Yesaya 57 - Eipomek

Israel nang arye, talye ning isa si erenyak ning ati, nyabuk yupu

¹ Allah arye, “Aning ara, wininamlume, aning ara, pia kum wininamlume,” nyapdeipsuk yupu, talibuka ulamlinye bira, akunum diplyeura, yuk nang arye, ‘Se, aning ara, pia mambul’ tenen, moubuka kum kalikinyake. Tonda, Allah ati diba teneplirye, pia teleb kibuka diksukumuk ulamikce nang dibikcopura, yuk nang eibikirye, ‘E, aning ara, deiyok ani,’ tenebuka, moubuka kum bikinyake. Dipkoprob ara, Allah arye nyabuk yupu talibuka, pia moubuka diksukumuk unyak nang akunum dibikceura, atalak aryuk, ikin ning sik dam ton kum unyake. Aning nirya batakuka, yukak binuka unyake.

² Akunum dibice nang ara, sikda teleb aryuk, dikdik selbanyak ati, ikin kumce, teleb ukirye, talye kanye bobuka, tunim abuka unamake. Yata nang do nirya, sikda, Allah arye, ‘Aning ara wininamlume, aning ara pia kum wininamlume,’ nyasilye yupu moubuka talibikirye, diksukumuk unyak nang ara, ikin kanye bona ap, kanye tenina ap pia kumce teleb ukirye, sik mapmace talak ara, sik amsuna deice arye, dikdik sebikirye, teleb kibuka manyake.

³ Bukni, anggunda malye winin ning talibuka winilulum nang ara, na dam yanuka kekepnululume! Anggunce yamunyeba, narye wenepnamsina deiyok ara ani! Winipmanto ara, anggunda isa si erepmunce, ninye kerdon nang arye deililamak mapu atonun nang ululume. Tonda, anggunda pia malye ululuma ati, winipmanto ara, sikda ubula dobuka talye-talye yolalamak kilapu arye, mapu talye deiltaklamak nang atonunuk ululume! Tonda, kilapu akunum ninye domik kilapu arye, yuk nang domik kilapu dobuka, ubula yobuka, deililamak mapu atonun nang ululume.

⁴ Anggun malye weik winilulum nang ara, yata deiyok ati, malye yupu deice arye nalipnulumce, aukutupnulum do? Anggunce, ‘Elda talinye,’ tenepnulumce, malye yupu tuba nyanululum do? Anggun ton tenipdelulume! Anggunda talye tilila yupu nyan nang kum ululum do? Allah arye, ‘Aning ara wininamlume, aning ara pia kum wininamlume,’ nyapdeipsuk yupu yanin nanguk kum ululum do? Kume, winipmanto ara, anggunda malye kibuka, malye weik un nang arye, deibikba, dadeipdanin yangalamik nang atonun nang ululuma ara, dan do!

⁵ Sikce, isa si erena ap, ‘Mapu ap, din ning ap weik tonun taliptipnye,’ tenena ap, weik yo tikamlya dam bimunce, amem yo dam isa si erepmunce, yolalulume. Tonda, ‘Nun koun ning kounyabuk, isa arye yanuka melisilya deice arye, teleb-teleb kibuka bokosulule’ tenen, keil deiya dam bimunce, anggun deiplum mapu bobuka, isa si erepmunce, aisa arena ati, anggun mapu olulume.

⁶ Ati ara, weik mek balamlye lilun teleb keil, alap piting alamle keil uamlyak ara, anggunce si erelulum isa daunyaka ati, asukumuk bimunce, anggun si erelulum isa ati, ‘Nun ni melipsilyame,’ nyabuka, morolbinamlume. Anggunce na Allah ati akunum bataknuluma ati, anggun si erelulum isa aryuk, melipnamsiake. Narye kuma! Narye anggun teleb ning areamnutum bukni, anggunce anggur mek kweplumce, alap piting alamle keil deice dikilulume. Tonda, ‘Isa arye melinamsil’ tenen, aisa arena ati, gandum duk bulubuka arelulume. Ati, anggun tenipdelulume! Anggunce isa si erelulumce, areluluma deice arye, anggunti na yu unulul ning ara, kum danamle do? Anggun malye ululum ning ati, narye, ‘Anang weik tonun wenebuka opnamne,’ tenebuka kintinipsise ning ara, ‘Dauplye’ tenen, biknirye, bataknamne do? Kume, aning ara, winipmanto kume.

⁷ Aninguk kum bukni, tonda, anggun kanye deice aryuk, ‘Nunda kam ning obibirye, nun si erenyab isa arelbinamab’ tenen, weik mutuku kon welebuka, aning bobalulume. Anggunce, ‘Nun si erenyab isa arye melipsilyeba, nun mapu weik deiptibye’ tenen, amutuku kon deice welepmunce, yolalulume.

⁸ Anggunce, ‘Talya yolanamap aik ani, tenepnamak’ tenen, lakin ning sekuka, ayolan aik bublan dam deililulume. Winimunya deice arye, anggunda na Allah ati akunum bataknulume. ‘Anyasik kilapu ap, sal ap, ansinibibirye, neika yolanamap’ tenen, anggun ongolulum baju ara, akunum kwiribuka batakmunce, anggun man amsuna deice wekmunce, ‘Yata kil do, yatanye do, na ap neika mapnimirye, yopdananam’ tenen, kintiniplume. Ton nang ara, ‘Neika mana ati kintinibuka deipmunce, sik dekna ati yo bok akunum aremunce, tuba-tuba yolalulume. Anggunce, sik talye yolalamak kilapu ap, sal ap, yolanmakirye, manyakak ara, anggunce, ‘Se, aning ara, pia patasulula ati, aning winiptibye’ tenen, kanye deililulume. Anggunce, yuk nang ap neika maluluma deice arye, anggun baju ongona kumce, anggun nong bananguk elilalulume. Winimunya nirya ara, pia malye weik ululume.

⁹ Tonda, anggunce, amutuku isa el si ara, Molok, teleb minyak mek ap, tonda, ‘Nun nong deice likibyeba, tong teleb nyapnamsil’ tenen, tong teleb nyan mek ap, weika arye bobimunce, binuka sik nong deice likdeiplumce Molok si eremunce, talye yolalulume. Tonda, anggunce, ‘Yata isa ton si ereptipyeba, melipsutu do?’ tenen, ninye dopdeiplumba, pia pera mutuku unyak nang dam ati, yupu nyalbalamikce, morolamik. Aninguk kum bukni, sik, ‘Min diamik nang bobanyakak, Sheol mutuku, yuk isa ton aunyak do? Sikce ton melipsiting do?’ tenen, morolamlumba, asing keten nang arye ton dililamik.

¹⁰ Sikce, ‘Se, dan mutuku arye, nun kanye deipsutu ton eiptibirye, doproptibye do? Dan sukum arye, yuk mikip isa epdatibirye, morobibyeba, melipnamsiyak do?’ tenen, pia dipdebanauk ulamlum bukni, adeice arye, mitang upsuke. Winipsukba, anggunce, ‘Winira akunuma. Aning nirya ara, malye wininyaba ati, aning nirya arye, kum melipsutue, dauplye,’ ton pia kum teneplume. Aning kum bukni, anggunce, ‘Kume aning nirya ara, pia patanauk unmasila ati, aning ara pia dilina ap, dolona ap unamab,’ tenen, pia pi dobuka mikip aryuk, ‘Aninguk talibuka unamabe’ tenen, mikip tonap tabakuka unamlume.

¹¹ Allah arye nyabuk. “Se, anggun Israel yala nango. Anggunda, yata isa ati, ilil weik upsuka deice arye, nati minin yupu ap, tilila yupu ap nyalamlumce, nati akunum bataknulum do? Sik aisa ara, yatato wininyaka ati, anggun nirya arye, ilil upsukba, anggunce, nati tilila yupu nyalamnulum do? Winilamluma deice, na Allah arye anggunti weik tonun melilamsise ning nirya ara, pia luba kipnulumce, nati diba tenebuka, pia tuba kum tenenululume do? Tonda, narye anggunti, wenen yupu weik tonun ton kum nyalamsise. Kum wenelamsirye, anggun malye ululum ning ati el lina kumce, biklamsesa ati, anggun ning ara, ‘Elda yata ton winipsutu do? Elce yata wiripnamsil do, kume?’ tenelamlumce, nati tonap ilil kum usulul do? Anggunda, ‘Kume, nunce yuk talye si erenyaba ara, tuba wininamap,’ tenelulum do?

¹² Bukni, na Allah arye anggun Israel nang nirya ati nyapsine. Dipkoprob teleb uning kum bukni, anggunce sik isa si erena ati, moubuka taliplumce pil weik dolulum ning ara, eibuka bikisunun bukni, aning nirya ara, nong pia kum upnamle ning, talye ning talibuka ululume. Tonda, anggunce talibuka pil domunye nirya ara, deiyok ton kum upmala ati, aning nirya arye kum melipsitinge.

¹³ Bukni, anggunce akunum batakmanuluma ati, anggunce, ‘Se, yatanye birye, melibuka lyepsetu do? Yata mikip arye melipsutu do?’ tenen, yupu weik arye malye nyabuka ngalukmunce, morolulum talak ara, anggun taruk arye, isa urasin atonun kibuka, memebuka deipmunce, si erelulum ning aryuk lyelonamsinyake! Sik aisa nirya ara, ninye si mikip, like tonok yukubikca deice arye, aning nirya kum danamle. Tonda, kumanya mitik aryuk, aning bobuka bilirye, kum danamle. Bukni, yata nang do nirya, ‘Allah elcuk nun melibuka lyepropnamsil’ tenen, na amu tam yanuka duknubuka unamak nang ara, dipkoprob amutuku talibuka unamake. Tonda, narye arepsinyeba, anggun dam unamak nang ati arepyeba, anggun ‘Naʼ tenen mutuku kon, apia teleb lek sukum, Sion mutuku doprobikirye, asukumuk unamake.

Allah nyalin yupu deice arye, “Na mapu koproba, Israel nang melipnirye, kanye teleb kipdeipnamne,’ nyabuk yupu

¹⁴ Allah arye nyabuke. “Na mapu koproba, Israel nang, sik binamak bisik ati, moubuka kintininamlume. Pia teleb bisik yabuka kintinipmunye, bisik noutam kwalyamlye ning nirya ara, wibuka yukak dobuka donoknamlume. ‘Na mapu ara, talye mangkau bikbik abuka binamaka’ tenenun ati, nyapsine.

¹⁵ Nara Allah, aning-aning nirya deice tam erebuka ununye birye, nyapsine. Tonda, aning-aning nirya deice tam ununa ati, na siuk weik tonun ereninyaknye birye, nyapsine. Nara min talak akunum kam ulamsirye, aminyan doyanamle talak babye, na pia Kam Una Deiyoknye unune. Na ap, na si ap, Pia Teleb, Lek Ululnye unune. Nara, pia weik erenak, im deice unune. Na ununak ara, dipkoprob malye ning tonok babye kum ulula ati, pia teleb kurunak unune. Bukni, nara yata nang do nirya, sik talima amu tam kibikirye, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, talima erena kumce, malye kanye bobuka, sik kanye talima namin unyak nang ap, neika unamne. Na ap, sik epdanuka neika unamap deiyok ara, narye sik malye kanye bobuka talima lamapdongobuka unyak nang ara, mikip arepnyeba, sik kanye deipnamake. Tonda, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, engenyak nang ati, sik talima kwa dipnyeba, sikce kanye deibuka teleb unamake. Sik ato unyak nang, sik dam ara, na aunamne, nyapsine.

¹⁶ Ayupu nyapmasina ara, talye ati kume. Deiyok ara ani. Ara, narye na mapu, anggun dam ati, “Anggunda pia malye ululum nang,” nyabuka, pia ati kum wenepnamsine. Tonda, narye sik malye unyak ning ati, tuba-tuba yu upnilyeba, anggunti kum wanamsine. Deiyok ara, ‘Na yu tuba upnilyeura, anggunti pia wenepsinirye, ikin ning anggun deice pia deipsinyopura, na mapu anggun imun kanye bobuka, talima daksaknul’ tenen, tuba tonap kum wanamsine. Narye anggun nirya ara, memepdeiamsak umunya ati, aminyan talak naryuk, anggunti, kanye tonap teleb kipdeipnamsine.

¹⁷ Narye anggunti, yu weik upnuka deiyok ara ani. Ara, anggunce, ‘Se, aning ton doproptibye, awinin ning ton winiptibye’ tenen, pia patanauk ulamsuka deice arye, malye weik winilamik ati, narye anggunti, yu upnuk. Yu weik upnuka ati, anggun wenena ati, weik ikin anggun nong deice deililamsirye, ‘Na tam tamubuka yanamak’ tenen, anggunti bataksirye, ‘Aning kum melipnamne’ tenen, duknupdopsirye, anggunti ton kum melilamsise. Winibuka ulamse bukni, anggun na mapu ara, malye kanye bobuka, keil kat ulamle atonun talima kat un nang ululuma ati, tonap tamubuka, sik kanye aryuk, ‘Kume, abisik ara, teleb tenebibye ninguk, binuka wininamabe,’ tenelamikce, tuba malye-malye winilamik.

¹⁸ Narye sik malye ulamik ning nirya ara, akunum eipsirye, tuba bikinune. Bukni, narye, sik amalye ning talibuka, unyak nang tuba tamubuka teleb kipdeipnamne. Tonda, narye sikti, melipnirye, diksukum bisikuk bobinamne. Tonda, sikce, ‘Se, yata wiriptibye do?’ tenen, imun kanye bobuka, unyak nang ara, narye sik talima kwa dipnirye, anggun kanye talima tamubuka teleb kipdeipnamne. Winipnyopura, yata nang do nirya, sikce ikin kanye bobuka engenyak nang ara, teleb kipdeipnyopura, sikce kanye deibuka nati, ‘Se, Allah ara, pia teleb ulule,’ nyabuka, nati si erenamniake.

¹⁹ Narye Israel nang nirya, asukum unyak nang babye, pia otam mutuku noutam unyak nang babye nirya ara, narye tuba tonap teleb kipdeipyeba, tenina kum aryuk, talye tunim abuka, pia teleb unamake. Nara, Allah Yahweh arye ayupu nyapmasina ati, aning nirya ara dipkoprob nong upnamle,’ nyapsine. Na mapu koprop nirya ara, narye kwetepnirye, pia teleb kipdeipnamsine.

²⁰ Bukni, sik malye ning talibuka unyak nang ara, malye kanye bobuka, kanye bokoltonauk unamle. Winipmanto ara, weik laut mekwen ara, tunim abuka pia kum arye, mek ombak welepmana, koulukmana kibuka, lonting-lonting alamle touk unamake. Dipkoprob winiplyeura, amekwen amu tam arye, bental ap, sung-sung ap, weik langdilamle touk, sik amalye unyak nang ara, malye winin ning aryuk langdipnamle.

²¹ Ati, sik malye un ninguk talibuka unyak nang ara, teleb kanye bobuka, tunim abuka kum unamake. Sikda imun kanye bobikirye, ikin asa pia unamake.” Allah arye, sik Israel yala nang ati, nyabuk.