Yesaya 66 - Eipomek

‘Mutuku-mutuku nirya ulul ning nirya ara, Allah aryuk kwepdeibuke,’ nyabuk yupu

¹ Na Allah Yahweh im deice bukuka ununye birye nyapsine. “Winipmanto ara, tukwak mutuku ninye deiyok nang arye, weik bun ning deice bukikirye, yupu bokolilamak touk, nara, im deiceuk, pia bukuka unune. Im deice ununa anya arye, tukwak mutuku ara, yan dikdik sena ati delilamak touk, unune. Ati, yata wiribuka aik doptumba, anyaik pum tam dikdik sebuka uptinye do?”

² Na Allah Yahweh arye nyapsine. “Tukwak mutuku noutam ulul ning nirya ap, im noutam ulul ning nirya ap ara, na taruk koproba arye, kwepdeipsiba ulule. Kanye talima erena kum, ‘Se nun malye unyabe’ tenen, ilil upliba, nimalyap asa unyak ninye ati, na kanye delinune. Tonda, sik malye unyak ning batakikirye, narye, ‘Aning ara wininamlulume, aning ara, kum wininamlulume,’ nyalisinye yupu nirya ara, moubuka kekebikirye, talibuka unyak ninye ati, na kanye delinune.” Allah arye, Israel ninye ati nyabuk.

³ Bukni, anggun Israel yala nang ara, anggun kanye aryuk, ‘Winipnamabʼ tenen, malye tenelulum ninguk winilulume. Ara, anggunce isa el siuk erelulum deice arye, pia malye ning weik winilulum bukni, tonda, ‘Allah ati arepnuyabe,’ tenelulumce, na arena ati, yuk ning ton arenululume. Winiplulum ning ara, pia malye uka. Ara, yatanye do nirya, yim sapi basam obuka, Allah el si erena ati boyanuka arebikce talakuk, anang aryuk, sik mapu ton obikirye, isa si erena ati boyanuka arelbanyake. Tonda, domba basam mi winiryuk weinye nenmalye ning, na Allah ati binuka arebikce talakuk, sik anang aryuk, sik Kanaan tam nang ulamak touk, kam dobuka, el ngang talibuka bobikirye, isa si erena ati arelbanyake. Aning atonun ton, gandum duk boyanuka, na Allah si erena ati, yanuka arebikce talakuk, anang aryuk, sik Kanaan tam nang ulamak touk, basam ining boyanuka, isa si erena ati binuka arenyake. Tonda, gandum duk teikikirye, nintong teleb mek, el si kemenyan tabakikirye, na Allah ati, telebe nyana ati ara, na si erenyakce, aning dobuka, uku dongonmakce talakuk, anang aryuk, sik Kanaan tam nang ulamak touk, isa si erena ati, isa urasin atonun ning memebuka deiamik ning ati, ‘Nun ni telebe,’ nyabikirye, aisa si erenyake. Ati ara, sik amalye ning talibuka unyak nang nirya ara, na bataknikirye, sik kanye aryuk, ‘Winipnamabe,’ tenebikce ninguk ubuka, pia malye ning ukirye, aning nirya ati, kanye deibuka unyake. Aning nirya ara, pia malye weik wininyake.

⁴ Aning wininyaka ati ara, na babye, na kanye tenipnye touk winipnamne. Aning ara, narye anggunti, ‘Na nyapdeipse yupu moubuka talibikirye, natibuk dobolyanganamniakʼ tenen, anggunti yukupsisirye, yupu nyapsise bukni, atalak ara, sikce tamubuka yupu kum nyapnike. Tonda, narye, “Aning ara, wininamlume, aning ara pia kum wininamlume,” nyabuka, sik dam mambul yupu nyalamse talak babye, anggunce na nyapdeipse yupu moubuka kum kekelamnik. Na yupu kekena kumce, sikda malye un ninguk talibuka ulamik. Ara, narye, “Anggunda pia malye un ning ara, na pia like, awinin ning ara, na lik anya arye, pia kum wininamlume. Aning nirya ara meme,” nyapsirye, ‘Na dam ara, aning nirya ara, pia malye weik ulule,’ tenyamse ning ara, sik malye kibuka winilamikce, amem ninguk tuba talibuka ulamik. Sik lik tenebuka batakikirye, malye ninguk, pia weik tonun wininyaka ati ara, narye anggun wenepnamsine. Ara, sik aning wininyak nang nirya ara, weik tonun wenebuka opnamsine. Anggunce, ‘Se, dipkoprob kanye imun ning ara, aning ton, aning ton, nun dam yangasululeʼ tenen, ilil pia weik ukirye, kanye imun kanye bobuka, unyak ning dobuka, anggun deice deipnamsine! Allah arye sik Israel yala nang nirya ati nyabuk.

Allah arye, Israel nang, sik kanye melina ati, nyabuk yupu

⁵ Nabi Yesaya birye, sik Israel yala nang ati nyabuk. Allah Yahweh arye, akunum nyapdeipsuk yupu ara, moubuka kekepnamlume! Ara, yata nang do nirya, sikce Allah nyalul yupu moubuka kekenamak nang ati nyapsine. Allah Yahweh arye, ‘Aning ara, wininamlume, aning ara, kum wininamlume,’ nyabuka nyasulul yupu nirya ara, moubuka kekebikirye, ‘Se, malye ubibiba, Allah arye wenepsilyakʼ’ tenen, ilil upliba, sirim talibikirye, el yupu uk moubuka talibikirye, dobolbanyak nang ati, nyapsine. Anggunce nati, diba tenibuka, ilil tenebuka moubuka ululume. Anggunce ululum bukni, yuk Yudea tam unyak nang, anggun dam unyak nang ara, anang arye anggunti, malye yupu nyapsikirye, ‘Anggun arye, ‘Allah ara, ila mambulnye ulula ati, el yupu uk talibuka unamyabe,’ nyabuka ululuma ati, nunce anggun ati, nun like. Anggun ap neika una ara, nun like,’ tenepsikirye, nalisinyake. Sik anang ara, nalibikirye, nyanamsiyake. “Wini talak ara, nunce moubuka dinamabe. Allah el mikip weik ap, el teleb una ap deice arye, el dirina, anggun dam lak sukum kipdeipliba, weik tonun kanye deipmunyopura, nun ton aning nirya eilinamabe,’ nyabuka, nalibikirye, ikik-ikik nyanamsiyake. Nyasinyak bukni, dipkoprob aminyan talak ara, ayupu nyanyak nang ara, na Allah arye, sik tibuk wenepniba, sik diamuk alye dakdanamaka atia.

⁶ Tonda anggun nirya pia moubuka kekepnamlume! Amutuku weik asik donyakak noutam arye, weik lelim nyanamake! Tonda, Allah el si eren aik domika pum tam arye, Allah Yahweh aryuk, weik yupu deice arye nyapmale! Aning ara, Allah Yahweh ati, “Nun like, elce, ‘Winipnamlume,’ nyapdeipsuk yupu ara, nun like! El tam kum kipdopnamabe,” nyabuka, Allah ati, sikce mal pinyak nang ati ara, Allah arye sikti, nyapmale. Ara elce, “Amalye weik wininyak nang ati ara, anggun kwang dana ati, weik tonun wenepnamsine, winipnamsine,” nyanmala deice arye, lelim weik kekenmabe.

⁷ Allah arye sik Sion mutuku nang ati, winipmanto yupu nyapmale. Ara ani. Kekeplulume! Anggun Sion mutuku ululum nang ati ara, winipmanto yupu nyapsine! Tonok kil arye, mi kanam kum bomuk talak bukni, el mi akunum deiamuk. Tonda, akil ara, mi deiya dina kum deice aryuk, el mi akunum deibuk. Ara, mi deipnukce talak ara, uk kum dibuk diparyuk, el sal mi akunum deibuk.

⁸ Bukni, yata nang arye, ato ning eibikce, ‘Aning winibuke,’ nyabuka lak nyalamikba, yuk nang nirya ton, anye yupu kekelamik do? Yata nang ton atonun ning winibukba, el asing arye eibuk do? Kume, aning ara, kum winipmanto. Tonda, anggun tenipdelulume! Tonok sum noutam aryuk, ninye arye weik asik uamlye ning nirya, adiparyuk dobuka kintinip deipting do? Tonda, tonok sum noutam aryuk, ninye yala tonok arye, sik mapu deiptingba, dadeipdanin, yangalamika ani, asum aryuk, tonok weik mutuku noutam binuka langdiptuba, ninye weik tonun upting do? Kume, aning babye kum winipmanto. Bukni, winipmanto ara, kilapu mi deiya winiryuk deiyok koubuka, uk dinmalyopura, adiparyuk mi deiptu atonun ubuka, Sion mutuku ara, tonok sum deice aryuk, el mapu nirya adiparyuk tonok talak aryuk deibuk

⁹ Tonda, anggunce tenipdelulume! Na Allah Yahweh arye nyapsine. Winipmanto ara, kilapu arye mi deipnukce talak dam upliba, mapu delina deiyok ning arenunye birye, aning batakniba, sikcuk mapu deipting do? Tonda, mi delina dam upmatu bukni, narye mi yangan bisik adiparyuk sekdongopnamne do? Kume, aning ara pia kum winipnamne. Kume, anggunce si erenumunye Allah ara, na akunum unune. Narye anggunti pia melibuka kalikisunune. Nara, mi delina deiyok ning, arena deiyoknye ununa anya arye, aning nirya ara, dipkoprob kum winipnamne. Kume, narye, ‘Winipnamne-winipnamne,’ nyabuka, nyalin yupu deice nyamsise ning nirya ara, dipkoprob aninguk winipniba, dipkoprop aning nirya nong upnamle! Na Allah Yahweh arye nyapsina anya arye, na tenyamse ning nirya ara, dipkoprob nong upnamle!

¹⁰ Ati ara, yata nang do nirya, anggunce Yerusalem mutuku weik asik unyak nang ati, tenepmunce, kanye pia delilulum nang ara, kanye weik deibuka, pin-pin asa arye unamlulume. Tonda, minop talak yu nang arye yanuka, Yerusalem mutuku weik asik ulubuka sung-sunga buklobikba, kanye imun ubukba, anggunce, ‘Seʼ tenen, malye kanye bobuka engelamlum nang nirya ara, atalak aryuk, anggun Yerusalem mutuku unyak nang ap, tonok kanye bobuka, neikauk kanye weik deibuka, pin-pin asa arye unamlulume.

¹¹ Yerusalem mutuku ati, kanye deibuka unamluma deiyok ara, ani. Ara winipmanto ara, kilapu arye deibice mapu, el moum yunguk pia tuba arelamliba, dinmalya ani, boupliba kanye deibuka, talye mangkau asa teleb ulamle touk, anggun babye atonun ubuka unamlume. Deiyok ara, aminyan talak Yerusalem mutuku tuba tamubuka pia teleb kipdeipniba, amutuku noutam arye, pia teleb ning yala-yala nirya weik tonun aupliba, anggunce aning dobuka dipmunce, talibuka unmamunya ani, teleb kanye bobuka unmamunce, dakeiam asa teleb arye unamlume. Aning atonun, na Allah arye anggunti, teleb kipdeipsiniba, pin-pin asa unamlume.

¹² Aning nirya ara, talye ati kum nyapsine. Deiyok ara ani. Ara, na Allah Yahweh arye, ayupu nyapsina anya arye, nong dipkoprob upnamlarya. Winipnamsina ara, ani. Narye anggun Yerusalem mutuku nang ap, amutuku nirya ap ati, tuba tamubuka pia teleb kipdeipnyopura, aning-aning nirya ara, yamubuka arepnamsine. Winipnamsin ning ara, winipmanto yupu nyapsine. Ara, weik mek pia celona kumce, mek mikip arye balamle atonun, narye anggun ati, aning-aning nirya weik tonun arenamsine. Tonda, yuk-yuk mutuku nang, yala-yala nirya ara, pia teleb bona weik tonun, Yerusalem mutuku dam boyanuka arenamsiyake. Winipnamaka ara, mitik tonun kuma. Weik mek oplirye, mikip arye pia balamle atonun, anggun dekna weik ning yala-yala nirya boyanuka, Yerusalem mutuku dam boyanuka arenamsiyake. Winipmanto ton ning ara, mapu el lin irina deice moubuka bulamakba, kanye deibuka unyaka atonun, anggun babye atonun unamlume. Tonda, mapu iribukabikirye, moum arebikiba, bouplirye, kanye delilamak atonun, narye anggunti atonun winipnamsine. Kilapu arye, sik mitik mapu dobuka sik keil deice deibikirye, lulukulongokiba, sik mapu kanye delilamak touk, narye anggun tibuk atonun winipsinirye, kanye deibuka telebuk unamlume.

¹³ Tonda winipmanto ara, kilapu arye, sik mapu engenmakce talak ara, amapu moubuka bobikirye, namin yupu nyabikirye, kaliklamak atonun, na Allah arye, anggun Yerusalem mutuku ululum nang nirya ati, anggun melisinirye, melibuka kalikinamsine. Yerusalem mutuku noutam arye melipsinyopura, anggunda kanye deibuka, talye tunim nyabuka, pia teleb-telebuk unamlume. Allah arye nyabuk.

Allah Yahweh, el mikip weik deice arye winipnamle ning ati, nyabuk yupu

¹⁴ Allah arye, sik Israel yala nang ati nyabuk. Aning nirya akunum winipnirye, anggunti pia teleb kipdeipsinyopura, anggun Yerusalem mutuku umunye nang eipmunce, anggun kanye weik deipnamlume. Tonda, na Allah arye anggun mikip kipdeipsinirye, anggun nong telebuk unamlume. Winipmanto ara, mok cepliba winiryuk yo mutmuta minopce paplirye, pia weik tonun tiklamle touk, narye melipsinyopura, anggunda pia telebuk unamlume. Aning akunum teleb kipdeipsinyopura, na amu tam pil moubuka dolulum nang ati ara, anang nirya eipsikirye, ‘Se, dipkoprob Allah Yahweh arye, el pia taruk mikip arye, el ‘Naʼ tenen, nang ati, dipkoprob melilule. Bukni, elti, ‘Nun likeʼ tenen, elti, mal olan nang ati ara, el yu upliba, sik dekna ati, weik arye wenenamle,’ tenebikirye, kel biknamake.

¹⁵ Aning ara, talye ati kume. Na Allah arye aning nirya winipnamna deiyok ara, ani. Ara dipkoprob, na Allah Yahweh arye, aning anggun wenena ati, uku bobuka yanamne. Tonda na yanamne talak ara, weik kumanya mikip asa yalirye, lelim weik nyalamle touk, tonda kuda basam arye libuka tuku deice bobalamle ning, el si kereta perang minopce bikbik abuka balamle touk, na Allah babye minopce yanamne. Aning nirya winipnirye, sik malye winin ning kwang dakna ati, na yu weik uamnuk ning dobuka, sikce nati, ‘Nun like,’ tenepnikirye, na yanininyak nang, sik dam deipniba, weik kanye imun ning upnamle. Sik ti wenepnamne ning ara, weik uku buk dilamlirye, tin weik ulamle touk, mikip weik arye anang wenebuka opnamne.

¹⁶ Aning babye talye ati kum nyapsine. Dipkoprob, na Allah Yahweh arye, yata nang do nirya, sik malye winilamak ning ton eipnyopura, na uku buk ap, na ninye on parang ya ap arye, sik malye wininyak nang, tukwak mutuku sirya, im sirya nirya noutam arye, yupu bokeipsinirye, amalye un nang nirya, obuka sirya dakamne. Aning nirya akunum winipnyopura, atalak ara, na Allah Yahweh arye, ikin ning deipnirye, wenebuka opniba, yupa ninye pia weik tonun, parang ya arye oplopniba, adiparyuk dipnamake.

¹⁷ Tonda, yata nang do nirya, anggun Yudea tam ululum nang bukni, anggun Kanaan yala nang arye malye-malye winilamak touk, sik nong bol deice ninguk mek kekuka, teleb kipdeipdakirye, yuk nang ap melibuka, isa si erenak ati, isa si eren ning memebuka deiamikca, mem wa windam bikirye, isa si erenyak nang nirya ara, obuka sirya daknirye, kum kipdeipnamne. Sik nirya ara, adiparyuk tonok talak aryuk dipnamake. Na Allah Yahweh arye, ayupu nyapsina anya arye, aning ara dipkoprob nong upnamlarya! Anang ara, Allah arye, “Aning ara, anggun nirya pia kum dinamlume. Aning dipmunyopura, na dam ton kum yanamlume. Aning ara, na lik anya arye, aning ara mem ning atia,” nyapdeipsuk ning, basam sirika ap, kop ap, kapang ap, yuk malye kam ulye ning yala-yala nirya ap, dilamikce nang ara, anirya kum kipdeipnamne,” na Allah Yahweh arye nyapsina anya arye, aning ara dipkoprob nong upnamlarya! Allah arye nyabuk.

¹⁸ Ura, na Allah arye, tukwak nang im sirya, mutuku sirya nirya ara, sik kanye tenelamice ning ap, sikce mem pil donyak ning ap, sikce wininyak ning nirya ap ara, na elilamsa ati na akunum bikinune. Aminyan talak ara, na tamubuka yanyeura, tukwak mutuku im sirya, mutuku sirya ap, ninye ayala-ayala nirya ap, yupu yuk-yuk nyalamice nang nirya ap, noutam arye sal ton, kilapu ton, bulupdeipnamne. Sik aninye akunum bulup deipnye ati, wekice talak ara, na pia teleb unye ning ap, na pia mikip weik unilye ning ap ati, dirina weik unilye ning ara, lake upliba, eipnikirye bita biknamake.

¹⁹ Na Allah arye abulubuka deipnamne nang ara, unamak noutam ara, ‘Na mikip kel biknamakʼ tenen ati, ton lak kilin ning kintinibuka deipnamsine. Winipniba, anggun anang kan-kan arye, ton nang kum oplopniba, tuba kam unamak nang ara, wibuka deipnyopura, sik anang nirya arye, na yupu ap, na unye ning ap ati, bobikirye, aning nirya min kum kekelamik nang dam binuka, lak nyalbinamake. Dopdeipniba, lak nyalbikcopura, na pia teleb unye ning ap, mikip weik arye pil dolamse ning ap, na weik eren unun ning ap nirya ara, sikce eibikirye, kekebuka kel biknamake. Ara, narye dopdeipnamne nang arye, sik dana-dana tam unyak nang dam binuka, na pia teleb unye ning nirya lak nyalbinamake. Sik nyalbinamakak ara, ani. Ara, Tarsis mutuku ap, Pul mutuku ap, Lud mutuku ap, Mesek mutuku ap, Rosh mutuku ap, Tubal mutuku ap, Yawan mutuku ap, Spanyol mutuku ap, Yunani mutuku ap, binuka lak nyalbinamake. Amutuku-amutuku nirya unyak nang dam lak nyabikiba, na pia teleb unye ning ap, na mikip weik unilye ning ap ara, kekebikirye, moubuka kel biknamake.

²⁰ Narye wibuka deipnamne nang arye, amutuku nirya peterepra banamaka noutam arye, anggun kayapu nang, Israel yala nang ton, amutuku-amutuku noutam arye dobuka, Yerusalem mutuku tamubuka boyanamake. Ara, ninye arye, Allah el si erena ati, deken ning boyanuka arelamaka atonun, sik yuk-yuk mutuku nang boyakirye, na Allah Yahweh ati, arelyanganamniyake. Tonda, anang ara, bobukabikirye, na wibuka deiamse mutuku dup, Yerusalem pia teleb lek mutuku boyanamake. Boyanamak ning ara, kuda basam balye deice buna ap, keledai basam balye deice buna ap, unta basam deice ap, kuda basam arye libuka bobanyak kereta perang deice ap, anang libuka boyanganamake. Sik amutuku nang boyakirye, na dam boyanamake. Aning ara, winipmanto ara, anggun Israel nang arye, na Allah ati, na si erena ati, gandum ning bulubuka kintinibikirye, teleb lun ning, mek loknopura, aning deipnirye, na si eren aik dam boyangalamik touk wininamake. Ara, gandum duk libuka, teleb ning deice arelyangalamika atonun, sik yuk-yuk mutuku nang boyakirye, na dam boyanganamake.

²¹ Tonda sik pera mutuku arye tamubuka boyanamak nang noutam ara, narye, ‘Imam-imam pil dona deiyok nang ap, imam pil melibuka dona ati Lewi yala nang ap, atonun kipdeipniba, anang arye na si eren aik pum tam pil donamniakʼ tenen, wipdeipnamne. Na Allah Yahweh arye nyapsina ati, aning ara dipkoprob winipnamne.

²² Dipkoprob nyapsine. Narye winiryuk im kwepdeipnamne ning ap, tonda, winiryuk tukwak mutuku kwepdeipnamne ning ap, aning kwepdeipniba, pia aupnamle touk, ‘Naʼ tenen, nang, sik Israel nang, sik ap, sik si ap, anggunce deipmunba dadeipdanin binamak nang ap, nirya ara, na dam pia aunamlume. Anggunda, min kum kum danamlume! Na Allah Yahweh arye, ayupu nyapmasina anya arye, aning ara dipkoprob winipnyopda, nong upnamlarya!

²³ Aning atonun, yata winiryuk ning kiplye talak arye, owala winiryuk wala kipnamle talak, anoutam talak nirya ara, ninye nirya yanuka, na si erenamniyake. Tonda, talye pil dona kumce, na si eren sum, Sabat sum kiplye talak arye dipdongobuka, ominggu kipnamle Sabat sum, anoutam talak nirya ap nirya ara, tukwak nang mutuku sirya, im sirya nirya unyak nang noutam ara, ton nang bulubukabikirye, na si erena ati, Yerusalem mutuku noutamuk bukni, na dam yanamakirye, na siuk erenamake. Na Allah Yahweh arye nyapmasina anya arye, aning nirya ara dipkoprob nong upnamlarya!

²⁴ Yerusalem mutuku noutam yanuka ulamikca ani, na si erebikirye, akunum sirya dakikcopura, tamubuka anyasik noutam arye batakuka, Yerusalem mutuku sakuka, bai tam bakce talak ara, na yupu yanibuka, ‘Allah ara, nun like, el yupu moubuka kum talipnamabe,’ nyabuka, nati yanaipnamniyak nang bukni, akunum obuka batakniba dipmakiba, sik nong lak upmalaya eipnamake. Tonda, anang, sik nong bol lyulamlirye dinamle ku duk ara, pia donauk unamle. Wininamle ku duk ara, pia kum dipnamake. Aning atonun, tonda sik nong dinamle ku ara, pia kum bataknamle. Dinauk unamle. Aning nirya ara, narye oplopniba lyupnamle nang nirya dinamaka arye, amalye ulilamikba, opse nang ati, ilil weik dakna ning ara, pia ulamliba, tuba kam unamak nang nirya ara, ‘Nunce adipmek nang ara, nun like,’ pia teninamake. Allah arye sik Israel yala nang nirya ati, ayupu nyabuk.