdeipnamle. Ara, Galilea mutuku, sik Yahudi yala kum ninye ap, ansinibuka unyak mutuku, teleb kipdeiplirye, yuk ninye nirya arye, amutuku ati, ‘Se, amutuku ara, mambul weik mutuku,’ nyabuka kanye delinamake. Ara, Galilea tam bukni, weik laut mekwen dam ap, Yordan mek balamuk tam ap, teleb kipdeipnamla ati nyapsine,” Yesaya birye nyabuk. Tonda, aminyan dowinipnamle ning ara, Allah arye amutuku nirya, teleb kipdeipnamuk ning tenena ati, Yesaya birye ayupu kekebukce, dukdongobuka sekeibuk. Ara, aminyan dowinipnamuk ning ati, laka nyabuk.

² Minop talak, ikin ning weik ulamukba, pia imun kanye bobuka unyakakuk ulamik ninye ara, atalak noutam, dirin weik ulul ning akunum eipmake. Ikin ning ap, ninye dipna ap, weik ulamuk mutuku noutam ulamik ninye ara, wini talak ara, weik dirina ning akunum eipmake. Ara, beren tam talak keting panaplirye, dirina weik ulamle touk, aninye arye dirina atonun ning, weik mambul ning akunum elinmake.

³ Sik Yahudi yala ninye ara, ikin weik ulamikba, sik yala ninye ara, mitik kipnin balamuka ani, kum danmanto ulamik bukni, Allah ance, sikti, meliamluma deice arye, wini talak ara, sik ninye yupa weik tabikirye unamake. Tonda, ance winipminba, kanye weik deibuka, telebuk upnin banamake. Ance sikti, meliamluma deice arye, kanye deibuka pia teleb unmake. Winipmanto ning ara, ninye arye wa wibuka, sik koulamak ning nirya, akunum nong weik uplye talak ara, aning nirya libuka deibikirye, pia kanye deibuka teleb ulamak touk, wini talak ara, sik Yahudi yala ninye kanye deibuka, pin-pin asa arye unyake. Winipmanto ning ara, ton tam nang arye, yuk tam nang ati, obuka sirya dakikirye, amutuku talilamikce ning nirya, dalubuka doprobikirye, kanye weik tonun deibuka, pin-pin asa arye ulamak touk, wini talak ara, sik Yahudi yala ninye arye, kanye deibuka unyake.

⁴ Winipmanto ning ara, yu weik nang arye, sik obuka, sirya dakice ninye ati, kama arye debuka olamak touk, nun obuka sirya daksik ninye arye, ikin weik, nun nong deice delilamsik ning nirya ara, Allah an mikip deice arye, akunum kum kipdeipmasilama ati, kanye deibabe. Minop talak, Gideon ap, el yin talin nang ap, ninye mitik tonunuk ulamik bukni, an meliamluma deice arye, sik Midian tam ninye mikip weik ulamik bukni, anang nirya obuka, sirya dakik touk, wini talak ara, ance nunti akunum melipmasilamba, telebuk unamabe.

⁵ Tonda, sik yin talin nang arye, yan ongon ning sepatu ap, baju ap, ongopna arye, ninye olamikba, ining pakuk ning nirya ara, uku dapnamabe. Uku dongobipyopura, aning nirya uku arye dipnamlarya.

⁶ Aning nirya ara, talye ati kum nyanyabe. Aminyan talak, pia telebuk wininamsil ning deiyok ara ani. Ara, Allah arye tenelamsuk touk, wini talak ara, nun lyena ati, sal mi tonok akunum deipmasirake. Allah arye weik mambul mi akunum kintinibuka arepmasile. Nun lyena ati, ami akunum arepmasil mi elda, aminyan talak aning-aning nirya talibuka, nun ninye deiyoknye unamsile. Winibuka daulamepya ani, ninye nirya arye, el si erebikirye, el si ati nyanamak ning ara, ani. Pia Mambulnye ulule. Ninye melina ati, Kanye Talima Kwadina Deiyoknye ulule. Pia Mikip Weiknye Allah ulule. Nun Ni Allah, Pia Kam Unamlanye ulule. Allah ap ninye ap, neika teleb una ati, Ansinilina Deiyoknye ulule. Aning-aning nirya, ninye arye el si tenibuka nyana ati, ayupu nyanamake.

⁷ Elda, aning-aning nirya ap, ninye nirya ap taliplirye, ninye deiyoknye pia aunamle. Elce aning-aning nirya, talibuka unamle talak ara, kum kumdanamle. Tonda, elce, ‘Allah ap, ninye ap, teleb ubuka neika unamak’ tenen, ansinilina deiyok kibuka unamsilnye bira, pia aunamle. Aning babye, kum kumdanamle. Minop talak ninye deiyoknye, Raja Daud birye taleamuk mutuku ap, ninye ap ara, el dem arye, pia taliplirye, ninye deiyoknye pia aunamle. Raja Daud ninye deiyoknye una ati, weik mambul bun ning deice bulamuk touk, anye babye, aning deice pia abunamle. Raja Daud birye taleamuk mutuku ap, ninye ap nirya ara, ayanamlanye, el si mikip deice arye, aning-aning nirya pia talinamle. Elce pia teleb kibuka, yupu lipsisikuka bokolinamsile. Tonda, el malye winin ning tonok babye kum winilirye, pia diksukumuk unamla deice arye, amutuku nirya ap, amutuku unamak ninye nirya ap, teleb arye talinamle. Elda ninye deiyoknye kiplirye, talinamle ning nirya ara, pia aunamle. Wini talak ap, yuk sum nirya ap, pia ati unamle. Elce pia teleb unamle ning nirya, sirya dakmanto kum unamle. Aning nirya ara, talye ati kum winipnamle. Allah Yahweh ara, aning-aning nirya talilirye, im deice yin talin malaikat nirya, sik weik deiyoknye ulule. Allah Yahweh, aning-aning nirya talibuka, deice tam ulirye, Weik Erenanye birye, pia pi dobuka, el mikip weik deice aniryuk, aning nirya dipkoprob pil dolya deice arye unamle. Allah arye nyapdeibukba, Yesaya birye sekeibuke.

Allah arye Israel nang ati, yu upliba wenepnamle ati, nyabuk yupu

⁸ Allah arye, aning-aning nirya talebuka, mikip weik ululnye arye, Yakub birye deibukba, dadeipdanin yangalamik nang ati, ayupu nyabuk. “Sik Israel mutuku unyak nang nirya ara, sik malye unyak ati, wenen ning akunum kintinipse,” nyabukba, sik Efraim mutuku unyak Israel yala nang nirya ap, tonda Samaria mutuku unyak nang nirya ap ara, ayupu kekebikce, ‘Allah arye, wenen yupu akunum nyapmasil,’ tenebuka, bikik bukni, sik anang ara, kanye erena ap, kwalina ap deice arye, ‘Yo, winipnamsila babye, daupmalye. Nunce winipnamabe,’ tenelamik.

⁹ Tonda, nun mal olan nang arye, keil wininga buk, keil kibuka memelamak ning (batu bata) arye dikuka, pia weik asik domupu bukni, nun mal olan nang arye, nun weik asik nirya ara, akunum dakuka batakikak daupnamle. Aminyan ara, nunce winiryuk pia weik asik ara, mutuku dam bulamle keilak, nun asik nirya tamubuka, teleb kibuka, lipsisikuka dopnamabe. Tonda, nun urasin teleb yo nirya ara, akunum kweplomice babye, nunce Libanon mutuku palamle keipyal yo, urasin pia teleb ning, anyak punubuka koupnamabe. Ati opsitinga babye, nunce aning nirya lipsisikuka dopnamapca” nyabik.

¹⁰ Nyabika ati ara, Allah Yahweh arye, sik mal olan nang ati, kanye mikip kipdeibuk. Ara, sik yanuka obuka malye kina ati, mikip weik kebukba, anang arye, ‘Israel tam nang olbinuyapʼ tenen, akunum kitinibik.

¹¹ Winibuka kintinibikce, keting yangan tam arye, sik Siria mutuku ulamik yin talin nang ap, tonda keting kumulban tam ulamik Pilistin yala yin talin nang ap, sik nirya arye, Israel yala aulamik nang ati, adiparyuk binuka obikce, sirya dakik. Ayu nang arye, Israel yala nang ati, obuka sice buklobik. Ura, Allah arye sik Israel nang ati, ikin ning weika arye, sik nong deice deiamuk bukni, elce, ‘Yo, akunumaʼ tenen, el yu ara, min kum lipdomuk. El yu tuba ubukba, el taruk mikip deice arye, Israel yala nang ati, tuba wenelamuk.

¹² Deiyok ara, Allah Yahweh aning-aning nirya eitam erebuka, mikip weik ululnye birye, im deice tam unyak yin talin malaikat nirya, sik deiyoknye ulule. Winibuka ululnye birye, Israel nang, sik deice ikin weik ning deibukce, wenebuka babye, sikce, ‘Se aikin deipsil ning ara, pia mambule,’ kum tenebik. Tonda, sik malye winilamik ning ati, ‘Se, nun malye winin ning batakuka, nun ni koproba Allah Yahweh, el damuk tamubuka binuka, el siuk erenamabe,’ kum tenebik.

¹³ Aning kum tenebika ati, Allah Yahweh arye, tonok talak aryuk, winipmanto, sik kisok tam ap, sik der tam ap ara sekuka, mitik-mitik kiplobuk. Ara, sik Israel mutuku noutam talibuka ulamik ninye deiyok nang ap, sik amu tam kibuka, yuk mambul pil talibuka dolamik deiyok nang ap nirya ara, tonok sum aryuk, obuka kum danaibuk.

¹⁴ Ara, dipkoprob ning ara, Allah yupu talibuka ulamik wisi-wisi nang, sik weik kel bikamik nang ap, tonda amutuku ulamik nang arye, si erelamikce, mikip ulamik deiyok nang ap, sik nirya ara, wenebuka oplobuk. Tonda, Allah arye, ‘Nyapnamlulume,’ nyalilamuk ning kekelamikce, el yupu laka nyalamik deiyok nang, nabi-nabi nang ulamik bukni, tilila yupu peterelamik nang ap, obuka kum kipdeibuk.

¹⁵ Ara, talye ati kuma. Deiyok ara, amutuku noutam ninye deiyok kibuka taleamikce, ulamik nang arye, sik taleamik nang talye bisikuk bobuka balamik. Winilamika ati, adeice arye, sik taleamikba, sik yupu kekelamik nang ara, kanye windung-wandung abuka, boktobuk arye, bokwang-wangap danuka yuk-yuk kililamikce, malye winin bisikuk balamik.

¹⁶ Sik Israel mutuku noutam ulamik deiyok nang nirya ara, winilamika deice arye, sik Israel yala nang nirya, dipkoprob bisik batakuka, malye bisikuk dobolbalamikba, sikda pia kanye kat nanguk ulamik.

¹⁷ Ati ara, Allah Yahweh arye, amutuku ulamik wel nang nirya ap, amutuku noutam ulamik youwak kilapu ap, amutuku ulamik kwaknamne mapu ap nirya ara, Allah arye, ‘Se, sikda na bico ati, amutuku nang kum wenepnamne,’ kum tenebuk. Akum bukni, sik nirya ati talye wenebuk. Winibuk ning ara, talye ati kuma. Deiyok ara, sik atalak ulamik Israel nang nirya ara, malye winin ninguk talibuka ulamikce, Allah ati kum tenelamik. Elce, ‘Aning wininamlume, aning ara, pia kum wininamlume,’ nyapdeibuk yupu nirya ara, kekena kumce, yaniltalamik. Tonda, sik nirya ara, talye-talye yupu ap, deiyok ton una kum yupu ap, talye nyalamik. Ati, Allah bico kum tenebukce, el yu ubukba, anang nirya ati wenebuk. Allah arye, sik Israel nang ati, ikin ning weika arye, sik nong deice deiamuk bukni, narye, ‘Yo, akununaʼ tenen, el yu ara, kum bapdongamuk. Elce tuba yu ubukba, el taruk mikip arye, Israel yala nang ati, tuba wenelamuk.

¹⁸ Allah arye sikti, wenena weik ning arebuka deice arye, sikda kanye imun ubuk. Winipmanto ara, amutuku noutam, sik malye winilamik ning ara, talye palamle ning ap, tatce ning ap atonun ubukba, uku buk dilamlirye, atalye ning nirya, dilolamle atonun ulamik. Tonda, ninye arye, bai mutuku noutam, uku sekiceba, weik uku buk ara, bai mutuku nirya dilamlirye, weik tulum im tam bukuka welelamle touk, ubuk. Ara, Allah arye sik malye winilamik ning ap, sik ap, obuka kum kipdeibukce, winibuk.

¹⁹ Allah Yahweh ara, aning-aning nirya eitam ulirye, im deice unyak yin talin malaikat nirya talibuka, sik deiyoknye ulule. Allah elce, sik Israel yala nang ati, pia yu weik ubukba, anang wenebuk. Yu weik ubukba, amutuku ulamik Israel nang, sikti, wenebuka deice arye, weik uku buk dilamle touk ubukba, sik taleamik mutuku nirya, uku dibuk. Sik amutuku ulamik nang nirya babye, uku buk dinmalibuk, adeice yo webuka dongolamak touk ubikba, uku arye dibuka, sirya dakuk. Tonye birye, el kwit ati obuk. Tonoknye babye, ton kum bico tenepdayik. Sik nirya arye, olanauk ulamik.

²⁰ Atalak ara, kwaning weik patan li kibuka ati, tonok asik nang arye, sik sirik tam unyak nang ati, obinuka obikce, sik din ning alubuka doprobikopura, dibuka sirya dakdobik. Bukni, kum boubukba, tuba kwaning patanuk ulamuk. Ati, sik sirik tam neika ulamik nang ati, obinuka obikce, sik din ning babye, alubuka doprobikopura, dibuka sirya dakdobik. Bukni, aning dibika babye, kum boubuka ati, tuba kwaning patanuk ulamuk. Pia kwaning patana weik ulamuka ati, sikcuk deiamik mapu ap, sik tam nang ap nirya ara, obikce, sik nong babye dipdobik.

²¹ Atalak ara, ikin weik ning upnamle ati, anggun nirya ara, Israel yala nang bukni, danoutam arye bokuka, sik Manasye yala nang ap, Efraim yala nang ap, tuba olanauk winilamik. Winilamik bukni, aninguk kume. Sik Efraim yala nang ap, Manasye yala nang ap, sik bitinye neika keprobikura, sik Yehuda yala nang ati olbinamik. Winilamika babye, Allah el yu tuba ubukba, sik anang ati tuba wenebukce, atalak babye ‘Tuba ton ap wenepnamne,’ tenelirye, kintinilule.