Yesaya 53 - Eipomek

Allah arye wipdeibukba, ninye lyen pil donamlanye biti nyabuk yupu

¹ Allah arye nyabuk. “Yata ninye arye, nun kekelamupu yupu kekebuka diba tenelamik do? Allah el si Yahweh arye el mikip laka kililamukba, elilamikce kel bikamik ninye ara yata ninye do?”

² Allah el si Yahweh arye tenelamuk touk, el pil dolamuknye bira, miklamle tukwak arye duk teleb ning betekuka palamle atonun ulamuk. Anye bira, urasin telebnye kum ulamuka anya arye, elilamuburye, elti, ‘Anye bira urasin telebnye,’ kum tenelamupu. Anye el nong urasin ara, liknye ulamuka ati, nunce elti, kum dildelamuburye, ‘Se, anye bira, nun kanye deibabe,’ kum tenelamupu.

³ Utenelamuburye, elti, lik ulamsukba, ninye nirya arye lululilamuburye, el dam batakuka yuk sukumuk ulamupu. Anye bira, ikin ning weik el nong deice delilamikba, imun kanye bobuka ulamuk. Ati, ninye arye yuk nang ati, ‘Nun like’ tenen, urasin tamubuka meilolamak touk, tonoknye babye, elti, kum elilamik. Atonun, nun babye elti, ‘Telebnye aulule’ tenen, kanye kum delilamupu. El ti ara, ‘Elda talinye binya arye, dauplye,’ tenelamupu.

⁴ Winibuka tenelamupu bukni, dipkoprob nun malye unyap ning dobuka bobinamsuke. Dipkoprop aning ara nun kum winipmanto ulamuburye, malye ulamupu ning ara, nun pununa ati, el deice uk deipdana dobukapsukce, kum kipdeipsuke. Tonda, nun uk disulul ning nirya, kum danalisulule. Nun imun kanye bobuka ulamupu ning ati, dobukapsukce, ikin weik ulamukce punupsuke. Nun ikin ulamsuk ning nirya ara, nun melina ati dopromsuk buk, nunce tenebupe ning ara, ‘Ara Allah arye el wenena ati ikin ning el nong deice delinmala atia,’ tenelamupu.

⁵ Aning ara, walwal arye tenelamupu bukni, nun malye winilamupu ning deice arye, elti, yu nang arye olamikba, el nong deice dila weik ulamuk. Nun malye-malye weik ulamupu ning ati, tace ning arye talibuka onmekbuk, el nong deice dila weik ubuk. Aning deice arye, nunti, teleb kipdeipsuke. Nun malye winina ati, ikin ning weik el nong deice deiamikce, wenebika deice arye, nunti lyepdeipsuke. Nun kum winipmanto ning ap, nun malye winilamu ning nirya ap, kum kipdeipsukce, lyepsukce, teleb kipdeipsuke.

⁶ Winilamuk ning deiyok ara ani. Ara, winipmanto ara, nun nirya wanglamak domba basam atonun ulamupu. Nun malye ulamupa deice arye, nun kanye yuk-yuk tenilamuburye, bisik yuk-yuk tenebuka balamupu. Domba basam buru sakuka yuk-yuk dabalamak touk ulamupu. Allah Yahweh arye nun tukwak ninye malye winilamu ning ati opsutu bukni, nun malye winina ati, nun malye winilamu ning nirya dobuka, el amu tam pil dolamuknye, el nong deice uk deibuk.

⁷ Allah el wipdeibuknye bira, nun malye ning lyena ati, yu nang arye yu ubukba ikin ning weik el nong deice deibik. Bukni, yupu nyana kumce, talye tunim altaknauk ubuke. Elce tamubuka, ‘Yata deiyok ati wininmaniak do?’ nyabuka, malye yupu kum nyabuk. Domba basam opnamaca ati, dobuka bobanmace talak yupu kum talamle touk ubuk. Tonda domba basam potong kon nang arye, el potong konmace talak, yupu tana kumce, kanye lamapdongobuka dakeiyam asa arye, kintinililamle touk ubuk. Ara, yu nang arye elti, malye yupu weik nyanmek talak ara, elda ayupu kekena kumce, talye kanye bobuka ulamuk.

⁸ Elda malye kum winilamuk buk, yu nang arye tapu koubuka yupu lipsisikuka bokolina deiyok nang dam bobiyikce, wenebuka el nong deice ikin ning deibuka obik. Awinibik ning ara, diksukum kibuka kum ubik. Tenepce arye duknubuka tilila yupu malye nyanmekce, wenebuka obik. Atalak ara, yatanye birye, ‘Se, nun malye un ning pununa ati, dipnule,’ tenen, moubuka kel bikamik do? Kume, aning moubuka kum tenilamike. Obikba dibukopura, tukwak mutuku kam ulamik ninye noutamak arye, el nong kum ubuk. El dibuka deiyok ara, na Allah arye wipdeiamse ninye malye winilamik ning ati, ‘Kum kipdeipnirye, aninye lyepnamne’ tenen, dibuk.

⁹ El weipnuyik talak ara, malye nang Allah ati diba tenena kum nang noutamak obikba, el nong weibik. El keil deiya pum tam weibikak ara, bona utotoa talin nang arye kintinip deiamik sukumuk binuka weibik. Anye bira malye winina ap, tilila yupu nyana ap ara, pia kum winilamuk buk, obik. Deiyok kum uamukbuk, obik.

¹⁰ Malye nang arye obik bukni, Allah el si Yahweh arye, minop talak danirye, ‘Anye bira imun kanye bobuka dadipnamle,’ tenelamuk touk, nun pununa ati dipsuke. Tonda Allah Yahweh arye tenelamuk touk, el nong uk dibuka deice arye ninye malye wininyak ning nirya kum kipdeibukce, tukwak ninye sik malye winina ati dibuke. Akunum dibuk bukni, kam buklirye, el unamle talak babye weik malamlirye, elce deipliba dadeipdanin banamak ninye eipnamle. Anye deice arye, Allah Yahweh arye, ‘Wininamne,’ tenelamuk ning nirya, anye pil dopliba, dipkoprob nong upnamle.

¹¹ Allah el si Yahweh arye, wipdeibukba, pil donamlanye bira, imun kanye bobuka, ikin deice aryuk ulamikca ani, akunum obikiba dipnamle. Aning akunum winiplyopura, kam bukuka kanye deiplirye, imun kanye bomuk ning, nong upnamle ning eilyopura, elce, ‘Na akunum upne,’ tenen, kanye deipnamle. El imun kanye bobuka unamla deice arye, ninye tukwak ninye weik, elce sikti, ‘Akunuma, narye aninye ati, akunum teleb kipdeipmane,’ nyapdeipnamle. Adeice sik kanye talima teleb ulinamle. Na Allah ati pil donamnilnye birye, ninye mutuku-mutuku nirya malye wininyak ning wenena ati, el nong deice uk dobuka deipdanamle. Winipnamla deice arye, na Allah arye ninye mutuku-mutuku nirya noutam arye ninye weik namin kipnirye lyepropnamne.

¹² El kanye aryuk el nong ap, el kam una ap, ninye malye winina ati talye arepsuk. Ninye mutuku-mutuku nirya, sik malye wininyak ning dobuka, el nong deice deipdayuk. Winibuka ati, na Allah arye, elti, erepdeipniba, pia weik mambulnye unamle. Mikip weik nang ap, weik mambul pil donyak nang ap ati, ninye nirya si erelamak touk, el tibuk, el si erebuka kinamake. Tonda, mikip nang arye, yuk mutuku nang ati obisibikirye, sik talilamikce ning dalubuka dololamak touk, na Allah arye elti, pia teleb ning weika tonun arenamne. Elda telebnye ulamukba, el ap ulamik nang arye elti, ‘Elda malye wininanye,’ nyabuka, el nong deice malye yupu nyalilamike. Elda, ‘Allah arye malye wininyak ninye, namin kipnamle’ tenen, morolamuk. Morolamukce, sik malye wininyak ning ara, el nong deice dobuka deipdayuk. Ati, na Allah arye na pil donanye biti, dekna arepneba, weik mambulnye unamle. Ninye nirya arye el tibuk kinamake.