Yesaya 49 - Eipomek

Allah Yahweh arye, Israel ninye ap, yuk pera mutuku ninye ap, lyena ati dopdeipnamuknye biti, nyabuk yupu

¹ Allah arye, ninye lyena ati, el melin pil donamuknye wipdeibukba, anye birye nyabuk. “Se, anggun pera mutuku dana-dana ululum ninye ap, laut mekwen noutam sekdongamuk mutuku kon ululum ninye ap, nirya arye, na yupu uk, moubuka kekeplulume. Ara, sik min kum deiamnirik talak arye, akunum Allah Yahweh arye, wipdeipnukce nyapnuke. Tonda, na nin mun pum tam, tuba bomnuk talak arye, akunum wipdeiamnukce, na si sisibuka yukupnuke.

² Allah arye, nati, ‘Elce mambul yupu nyanamle’ tenen, yupu teleb kipdeipnuke. Winipmanto ara, parang ya ketepmakibuk, si tolamle atonun, yupu nyana weik kel kina deiyok ning arepnukce, teleb kipdeipnuke. Winipnukce, Allah el mikip weiknye, el taruk koproba arye kalikuka melipnuke. Adeice arye Allah el yupu nyapnuka ara, mal lubuka tace ketepdeipmakce ning arye, luksiliba nong noutam weksilirye, libum-libum alamsila atonun kipdeipnuke. Winipnukce, ‘Aminyan doyanamle talak dopropnirye bopnamne,’ tenelamak touk, mal lin aling arye libuka delilamak touk, ‘Aminyan talak pil dopnamnil’ tenen, el mal lilamak ning atonun ubuka, dungnupdeipnuke.”

³ Allah arye, na Israel biti, nyapnuke. “Anda na amu tam umince, na piluk donamnilame. Na weik teleb ununa ap, na mambul weik ununa ap, an deice deipkinyopura, ance mambul pil dominya deice arye, ninye mutuku-mutuku nirya, weik tonun, ‘Se Allah ara weik telebe,’ tenebikirye, na Allah siuk erebuka unamniake,” Allah arye nyapnuke.

⁴ Nyapnuk bukni, narye tamubuka, elti, nyapse. “Na kanye ara, talye piluk donmanibuk, na mikip kum danilirye, mitang upnamnile. Pil ara weik donamne bukni, ‘Nong ara kum danamnil do?’ tenenune. Aning ara na kanye aryuk utenyamse bukni, na kele, Allah Yahweh arye el tenelye touk dipkoprob upnamnile. Tonda, na pil donya atonun, Allah arye dekna arenamnile.”

⁵ Allah Yahweh arye, na min kum deiamnirik talak arye, ‘Na pil donamle’ tenen, wepdeiamnuke. Ara, Allah kanye deiamnukce, ‘Na pil melilamnuknye birye, na mapu Israel ninye nirya bulupdeipliba, sik nirya tamubuka na damuk yanamak’ tenen wiamnuke. Allah Yahweh arye, ‘Na pil melinamnilnye, ninye arye el si erenamak’ tenen, weik si sisibuka wepdeiamnuke. Na mambul pil donuna ara, Allah el mikip deice aryuk meliniliba apil donune. Ati, elda na melibuka mikip kilina deiyoknye unulule.

⁶ Allah arye, el amu tam pil melibuka dolulunye, nati nyapnuke. “Na mi anda weik mambul pil dopnamnilam bukni, ‘Aning mitik uplyak’ tenen, weik ikin ning ton nyapnukine. Ara, Israel ninye, sik apu koproba Yakub birye deiamukba dadeipdanin yangalamik ninye ara, yuk pera mutuku yu nang arye, obuka sirya dakikce, tapu koubuka sik mutuku tamubuka bobinamike. Winilamik bukni, ance pil donmaminya ani, aninye tuba tonap, dekenamnululume. Yuk nang arye Israel yala ninye weik tonun, bobinamikba, kum danin balamikba, na Allah arye kalikuka melilamsiba, tuba kam unyak ninye ara, an pil dominya deice arye, aninye dobuka weik tonun, na dam ila tamubuka boyanganamnilyame. Na Allah arye, anti, dirina kina deiyoknye kipdeipkiniba, ance Yahudi yala kum ninye ara kunuknak atonun unyak bukni, anggunce, sik talima dirin kilinamlume. Winipnamluma deice arye, na dirina ara Yahudi yala kum ninye sik deice arepneba, moubuka tenebikirye, nati kel kipnamake. Na dirina sik arepneba, adirina eibikirye, sik kanye deipnamaka deice arye, sikce ninye mutuku-mutuku nirya ap, mutuku sirya im sirya daunyak ninye ap, peterebikiba, kekebuka kel kibikirye, sik malye unyak ning batakicopura, narye ninye weik lyepnamne.” Allah arye nyabuk.

⁷ Allah Yahweh arye nyabuk. “Nara Israel ninye, sik Lyena Deiyoknye unune. Sik malye wininyak ning ati, talye lukparabuka opnirye, sirya daktinye bukni, sik malye ning pununa ati, narye sikti, dekuka lyepnamne. Nara weik Diksukum koprop Una Deiyoknye unirye Israel yala ninye ati pia kalikuka melinune. Pia Telebnye uniba, Israel ninye arye na si ereninyake. Na Allah arye na amu tam pil donamnuknye, na melinanye biti nyapkine. Israel yala ninye nirya arye anti, ‘Anye bira nun like’ tenen, anti malye yupu weik nyalamkike. Tonda ance ninye deiyok nang, sik amu tam pil dolalumnye biti nyapkine. Sik ninye deiyok nang ara, narye anti donamkin pil eibuka kel bikikirye, an si erena ati, tikukabikirye, an si erenamkiyake. Tonda ninye deiyok nang arye, delilamak mapu eipkikirye, an si erena ati, yanuka nong kanulongonamake. Wininamaka deiyok ara nyapnune. Ara, nara Allah Yahweh arye ‘Wininamne,’ nyanye yupu nirya ara, dipkoprob dukulongonanye ununa ati, ereipkiniba an si erena ati, an si erenamkiyake. Nara weik Diksukum koprop Una Deiyoknye unirye, Israel yala ninye ati pia kalikuka melinune. Na aryuk anti wipdeiamkisa ati, yuk-yuk mutuku deiyok nang nirya arye, an si erenamkiyake.” Allah arye nyabuk.

Allah Yahweh arye, Israel ninye tuba tamubuka teleb kipdeipnamuka ati, nyabuk yupu

⁸ Na Allah Yahweh arye na mapu Israel ninye ati nyapsine. “Narye tenyamse talak akunum yalyopura, anggunce moryamnulum ning ara kekepsinirye, melinamsine. Tonda narye tenyamse talak akunum kiplyopura, anggun melibuka lyepnamsine. Winipsinirye, anggunda na amu tam ulamunyeba, narye tuba kalikuka melinamsine. Winipnamsina deice arye, doryanamle talak unamak Israel ninye babye, aning eibuka kel bikikirye, ‘Nun babye dipkoprob lyepropnamsile’ tenen, kel biknamake. Ati na pil donamsina deice arye, yuk mutuku nang arye anggun mutuku nirya alabuka dopropsik ning ara, tamubuka arepnamsine. Winipsinyopura, narye anggun minop talak aik dobuka ulamlumak bukni, aik oldemuk upsukak ara, tamubuka arepsiniba, aik dopmunce amutuku ara pia talibuka unamlume. Aning ara, na tenepse talak akunum uplyopura, winipnamle.”

⁹ Ninye wenebuka dongolamak aik bunyak nang ara, lopdeipnirye, ‘Bai tam bilulume,’ nyapniba binamake. Tonda kunuknak unyak ninye ara, dirin dam dobuka deipnamne. Winipnirye sik aninye ara, dobuka yo pata mutuku aning-aning nirya teleb kibuka pana kum mutuku deipniba, unamak bukni, sik unamakak nirya ara, din ton pia kum patapnamle. Auna uk upnamle. Sik weinyak ning babye, bisik lilunak palamle maning ap, mutuku kon palamle maning ap, talye lukparabuka dinamake.

¹⁰ Sik aninye ara, din ap, mek ap, ton kum patapnamle. Tonda, mek kumak, pia pata mutuku unamak bukni, sik nong deice keting kum dinamle. Ara, narye sikti, bico tenebuka lyepromsinye, na Allah arye sikti, pia tuba kalikuka melinamne. Pata mutuku noutam unamak bukni, narye sik aninye bobukapnirye mek pu dam delilbanamne.

¹¹ Narye sik banamak bisik ara, weik cang mutuku bukni, lu kipdeipnirye, bisik teleb kibuka yalinamne. Tonda, weik kwalin bisik balamice ning ara, lu teleb kibuka yalinamne. Tonda sik banamak bisik ara, dok sukum bisik nirya, tuku erepdeipnirye yalinamne. Narye teleb kipdeipniba, sik banamak bisik nirya ara, telebuk upnamle.

¹² Winipnyopura, na mapu ara pera mutuku arye, Yerusalem mutuku uk tamubuka yanganamake. Ara, outam arye yanganamake. Tonda, keting kulamle tam arye yanganamake. Tonda eitam arye, mutuku si Sinim mutuku arye Yerusalem mutuku tamubuka yanganamake.

¹³ Winipnamaka ati, im ap, tuku ap, mutuku-mutuku nirya ara, anggunce, kanye deipmunce, pia kanye lon mot nyapnamlulume. Wininamluma deiyok ara ani. Ara, Allah arye ‘Na mapu koprop’ tenen, wipdeiamse ninye ara, yu ninye arye obuka sirya dakuka tomobice, ikin piluk aruklamikba, apiluk dolamikce imun kanye bolamika ati, wini talak ara na Allah arye ‘Naʼ tenen, ninye ati teleb kin ning arepnamne. Ati pin-pin kanye bobuka mot nyanamlume.

¹⁴ Bukni, sik Yerusalem mutuku unyak ninye arye nyanyake, ‘Se, na ni Allah, el si Yahweh ara, nunti pia kum tenesilirye, akunum batakuka luba kipsuke,’ nyanyake.

¹⁵ Nyabik ning ati, na Allah arye anggun aninye ati tamubuka nyapsine. Winipmanto ning ara, tonok kil arye el mi tonok deiamlyopura, luba kilul do? Tuba tenelul do? Tonda akil el mun pum bisik arye deiamlye mi ati bico tenelul do, kum do? Akil el mi ati kum luba kilul atonun, Na Allah arye anggunti kum luba kinamsine. Kilapu ara, sik mapu luba kipnamting buk, na Allah arye anggunti pia kum luba kipnamsine.

¹⁶ Yerusalem ninyeo, na Allah arye anggunti kum luba kipsise. Pia tuba tenesunune. Ati winipmanto ning ara, anggun si ara, na taruk tatang deice akunum sekeipse. Anggun ululum mutuku dana-dana tam cang keil poka doplumce, anoutam umunye mutuku ap, anggun amutuku umunye ninye ap ara, pia tuba tenesunune.

¹⁷ Wini talak ara, anggun obuka sirya daksik nang ara, adiparyuk, sik anggun dam arye akunum kwarabuka bindopnamake. Tonda, anggunce deiamlum mapu ara, pera mutuku arye batakuka, minopce anggun dam yanganamake.

¹⁸ Ati, tikukapmunce, sik ulamikak dana-dana tam ton dipdenamlulume. Anggun mapu nirya ara, tamubuka anggun dam anyuk akunum yanganmake. Aning ara, dipkoprob nyapsine. Na Allah Kam Una Deiyoknye birye, dipkoprob nyapsine. Anggun mapu anggun dam anyuk yacopura, kanye pia weik deipnamlume. Winipmanto ara, ninye dopnamalye kil kwerya dobuka bukmaliba, eibikirye kanye delilamak touk, anggun mapu tamubuka yacopura, anggunce kanye deibuka unamlume.

¹⁹ Minop talak yu nang arye anggunti obuka sirya daksikce, anggun talilamlum ning ap, anggun ulamlum mutuku ap nirya, atu atonun kiplopsikce, ninye nirya dobuka bobinamsike. Bukni wini talak ara, Israel ninye weik yakirye, amutuku yanuka ukiba, ninye pia weik ubikirye langdipnamake. Israel yala ninye ara, pia weik upnin banamaka ati, amutuku tuku ara, mitik tonun ati, langdipnamake. Sik yu weik nang arye, ‘Amutuku ninye nirya obuka sirya dakibirye, sik mutuku talibuka unamap,’ tenebikce, anggun obuka sirya dakamsik nang ara, adiparyuk batakuka bindobikirye, pera mutuku uk binuka unamake.

²⁰ Babel mutuku nang arye bobinamsik talak ara, imun kanye bobuka ulamlum talak arye deiamlum mapu arye nyanamsiyake. ‘Amutuku nun unamabak ara, lo mitik tonun ati, tonap amutuku arepsutumba, lo weik upsutopura, aunamabe,’ nyabuka moropsikiba, anggunce kekenamlume.

²¹ Nyapsicopura, anggun kanye noutam arye, tenipnamlume. ‘Amapu ara, yata nang arye, nunti deibuka arelamsik mapu arye nyanmasiyak do?’ tenenamlume. ‘Nun ni koproba Allah bataksukba, nun imun kanye bobuka ulamupu talak noutam ara, nun mapu nirya ara, min kum wamsuk do? Tonda mapu tonap deipmanto kum ati wamsuk do, kum do? Kume, nun mapu kum dayuka ati, kum deipmanto ulamsuke. Tonda nun pera mutuku noutam ulamupu talak ara, nun yuk bulamupa ati, amapu ara dan tam nang arye deiamik mapu yanmakce nyanmasiyak do?’ tenenamlume. Aminyan talak ara, anggun mapu weik upnin banamaka ati, ayupu nyanamlume.

²² Na Allah Yahweh arye nyapsine. Nara aning-aning talibuka deice tam unirye, Weik Erena Deiyoknye unune. Narye, ‘Winipnamne,’ tenenye touk wininune. Na mapu Israel yala ninye ati nyapsine. Narye ninye yuk mutuku ninye, Israel yala kum ninye ara, sik unyakak laka kipniba, sik Israel mapu ara, yuk nang arye dobuka bobinamikbuk, sik noutamak dabinuka unyak mapu nirya ara, tamubuka amutuku uk iribuka boyanganamake. Tonda sik kilmapu ara, amakuka boyanganamake.

²³ Yuk mutuku ninye arye, sik mapu ap, sik kilmapu ap dobuka delilyanganamak talak ara, yuk pera mutuku, sik ninye deiyok kibuka taleamik Raja nang arye, Israel yala ninye sik mapu ati, melibuka kalikinamake. Tonda, aRaja nang sik kilapu, weik deiyok kilapu kibuka ulamik bukni, wini talak ara akilapu arye, Israel yala ninye sik mapu ati, melibuka kalikinamake. Sik yuk mutuku Raja nang ap, sik kilapu ap, sik Israel yala ninye sik amutuku tam uk unamake. Winipsikirye anggun, Israel ninye si erena ati, anggun dam yakirye kanupdongobuka si erenamsiake. Sik yuk mutuku weik deiyok ninye, mambul nang ulamik bukni, wini talak ara, talye ninye uk unamake. Anggun Israel ninye dam yakirye, anggun si erena ati, kisok kanupdongobuka tuku deice mabikiba, anggun yan deice upmalye tuku butbuta sik sitang deice palinamle. Sik ninye deiyok nang arye anggun Israel ninye ati, anggun amu tam ubikirye, si erenamsiake. Aning winipsikca deice arye, anggun Israel ninye ara kel biknamnulume. Ara, na si Allah Yahweh nati kel biknumunce, ‘Se, dipkoprob Allah el dem arye apil dopmasile,’ tenenamnulume. Tonda, ‘Allah elcuk melinamsile,’ tenen, natibuk moropnikirye, na si ereninyak ninye ara, malye kanye kum bonamake. Narye aninye ati, dipkoprob melipnamna anya arye, alye kum dakdanamake.

²⁴ Anggunda teneipdelulume. Nyabuka asilanamlulume. ‘Mal olan ati weik deiyok mikip nang, unmatingak arye, sikce deiamik bon-bona, yuk talye nang arye binuka alabuka dopropting do? Aning atonun, yu nang arye, yuk mutuku nang bisibikirye, anang tapu koubuka deiamting nang ara, yuk mutuku nang arye, talye lukparabuka tapu lobukaptingce, bobiting do?’ nyabuka asilanamlulume. Kume, anggun kele aning kum winipmanto.

²⁵ Bukni, na Allah Yahweh arye nyapsine. Asipdenulum ning ara, diba narye winipnamne. Mal olana deiyok nang arye, anggun Israel ninye obuka sirya daksikce, tapu koubuka bobinamsik bukni, amikip nang awininmaki buk, narye sik Israel ninye ati dopropnamne. Tonda yu nang arye kalikmakibuk, narye sik dam binuka dopropnamne. Ara, dipkoprob na Allah aryuk, sik mal olan nang arye, anggun Israel yala ninye obuka sirya daksik nang ati, narye kwang dakna ati, sik dam binuka obuka sirya daknirye, Israel ninye sik mapu nirya lyepnirye tamubuka boyanamne.

²⁶ Narye anggun Israel ninye obuka yanilongolamsik nang ati, opnyopura, sik mining mamun arye sik mining mamun uk obuka dilanamake. Winipmanto ara, obuka dilanmakirye, sik mining ininguk obuka dilakiba, kanye walwal kinamle. Narye winipnyopura, ninye mutuku-mutuku nirya ara, kel biknamake. Ara, ‘Allah Yahweh arye sik Israel ninye, Lyena Deiyoknye bira, el aulule’ tenen, kel kipnamniake. Tonda, Israel ninye sik malye wininyak ning ati, Allah arye wenebuka oploptu bukni, ‘Sik pununa ati, aninye akunum dekuka lyepsuke’ tenen, kel kipnamake. Nara, aning-aning talibuka deice tam Pia Mikip Weik Allah unirye, Israel ninye ati, pia kalikuka melinunye, Pia Telebnye unune. Winipniba, Israel yala ninye arye na si ereninyake. Na Allah unune. Israel ninye sik malye wininyak ning nirya kum Kilina Deiyoknye bira na aunune. Ninye mutuku-mutuku nirya aning kel kipnamaka ati nyapsine. Allah arye nyabuk.