Yesaya 5 - Eipomek

Ninye arye, malye winin ning ati, domon yupu deice arye, anggur wa wiliamik ati, mot sen deice arye, nyabuk yupu

¹ Kekenmanulum buk, mot senmana ara, anggur tapu wa wina deiyoknye biti, bico uniliba, nyanmane. Na kayapu, anggur wa wina deiyoknye birye, wa wiamuka ati, mot senune. Mot sena deice arye nyapne. Bico tenenunye birye, mutuku bukamuka lilunak, tuku pia telebak anggur wa wibuk.

² Anggur wa win talak ara, tuku paliplobukce, keil wibuka dopronokuk. Teleb tuku noutam ara, anggur tapu pia teleb ning kouamuk. Kouamukce, ‘Na anggur tapu duk ubula dopropnicak’ tenen, doltakna aik cang aik domuk. Winibukce, ‘Anggur tapu duk teikniba, mek deiplyeura, mek wenamne’ tenen, keil pala deice lukeibuk. Aning nirya akunum winibukopura, ‘Dan talak arye, anggur duk teleb ning moupnamnil do?’ tenen, dilamuk buk, anggur tapu duk, mek teleb ning kum moubukce, anggur tapu duk sik len ninguk moubuk.

³ Winyamuka ati, se na kayapu, anggun Yerusalem mutuku ululum ninye ap, Yehuda tam ululum ninye ap ati nyapsine. Malye ubuk ning ara, anggur wa wina deiyoknye birye, malye ubuk do? Anggur tapu arye, malye ubuk do? Anggun bita teneipdelulume.

⁴ Narye, ‘Anggur tapu duk mek teleb ning moupnamnil’ tenen, apil nirya dolamsebuk, yata deiyok ati, anggur duk sik len ninguk moulamuk do?

⁵ Anggur duk malye ninguk moulamnuka ati, winipnamak ning ara, nyapnusine. Ara, anggur wa wiamsak dana-dana tam nirya, keil poka dobuka denepse ning ara, dakuka uluplonamne. Winipnyopura, anggur wa malye upnamle. Keil poka dobuka denepse ning ara, dakuka daluplopnyopura, yuk malye nang wekikirye, amutuku nirya yanuka yanipnamake. Winibuka yanibikirye, uku sice kiplopnamake.

⁶ ‘Na anggur tapu duk weik moupnamnil’ tenen, anggur tapu taruk seklopniba, kwapu youbuka, duk weik mouptu bukni, aning ara, kum seklopnamne. ‘Duk weik moupnamnil’ tenen, pinga kum deipnamne. Anggur wa ara, ‘Dauplye’ tenen, bataknamne. Anggur wa wilamse mutuku nirya ara, talye yo mutmuta ap, tace ning ap, beteklirye pabuka kwiniklyopura, anggur tapu bok ton kum eipnamake. Talye ninguk papnamle. Tonda, narye dua ap, mok ap ati, “Memepdoplulume,” nyapniba, mok ara, asukum ton kum sakuka, kum pulyanamle.

⁷ Adomon yupu nyapmasina deiyok ara ani. Anggur wa deiyoknye bira, Allah aning-aning nirya talibuka ulye deiyoknye, Allah Yahweh ulule. Allah Yahweh ara, aning-aning nirya talilirye, im deice yin talin malaikat nirya, sik weik deiyoknye ulule. El anggur wa ara, Israel yala ninye unyake. Tonda, teleb wa tuku ati kanye delilul ning ara, sik Yehuda yala ninye unyake. Israel ninye ap, Yehuda yala ninye ap, ‘Teleb kibuka unyak do?’ tenen, dililamuk bukni, aninye nirya ara, olanauk ulamik. ‘Diksukumuk unyak do?’ tenen, dililamuk bukni, ton nang arye, ton tam nang ati, ikin ning weik, sik nong deice delilamikce, malye nyabuka, ngaluklamikba, kekelamuk. Ati, Allah arye aninye nirya ati, malye kanye bolamuk.

Ninye arye malye winin ning ati, domon yupu deice arye, anggur wa ati, nyabuk yupu

⁸ Anggun malye ululum nang ara, Allah arye wenepnamsila ati, anggunda bico. Ara, anggunce, anggun aik akunum doplum bukni, yuk talye kankan nang arye domik ning ara, anggunce dekna ap, alubuka dolona ap arye, doproplumce, anggun ninguk weika arye, tabakuka delilulume. Atonun, anggun wa tuku akunum aubuk bukni, yuk nang arye wilamak wa tuku ton, alubuka doproplum nang ara, malye winilulume. Angguncuk, sik yuk nang talilamik ning ap, ulamik mutuku ap nirya ara, akunum doproplumba, anang yukak bendobikura, angguncuk amutuku talibuka, anggun yuk aunmamlume. Winilulum ning ara, malye weik winiplume. Allah arye nyabuk.

⁹ Nara nabi Yesaya kekenmasibuk, aning-aning eitam erebuka, mikip weik ululnye Allah Yahweh arye, “Dipkoprob winipnamne,” nyabukak kekepse. Anyabuk yupu ara ani. “Narye Israel nang wenepnamne talak ara, teleb weik aik, akunum domik ning nirya ara, anyasik noutam ninye ton kum unamake. Sikce, urasin pia teleb aik, istana domik ning nirya babye, anyaik pum tam, ninye ton kum unamake. Narye anang ati wenepnirye, pia kum kipdeipniba, anyasik-anyasik nirya, ola dem upnamle.

¹⁰ Ninye ap, sik sapi basam ap arye, pala weik wa, lo 10 hektar ubuk ning ara, wa wibikirye, anggur yala koupnamak bukni, aminyan talak anggur duk li yalyopura, anggur duk dakuka, mek purubuka deipnamak ning ara, pia mitik tonunuk, 22 literuk upnamle. Aning atonun ton, gandum yala ati, kintinibuka deipnamak yala ara, 220 liter bobuka koupnamak bukni, gandum wa wibuka kouamica ani, paplirye, el nong moupnamle ning ara, weik kum bukni, mitik tonunuk, 10 liter dem lipnamake. Deiyok ara, narye din patan talak arepnamsin ati, anggunce koulalum ning nirya ara, aminyan talak pia kum kipdeipnamne.

¹¹ Anggunda bicoe, weik arye wenebuka opnamsina atia! Ara, anggun Israel yala nang kan-kan arye, ton nang ara, beren tam koproba arye, bukikirye, ‘E, adiparyuk kanye wangalamak mek dilbinuyabe,’ tenebikirye, unyake. Ton nang ara, beren tam arye dipdongobuka, anoutam talak ap, lukunyan talak ap ara, sikce yu mekuk pia dinyaka deice arye, amek el yu arye, sik kanye pia wanganyake.

¹² Sik anang arye, weik kwalya kwalibuka dinmace talak ara, mot sena ati, lelim len ning, el si kecapi ap, gambus ap, tonda rebana ap, suling ap onmakirye, kanye wangalamak mek, anggur mekuk dinyake. Wininyak deice sikce, ‘Se, nun ni Allah Yahweh, elce amambul pil donamleʼ tenen, sikce elti, moubuka bita tenebikirye, el taruk arye mambul pil dolamuk ning ati, si kum erenyake.

¹³ Na kayapu koproba, sik Israel yala nang ara, malye weik unyaka ati ara, narye lo arepnyeura, yuk pera mutuku yu nang arye, Israel nang ati olyaceura, sik mutuku bobinuka, ikin pil arukunamake. Yuk mutuku noutam bobinamak talak ara, sik Israel nang, ‘Naʼ tenen, nang ara, aning-aning nirya, kel bikna kum nang, walwal un nang dem dobuka, yuk karin mutuku delilbinamsiake. Sik deiyok-deiyok nang nirya ara, din patana deice arye dipnamak ca! Tonda, sik amu tam talye daunyak nang ara, mek dina kumce, pia din patan deiceuk ulamikca ani, dipnamake.

¹⁴ Ati ara, narye dibina deiyok ning ara, din ap, mek ap patana deice arye, tonda, ninye olana deice arye, ninye weik tonun akunum dibicopura, dibin nang sik kanye balamakakuk, binuka unamake. Asukum ara, tuku palilamakak ap, sik dibice nang kanye binamakak ara, lipdanmanto kum mutuku. Ninye dibikcopura, ninye yupa nukmanto kumce, yupa pia weik banamake. Ara, Yerusalem mutuku talibuka, ulamluma deiyok nang nirya ap, anggun mapu ap, anggunce taliplumba, anggun amu tam unyak nang ap, ninye mal olan nang ap, kanye wangalamak mek weik dinyak nang ap, kwalina kwalibuka kanye deibikirye, talye luparabuka dikirye, malye-malye unyak nang ap, narye anggun nirya ati, oplopsinyeba, dipmunyeura, tuku luknamsiake. Tuku luksiceura, akunum diamik nang biyik tamuk, anggun babye amutuku binuka unamlume.

¹⁵ Na Allah arye, aikin ning, sik deice akunum deipye, nang nirya ara, amu tamuk deipnamne. Yata mutuku do nirya, im sirya, mutuku sirya nirya unyak nang ara, malye updakceura, alye asa unamnyake. Tonda, yata nang do nirya, sik kanye erena deice arye, kwalibuka unyak nang ara, tamubuka amu tam kipdeipnamne. Sik nirya ara, ‘Seʼ tenen, ikin kanye bobuka unamake.

¹⁶ Malye winin nang nirya wininamak bukni, nara kume. Nara Allah Yahweh, aning-aning eitam erebuka, mikip weik ununye, nara pia teleb pil dopnye deice arye, na si laka kipdeipnamne. Nara Allah arye, sik malye unyak nang nirya ati, diksukum kibuka, ninye yupu bokdeipnirye, sik malye winilamak touk, akunum wenepnyopura, yuk mutuku nang nirya eibikirye, ‘Se, Allah Yahweh ara, el siuk erenamabeʼ tenen, unamake. Aning atonun, na Allah ara, malye winin ning tonok babye winina kumce, pia diksukum piluk donamne deice arye, yuk mutuku nang nirya eibikirye, ‘Se, Allah Yahweh ara, elda dipkoprob diksukum un ninguk winilirye, Pia Telebnye ulule. ‘Elda malye un ning tonok babye, pia kum winiluleʼ tenen, moubuka bikinamyake. Aning nirya ara, laka kipdeipnamne.

¹⁷ Na Allah arye, aning nirya, akunum pil dopnyeura, domba basam mapu ap, domba basam nong weik nemuk ning ap, sik mutmuta dinak eplobikirye, pia telebakuk dinamake. Ara bai mutuku talyak ap, tonda minop talak sik bona talin nang ulamikak bukni, sik aik olnoutam babye, mutmuta tiklamyak, talye mangkau arye bobuka dinamake.

¹⁸ Ton nang ara, tilila yupu uk, tuba-tuba talye nyaltakanyake. Aning wininyaka ara, winipmanto nyapnusine. Ara, talye yupu weik nyanyak nang ara, ninye arye tuku deice ban ning, el si gerobak, ikin ning gerobak pum tam libikirye, tapu kirikuka libuka, bobalamak touk wininyake. Sikce tilila yupu nyakirye, malye un ninguk tuba-tuba wininyak nang ara, bicoe! Sik nong deice ara, pia ikin ning, cakman tenepmanto kum kanye, ikin ning upnamle!

¹⁹ Deiyok ara, ani. Sik anang ara, Allah ati malye yupu nyabikirye, lik-lik asa yupu nyabuka nalinyake. Sikce nyanyake. ‘'Deiyok ara, Allah elce, ‘Winipnamne,’ tenelye ninguk, min arye pil doptuba, nun asing arye eiptibye! Nunda aunmabya ani, Allah arye, ‘Aning ara winipnamnarya,’ tenyamuk ning ara, adiparyuk, asukum yaturye, apil doptu ura, nun ton aning eibuka biknuyabe. Tonda, Israel nang arye, el si erenyaknye, Pia Teleb Lek Ululnye, elce nun dam yatuba, nun asing arye eibibiyakarye, moubuka biknamabe,” nyanyake. Nyanyak bukni, diba tenena kumce, talye lik-lik asa nyanyake.

²⁰ Anggunda weik arye wenepnamsin ati, anggunda na bicoe. Anggunce dipkoprob pia malye wini ning ati, ‘Kume, aning winina ara, telebe,’ nyalulume. Anyapce, anggunce, dipkoprob teleb winin ning ati, ‘Kume, aning ara, pia malye ulule,’ nyabuka peterelulume. Tonda, pia malye unyak ning, kunukna ato ning aupmalibuk, anggunce, ‘Kume aning ara, dirina atonun ninguk ulule,’ nyabuka peterelulume. Tonda, dirina aupmalyebuk, anggunce, ‘Kume, aning ara, kunukna atonun ning ulule,’ nyabuka tilila yupu nyalulume. Atonun, anggunce, pia toh lelamle ning aupmalye babye, anggunce, ‘Kume, aning ara, sik ning ulule,’ nyalulume. Tonda, yu ning aupmalibuk, anggunce, ‘Kume, aning ara, toh lelamle ning ulule,’ nyabuka, tilila yupu nyalulume. Aning atonun nyalulum nang nirya ara, narye wenebuka opnamsine.

²¹ Anggunda, weik arye wenepnamsin ati, anggunda bicoe. Ara, yata nang do nirya, anggun aululum nang ara, ‘Nunda kel weik bikamupu nang unyabe,’ tenepmamunce winilulume. Anggunce, ‘Kume, nunda aning-aning kel bikupa ati, nunda dipkoprob kel nang unyabe,’ tenepmunya ati, aning atonun nyamunye nang nirya ara, narye wenebuka opsiniba, ikin weik unamlume.

²² Anggunda weik arye wenepnamsin ati, anggunda bicoe. Ara yata nang do nirya, anggunce anggur yu mek, kanye wangalamak mek, weika arye dinyak nang ara, yuk nang eibicopura, ‘Se, sikda dipkoprob teleb unyake,’ tenebikirye, anggunti si renyake. Aning atonun, sikda yu mek, kanye wangalamak mek ap, yuk yala yu mek ap, tabakuka kintinipmunce, dipmunyeura, yuk nang arye eipsikirye, ‘Se, sikda mambule. Yuk nang arye apil mitik tonun aryuk donyak bukni, anggunti ara, pia weik kel arye apil dolulume,’ nyabikirye, anggun si eresinyake. Aning atonun winilulum nang ati ara, narye ikin ning weik anggun deice deipnamsine.

²³ Tonda, anggun anang aryuk, anggunce namin kilongon yo bok dopropmunce, dipkoprob malye winipmalinye biti, ‘Kume daupmalye, elda malye kum winipmale,’ nyabuka, teleb kipdeipmunce, kum wenelulume. Aning atonun, dipkoprob malye pia kum winipmalinye biti, namin kilongon yo bok dopropmunce, ‘Elda malye winipmale,’ nyabuka, el nong deice ikin ning deipmunce, wenelulume.

²⁴ Anggunda, Allah arye, ‘Aning ara, wininamlume, aning ara, pia kum wininamlume,’ nyapdeibuk yupu nirya, akunum bataklume. Tonda, anggun Israel yala nang, anggunce el si erelulum Allah ara, Pia Teleb Leknye, elce nyapdeiamsuk yupu ati, malye kilulumce, yaniltakalulume. Winiluluma ati ara, anggunda sisal ning ap, kel-kel alamle mutmuta ap, uku buk arye diplirye, kum danalilamle touk, anggun amalye ululum nang babye, Allah arye kum kipdeipnamsile. Aning atonun, ninye koulamak ning, yating wamlye ning bukni, yating lyupdopliba sesal selolamle touk, anggun babye kum kipnin banamlume. Tonda, bai tam kita ning, kita mouplirye, lapmalye ning tubuka lulsaklamle touk, anggun babye, Allah arye wenebuka sirya daknamsile.

²⁵ Allah arye el mapu koproba, anggun Israel nang ati, yu uplye ati, uapnamsile. Ara, weik uku buk dilamle touk, yu weik upliba, anggunti wenepnamsilarya. Elce anang wenebuka opnamle ati, ‘Aninye opnunʼ tenen, el taruk erebuka, akunum kintinibuk. Winiplye talak ara, mutuku-mutuku nirya luluknamle. Tonda, sik anang opliba dipnamak nang, sik tuku luknamakak ara, talye bisik lilunak donokamikiba, nirya lyulamlirye, tong weik welenamle. Winiplye babye, Allah arye sik anang, sik wenena ati, ‘Adekna,’ kum tenepnamle. Elce sik malye wininyak ati, weik yu uplyeba, tuba wenenauk unamlarya.

²⁶ Allah arye yu uplyeura, sik ninye pera mutuku daunyak nang ati, ‘Minopce asukum yatingʼ tenen, yu yupu arye yukupnamle. Tonda, elce, ‘Asukum pola yaceura, anang opnuyapʼ tenen, winipmanto ara, ninye arye lak kilina ati, weik spanduk deibikirye, erebuka lak noutam tikililamak touk, yupu nyabuka, sik pera mutuku daunyak nang ara, adiparyuk yanuka opnamake. Anggun eiplume! Ayu nang ara, akunum minopce yanganmake!

²⁷ Sik pera mutuku arye, Israel nang dam yanganamak nang ara, ‘Mal olal binamapʼ tenen, kintinibuka yanganamak talak ara, sikda dikdik ton kum upnamle, tonda wi talibuka kum mapnamake. Sik mitang upmalye babye, bisik noutam arye, ton kum saknamake. Tonda, sik yan dumu ton kum duknamle. Deiyating ton kum lopsaknamle. ‘Dikdik sepnuyapʼ tenen, sik deiyatinga ara, kum lopmakirye, sik yan ongon ning, el si sandal ara, tapu kum lopnamake. Bikbik abuka, olyanganauk upnamake.

²⁸ Anang sik mal ara, taca lubuka bopnamake. ‘Israel nang opnuyapʼ tenen, sik yin ara, ‘Mal dopnamapʼ tenen, yin tapu pina kum-kum dibuka kintinipnamake. Talya taruk aryuk, kum talipnamake. Sik yu uplya ati, tulum asa bikbik abuka, pola yanamaka ati, anang sik kuda basam yan kala mikip ara, pia kat keil uku seknak ati, memebuka delilamak keil atonun upnamle. Ati akuda arye, tuku deice balamle ning, el si kereta perang bobuka balibuk, kereta yan roda ara, min libuka binamle. Winiplyeura, winipmanto ara, mikip weik kum, sik mikip, kum arye bubatikuka balamak touk kibuka, sikda bikbik abuka yanganamake.

²⁹ Sik pera mutuku arye yanamak yin talin nang ara, sik yupu weik arye, nyapnamaka ara, yu gus atonun ning, singa kus, el dina oplirye, yupu weik kamulamle touk, yupu weik nyapnamake. Sik aninye arye, ninye tomopnamak ning ara, singa kus arye, el dina obuka dipnulye ning, oplirye weik yupu nyalamle atonun ubuka, anang arye Israel nang bobikirye, sikce abatakikce nang, adiparyuk bobuka bindopnamake. Winipnamak talak ara, yuk mutukunye tonoknye babye, sik Israel yala nang ati, yanuka kum lyepnamle. Ayu nang arye, tonoknye ton kum batakuka binamak. Sik nirya bobuka binamak.

³⁰ Tonda, winipmanto ara, sik yin talin nang, yu weik arye, Israel nang ati olyanamak talak ara, singa kus arye, weik yupu nyalamle touk, sikce weik yupu deice arye nyanamake. Yehuda mutuku unyak nang arye, kekelamikcak, mal olanmakirye, ngaluklamak ning ara, winipmanto ara, weik mek laut mekwen ombak weleplirye, lelim weik lelamle atonun kibuka, ngaluknamake. Tonda, yata nang do nirya, sikce amutuku noutam nirya, singa kus yupu kamuna arye, inipnamlya ati kunuklamle atonun, winipnamle. Ara, keting kumuplye talak bukni, kunuknamle. Tonda, amutuku unamak nang nirya ara, imun kanye bobikirye, ikin weik unmacak eipnamake. Keting deiplyeba, dirina weik upnamle bukni, asum ara, weik mutuku dup, kunuklirye dua palibuka winilamle touk kibuka, amutuku nirya ara, kunuknamle. (Ara kereta ap, kuda ap deice bukuka banmaceba, tuku butbuta arye, weleplye deice arye, dua winilamle touk kibuka, tuku butbuta arye lipdongopliba, amutuku nirya kunuknamle. Winiplyeura, Yehuda mutuku nang nirya ara, imun kanye bopnamake.)