Yesaya 52 - Eipomek

Allah Yahweh arye, Yerusalem mutuku ninye ati, lyepnamle yupu

¹ Se, Yerusalem mutuku ululum Israel ninyeo, kanye moubuka tenena kumce mapmaluma ara buklulume. Ninye arye teleb baju ongobuka balamak touk, anggun talima noutam mikip upsiliba unamlume. Winipmunce, ‘Pia kanye deibuka unamap’ tenen, kwerya teleb baju uk ongopmunce unamlume. Na Allah arye, ‘Amutuku noutam ara, na si ara amutuku deice deipniba, ‘Naʼ tenen, mutuku unamnil’ tenen, wipdeiamse mutuku, Yerusalem ati nyapne. Narye kum wipdeiamsa ati, sik den bol mouse kum sekenyak ninye ara, malye wininyak deice arye na dam kum yatinge. Aninye aning-aning nirya ara, na Allah ati diba kum tenenyak ninye ara, Yerusalem mutuku domik poka bublan noutam ara, tuba tonap pia kum wekenamake.

² Yerusalem ninyeo, anggun malye kanye bona ati, butbuta deice umunyeba butbuta palipsuk ning ara, kiliplopmunce, weik kota mutuku noutam teleb kibuka ulamak touk unamlume. Sik ninye deiyok nang arye, pia teleb bun ning deice bulamak touk, narye ereipsiniba, telebak unamlume. Tonda yuk mutuku nang arye, malye kipsikce, tapu kouamsik ninye, anggun Sion mutuku umunye ninye ara, anggun ngang dam tapu koubuka wenen aik deiamsikba bulalum ning ara, wini talak ara lopdalulume. Anggun Sion mutuku deice arye deiamsik ninye ati nyapsine.

³ Wininamluma ara, talye ati kum nyapsine. Deiyok ara, na Allah Yahweh arye, na mapu anggunti nyapsine. Anggunda dekna kumce urdem arye dunubuka bobinamsik touk, na babye dekna kumce, talye diamuk lopdeipsinirye, lyepnamsine. Ara, dekna yo bok do, yuk mambul ning do, arena kumce, talye diamuk lyepnamsine.

⁴ Nara, aning-aning nirya talibuka deice tam Weik Erena Deiyoknye unirye, ‘Winipnamne,’ tenenye touk wininune. Narye nyapmasine. Yata ning do nirya, na tenenye touk wininunye, Allah Yahweh arye urdem ati kum nyapsine. Ara, na Yahweh arye minop talak wipdeiamsise ninye, Israel ninye anggun mutuku noutam din kum ubukba, kwaning patan ati, Mesir mutuku binuka ulamlume. Atalak noutam ara, ninye asik nang atonun ulamlume. Bukni, anoutam talak ara, sik Asyur nang yana arye, anggun mining winilalum ning ati, yanuka obuka dalulamsikce, ikin ning weik anggun nong deice delilamsike. Winilamsik touk, tuba talisinyake.

⁵ Ati, wini talak ara, ‘Naʼ tenen, ninye yata wiribuka unyak do? Nara Allah Yahweh arye, nyapsine. Malye nang arye nati nyaninyak ning ara, pia malye ati, na lik weik unulule. Ara, Babel mutuku nang arye, yanuka obuka sirya daksikce, anggun ning nirya yanduka alabuka dopromsik ning ara, anggun dekna ati, Babel ninye arye nati kum arelamnike. Winilamikce, ‘Israel ninye pia talinamap’ tenen, kanye talima erelakirye, na Allah ati yep-yep anikirye, na si ati, malye yupu nyaninyake. Asum-asum nirya, na si deice pia malye nyaninyake. Nara, Allah Yahweh arye, nyapsine.

⁶ Ati, na wipdeiamsise ninye, anggun Israel ninye ati lyepnamsin talak ara, anggun nirya arye nati, ‘Allah Yahweh ara, aulule’ tenen, kel biknamnululume. Narye lyepnamsin sum aryuk, anggunda, ‘Aning min kum winibuk talak ara, Allah arye akunum nyapdeiamsuke’ tenen, kel biknamnululume. Dipkoprop, na Allah aryuk ‘Winipnamne,’ nyabuka nyalilamsise.

⁷ Narye wipdeipniba, yupu laka nyanamak nang ara, anggun eipmunce kanye weik deipnamlulume. Anang ati, winibuka tenenamlulume. ‘Se, pia laka teleb yupu boyasice nang ara, sik tukwak bisik yanibuka teleb yupu boyanmasiyaka anya arye, sik yan babye pia telebe tenen, kanye delinyabe,’ tenenamlulume. Aning ara, mutuku-mutuku nirya bakirye, na laka teleb yupu laka nyapre banamake. Tonda, olana kumce, kanye talima dukdongobuka teleb una ati, yupu peterepre banamake. Tonda, ninye lyena yupu boyanamake. Ayupu nyalyanganamak nang arye, anggun Sion mutuku ululum ninye ati, ‘Anggun ni koproba Allah, aning-aning talibuka, weik deiyoknye Raja, Allah aniryuk talisilirye aulule,’ nyabuka nyanamsiyake.

⁸ Ati, sik mutuku noutam kalikuka dina deiyok nang arye, kanye deibuka una ati nyanamake. Pin-pin kanye bobuka nyanamak yupu ara, moubuka kekenamlulume. Ara, sik ni koproba Allah Yahweh arye, ‘Na tenena ninye lyepnune’ tenen, Yerusalem mutuku yalirye, sik asing koproba arye eibikirye, kanye deibuka weik yupu deice arye si erebuka kinamake.

⁹ Ati, Babel mutuku nang arye Yerusalem mutuku aik daklomikba, oldem uamukak arye, kanye deibuka unamlume. Ara, anggun Israel ninye batakamsikba tuba ululum ninye ap, tuba tamubuka yanganamlum ninye ap arye kanye deibuka unamlume. Aning deiyok ara, Allah Yahweh arye el ‘Naʼ tenen, ninye Israel ninye ati, melibuka lyepsiliba kanye delinamake. Babel mutuku ninye arye anggun Yerusalem mutuku umunye Israel ninye talipsik noutam arye lopdeipsiliba talye kanye bobuka telebuk unamlume. Yerusalem mutuku tamubuka arepnamsila atia.

¹⁰ Allah Yahweh arye ninye mutuku-mutuku nirya anggun dinak, el mikip laka kibuka kiklipdebuka, mikip weik pil dopliba eibikirye, kel biknamake. Pia malye ton winina kumnye birye, mikip weik donamle pil ara kum duknupnamle, laka kibuka pil dopliba elinamake. Ati, mutuku sirya im sirya, mutuku-mutuku nirya unyak ninye, nun ni Allah arye ninye lyen ning arepsiliba eibikirye, kel biknamake.

¹¹ Wini talak ara, Babel mutuku batakmumce, anggun mutuku koproba tamubuka yanamlume. Allah Yahweh el si eren aik pil don ning nirya dobuka bobinamik ning ara, tuba tamubuka boyanamlulume. Aning dobuka boyanamlum nang ara, Allah arye, ‘Aning ara, malye ning anya arye, aning talina meme,’ nyalamuk ning aning-aning nirya ara, anggun ton kum talinamlulume. Winipmunce, anggun Babel mutuku arye tamubuka Yerusalem mutuku yanumunye talak ara, anggun nong nirya mek kekuka teleb kilanamlulume.

¹² Anggun banumunye talak ara, kwepdanin bana meme. Tonda, dobolkirikinmakce nang kwepdanin balamak touk kum wininamlulume. Aning kum winipnamluma deiyok ara, anggun ni Allah Yahweh arye, anggun dam melipsilirye, bobuka banamsile atia. Anggun Israel ninye ati pia kalikuka melisulul Allah arye, ‘Dana-dana tam arye yanuka anggun malye updeiplyak’ tenen, aning ati, kalikuka melinamsile. Ati kwepdanin bana meme.

“Allah pil dona ati, wipdeiamuknye bira, kanye imun unamle,” nyabuk yupu

¹³ Allah Yahweh arye, nyapsine. Dipkoprop, na pil donamlanye birye, pia weik kel bikna deice arye, mambul pil dopliba, nong upnamle. Nong uplyopura, ninye weik tonun eibikirye, elti, si erelinamake. Narye, ‘Elda, aning-aning nirya deice tam ulirye, ninye deiyoknye pia unamle’ tenen, elti, si erepdeipniba weiknye kipdeipnamne.

¹⁴ Minop talak ninye weik elti, elilamikce lukulalamikba, ‘Se, bicoe,’ tenelamike. Atenelamik ning deiyok ara, yu nang arye, elti, obuka, el nong deice ikin weik ning weik tonun deiamikba, el urasin ara pia malye kipdeibik. Winibika ati, ninye arye, ‘Se, yuk nang ton olamikba, sik urasin mitik tonun arye malye ulamik bukni, anye bira, dipkoprob pia weik olamikba, el urasin ara, pia malye kipdeibik,’ tenelamik.

¹⁵ Minop talak ara, yu weik nang arye elti, wenebuka olamikba, urasin yuk ubukba, ninye elilamikce, ‘Se,’ tenen, lukdanuka kisok kwisi meka bongolamuk. Bukni, aminyan talak ara, ninye mutuku-mutuku nirya arye, el wininamle ning mambul pil doplyopura, ninye weik tonun, ‘Se, elda weik mambule, pia telebnye ulule’ tenen, kel biknamake. Tonda, yata mutuku do nirya, ninye deiyok nang, Raja nang weik tonun, elti, eibikirye, sik yupu nyana kumce na nie tenen, elti, dinamake. Winibuka eibikirye, pia lukuldana uk unamake. Ara, urdem ati kume. Deiyok ara, minop talak arye kum winilamuk ani, sik Raja nang bita kel kum biklamik ning ap, tonda yuk ninye arye sikti, kum laka nyalamikba, moubuka bita kel kum biklamik ning ap, talak arye aning winipliba eibikirye, moubuka kel kipnamaka ati nyapsine. Allah Yahweh arye nyabuk.