Yesaya 8 - Eipomek

Samaria mutuku nang taleramik bona nirya ara, sik Asyur mutuku nang arye, alupra bobinamik ati, laka nyabuk yupu

¹ Allah el si Yahweh arye, na Yesaya biti nyapnuke. “Domba bol kobuka, ketingak deibikba, mikukce, pala weik ubuk ning dopmince, adeice arye, sekin ning laka nyabuka sekeipnulyame. Aning deice sekeipnulyam yupu ara, ani. ‘Maher-Syalal Hash-Bas,’ nyabuka sekeipnulyame. Ayupu deiyok ara, ‘Amutuku nirya, minopce atu kibuka, sirya daknamlyame. Tonda, amutuku ulul ning nirya, alubuka dopnulyame,’ nyabuka seknulyame.

² Ayupu seknuminye talak ara, ance ninye bitinye yukupminyeba, aseken ning yanuka dipderikirye, ‘Asekmalam ning ara, Allah arye nyapbuk touk, pia dipkoprob sekmalame,’ nyapnamkirake. Ara, na si eren aik pum tam, pil dona deiyoknye, el si Uria ap, tonda, Yeberekya el mi Zakaria ap, yukupminyeba, yanuka dipdenurake.” Allah arye, na Yesaya biti nyapnuke.

³ Nyapnuk talak, na aik tamubuka bise. Bisirye, na kil ap neika daulamnumu ani, na kil mi bobuk. Bomuka ani, sal mi akunum deibukopura, Allah Yahweh arye nyapnuke. “Ami el si ara, ‘Maher-Syalal Hash-Bas,’ nyapnamlyame.

⁴ Ami si nyapnamlama ara, urdem ati kume. Ara, ami min kum nepsilirye, ‘Na nin, na ni,’ min kum nyapnamle talak ara, Asyur mutuku ninye deiyoknye birye, amutuku noutam yalirye, Damsyik mutuku ap, Samaria mutuku ap yalirye, sik talinyak ning aning-aning nirya, dalubuka doproplirye, el mutuku koproba tamubuka bobinamle.” Allah arye, na Yesaya biti nyapnuk.

⁵ Allah el si Yahweh arye, tonap dukdongobuka, nati laka nyapnuke.

⁶ “Na Allah arye arelamse mutuku noutam, mitang asa arye balamle mek, mek si Syiloa mek ati, amutuku unyak ninye arye, ‘Amek ara, nun like,’ tenenyake. Tonda, na Allah arye Aram mutuku deiyoknye, el si Resin ap, Israel ninye sik deiyoknye, el si Ramalya, el mi Pekah ap ati, wenepnamne ning ara, akunum kekebikce, kanye deibuka unyake. Aninye arye wininyaka ati, wenepnamne.

⁷ Amutuku ninye arye, malye weik wininyaka ati, na Allah Yahweh arye winipnamne ning ara, ani. Asyur mutuku ninye deiyoknye ap, el yin talin nang nirya ap, dopdeipniba, Yehuda yala ninye mutuku yanuka wariknamake. Sikce yanuka winipnamsiak ning ara, otam weik mek, el si Efrat mek, deibuka obukaplirye, mek kup-kup pamlye ning bobalamle touk, upnamsiake. Ara, Asyur mutuku ninye deiyoknye bira, el mambul ulul ning ap, el mikip ulul ning ap deice arye, yanuka kekepsilirye, opnamsile. Efrat mek deiplirye, mek dana-dana langdibuka balirye, auamlye ning nirya bobalamle touk, Asyur mutuku ninye deiyoknye yalirye, anggunti atonun winipnamsile.

⁸ Mek deibuka obukaplirye, okibuka, akibuka kilirye, tonok mutuku nirya mek aryuk obuka dilamle touk, Asyur mutuku yin talin nang arye, anggun Yehuda yala ninye umunye mutuku nirya yanuka wariksikirye, langdipnamsiake. Winipmanto ning ara, mekwen pum tam wekikiba, kisok dam ulamsil touk, kipnamsiake. Winipnamsiaka ara, anggunce kum lyepdatume. Tonda, maka pol arye, tonokak obuka elilamle touk, Asyur mutuku yin talin nang arye, anggun ululum mutuku nirya, alapdopnamsiake. Aning nirya winipnamsiaka ati, anggunce nyapnamlume. “Se, Imanuel, Allah nun ap neika uptibirye, melipsetue,” nyabuka, malye kanye bobuka engenamlume. Allah arye na Yesaya biti, nyapnuke.

⁹ Allah elcuk nyabuk. “Awinipnamle ning ati, mutuku-mutuku nirya, daumunye ninye ara, ayupu kekepmunce, kanye kum deipnamlulume. Anggunce, ‘Ninye olbinamap’ tenen, kanye deibuka, weik yupu nyabuka, kulmana lulamlum bukni, na Allah arye wenebuka opnamsin ati, kanye imun bobuka unamlume. Anggun yuk pera mutuku daumunye ninye ara, kekeplulume. ‘Ninye olbinuyap’ tenen, yin ap, mal ap, ya ap, aning-aning nirya kintinilinamlum bukni, na Allah arye wenebuka opnamsin ati, imun kanye bobuka unamlume. Narye anggun nirya obuka, sirya daknamsine.

¹⁰ Tonda, anggunce, ‘Yuk mutuku ninye olbinamap’ tenen, ‘Winipnuyabe,’ nyabuka yupu talilamlum bukni, narye anggunti, yupu seksinyopura, anggun tenepmalum ning, nong kum upnamle. ‘Winipnamap’ tenen, kinintininamlum bukni, anggun tenepmamunya atonun, kum wininamlulume. Atenepmalum ning nirya, kum kipdeipnamsine. Ayupu nirya nyapmasina ara, urdem ati, kum nyapsine. Imanuel nyanyak touk, “Na Allah ap, Israel yala ninye nirya ap neika unamap ati, nyapsine. Ati anggunce, ‘E Yahudi yala ninye nirya obuka, sirya daknamabe’ tenen, kanye kum delinamlulume.” Na Allah arye nyapsine.

Allah arye Yesaya biti, “Aning ara, winina pia meme,” nyabuk yupu

¹¹ Allah Yahweh arye, mikip yupu arye, nati nyapnuk ning ara, ani. Sik talye-talye daunyak nang arye, tenebuka wininyak touk, kum tenenamlyame. “Winina meme nyapkine,” nyapnuke.

¹² Yata deiyok nang do nirya, aik bublan tirikuka wekikirye, sikce ‘Winipnuyabe,’ tenebuka, nyanyak yupu ati kekepmunce, ilil una meme. Ati, sik yuk mutuku yu nang, yupu talibikirye, nyasinyak yupu kekepmunce, ‘Se, sikce nun Yahudi ninye nirya obuka, sirya daknamsiake,’ tenen, ilil una meme.

¹³ Yata nang do nirya, sikce ilil ulamle touk, anggunda ilil kum unamsulule. Bukni, biknamlulume. Na Allah Yahweh, aning-aning nirya talibuka, im deice yin talin malaikat nirya, anggun weik deiyoknye ununa ati, ilil unamsile. Nara, malye ning tonok babye kum wininirye, Pia Teleb Leknye unune. Ati, na siuk erenumunce, natibuk, ilil tenebuka umunyopura, yuk ning ati ton, ilil kum unamsulule.

¹⁴ “Anggun Yahudi yala ninye nirya ara, anggun telebuk unamluma ati, melibuka kalikinamsinanye, na tonoka. Bukni, nara yan dum duklamle keil atonun ununa ati, winipmanto ara, ninye arye bisik bakce talak ara, keil arye yan dum dukliba, kote saklamak touk, narye wenepnamsin talak ara, anggun Yehuda yala ninye ap, Israel yala ninye ap, atonun winipnamsine. Ara, narye wenen ning weik, anggun deice arepsinyeura, anggunce, ‘Se,’ tenen, kanye imun upsilirye, talima uk dinamsila ati, nyapsine. Aning atonun winipmanto ara, ninye arye, ‘Kapang youpnamle’ tenen, mana wena wemicak, kapang mangkau arye, balibuk youlamle touk, narye wenen ning weik, anggun deice arepsinyeura, anggun Yerusalem mutuku umunye ninye nirya ara, mana wena youpliba, nurulamle touk, winipnamsile. Aning akunum nyapsine.

¹⁵ Ninye arye, bisik banmace talak ara, keil arye yan dum dukliba, kote saklamak touk, anggun Yerusalem mutuku ululum ninye weik tonun, yan dum duksiliba, sakmunyopura, ila tuba tonap kam kum buknamlume. Ara, sik yuk pera mutuku, yu nang arye, anggun Yerusalem mutuku ululum ninye weika tonun, yanuka talibuka, tapu koupsikirye, sik mutuku koproba tamubuka bobinamsiake.” Allah Yahweh arye, sik Yahudi yala ninye nirya ati, nyabuk.

¹⁶ Nyabukura, nabi Yesaya birye, ayupu nyabuk. “Allah Yahweh arye, wininamsil ning nirya ara, ‘Moubuka kel kipnamlum’ tenen, sekeipnusine. Ayupu sekdeipnirye, na yupu moubuka talinyak nang arepneba, anggunce, anggun Israel yala ninye ap, Yehuda yala ninye ap arye deipmunyeba, dadeipdanin banamak ninye nirya, kel biknamaka ati, peterelbanamake.

¹⁷ Yakub birye deibukba, dadeipdanin balamika ani, deibik ninye nirya ara, Allah el si Yahweh arye, ‘Sik malye wininyak ning ara na like’ tenen, balye tamubuka, akunum batakmasile. Bukni, ‘Nun ni Allah Yahweh, dan talak tamubuka melipnamsil do?’ tenen, diba tenebuka, dinauk unamne. Nara, ‘Allah elcuk melipsutu’ tenen, Allah atibuk, diba tenebuka, el dam anyuk banamne. ‘Yuk ning arye, ton melipnutue,’ tenebuka, kum unamne,” nabi Yesaya birye, nyabuk.

¹⁸ Yesaya birye nyabuk. Na ap, Allah Yahweh arye arelamnukba, deipse mapu ap ati, Allah Yahweh elce weik mambul si akunum arepsuke. Asi moubuka tenebibya deice arye, Allah Yahweh arye, wininamsil ning nirya ara, moubuka kel biktibye. Tonda, Allah Yahweh arye aning-aning nirya talibuka, deice tam ulirye, im deice yin talin malaikat, sik weik deiyoknye ulule. El si ap, mikip ap ara, Sion mutuku deice arepsukba, ulule.

¹⁹ Elce nunti, awinipnamsil ning ara, akunum tenilamsuka anya arye, yata deiyok ati, malye nang dam asilbalyam do? Ara, asing keten nang ap, diplamice nang kanye ati, yupu talilbanyak nang ap, ‘Aminyan yata winipnamsil do?’ tenen, asilbalulum ning ara, malye winilulume. Sik anang arye duknubuka, mur-mur anyak yupu ap, merye nyanyak yupu ap ara, yata ati kekelulum do? Nun kam tuba unyap ninye arye, akunum diamice ninye, kanye arye nyanyak yupu deice arye, aminyan winipnamsil ning ati, dipkoprob kel kiptibye do, kum do? Aning ara, kum winipmanto ati, anggunda yata ati, anggun ni koproba Allah ati, kum asilbalulum do?

²⁰ Anggun ton moubuka tenipnululume. Allah arye, nati nyapnukba, sekeipmasin yupu atonun, tenibuka kum nyanyak nang nirya ara, talye nong yokuk unyake. Dan nang do nirya, na sekeipmasin yupu atonun tenebuka, kum nyanyak nang nirya ara, aminyan talak sikda dirina ak kum unamake. Sik nirya ara, dipkoprob kum winipnamake.

²¹ Anang ap, ato nang, sik yupu kekece nang ap, amutuku nirya, din pataplirye, kum uplye talak ara, imun kanye bobikirye, mutuku dana-dana nirya, din ati epra banamake. Bukni, kum eibikcopura, pia patanauk uliba, sikce sik ninye deiyok nang, Raja nang ap, sik ni koproba Allah ap ati, malye yupu nyabuka, derenamake.

²² Sik urasin erebuka, im deice dipdenamak bukni, Allah arye kum meliplyopura, ila tamubuka tukwak mutuku tam ton, ‘Yatanye birye melipsutu do?’ tenen, dilbinamake. Dilbinamaka babye, tukwak tam nirya ara, din patana ap, yuk kanye imun ning ayala-ayala nirya ap, kunukne ninguk upliba, eibikirye, ilil weik asa unamake. Aminyan talak ara, Allah arye aninye nirya dobuka, pia kunuknakuk, yakwetepnamle.

Ninye deiyoknye, aminyan talak yanamle ning ati, nyapdeiamuk yupu

²³ Bukni, anggun Yahudi yala ninye nirya ululum mutuku noutamak ara, imun kanye bobuka, unamlum ning ara, tuba kum upnamsile. Aminyan sirya talak ara, Allah arye aning nirya kum daneipnamle. Yahudi yala ninye kan-kan noutamak arye, sik Naftali yala ninye ap, Zebulon yala ninye ap arye, batakuka bindomik mutuku ara, Allah Yahweh arye, ‘Amutuku ara, mem mutuku kum,’ tenelamukce, amu kiamuk mutuku bukni, aminyan talak ara, ila tuba tonap amutuku ereipnamle. Aminyan talak ara, Allah arye amutuku noutamak nirya, teleb ubuka erepliba, yuk mutuku ninye nirya arye, amutuku ati, ‘Weik mambul mutuku’ tenen, si erenamake. Ara, keting wekelbalamle tam, weik laut mekwen dam arye dipdongobuka, Yordan mek koubuka, otam keting panalyangan tam nirya, teleb kibuka ereipnamle. Aning atonun, Galilea tam babye, yuk ninye asik nang yanuka, tia ati ulamik bukni, batakuka bindobik mutuku babye, aminyan talak, Allah arye amutuku teleb kibuka ereipnamle.