Yesaya 56 - Eipomek

Allah arye, ‘Ninye mutuku sirya, im sirya nirya ati, lyen ning akunum kintinip deipsine,’ nyabuk yupu

¹ Allah el si Yahweh arye, anggun Israel nang, el mapu koproba ati, nyapsile. Narye anggunti, ‘Aning ara, wininamlume, aning ara, pia kum wininamlume,’ nyapdeipsise yupu moubuka talipmunce, diksukumuk unamlume. Tonda, anggunce yuk nang nirya, yupu bokolina ara, ninye urasin maka meina kumce, yupu dipkoprob ninguk kibuka bokeipnamlume. Winibuka unamluma deiyok ara, ani. Minopce na yanirye, anggunti lyepropnamsine. Tonda anggun mal olan nang noutam ara, ‘Narye na mapu ati, lopdeipnirye, lak kipdeipnamsine,’ tenyamse ning ara, lak kipdeipniba, anggun nirya arye eipnamlume.

² Tonda winiryuk nyapmasin ning ara, malye winin ning ton kum winilirye, aninguk moubuka taliplirye, leibuka ululye bira, narye elti, tuba tonap teleb kipdeipnamne. Anye bira, kanye deipnamne. Tonda narye, ‘Asum ara, na si eren sum ati, Sabat sum noutam ara, dikdik sepmunce, na siuk erenamnulume,’ nyapdeipsise ning ara, moubuka kalikdakirye, teleb ubuka ukirye, asum moubuka taliplirye, asum noutam ara, ‘Asum ara, aning winina meme,’ nyapdeipsise ning ati, pia malye kum winilulnye bira, narye teleb kipdeipnamne.

³ Tonda yata ninye asik nang do nirya, ‘Allah Yahweh ati, diba tenepnirye, el ap, el mapu ap, sik tam yanuka kipnyeura, sik ap neika unamne,’ nyaplinye bira, elda na tenenanye, akunum ulule. Atonye bira, pia kum nyapnamle. ‘Se, na Allah el mapu koproba wiplirye, nara bataknamnile,’ kum nyanamlule. Tonda yatanye birye do nirya, ‘Allah atibuk pil donamneʼ tenen, den mouse ning sekenyak nang ara, ‘Se, koula yo arye, duk kum moupmanto ulamle touk, nun babye mapu tonok babye kum deibupa ati, nunda Allah el mapu unyaba kuma,’ kum tenenamake.

⁴ Anyapmasina ara, talye ati kum nyapne. Deiyok ara, ani. Ara, na Allah arye anggunti nyapsine. ‘Den bola mouse kum wamlye nang babye, pia teleb kipdeipnamsine. Ara anggunce, ‘Kume, Allah arye arepsuk Sabat sum deice arye, talye pil dona kumce, el siuk erenamabe’ tenena, ap, tonda narye, ‘Aning ara, wininamlume, aning ara, kum wininamlume. Na kanye delinun nun ning ara, ani. Teleb winin ning ara, ani,’ nyapdeipsisiba, aninguk talibuka, winin nin ap, tonda narye, ‘Anggunda winipmunyeura, narye aning-aning ton arenamsine,’ nyabuka, nyalin yupu deice arye, nyapdeiamsise ning nirya, moubuka talibikirye unyak nang ap, winin ning ap ara, narye anggunti, pia teleb kipdeipnamsine.

⁵ Sikce aning nirya akunum winibikcopura, nara, Yerusalem mutuku noutam bukni, na si eren aik pum tam arye, ‘Sik si ap, sikce winilamik ning ap ara, ninye nirya tuba teninamakʼ tenen, lak bikilin ning ton deipnamne. Yuk nang nirya ara, aning eibikirye, bikikcopura, ‘Se, sik asi sekeiamuk nang ara, dipkoprob mambul teleb weik nang ulamik. Allah el mapu koproba babye, mitik mambul unyak bukni, dipkoprob anang ara, pia teleb mambul weik nang ulamik,’ tenenamake. Tonda ‘Teleb ning ara, nunce mapu ap, kilmapu ap, deiptibyeba, nun si pia tuba aupnamsil bukni, dipkoprob weik mambul ning ara, Allah arye anang, sik lak kilin ning deibuka ati, sik si pia tuba tenenamabe,’ tenebuka nyanamake. Na Allah arye, sik anang si dobuka, na aik pum tam deipniba, anggun si aupmasilyopura, tuba bikinamsine. Winibuka anggun si akunum deipnyopura, narye anggunti, kum bataknamsine, Pia ati, aupnamsile, nyapsine.

⁶ Tonda, aning atonun, sik ninye asik nang babye, sik kan-kan ara, ton nang arye, ‘Allah Yahweh ati, diba tenepnarye, el ap, el mapu ap, sik tam yanuka kipnyopura, sik ap neika unamne,’ nyaplinye birye, elda na tenenanya akunum ulule. Sik anang arye, ‘Kume, nunda Allah el tam akunum yanuka unamaba ati, nunce Allah ati, diba tenebuka, kanye deibikirye, el amu tam piluk donamabe. Tonda nunce, ‘Kume, Allah arye arepsuk Sabat sum deice arye, talye pil dona kum aryuk, el si erenamnyabe,’ tenena ap, tonda Allah arye, ‘Aning ara, wininamlume, aning ara, kum wininamlume. Na kanye delinun ning ara, ani. Teleb winin ning ara ani,’ nyapsuk ati, aninguk talibuka unamak ning ap, tonda Allah arye, ‘Anggunda winipmunyeura, narye aning-aning ton tamubuka arenamsine,’ nyabuka, nyalin yupu deice arye nyapdeiamsuk ning nirya, moubuka talibibirye, unamabe,’ nyabikirye, aninguk wininyak ninye ara, narye sikti, pia teleb kipdeipnamne.

⁷ Narye aninyasik nang nirya dobuka, Sion pia lek teleb aik bobinamne. Na aik ara, ‘Ninye nirya arye, na Allah ati, anyaik yanuka moronamniakeʼ tenen, deipsa ati, narye lo arepniba, anyaik wekuka moronamniak talak ara, pia teleb kanye kipdeipsiniba, pin-pin kanye bobuka unamake. Tonda, na si erena ati, sikce domba ato ning obikirye, ‘Allah arye, nun malye winin ning kum kibuka deipnamsilʼ tenen, na mesba deice arye, uku dongobikirye, arenamniak ning ap, tonda sikce nati teleb aren ning ap, arepnicopura, sik ninye nirya arye, nati morolyangana ati wininamle,’ tenyamse. Akunum tenyamsa ati aning ara, dipkoprob nong kunupnamlarya nyapsine!

⁸ Aning ati ara, na Allah Yahweh arye, aning-aning nirya talibuka, deice tam erebuka, Pia Mikip Weiknye ununa ati, aning nirya tenepnye touk wininuna ati, dipkoprob aning nyapmasin touk, kunupnamlarya! Na Allah ara, Israel yala nang, sik mutuku koproba noutam arye bobuka, yuk pera mutuku bobinuka deiamikbuk, narye tamubuka dopnirye, asukumuk boyanamne. Ton ninye ara, akunum dobuka, asukumuk tamubuka delilyase. Bukni, aninye bobuka yanirye, na dam deipnirye, sirya daknyopura, yuk ninye babye bulubukapnirye, tonok kentinip deipnye sukumuk deipnamnarya! Ara, sik min talak akunum boyase ninye ap, aminyan talak boyanamne ninye ap ara, ansinibuka tonok kipdeipnyeba, teleb ubuka neika unamake. Aning nirya ara, Allah arye sik Israel ninye ati, laka nyabuk.

Israel ninye talina ati, ninye deiyoknye kibuka, ulamika deiyok nang nirya, malye uamika ati ara, aminyan talak wenepnamle ning ati, nyabuk yupu

⁹ Allah arye, sik Israel tam deiyok nang ati nyabuk. Allah arye, suk yuk pera mutuku unyak yin nang ati, ayupu nyapdeibuk. “Winipmanto ara, bura tam talye kam daulamle yu ning nirya ati, nyaplirye, ‘Anggun bura tam kam ubuka ululum yu ning nirya ara, yalulume! Yamunce, na mapu koproba, anggun Israel yala nang ati, deiyok kibuka talinyak deiyok nang nirya ati, yanuka obuka dipnamlume!’ nyapsine,” nyabuk.

¹⁰ Deiyok ara ani. Ara, “Israel yala nang ati, talibuka kalikna deiyok nang nirya ara, asik kuplirye, kunuklamle nang atouk unyake! Sikda, ‘Aminyan winipnamsil ning ara ani,’ kum nyanyak, tonda aning-aning nirya ara, kum bikamika ati, sikda walwal nanguk unyake. Sik adeiyok nang nirya ara, winipmanto, ninye opmanto ning dam aupmalibuk, kam arye kum leilamle kam Atonun unyake. Sikda, yupu lup nang unyaka atonun unyake. Sikda talye kanye bobuka, mana dem patapliba, mabikirye, lengdar mana dem unyake. Sik anang ara, ‘Maptibyeʼ tenen, pia patalule.

¹¹ Sik aninye ara, kam atonun dem unyake. Winipmanto ara, kam arye din patana dem ulula ati, moubuka bikina kumce, talye aupmalye ning nirya luparabuka, diplibuk kum boulamle touk, anang babye wininyake. Sik aninye deiyok nang ara, aning-aning nirya ati, patana dem ulule. Tonda winipmanto ara, sikda domba basam weina deiyok nang atonun unyak bukni, sikda moubuka, kum bikmanto nang unyake. Sikda, sik kanye pum tam aryuk tenebikirye, ‘Teleb winin ning ati, abisikuk binuyabe,’ kum tenenyake. Sik mining kanye aryuk, ‘Nun yuk tenebipye bisikuk, atalye binuyabe,’ tenebikirye, malye bisikuk banyake. Tonda, sik anang nirya arye, ‘Kume nun bidamang aryuk bona weik dolonamabe,’ tenebikirye, sik patan ning tenenyake. Tonok ning babye, yuk nang patan ning ton kum tenenyake. Sik Israel tam unyak ninye deiyok nang nirya ara, ato kanye dem bobuka malye dem wininyake.

¹² Tonda, sikce nyanyake. “Anggun ton yalulume! Nun ap, kanye wangalamak yu mek doprobipyeura, amek weik anun neika dinamabe! Anggun ton yalulume! Nun ap, anggun ap arye, yu weik anggur mek dobuka, dinamabe. ‘Dilamepya ani, akunum boupsilyopura, teleb kanye bobuka unamabe,’ tenena kume. Tonda, mapmapya bereklyopura, ambusum abapye, awininmap touk winipnamabe. Arup ara, mitik teleb upmasil bukni, ambusum ara, pia teleb weik sum yanamala ati, ambusum ara, kanye weik deibuka, telebuk unamabe!” nyabuka nyalanyake. Allah arye, sik Israel yala deiyok nang ati nyabuk.