Yesaya 51 - Eipomek

Yerusalem mutuku tuba tonap teleb kilina ati, nyabuk yupu

¹ Allah arye, sik Israel yala nang nirya ati nyabuk. “Anggunda moubuka kekepnululume! Anggunce, ‘Se, diksukum una ara, weik tonun patasululeʼ tenen, moubuka kel biklum nang ati nyapsine. Tonda, anggunce, ‘Se, nun ni koproba Allah Yahweh arye, lobuka lyepsilirye, ‘Teleb una ara ani, teleb bisikuk dobolbanamlume,’ nyabuka, ‘Peteresulul ning ara, pia telebeʼ tenen, patasiliba, moubuka eililulum nang ara, anggun apu yapu nang ati, moubuka tenipdenulume. Winipmanto ara ani. Anggunce tenipdelulume. Ninye arye, ‘Pia teleb keil dobuka, teleb keil aik dopnamapʼ tenen, ‘Teleb keil palina ara, cang mutuku arye palibuka doproptibye do?’ tenen, keil telebak moubuka dipdebibirye, asukumuk teleb keil dobuka, aik donyake. Aning atonun, anggun apu yapu ap, anggun nun yapu ap, tuba ton ap moubuka tinipdenamlume. Sik bitinye ara, mitik tonun, teleb keil palina atonun unrurake.

² Ati ara, winipmanto yupu nong noutam deiyok ning ara, ani. Ara, anggun apu koproba Abraham biti tenipdelulume. Tonda, anggun nun Sarah ton tenipdelulume. Abraham birye, anggun Israel yala nang deiamsuke. Aning atonun Sarah birye, anggun deiamsuke. Abraham ati tenipdenamlum ning deiyok ara, ani. Minop talak ara, na Allah arye Abraham biti wipdeipse talak ara, mi ton tonok babye min kum deiamuk. Mi kum deiamuk bukni, narye elti, wipdeiamsirye, pia teleb kipdeipsirye, mi arekiseba, elce deibukba, aminyan talak ara, ami arye ton deiamukba, dadeipdanin yangalamika ani, adeice arye, mapu pia weik deiamikba, wini talak ara, anggun Israel yala nang yupa weik tonun akunum ululume. Aning nirya ara, narya.

³ Ati ara, anggun atalak ululum Israel nang babye, moubuka tenipdenululume. Dipkoprop, na Allah Yahweh arye, anggun Yerusalem weik asik noutam ululum nang ati, aminyan talak anggun talima kwa dipnamsine. Naryuk anggun kanye ara, teleb kipdeipnamsina deice arye, anggun Israel yala nang nirya ap, anggun mal olan nang arye, malye kibuka sung-sunga bultakalamik mutuku nirya ap babye, tuba ton ap teleb kipdeipsiniba, anggun nirya telebuk unamlume. Tonda, naryuk anggun aik oldem ubuk ning nirya ap, anggun wa wina ati tuku ap, anggun mutuku noutam pia malye ubuk tuku ap, mutuku ap nirya ara, tuba ton ap teleb kipdeipnamsine. Ara, anggun oldem nirya ara, minop talak Eden mutuku, pia teleb uamuk touk, teleb kipdeipnamne. Tonda, anggun Israel tam ninye unmeka ara, na Allah Yahweh, na pia teleb wa tuku dam, pia telebak atonun kipdeipnamsine. Winipnyopura, anggun mutuku noutam ara, anggun Israel nang nirya ara, kanye deipmunce, pin-pin asa kanye deiceuk kintinipmunce, ‘Nun ni Allah telebe,’ nyapmunce, kanye lon mot pia nyapnamnulume.

⁴ Ati ara, se, na mapu koprop atonun ululum nango! Anggun nirya ara, na nyapnusin yupu moubuka kekenamnulume! Tonda, narye wibuka akwamsise nang, ‘Naʼ tenen, nang ara, anggun moubuka kekepnululume! Anggunce na moubuka kekepnamnulum ning deiyok ara, ani. Ara, narye anggun nirya ati, ‘Aning wininamlume, aning ara, pia kum wininamlume,’ nyabuka, lak peterenamsine. Tonda, narye, ‘Diksukum una ning ara, ani. Pia teleb una ara, ani, malye ning ani,’ nyabuka, lak peterepnamsin yupu ara, ninye mutuku sirya, im sirya nirya ati melipnamne. Winipmanto ara, narye nyapnusin yupu ara, tukwak nang mutuku sirya, im sirya nirya unyak nang ati ara, sik weisa atonun upnamle. Aning kekebuka kel kibikirye, ‘E, teleb winin ning ara ani,’ tenen, moubuka kel biknamnyake. Na yupu arye anang nirya ara, dirina upliba dirina deiceuk, teleb unamake.

⁵ Narye anggunda, ‘Naʼ tenen, nang ati, anggun mal olan nang dam, narye lobuka lyepdopnamsina ati, kintinip deiamse ning ara, akunum dam uple. Minop yanamle! Tonda, narye ninye mutuku sirya, im sirya nirya ati, malye kipnamne ning ara, akunum yanmanto upmala. Dam akunum uple. Ati ara, sik weik laut mekwen lilundam unyak nang ara, ‘Se, Allah arye, dan talak yanuka melibuka lepnamsil do?’ tenen, kalikuka dinauk uninyake. Sikda, ‘Se, Allah el mikip weiknye biryuk, el taruk mikip arye pil doplirye, lyepnamsilʼ tenen, kalikuka dinauk unamake.

⁶ Ati, anggun Israel yala nang nirya babye, tikuka im deice tam ap, tukwak mutuku ap, dipdenamlulume. Dipkoprop nyapsine. Im deice tam ulul ning nirya ara, kum danamle. Ara winipmanto ara, ninye arye weik uku deibikiba, im noutam welepmalya ani, adiparyuk kum danalamle touk, im deice tam wamlye ning nirya babye, kum dandopnamle. Tonda, tukwak mutuku ara, ninye arye wilamak baju wisi danamlirye, kwilikilsakalamle touk upnamle. Winiplyopura, tukwak mutuku noutam, mutuku sirya, im sirya nirya unyak nang nirya ara, talye suma adiparyuk dibilamak touk ubuka, dipnamake. Bukni, na Allah arye anggunti, lobuka lyepdopnamsin nang ara, min kum, kum danamle. Narye anggunti, lobuka lyepdopnamsin nang ara, pia ati aunamle. Aning ara, min kum, kum danmanto anya arye, pia sirya dakuka min kum, kum danamle.

⁷ “Anggunda moubuka kekepnululume! Anggunce, ‘Se, diksukum winina ara, weik tonun patasululeʼ tenen, moubuka kel biklum nang ati nyapsine. Ara, narye, ‘Aning ara wininamlume, aning ara pia kum wininamlume. Teleb una ara ani,’ nyabuka peterelamsise yupu akunum taliplumce, anggun kanye talima noutam boplumce, aninguk talibuka ululum nang ati nyapsine. Anggunce na yupu kekepnululume! Sik yuk talye unyak nang, tukwak mutuku unyak nang arye, talye-talye yupu nyabuka, nalisinyak yupu ap, nalibuka ik-ik nyasinyak yupu ap, minin yupu nyasinyaka ap nirya babye, ilil una pia kume. Tonda, talye nang arye anggunti ara, ‘Sikda malye unyake. Sikda talye ning ati, diba tenenyake,’ nyapsikirye, malye yupu anggun deice nyasinyak nang ati ara, anggunce, ilil una kumce, ‘Se, yata ning deiyok ati ayupu nyasinyak do?’ tenen, kanye teniltona pia kum unamlume. Atalye nang arye, anggunti, malye yupu nyapnamsiyak bukni, anggunda ilil una ap, mikip mitang una ap ara pia kum unamlume. Deiyok ara, ani.

⁸ Sik amalye nyapsikce nang babye, ton kam kum unamake. Sik anang ara winipmanto ning ara, kiridima arye, baju depliba, kin-kin weik ulamle touk unamake. Tonda, ninye arye, domba basam potong dobuka, aning arye baju wilamak ning, el si wol, sing arye aning dilamliba, kum dananamle touk, anang babye dipkoprob dibikirye, kum dandopnamake. Bukni, na Allah arye, anggun Israel nang ati, lyepdopnamsin nang ara, min kum, kum danamle. Tonda, narye anggunti, anggun mal olan nang dam arye, lobuka lyepdopnamsin nang ara, pia ati aunamle. Aning nirya ara, min kum, kum danmanto anya arye, pia sirya dakuka min kum, kum danamle. Naryuk anggun akunum lyepdopsinyopura, na mapu koprop arye deipmunba, dadeipdanin dotalak banamak nang nirya babye, sik nirya pia ati aunamake. Min kum, kum danamake. Allah arye ayupu nirya ara, sik Israel nang ati nyapdeibukba kekebik.

Israel nang arye Allah ati, “Na nio, melipsilyame!” nyabuka, morobika deice arye, nyabik yupu

⁹ Allah arye ayupu nyapdeibukba, sik Israel nang arye nyabik. “Se, nun ni Allah Yahweh, an adiparyuk kekepsimince, melibuka lyepsilyame! Na nio, an mikip weik deice aryuk, nun lyepdopsilyame! Minop talak ance nun apu yapu ati, melibuka lyepdonlum touk, nunce, ‘Adiparyuk tikibirye, nun atalak unyap nang ati ton, yanuka lyepdopsutumʼ tenen, moropkiyabe. Ura, nun ni Allah anti, nun apu yapu arye, ‘Nun ni koproba Allah, melipsilyame!’ nyabuka, moropkikba, yu weik ulamuk isa kwatima, akam ulamuk ning, el si Rahab, akunum parang ya arye sekuka omuka deiyoknye birye, yatanye birye do? Kume, yuknye birye kume. An Allah aryuk, weik laut mekwen noutam kam ulamuk kwatima, el si Naga Laut, weik laut mekwen pum tam arye lukuka oplumba, diamuke.

¹⁰ Tonda, ‘Yatanye birye ailil weik pil domuk do?’ tenen, pia teniltona kum usulule. Kume, Allah ancuk, Ining Bi Laut mekwen, karue weik mek mekwen awamukba, alaut mekwen mek obuka, balamukce, bulubuka deiamuk laut mekwen mek nirya ara, ancuk amekwen cepdeiplume. Yuk nang arye kume, an uka. An mikip weik arye alaut mekwen deiamukak cepdeiplumce, anoutam bisik bana ati, tuku sesal sebuka kintinip deiamlume. Winipnyamluma deice arye, ancuk lyepdopsulum nang arye, alaut mekwen noutam, sesal sebuk bisik deice yanibuka biyikce, mek otam binamik. Ance lyepdomlum nang arye, abisik deice, teleb kibuka otam biyik.

¹¹ Ati ara, nun babye winibuka melisilyame. Minop talak weik mambul pil dolamlum touk, wini talak babye, melibuka lyepdopnamsilyame. Ara, an mapu koproba ara, yu nang arye yanuka, obuka sirya daksikce, sik pera mutuku bobinamsikce, ikin ning nun nong deice deiamsik bukni, Allah Yahweh ancuk, akunum lyepdomsulum nang nirya ara, tamubuka Sion mutuku yanamabe. Ara, ‘Pia telebuk unamap,’ tenebikirye, Yerusalem mutuku tamubuka yanamake! Tonda, tamubuka yanamak talak ara, sik asok deice, lang-lang nyapliba, kanye deibuka, weik yupu arye kanye deilin mot nyabikirye, sik adiparyuk tamubuka, Yerusalem mutuku yanamake. Tonda, sik anang ara, tia talak ati kum bukni, pia ati, kanye weik deibikirye, anti si erenamkiyake. Tonda, sik anang ikin-ikin ulamukba, kanye imun weik kanye bobuka ulamik ning nirya ara, akunum kum danamla ati, pin-pin asa tuba si erenamkiyake. Sik Israel nang arye, Allah ati, nyabik.

¹² Allah arye, sik Israel nang ati nyabuk. Nara Allah aunune. Narye ayupu nyapsinirye, anggun kanye talima melipsinirye, teleb unamlume. Naryuk anggun nirya ati, kanye pia teleb kipdeipnamsine. Winipnane ati ara, anggunda, yata ning deiyok ati, tukwak mutuku noutam malye unyak nang ati, ilil usulul do? Tukwak nang nirya ara, dibinauk unamake. Winipmanto ara, talye yo mutmuta, keting tin arye opliba, sesal sepmalye touk, unyaka anya arye, sik talye tukwak nang ati, ilil una kume.

¹³ Sik talye tukwak nang ati, ilil kibuka ululum nang ara, nara, Allah Yahweh arye, anggun nirya kwepdeipsisopura, akunum lubakipnulume. Tonda, naryuk im deice tam wamlye ning nirya babye, bibikuka deipsirye memepdeipse. Tonda, tukwak mutuku amu tam deiyok ning babye, naryuk kwepdeipsirye tikipsinye, Allah ati akunum lubakipnulume. Lubakipnuluma deice arye, anggunda yata ning deiyok ati, asum-asum nirya ara, ‘Anggun opnuyapʼ tenen, kintinibuka deibikirye, yu weik arye olyanganamsiyak nang ati, ilil usulul do? Bukni, moubuka tenipdelulume! Dipkoprop, sik yu weik unyak nang arye, anggunti akunum olyanamsiyak do? Anang ara, dan sukum unyak do? Kume, anang arye, wini talak kum olyasitingce, min kum, kum kipdeipnamsiyake.

¹⁴ Sik wenen aik dongolamikba, tuba daunyak nang ara, narye adiparyuk lopdeipnamne. Anang ara, sik din ton min kum, kum danamle. Tonda, sik anang nirya ara, dibikiba, tuku pum tam ton kum weipnamake.

¹⁵ Aning ara, talye ati kum nyapsine. Deiyok ara, ani. Nara anggun si erenululumnye, anggun ni koproba Allah, na si Yahweh unune. Na mikip weik arye, laut weik mek kwen deice deipniba, kuruninikuka lutamuplirye, lelim weik nyalule. Na si ton nyanyaka ara,ani? Nara Allah Yahweh, aning-aning deice tam erebuka, Pia Mikip Weiknye Unirye, im deice yin talin malaikat nirya talibuka, sik deiyoknye unune.

¹⁶ Na Allah arye, ‘Na yupu arepniba kekeplirye, lak nyalbinamleʼ tenen, an Yesaya biti, na yupu dobuka an si pum akunum dongopkise. Tonda, narye anti, tuba kalikinauk ukunune. Winipmanto ara, na taruk pum tam ulyama anya arye, yata ning do nirya anti kum yanuka opkutue. Na Allah ara, im deice tam uamlye ning nirya babye, akunum bibikuka deiamse. Aning atonun, naryuk tukwak mutuku amu tam barina ati, teleb kipdeipsiba, tuba aupnamle. Wininuna ati ara, narye Sion mutuku unyak nang ati, nyapsine. “Anggunda, na mapu koprop, ‘Naʼ tenen, nang ululume,” nyapsine.

“Yerusalem mutuku ululum nang ara, anggun ikin usilye ning ara, sirya daknamle,’ nyabuk yupu

¹⁷ Kekepnululume! Anggun Yerusalem mutuku noutam ululum ninyeo, adiparyuk buklulume! Anango, anggun nirya buklulume! Anggun Yerusalem ululum nang ara, tikuka kintiniplulume! Nara Allah, na yu upnukba, kanye imun ning deice arye, wenelamsise ning ara, anggunce akunum doproplume. Winipmanto ara, yu weik mek, kanye wangalamak ning arepsisiba, aning nirya dibuka, sirya daklamlume. Mitik tonun babye, kum dikdongobuka batakmalume. Aning nirya akunum dinmaluma ani, anggun kanye walwalaplumba, tukwak sakmanto ulume.

¹⁸ Se, anggun Yerusalem ululum nango! Anggunda bicoe. Anggun Yerusalem mutuku noutam ululum nang arye, anggun mapu meliamlumba, akunum nebuka du nang unyak bukni, tonok ning babye anggunti, ‘Teleb binulum bisik ara, ani. Narye anggun taruk talibuka menekuka banmana ani, anggunda na aminyan tam yanganamlume,’ nyabuka kum nyaptinge. Anggun anang kan-kan arye, tonoknye babye, ‘Na talipsinirye, teleb bisikuk bobinamsine. Naryuk moubuka kalikisinirye, melibuka bobanamsine,’ kum nyaptue.

¹⁹ Anggun deice ara, kanye imun weik ning deiyok bitinye ara, akunum anggun dam yanuka, anggunti weik ikin arye teiknamsile. Ara, mal olan deice arye, anggun Yerusalem mutuku nang ara, akunum malye kibuka, sung-sunga buklopnamsiyake. Tonda, anggun mutuku noutam unyak nang ara, din patana weik talak kibukba, dopropmalume. Winibuka ikin weik ulamlum bukni, yata mutuku nang arye, anggunti, bico upliba, yanuka melipnamsiyak do? Yata mutuku nang arye yanuka, anggun melipnamsiyak do? Kume, narye yuk mutuku nang dopropniba, anggun dam kum yanuka melipnamsiyake.

²⁰ Se, anggun Yerusalem mutuku ululum nango, anggunda bicoe. Anggunce deiplum mapu nirya ara, mikip pia mitang ubukba, kanye tenina kumce, tukwak sakuka poulbiyike. Dan bisik do nirya, dana-dana tam bisik bana ati, deiyok koubuka banyak bisik nirya, anggun mapu tuku deice sakuka pounyak rusa basam arye, mangkau kanye bobuka banmakirye, ninye arye wemikce jaring atonun ning, kum eipmakiba, youlamle touk, unyake. Yata wiripting do, kume. Anggunce deiamlum mapu nirya ara, sik malye-malye winilamik ning ati, Allah Yahweh arye, yu weik ubukba, sik deken ning wenebuka, sik deice weik tonun arebuka anya arye, aning nirya akunum dopromikba, winipmanto kum unyake.

²¹ Ati ara, kanye imun weik ning, anggun deice yanamukba dopromlumce, amu tamuk ululume. Winipmanto ara, anggunda, yu mek, kanye wangalamak anggur mek weik tonun dibikiba, sik kanye walwal upliba, talye kanye bobuka, kum winipmanto ulamaka atonun ululume. Ati anggunda, narye nyapnusin yupu ara, moubuka kekepnululume!

²² Anggunce si erelulumnye Allah, nara, aning-aning deice tam erebuka mikip weik arye, aning-aning nirya talibuka unune. Nara Allah Yahweh, anggunda ‘Naʼ tenen, nang ululama anya arye, anggun si erelulum Allah arye, ayupu nyapsine. Anggun tam kibuka melisununye birye, anggun melibuka kalikina ati, ayupu nyapsine. Ara, anggun malye winilamlum ning ati, na yu weik upnukba, anggun deice arye, weik ikin ning deipsiseba, kanye imun usulul ning ara, anggun dam arye tamubuka dopropnirye, kum deipnamne. Winipmanto ara, ninye arye, kanye wangalamak yu mek dibikiba, kanye walwal uplyopura, tukwak sakuka poulbalamak touk ulamlum bukni, wini talak ara, aning ton ap, kum arenamsine. Narye anggunti, yu tenelamsise ning ara, akunum kum kipdeipnyopura, winipniba, anggun deice ikin ning ton yaliba, kum dolonamlume.”

²³ Narye minop talak, anggun ikin upnaba, kanye imun kanye bobuka ulamsuk ning nirya ara, narye dopropnirye, anggun nong deice ikin ning delilamsik nang, anggun mal olan nang ati ara, sik deiceuk aning tamubuka deipnamne. Ara, anggun oldana ati yangalamik nang arye, anggunti, ‘Tuku deice mapmunyeba, anggun nong deice yanibuka binuyabe,’ nyabuka, anggun deice yanilamsik yu nang ati, narye wenepnamne. Sik anang arye, anggunti, ‘Tuku deice mapmunyeba, anggun nong deice yanibuka binamsiyabe,’ nyabika deice arye, winipmanto ara, anggunce tuku deice mapmunye talak ara, sik ayuk mutuku nang arye yanuka, anggun deice yanipdongopsike. Anggun deice ara, talye tuku bisik deice atonun ubuka, anggun nong deice yanibuka balamik. Bukni, wini talak ara, anggun Israel nang ati, ikin weik ulamsuk ning nirya ara, dopropnirye, anggun yanilongolamsik nang ati, sik deice deipnirye, weik tonun wenepnamne