Yesaya 54 - Eipomek

Allah arye, Israel ninye ati, pia teleb kilinamla ati, nyabuk yupu

¹ Yerusalem mutuku ululum ninyeo, na Allah arye anggunti, domon yupu deice arye nyapsine. Minop talak ara, you kilapu atonun ulamlume. Mi kum bomlum talak ara, mi deiyok ton kum dipsukba, mapu ton kum deiamlume. Bukni, wini talak ara anggun kanye deipmunce, pin-pin asa arye mot senamlume. Ara, anggun mapu pia weik upre banamaka atia. Winipmanto ara, ninye domice kilapu arye delinyak mapu ara, mitik tonun arye delinyak bukni, anggunda, ninye kum domice kilapu atonun ulamlum bukni, aminyan talak ara, sik mapu anggun weik tonun deipmunyeba, weik upra banamake. Na Allah Yahweh arye nyapsina ati, aning ara dipkoprob nong upnamlarya.

² Ati, anggun unamlumak ati, tenda baju doltakna aik domluma ara, ayukumna moubuka ikra balamlumce, tuba tonap lo tabakna ati, ayukumna ikimunyakarye cang baju bol yanuka kirikdongobuka lipdopmunyeba bikilule. Atenda baju doltakna aik bublan ara, weik tonun kukeipnamlume. Anyaik kirikin tapu ara, pia erebuka perak kirikdongopnamlulume. Aning nirya ara urdem ati kume. Anggun mapu pia weik upre bakirye, anggun dam yanganamaka ati nyapsine.

³ Ton deiyok ara ani. Ara, anggunce ‘Lo tonap tabaknamabe,’ tenepmunyopura, kwanim tam taruk ap, sirik tam taruk ap, yuk-yuk talibuka lipdopmunyeba biknamlule. Winipliba anggunce deipmunyeba, dadeipdanin banamak ninye ara, weik upra bakirye, yuk mutuku unyak ninye ayala-ayala weik, mutuku-mutuku nirya, malye kibikirye, amutuku noutama uk unamake. Tonda, ton tam nang arye, ton tam nang ati, obuka sirya dakikiba, ninye una kumce, bipla pabuk mutuku ara, ‘Naʼ tenen, ninye, Israel yala ninye binuka unamake.

⁴ Ati, anggunda ‘Yuk ninye arye, nalibuka malye nyapsikiba, alye upsilirye ilil unamsil do?’ kum tenenamlume. Imun kanye bobuka mitang asa kum unamlume. Alye kum dakalanamluma ati nyapsine. Atenen ning ara, adiparyuk bataknamlume. Winipmanto ara, anggun wel ulamlum talak arye, malye ulamlumba, alye ulamsuk ning ara, kekebuka kum dukdongobuka ulamlum ning ara, tuba tonap kum teninamlume. Tonda, sal arye kilapu domica ani, youwak batakiceba, mambul kanye bobuka ulamak touk, kum unamlume. Aning atonun ulamlum bukni, aning babye tonap tuba kum teninamlume. ‘Nun biyuk unyabe,’ kum tenenamlume.

⁵ Aning ara, talye ati kum nyapsine. Deiyok ara, anggun kwepdeiamsuknye, el Allah ati, ‘Se na dopnuknye bitonun ulule’ tenen, unamlume. Allah ara, el si Yahweh ulule. Elce anggun akanye bitonun melibuka unamsile. El dem aryuk, im deice unyak yin talin malaikat nirya talibuka, sik weik deiyoknye ulule. Anggun Israel ninye arye, malye winilamlum ning ati, opsutu bukni, anggun malye winilulum ning namin kipsilirye, anggun lyepnamsilnye bira, el Allah ulule. Anya arye, Allah ara pia Telebnye ulirye, anggunti pia kalikuka melisulule. Ninye mutuku-mutuku nirya arye, elti, ‘Allah ara, Weik Erebuka Eitamnye ulirye, tukwak mutuku, mutuku-mutuku nirya unyak ninye talilula deiyoknye bira, el si ara Allah Yahweh ulule,’ nyabuka, Allah el si atibuk erenamake.

⁶ Israel ninye anggunda, ninye domice kilapu batakikiba, ‘Se,’ tenen, pia ikin kanye bobuka ulamak touk, ulamlume. Tonda, wel nang arye, wisi min kum danmakce talak, wel kilapu dobikirye, neika daulamdikca ani, anye birye el domlye kil batakliba, akil pia ikin kanye bobuka ulamle touk, anggun babye winilamlum bukni, wini talak ara, anggun ni koproba Allah Yahweh narye, weik tonun bico tenepsina ati, tamubuka melipnamsine. Winipsiniba, kanye deibuka pin-pin asa arye unamlume. Nara, anggun ni koproba Allah arye nyapsine.

⁷ Anggun malye ulamlumbuk, narye anggunti bataksisiba, tia talak ati anggun yuk daumunye bukni, wini talak ara, anggunti weik tonun bico tenepsinirye, tamubuka dopropnamsine. Weik tonun bico tenesununa anya arye, dana-dana tam arye bulubuka boyanganamsine.

⁸ Malye weik winilalumba, narye anggunti yu upnukba, bataklamsise. Anggun malye weik ulamlumba, yu weik upnukba, tia talak ati mitik tonunuk bataksisirye, na donga anibuka anggun ton kum dililamsisirye, kum melilamsise. Bukni, wini talak ara, na yu upnuk ning batakuka, narye anggunti bico uniliba, tuba teninamsine. Pia kum bataknamsine. Aning ara, talye kum nyapsine. Anggun ni koproba Allah, na si Yahweh, anggunti dekuka lyepromsisinye birye nyapsine.

⁹ Minop talak Nuh ulamuk talak ara, tukwak mutuku ninye arye malye-malye weik ulamik bukni, na Allah arye, weik mok arelamsiba, mekwen sirika diamuk. Winibukopura, narye Nuh biti nyapse. ‘Ance deipminba, dadeipdanin banamak nang, unamak talak nirya ara, narye tonap weik mekwen arepneba, deibuka tukwak mutuku nirya kum dipnamla anya arye, anggun nirya tuba tonap kum opnamsine,’ nyapdeiamse. Aning atonun, wini talak ara, narye anggun Israel ninye ati, nyapsine. ‘Na yu upniliba, wenebuka kum opnamsine,’ nyapdeipsine.

¹⁰ Ati pia weik mutuku bukuka ap, mitik-mitik mutuku kon bukuka ap nirya lokturye, sakuka kum datua babye, narye anggunti se tenesununa ati, kum luba kipnamsine. Narye anggunti pia tuba teninamsine. Bico tenesununce, narye anggunti yu upniliba, ikin ning anggun dam kum delinamsine. Tonda, narye anggunti, ‘Anggun ap, na ap teleb kibuka neika unamabe,’ nyapdeiamsise yupu ara, kume kum datue. Ara, na si Allah Yahweh arye nyapsine. Narye anggunti bico tenesununye birye nyapsine. Allah arye Israel ninye ati nyabuk.

Allah arye, Yerusalem mutuku winiryuk ning kwepdeipnamle ning ati, nyabuk yupu

¹¹ Na Allah Yahweh arye, anggun Yerusalem umunye ninye ati nyapsine. Se, anggunda ikin ning weik anggun deice uamukba, imun kanye bobuka ulamlume. Anggun kanye talima mikip kum wamsuk talak ara, mikip kilinanye min ton ulamukba, kum melilamsuke. Bukni, yu nang arye, anggun Yerusalem mutuku asik nirya daklomikba, oldem uamukak ara, melipsinirye, lipsisikuka donamsine. Ara, urasin pia teleb, dekna weik keil dobuka anggun aik lipsisikuka dopnamsine. Yerusalem aik ayukumna ati, dekna weik keil, el bol ara im sukulamle atonun, el si ara batu nilam dobuka deipnirye, adeice arye anggun aik nirya dopnamsine.

¹² Anggun unamlumak cang weik aik ara, narye ining bi keil, dekna weik keil el si ara delima keil, urasin teleb ning dobukapnirye lipsisikuka dopnamsine. Yerusalem aik antanabuka cang poka dopnamsin ning ara, yuk yala dekna weik keil dobuka dopnamsine. Tonda apoka bublan ati, dekna weik keil el si permata, pia urasin teleb ning arye dobuka memepnamsine. Tonda poka dopnya deice ara, urasin teleb dekna weik keil el si ratna arye deibuka dopneba, urasin pia teleb upnamle.

¹³ Anggun mapu amutuku unamak ninye nirya ara, na Allah Yahweh arye peterenamsine. Anggunce deipmunba, dadeipdanin banamak ninye ara, teleb kipdeipniba, sikce aning-aning nirya pil dobuka unamak ning ara, nong upnamle. Nong upliba bona weik talinamake. Na tam kinamake. Winibikca deice anggun nirya diksukumuk buka telebuk unamlume.

¹⁴ Anggun mutuku ap, anggun Israel ninye ap talibikirye, ninye deiyok nang unamak nang ara, diksukumuk unamake. Anggun mal olan ninye ara, pera sukumuk unamake. Kum olyanganamsiyake. Wininamaka ati, anggunda talye kanye bobuka telebuk unamlume. Winibuka unamluma anya arye, ilil kum tenenamlulume.

¹⁵ Yuk mutuku ninye arye anggunti, ‘Obuka sirya daknuyabe,’ tenebikirye, yanuka olyasikcopura, anggun ilil kum tenenamlulume. Ara, anggun ona ati yanamak ninye ara, narye nyapniba kum yanamake. Ati, dan ninye do nirya, ‘Israel ninye ati opnuyap’ tenen, yanamak ninye ara, anggun Israel ninye arye anang ati obuka sirya dakmunba, anang ara anggun amu tam unamake. Anya arye anang ati ilil una meme.

¹⁶ Kat ning besi memena kel nang arye, ‘Ninye on ning teleb ning ketepnamabe,’ tenen, besi ning dobuka, uku dapmakca ani, leibuka lopliba, tin weik uplyopura, ninye on ning tace ketenyake. Winilamak touk, na Allah arye yuk pera mutuku noutam, yu nang kintinip deipnirye dopdeipnibuk, yuk mutuku ninye sik wenena ati, ‘Obilulume,’ nyapnyopura, yin bobikirye, ninye olbanyake. Aning ara, naryuk kintinibuka delinune.

¹⁷ Bukni, dan ninye do nirya, ‘Israel ninye optibye,’ tenen, ninye on ning kintinibikirye, olyasiting bukni, kum winipmanto upnamake. Aning atonun, dan nang do nirya, anggun Israel ninye ati, ‘Malye kum winipmakibuk malye yupu sik deice nyapnuyabe,’ tenepnamsiyak nang ara, urdemuk unamake. Sikce nyanamsiak yupu ara, talye urdemuk nyanmatinga babye, nong kum upnamle. Tonda ayupu nyanamsiyaka deice arye malye kum kipdeipsitinge. Narye melipsiniba, anggun Israel nang arye amalye yupu talamak nang ati, yupu sekmunyeba, yupu kum asa unamake. Nara Allah Yahweh arye anggun Israel ninye ati nyapsine. Arup nyapmasin yupu nirya ara, na amu tam unamlum nang melipsiniba, dolonamlulume. Yuk ninye arye anggunti, malye yupu nyanamsiak bukni, na Allah arye anggunti pia melipsiniba, teleb upmunyopura, yuk mutuku ninye nirya arye, kel biknamake. Ara, ‘Se, Israel ninye ara, dipkoprob Allah el ‘Naʼ tenen, ninye unyake,’ tenen, kel biknamake. Narye dekna arin ning ara, pia teleb una deiyok ning arepsiniba, telebuk unamlume. Allah arye Israel ninye ati nyabuk.