Yesaya 7 - Eipomek

Allah arye nyapdeibukba, Yesaya ap, ninye deiyoknye Raja Ahaz ap, yupu talipdarik yupu

¹ Atalak noutam ara, Raja Uzia el mi Yotam birye deiamuk mi Ahaz bira, Yehuda yala ninye, sik ninye deiyoknye Raja ulamuk. Raja Ahaz birye, Yehuda yala ninye talibuka ulamuk talak noutam ara, Israel yala ninye ap, Aram mutuku ninye ap, ‘Yehuda tam nang opnamap’ tenen, yanmek. Ara, Aram mutuku taleamukce, ninye deiyoknye, el si Resin ap, tonda, Remalya birye deiamuk mi, el si ara Pekah bira, Israel ninye taleamukce, ninye deiyok ulamuknye ap, ‘Yehuda tam ninye opnamap’ tenen, ansinibuka pibiyikce, Yerusalem mutuku warikil biyik. Winibuka warikil binuka olanmek bukni, Yerusalem mutuku ulamik ninye ati, obuka sirya dakmanto kum ubik.

² Atalak ara, yuk nang arye, Daud el yala ninye dam yupu nyalbiyikce, “Kume, sik Aram mutuku ninye ap, Efraim yala ninye ap ansinibuka, ‘Yehuda yala ninye opnamap’ tenen, warikil yanmasiake,” nyabuka, laka nyanmek. Nyabikba, sik deiyoknye Raja Ahaz birye kekenmokce, el ap, el tam ninye nirya ap, ikin kanye bobikce, sik ilil ubuk. Ara, Israel tam ninye arye, sik mutuku warikilyanganmeka ati, Yehuda tam ninye nirya ara, sik deiyoknye Ahaz ap, ilil ubukba, kanye talima nirya sirim talibukce, yo tikamli bukni, kumanya yanuka dopliba, loklamle touk winibuk.

³ Winibukopura, Allah arye Yesaya biti, nyabuk. “Telebe an ap, ance deiplum mi, el si ara Syear-Yasyub ap, birumunce, Raja Ahaz ap epranamrume. Ahaz bira, ‘Yerusalem mutuku deice tam deiamuk mekwen arye, mek banamle’ tenen, palibuka kintinibik bisik sirya unamla ati, el eipminyopura, yupu talipnamrume. Abisik ara, an kele. Ara, baju mek likilbana ati, banyak bisik ani. Abisik birumunyopura, Ahaz ap eipdanamruma ati, abisikuk binulyame.

⁴ Birumunyopura, ninye deiyoknye Ahaz biti, nyapnamlyame. ‘Anda talima mikip kibuka kanye moubuka, kintinibuka unamlyame. Bukni, ilil asa kum unamlame. Anda kanye boktopkiliba, ilil asa kum unamkile.’ Ara, Aram mutuku talilula deiyoknye Resin ap, Remalya deibuk mi Israel ninye deiyoknye Pekah ap, sik yin talin nang ap nirya ati, ‘Sik nirya yakirye, warikuka opnamsiyak do?’ tenen, ilil asa una meme. Aninye deiyok nang ara, ‘Sikda mikip weik nang,’ tenelulum bukni, narye dipkoprob nyapkine. Sikda, yo uku dongobikiba dilamlye ani, lola sirika batakaltaklamle atonun, unyake. Sik min arye tenelamdik ning ara, nong kum upnamle ati, anda ilil una meme.”

⁵ “Sik anang ara, Aram mutuku talibuka ulul ninye deiyoknye, Resin ap, Efraim yala ninye ap, Israel yala ninye sik deiyoknye Pekah ap, yupu talibikce, ‘Yehuda yala ninye obuka sirya daknamabe,’ tenenmakce, yu weik ubukba, anggun dam yanmak bukni, sikti, ilil una meme.

⁶ Sikce tenepmaka ara ani. ‘Nun nirya arye, Yehuda yala ninye unyakak binuka, warikuka obibirye, sik unyak mutuku ap, sik aik ap nirya, dakuka atu kiplopnamabe. Winibibirye, nun kwit Tabeel el miuk, amutuku talibuka, ninye deiyoknye unamle. Amutuku nirya ara, bokdopnamabe’ tenen, yanamake.”

⁷ Sik anang ara, utenenyak bukni, aning-aning talibuka, deice tam unirye, pia Weik Mikipnye Allah Yahweh arye nyapkine. “Na nyalinye touk ununa anya arye, sikce, ‘Winipnamabe,’ tenenyak ning ara, dipkoprob nong kum upnamle. Sikce tenepmak ning ara, kum winipmanto unamaka ati, talye urdemuk unyake. Aning ara, pia dipkoprob kum kipnamsiake, nyapmasine,” Allah arye nyapnuke. Nyapnukopura, ayupu ton nyabuk.

⁸ “Ayupu ara, talye ati kum nyapkine. Deiyok ara ani. Aram mutuku ninye deiyok nang unyak sukum ara, Damsyik mutuku unyake. Ati Aram mutuku deiyok ara, Damsyik mutuku mikip mitik tonun ulul touk, sik Aram mutuku ninye nirya babye, mikip mitik tonun unyake. Tonda, Damsyik mutuku babye atonun, mikip weik kum ulule. Amutuku talibuka, ninye deiyoknye Resin bira, el mikip mitik tonun ulul touk, el ulul mutuku Damsyik mutuku deiyokak babye, mikip mitik tonun ulule. Aminyan talak, keting tamun enam puluh lima (65) tahun ton, akunum kiplyopura, narye nyapniba, yuk nang arye, Efraim yala ninye nirya obikirye, sirya dakmanto upnamake.

⁹ Aning atonun, Efraim yala ninye, sik mutuku deiyokak ara, Samaria ulule. Samaria mutuku talibuka ninye deiyoknye bira, Remalya birye deibuk mi, Pekah ulule. Samaria mutuku ninye ap, Pekah ap ara, mikip mitik tonunuk unyake. Sik mikip weik kum anya arye, anang ati ilil kum unamsulule. Ati, na dipkoprob yupu nyapkine. Kanye bokoltona kum diparyuk, anggunce, ‘Allah elcuk melibuka kalikinamsile’ tenen, pia pi dobuka, diba kum tenepnumumnyopura, teleb kibuka kum unamlume.” Allah arye, nabi Yesaya biti, nyapdeibukba, Yesaya birye, Raja Ahaz biti nyabuk.

Allah arye arepliba, Imanuel nyanamiknye, yanamuka ati, nyabuk yupu

¹⁰ Ton talak ara, Allah el si Yahweh arye, nabi Yesaya deice, ayupu nyapdeibukba, Yesaya birye, Raja Ahaz biti, tonap nyapdeibuk yupu ara, ani.

¹¹ “Ahaz, ance si erelyam Allah, el si Yahweh ati moronulyame. Ara, ‘Allah arye yata ning ton pitin kipdeipsutuba, eiptibirye diba teneptibye do?’ tenen, moronamlyame. Allah Yahweh elce anggunti, pitin kipdeipnamsil ning ara, ninye dipna arye banyak sukum ara, yukak outam do? Im deice tam do? Ance tenepminye touk, moropminyopura, Allah arye pitin kilin ning arepsutuba, ikin kum uptue.” Allah arye, nyapdeibuk.

¹² Nyabuk bukni, Ahaz birye, tamubuka nyabuk. “Se, narye pitin kilina ning ati, kum moropnamne. Deiyok ara, narye na ni Allah Yahweh ati, kum asipdenamne,” nyabuk.

¹³ Nyabukura, nabi Yesaya birye, tamubuka nyabuk. Se, nun apu koproba, Daud birye deibukba, dadeipdanin yangalamlum ninye nirya ara, kekeplulume. Anggunce yuk nang ati, ‘Derepsicak do?’ tenena kumce, winililulum ning ara, mitik malye winilulum bukni, ‘Allah arye derepsilyak do?’ tenena kum diparyuk, elti, winililulum ning ara, pia malye weik anya arye, yata ati winilulum do?

¹⁴ Ati, wini talak ara, Allah elcuk apeten kina ning ara, anggun dam pitin kipnamsile. Aning ara ani. Dipkoprop ninye dona kum wel kil tonok arye, mi bomlya ani, sal mi deipnamle. Akunum deiplyopura, ami el si ara, Imanuel nyanamake.

¹⁵ Ami deibikcopura, nepnin balamlya ani, kanye wisiplirye, din el yuk dobuka dilye talak ara, ‘Malye winin ning ara ani, teleb winin ning ara ani,’ tenen, teleb winin ninguk, wibuka teneplirye unamle. Malye ning nirya ara, kum wininamle.

¹⁶ Aning nirya, min kum winiplye talak ara, ance, ‘Se atam nang ara, mikip weik nang arye, obukapsikirye, sirya daksicak’ tenen, ilil ulye nang nirya ara, na Allah arye kum kipdeipnamne. Ara, Aram mutuku ninye ap, Pekah birye talilul Israel ninye ap nirya ara, narye wenepnirye, kum kipdeipnamne. Amutuku-amutuku nirya ara, malye kipdeipnamne.

¹⁷ Ara, na Allah Yahweh arye, winipnamaka ara, laka nyapnukine. Narye nyapniba, sik Asyur mutuku ninye arye, an ap, ance talilyam ninye ap, an ni birye deibukba, dadeipdanin yangalamik ninye ap, an mapu koproba ap, aninye nirya ati, anggun nong deice, ikin ning weik deipsikiba, imun kanye bonamlume. Sik Efraim yala ninye ap, Yehuda yala ninye ap, kanye talima wilipdanamikce, bokuka yuk-yuk kiyamik talak ara, ‘Aning ara, weik mambule,’ tenelamlum bukni, aminyan ikin upnamsil ning ara, weik ikin ning unamsile. Ara, na Allah Yahweh arye, Asyur mutuku yu nang ap, sik ninye deiyoknye ap, dopdeipniba, anggun Efraim yala ninye ululum mutuku ap, Yehuda yala ninye ululum mutuku ap yakirye, obuka sirya daknamsiaka ati, nyapkine.

¹⁸ Atalak winipnamle ning ara, Allah Yahweh arye, Mesir mutuku nang ap, Asyur mutuku nang ap, bokdeipliba, abitinye mutuku yin talinyak nang ara, ninye weik tonun yanamake. Ara, winipmanto ara, Mesir mutuku noutam, Nil mek deice deibum weik tonun arye amulamle touk, anang ara, weik tonun arye, anggun mutuku olyanamsiake. Tonda, winipmanto ara, Asyur mutuku noutam mong yupa weik ulamak touk, sik Asyur nang ara, weik tonun, anggun mutuku olyanamsiake.

¹⁹ Ayu nang dopdeipniba, anggun umunye mutuku noutam, akunum yakirye, yupa weik bulubuka weknamaka ara, winipmanto ara, arulongonak ap, keil pum bisik ap, kot dam ap, mutmuta pabuka tililamleak ap, mekwen delilulak nirya ap, deibum weik amulamle touk, anang ara weik tonun, anggun mutuku yakiba, langdipnamle.

²⁰ Ura atalak ara, Allah el si Yahweh arye Efrat mek otam Asyur mutuku nang boyalirye, winipnamsil ning ara, ani. ‘Sik Yahudi yala nang nirya, alye dakdanamak’ tenen, anggun potong nirya kopnamsiake. Ara, yata nang do nirya, anggun kisok potong ap, nong potong nirya ap, yan potong ap, bam potong nirya ap kopsikirye, kum kipdeipnamsiyake. Winipsikcopura, alye weik dakalanamlume.

²¹ Atalak ara, sik Mesir mutuku nang ap, Asyur mutuku nang ap, anggun Yahudi yala ninye umunye mutuku noutam, talibuka koululum ning nirya ap, anggun talibuka weilulum ning nirya ap, kum kipdeipnamsiake. Winipnamsiaka ati, yatanye do, sapi basam tonok uaptopura, kanye deipnamle. Domba basam tonokuk awaptopura, kanye deibuka unamle. Deiyok ara, yuk din ning aning-aning nirya kum danamla anya arye, abasam bitinye arye, moum yunguk dobuka diptuopura, kam uptue. Tonda, buru tam mong mekuk dobuka diptuopura, kam uptue.

²² Sik yu nang arye, Yahudi yala ninye umunye mutuku nirya, sirya daknamsiak bukni, amutuku noutam ninye mitik anunuk bataksikiba, kam unamak ninye nirya ara, dipkoprob moum yung ap, bai tam mong mek ap, dibuka unamake. Yuk din ning, aning-aning nirya kum danamla atia.

²³ Tonda, atalakuk, dan mutuku do nirya, anggur wa wilamice ning ara, dekna pia weik, perak 11 kilo deice arye deklamting bukni, teleb ning, wa win dam nirya, sik yu nang arye kum kipdeibicopura, sik dekna weik ning, anggur wa wilamicak, tace ning ap, talye mutmuta ap, punubuka papnamle.

²⁴ Winipliba amutuku banamak nang nirya ara, ‘Anggur tapu duk dakuka linamap’ tenen, kum binamak bukni, sikcuk pi dobuka, yin ap mal ap, bobikirye binamake. Amutuku nirya ara, tace ning ap, talye mutmuta ap uk, papnamla ati, nyapkine.

²⁵ Ara, mutuku bukamlye dam, wa wilamicak nirya, kum binamlulume. Ara, amutuku nirya ara, tace ninguk papnamla atia. Winipliba, ninye arye, awa win dam kum binamak bukni, amutuku ara, sapi basam ap, domba basam ap, wein tuku uk upnamle. Allah arye, nabi Yesaya biti nyapdeibukba, Yesaya birye, Raja Ahaz biti, laka nyabuk.