Yesaya 60 - Eipomek

‘Allah arye, Yerusalem mutuku unamak ninye ati, tamubuka teleb kipdeipnamle,’ nyabuk yupu

¹ Allah arye Israel ninye ati nyabuk. Yerusalem mutuku ululum ninyeo, anggunda mikip kipdopmunce, kanye deibuka telebuk unamlume. Anyapmasin ning ara urdem ati kum nyapsine. Allah el weik dirina dobuka anggun deice deipsiliba dirina kipmasile. Allah arye kanye deipsilirye, teleb kilinamsila ati, bukmunce, lak koprop kibuka winipmunyopura, yuk nang nirya arye sik dirina atonun ning, sik lyena ati akunum yanamal ning ara, eipnamake.

² Tukwak mutuku kunukna uk uamukce, inipdongabukba, ninye mutuku-mutuku nirya, pia weik kunuknak uk unyake. Bukni Allah el si Yahweh ara, sik dam arye, akunum yanganamle. Tonda Allah el weik dirina ara, anggun deice deipsilirye, lak koprop upnamle.

³ Winipliba, ninye mutuku-mutuku nirya arye, sik deice weik dirin ulul ning eibikirye, kanye weik deibuka sik dirinak uk dilyanamake. Tonda sik dam arye weik dirina lak koprop uplyopura, yuk pera mutuku ninye, sik ninye deiyok kibuka talinyak nang Raja-Raja nang weik tonun, adirina lak uplya eibikirye, kanye talima lipdopliba, sik adiparyuk yanganamake. Ara, pia teleb kipdeipsiniba, aning dilyanganamaka ati nyapsine.

⁴ Ati, anggun dipdelulume. Sik dana-dana tam arye, ‘Yata wiripmal do?’ tenen, ninye yupa pia weik tamubuka anggun dam anyuk yanganamake. Ara, anggunce sal mapu deiamlum ning weik tonun, pia pera weik mutuku arye anggun dam yanganamake. Tonda anggun kilmapu weik, anggun melin kilapu arye iribuka talibikirye, boyanganamake.

⁵ Aning nirya eipmunce, ‘Se, aning ara pia teleb’ tenen, pia teleb kanye deibuka, winipnamlulume. Winibuka kanye weik deipmunce, ngang kwakdupnamlume. Ara, sik aninye nirya arye, mutuku-mutuku nirya pera mutuku unyak ninye talibuka unyak ning weik tonun bobuka anggun dam boyanganamake. Tonda weik laut mekwen otam mutuku unyak ninye arye talinyak ning weik tonun, weik mek liya yo libikirye, laut mekwen deice bikirye, sik Israel ninye dam anyuk yanuka deibikiba. Langdibuka weik upnamle. Adeice arye kanye weik deipnamlume.

⁶ Aning atonun, Midian mutuku ap, Efa mutuku ap arye, boyanganamak unta basam nirya, arebikiba, dopropmunce, anggun mutuku nirya ara, sikcuk yanuka langdipnamake. Tonda Syeba tam unyak ninye nirya arye, pia dekna teleb ning emas ap, pia nintong teleb un ning, el si ara kemenyan ap, anggun dam boyanganamake. Aning-aning boyanganamak talak ara, Allah arye weik mambul pil dobuk ning ati, sik aninye nirya arye, ‘Allah elda pia mambul ulule. Elda telebe,’ nyabuka, si erebikirye sik dam anyuk aning boyanamsiake.

⁷ Tonda Kedar mutuku ninye arye weilamak domba basam ap, kambing basam ap, bobuka anggun dam boyakirye arenamsiake. Tonda Nebayot mutuku ninye arye yim domba basam weinyak ning ara, anggun dam boyanganamsiake. Adomba dopropmunce, nara Allah na si eren talak on ning ati, na arena teleb uka. Akam ning arepsikiba, anggunce, aning obuka uku dongopmunce, na Allah ati, anggun kanye deipmunce, teleb kanye bobuka unamlume. Winipmunyopura, nara Allah na si eren aik, urasin pia teleb aik ara, dirina weik arepneba, teleb uplyopura, ninye nirya eibikirye, ‘Se, Allah el si eren aik ap, Allah el ap ara, pia teleb ulule,’ tenen, sik kanye pia teleb unamake.

⁸ Winipmanto ara, kumanya arye pubuka dopliba, im noutam dua bobuka minopce balamle touk, tonda yalma maka arye, ‘Na aik binun’ tenen, lakdaka balirye, el aik lakuka balamle touk, yata ning bikbik abuka banmalyak elilulum do?

⁹ Kume, ara mekwen deice balamle weik mek liya yo, Tarsis mutuku ninye arye talibuka balamak mek liya yo, narye nyapsiba akunum kintinibuka deiamika ati, Israel ninye sik mapu libuka boyanganamake. Ara, pia pera mutuku, mekwen dana-dana tam sekdongamuk mutuku noutam, unyak Israel ninye ara, Tarsis mutuku talinyak mek liya yo wekikirye, Israel mutuku tamubuka boyanganmaka ara, anggun nirya dilulume. Tonda, dekna weik ning emas ap, perak ap dobuka, boyanganmaka ara anggun nirya dipdelulume. Wininmaka deiyok ara, ani. Ara, anggun si erelulum Allah, anggun ni koproba Allah el si Yahweh ati arenamake. Tonda Israel ninye pia kalikuka melilulnye, Pia Teleb Una deiyoknye, na Allah Yahweh, na si erena ati, boyanganmaka ara anggun dipdelulume. Wininamaka deiyok ara, ani. Ara, na Allah arye, anggun Israel ninye ati, pia teleb kipdeipsiniba, eibikirye, ‘Se, aning ara mambul weike’ tenen, sik si erebuka arelbana ati, aning boyakirye, nati arenamniake.

¹⁰ Allah arye Yerusalem mutuku unamak ninye ati nyabuk. “Anggun mutuku antanabuka weik cang keil poka doplumba, yu nang arye, ulubuka uku sice kiplomik ning ara, narye nyapniba, yuk pera mutuku unyak ninye arye, yanuka tamubuka dopnamake. Tonda, pera mutuku unyak ninye, sik ninye deiyok nang, Raja-Raja nang weik tonun, anggun Israel ninye ati melinamsiyake. Aning ara urdem ati kum nyapsine. Deiyok ara, anggun malye-malye weik winilamlumba, na yu wamnukba, minop talak narye anggun wenena ati, kanye imun ning arelamsise. Anggun malye winilulum ning ati opsitinye bukni, wini talak ara, anggunti narye tamubuka tenenirye, bico uniliba, pia teleb kipdeipnamsine.”

¹¹ Winipnirye, keting noutam babye, lukunyan babye, anggun keil poka noutam bisik bublan ara, tuba kukultakna uk upnamlulume. Winipmunba, narye nyapnyopura, mutuku-mutuku nirya unyak ninye, sik dekna weik talinyak ning aning-aning nirya ara, bobuka anggun Israel ninye ati arelyanganamsiake. Aning boyanganamak talak ara, sik pera mutuku unyak ninye, sik Yerusalem mutuku noutam menekuka baki bukni, sik ninye deiyok kibuka talinyak nang, Raja-Raja nirya ara, sik donga tam aminyan yanganamake. Wininamaka ara, winipmanto, ton tam nang arye ton tam nang ati, obuka sirya dakikirye, sik deiyok nang bobuka, ‘Tapu koubuka wenenak delilbinuyap’ tenen, ninye bisik laka balamak atonun upnamake.

¹² Wininamak talak noutam arye, ninye deiyok kibuka talinyakce unyak Raja nang ap, ninye ayala-ayala daunyak ninye nirya ara, anggun Israel ninye amu tam yanuka bukikirye, anggun amu tamuk pil kum dobikcopura, na Allah arye aninye ap, sik talinyak ning ap, sik mutuku ap ati obuka sirya daknirye, uku sice kiplopnamnarya. Aninye nirya ara, narye obuka kum kipdeipnamne.

¹³ Libanon mutuku buru tam ubukba, ‘Ara nun dokola ning,’ tenenyak ning nirya ara, bobuka anggun dam anyuk boyanganamsiyake. Anggun boyanganamsiak ning ara, pia dekna weik yo, urasin teleb yo, aning si ara, Berangan yo ap, Cemara yo ap, Eru yo ap nirya ara, bobuka anggun dam boyanamake. Boyakiba, urasin teleb yo dopmunce, nara Allah, na si eren aik urasin teleb ubuka dopnamnulume. Tonda na Allah yanilyanganamnak ara, na si eren aik ara, pia urasin teleb ubuka memep deipmunyeba, narye anyaik dirina weik deipnirye, teleb kipdeipnamne.

¹⁴ Minop talak ara, anggun obuka sirya daksikce, anggun nong deice ikin ning delilamsik nang, sikce deibikba dadeipdanin yanganamak mapu nirya ara, anggun dam yakirye, anggun tibuk si erena ati, kisok kanupdongobuka kinamsiyake. Tonda anggunti malya nyabuka yep-yep alamsik nang nirya ara, anggun damuk yanuka kekebuka weknamake. Winipsikirye anggun mutuku Yerusalem mutuku ati nyanamake. “Se, amutuku ara dipkoprob Allah Yahweh elce wipdeiamuk mutuku, el ‘Naʼ tenen, mutuku ulule,” nyabuka nyanamkiyake. Tonda, “Se, Sion mutuku ara, malye ning tonok ning kum ulirye, Pia Lyena Deiyoknye Allah ara, Israel ninye kalikuka melilulnye, el amutuku ati kanye delilule,” nyabuka, Yerusalem mutuku ati nyanamake.

¹⁵ Minop talak ara, anggun malye winilamlum ning wenena ati, narye batakamsisirye, lo arepsiba, yuk pera mutuku ninye arye, obuka sirya daksikba, yuk ninye nirya arye, ‘Anang ara nun like,’ nyabuka yep-yep alamsikba, yuk mutuku ninye arye anggun dam kum yangalamik. Bukni, wini talak ara, anggunti teleb kipdeipsiniba, pia telebuk unamlume. Narye ila tamubuka teleb kipdeipsinyeura, yuk yala ninye arye anggun Yerusalem unamlum ninye atibuk, tuba-tuba kanye deipsikirye, pia anggunti si erenamsiyake.

¹⁶ Winipmanto, kilapu arye sik mapu ati melibuka kaliklamak atonun, sikti, mikip unyak ninye mutuku-mutuku nirya ap, pera mutuku ninye deiyok kibuka talinyak nang Raja-Raja nang ap nirya arye, kalikuka melinamsiyake. Winipsikirye, sik pia teleb talinyak ning aning-aning nirya, anggun Israel ninye patasilye talak nirya ara, dekna kum, talye urdemuk arelyanganamsiake. Winbicopura, atalak ara, anggunce na si kel biknamnulume. Anggunce nati, ‘Diba elda nun Lyena Deiyoknye usulule. Elda Allah Yahweh, elcuk ulule,’ tenebuka kel biknamanulume. Tonda, ‘Nunda Yakub birye deibukba, dadeipdanin yangalamupu ninye, Israel ninye ara, Allah Pia Mikip Weiknye birye kalikuka melisulul,’ tenen, kel bikinamnulume.

¹⁷ Na Allah arye, anggun dekna ati arenamsin ning ara, mitik teleb ning kume. Teleb kat ning, el si perunggu nyalamak ninguk areptinye bukni, aning kum, pia teleb dekna weik ning, emas uk arenamsine. Aning atonun besi ning arepsitinye bukni, aning kum, el pununa ati, dekna weik ning el si perak arenamsine. Tonda mitang yo arepsitinye bukni, aning kum, el pununa ati, kat teleb ning, el si perunggu nyalamak ning arepnamsine. Atonun urasin teleb keil arepsitinye bukni, aning kum, el pununa ati, kat ning, el si ara besi arepnamsine. Arepsiniba, anggun unamlum mutuku ara, yuk nang olana kum diparyuk, pia darabuka, telebuk unamlume. Tonda, yuk yu nang arye, tapu koupsikirye, ikin pil kum arukunamsiyake. Aning kum bukni, pia diksukum kibuka, teleb ubuka winin ninguk nyapdeipsiniba, telebuk unamlume.

¹⁸ Tonda, anggun unamlum mutuku noutam arye, malye yupu nyapdakirye, olana uk kum unamake. Aning atonun, anggun unamlum mutuku ati, yuk pera mutuku yu nang arye, ‘E, Yerusalem mutuku ara, daklobibiba, kum datu’ tenen, ‘Aninye olbibirye, sik mutuku asik olonga uk kipdeipnamap’ tenen, kum unamake. Talye kanye bobuka unamlume. Amalye yupu ton nyabikiba, kum kekenamlume. Tonda, anggun mutuku Yerusalem asik antanabuka dopnamlum cang keil poka noutam ulamuk ning ara, ‘E wini talak ara, nun dana-dana tam apoka ulul touk, nun ni koproba Allah arye pia kalikuka lyesulule,’ nyabuka kanye delinamlulume. Tonda, anggun poka noutam potokolulum bublan wekenamak ninye nirya arye, ‘Se, Allah pia teleb ulule,’ nyabuka el si erebikirye, sik anyaik dam anyuk wekelyanganamake.

Allah arye, Israel ninye ati, ‘Weik dirina unamsil ning ara, natia,’ nyabuk yupu

¹⁹ Israel ninyeo, Yerusalem mutuku noutam unamlum talak ara, ‘Keting noutam talak ara, keting dirina ton upsutue’ tenen, kum patanamsile. Tonda lukunyan talak ara, ‘Wala dirina ton kipsutue,’ kum tenenamlume. Aning ara talye ati kum nyapsine. Deiyok ara, na Allah Yahweh aryuk, anggun unamlum mutuku noutam ara, na dirina deice uk pia ati unamlume. Tonda nara, anggun ni koproba Allah aryuk, weik dirina uk anggun deice deipsiniba, pia telebuk unamlume.

²⁰ Anggun mutuku noutam ara, ‘Se Sintam ara, keting otam wekelbaliba kunuknamsile,’ kum tenenamlulume. Anggun mutuku ara pia kum kunukunamle. Tonda anggun dam ara, ‘Se, lukunyan noutam ara, wala dirin ton mitik kipnin baliba kunuknamsile,’ kum tenenamlume. Ara, talye ati kum nyapne. Deiyok ara, na Allah Yahweh, na dirin aryuk, anggun unamlumak pia ati adeipsiniba, dirina pia aunamsile. Aning nirya ati, anggun ngalukuka mambul kirikuka nyalamlum talak ara, akunum nirya sirya daksile. Tuba tonap malye nyabuka, kum engenamlume.

²¹ Yerusalem mutuku talibuka unamlum ninye nirya ara, pia telebuk ukirye, diksukumuk unamake. Tonda sik unamak mutuku ara, min kum kum danamle, bukni pia atuba wamliba talibuka unamake. Ara, talye ati kume. Ninye arye ‘Nun koun ning koubikiba, aminyan paplirye, weik papnamle’ tenen, mitik yala ning doklamak touk, narye anggun Israel ninye ara, na bidamang Allah aryuk koulamakto wamsa atia. Anggunda pia teleb-teleb unamluma ara, na bidamang taruk ap, na bidamang mikip deice ap arye, mambul pil dolamseba, sirya talak ara, pia teleb unamlume. Aning nirya pil dolamse ning deiyok ara, ‘Ninye mutuku-mutuku nirya arye, na siuk erenamniyak’ tenen, pil dolamse. Ati, aning ara dipkoprob nong upnamlarya.

²² Amambul pil dopsisa arye, anggun Israel ninye noutamak arye, tonok yala nang yupa mitik wamlye babye, aminyan talak ara, mapu pia weik deibikirye, yupa weik upra banamake. Yata mitik yala nang do nirya, wini talak mitik ulamtuma babye, aminyan talak, narye teleb kipdeipsinyopura, sikce mapu weik deibiceba, ninye pia weik upliba, mikip weik ninye unamake. Aning nirya ara, na Allah Yahweh arye tenepse touk, atalak akunum oplyopura, nong dipkoprob upnamlarya. Aning ara, kume kum datue, dipkoprob upnamle. Na Allah Yahweh arye nyapsine. Allah arye nyabuk.