Yesaya 47 - Eipomek

Doyanamle talak winipnamuk ning ati, Allah arye, sik Babel mutuku nang ati, nyabuk yupu

¹ Allah arye, sik Babel mutuku nang ati nyabuk. “Se, anggun Babel mutuku nang kekepnululume! Anggunda kouluklulume! koulukmumce, tuku deice yanuka buklume. Anggunce mikip weik nang ulamlum bukni, aminyan talak ara, anggunce yuk mutuku unyak nang ton ap kum talipnamlume. Winipmanto ara, sik Kasdim mutuku nang ara pia urasin teleb wel kil atonun ulamlum bukni, wini talak ara, aning nirya akunum kum kipdeipsina anya arye, weik deiyok nang arye, teleb weik bunak bulamakak atonun ning arye koulukmunce, kanye lamapdongopmunce, tuku deice buklulume! Narye anggun dobuka amu tamuk kipdeipnamsina anya arye, ninye nirya ara anggunti, ‘Sikda pia mambule, pia teleb nang unyake,’ nyalamsik nang ara, ton ap kum nyanamsiyake.

² Ninye amu tam unyakce, pil melin kilapu arye ulamak touk, min talak ara, weik deiyok kil atonun ulamlum bukni, wini talak ara, pia amu tamuk deipnamsina anya arye, anggun gandum duk boyanuka tepung kintinina ati ara, keil aryuk teiknamake. Sikda, dibikiba ikin pil dolamak kilapu arye, pil dolamak touk unamle. Weik kilapu arye ulamak touk, anggun asok deice ara, kain arye koulongolamlum ning ara, aning bataklopmunce, kain arye anggun asok kum koulongonamlume. Tonda anggun baju ara, weik deiyok kilapu ongolamak ning ara, aning babye kwiriplopnamlume. Winipminyeba, yuk nang nirya arye, sik eipnamsiyaka ara, winipmanto mek koupnukca ati, cang baju mouse talipdongobikirye, erebuka balamakba, sik yan nirya lak upliba mek koubuka balamak touk, sik babye winipnamake. Deiyok ara, anggunda pia amu tam un nang atonun kipdeipnamsina atia.

³ Tonda, winipmanto ara, anggunda banauk banmamunba, yuk nang arye, anggun nong bananguk dinmasikiba, alye weik dakalanamlume. Ninye nirya ara, anggunti, yep-yep abuka, nalipsikca ati, alye weik unamsilume. Deiyok ara, na Allah arye, anggun Babel mutuku nang, anggun malye weik ulamluma ati, tuba tenilamnya arye, anggunti wenebuka kwang daknamsine. Anggun Babel mutuku nang ara, tonok nang babye, ton kum lyepdanamake. Na Allah arye anggun nirya ati wenepnamsine.

⁴ Na Yesaya birye, Allah arye nyabuk yupu nyapsine. Nun Israel nang malye ulamububa, Allah arye kum daneipsuke. Allah elda, malye un ning tonok ning babye kum ulirye, elda Pia Diksukum Ululnye ulirye, Pia Leknye ulule. Nun Israel nang ati, pia melibuka kalikisulule. Allah el si ara, Allah Yahweh ulule. Elda aning-aning nirya talibuka, deice tam erebuka, mikip weiknye ulirye, im deice yin talin malaikat nirya, sik deiyoknye ulule.

⁵ Anggun Kasdim mutuku ululum nang nirya ara, yupu nyana kumce, tunim abuka pia unyakak binuka buklulume! Ara, anggun Babel mutuku nang nirya ati ara, yuk mutuku-mutuku nirya unyak nang arye anggunti, ‘Se, sikda pia telebe unyake. Urasin pia teleb wel kilapu atonun unyake. Sikda, ninye deiyok kilapu atonun unyaka anya arye, yuk mutuku-mutuku nirya sikce talisinyake,’ nyabuka, anggunti si erelamsik bukni, atalak arye dipdongobuka, do unamle talak nirya ara, anggunti ayupu ton pia kum nyapnamake.

⁶ Minop talak ara, na mapu Israel nang arye, malye un ning weik tonun ulamika ani, na Allah arye sik wenena ati, yu upnukba, sikti, pia ikin weik ning sik deice deiamse. Ara, narye dobuka, sik Babel mutuku nang taruk deice deiamsiba, sik Babel nang arye, Israel nang obuka pia malye weik kibik. Winipse bukni, anggun Babel mutuku nang arye, ‘Naʼ tenen, nang, Israel yala nang ati, bico kum tenelamlume. Anggun yu upnaba, Israel nang nirya bukni, sik pia wise-wise nang babye ati, weik ikin ning sik nong deice deibuka daralongolamlume.

⁷ Min talak ara, anggun Babel mutuku ululum nang ara, maknya kintinibuka ululuma deice arye, anggunce nyalamlume. “Nun Babel mutuku nang aryuk, ninye deiyok kil atonun ubirye, sik mutuku sirya, im sirya nirya unyak nang nirya ati, nun diamuk talinamabe. Nunda pia ati, weik deiyok nang kibuka, yuk mutuku nang nirya talinamabe,” nyalamlume. Bukni, anggun babye moubuka kum tenibuka bikilamlume. Ara, narye pil dolamse ning ap, anggunce weik ikin ning dobuka Israel nang deice delilamlum ning ap, tonda aminyan talak narye sikti, dekna arepnirye, wenebuka winipnamsin ning ap ara, anggunce moubuka pia kum tenilamlume.

⁸ Anggunce, ‘Aminyan talak yata winipnamsil do?’ tenen, pia kum tenilamluma ati ara, anggun Babel mutuku nang ara, na Allah arye ayupu nyapnusin ning ara, moubuka kekepnamnulume. Se, anggun Babel mutuku ululum nang ara, anggun kanye arye, “Nun kanye deipsilye ninguk teninamabe,’ tenebuka ululume. Anggunda, talye tunim abuka bukmunce anggun asik dobuka ulamlum mutuku ara, ‘Nunda pia mikip weik mutuku nang unyabe,’ tenebuka ulamlume. Tonda, ‘Kume sik yuk mutuku unyak nang nirya ara, nunti kum olyasitinge. Nunda pia telebuk unamabeʼ tenen, anggun talima erepdamunce, ulamlume. Aninguk kum bukni, anggunda, ‘Kume, nunda Allah atonun unyabe. Mikip pia weik unyak nang ton, kum unyaka anya arye, nun uk ara mambul weik nang pia unamnyabe. Anggunce kanye arye, ‘Kume, nunda, yukwak kilapu, sikce deiamik mapu nirya dibikiba, pia utotoa kum kilapu ulamak touk, nunda aning pia kum upnamsile. Nunda pia telebuk unamapca!’ tenelamlume.

⁹ Winibuka tenelamlum bukni, dipkoprob nyapsine. Tonok talak aryuk, anggun domlum nang babye, anggun deiplum mapu nirya babye, anirya adiparyuk tonok talak deice arye dipnamake. Tonok talak aryuk, anggun domlum nang ap, anggunce deiplum mapu nirya ap ara, dibikcopura, atalak aryuk anggunda, pia utotoa kum yukwak kilapu, aning-aning nirya kum talibikirye, pia ikin kanye bobuka ulamak touk, unamlume. Diba, anggun mutuku noutam unyak asing len nang ap, ‘Telebuk unamapʼ tenen, mambul pil dona kel nang ap arye unyak ning ara, mitikto mikip ning ulul bukni, anggunce anggun mutuku melina ati apil donamaka babye, kum melipnamsile. Aminyan talak narye arepniba, ikin weik unamsil ning ara, dipkoprob anggun dam yanamle!

¹⁰ Min talak anggunce malye weik ulamlumce, anggun kanye ara, ‘Kume, yuk nang arye ton kum eibuka biksitinge,’ tenelamlume. Tonda anggunce, ‘Nunda kel weik nang unyaba anya arye, aning-aning nirya akunum kel bikamubuʼ tenen, ulamluma deice arye, malye bisikuk binmalume. Tonda, anggunce tenilamluma ara, ‘Nunda pia teleb, mikip weik unyaba anya arye, nunda Allah atonun unyabe. Yuk nang babye, yuk Allah babye, nun atonun kum ulule. Nun diamuk pia teleb unyaba,’ tenelamlume.

¹¹ Anggun talima erelamunya deice arye, aning nirya tenelamlum bukni, wini talak ara anggun Babel mutuku nang ara, pia ikin ning, kanye imun weik ning, anggun deice yasiliba dopropnamlume. Aikin unamsil ning ara, anggun mutuku asing len nang arye, pia teleb pil doptinga babye, aning arye kum yanuka melibuka yupu seknamsile. Allah arye anggun deice ikin un ning ati dopdeipnamsil ning ara, anggunce, ‘Aning ara yupu sekdongopnamabe,’ teneptuma babye, aning kum winipmanto. Dipkoprop anggun nong deice yanamsilca! Kum bikmamunye talak arye anggun dam kanye imun weik ning yasiliba, dopropmunyopura, anggun ap, anggun un ning ap, anggun mutuku noutam ulye ning nirya ara, malye kibuka sikce buklopsilirye, kum kipdeipnamsile. Tonda aning min kum winipmalye talak arye, ‘Aning-aning winipnamle ning ara, winibuka winipnamsileʼ tenen, pia moubuka kum biknamlume.

¹² Anggun Babel mutuku nang ara, minop anggun wel talak arye, anggun tukwak mutuku kel bikna deice arye, sang yupu do, asing len nang arye nyalamak yupu do, kir don nang arye, ninye olamak ning do, aning-aning aupmalaya babye, aning arye kum melipdanmanto kum upnamsile. Anggun mutuku noutam talye ning talibikirye, malye-malye unyak nang arye, anggun pia teleb yupu ap, pia teleb pil ap, dobikca deice arye, yuk nang eibikirye, ilil upliba, sik yok sirim talipnamla babye, ato ning talibuka, pil dona deice arye, ayanamsil ikin ning ara, yupu kum sekmanto unamlume. Dipkoprop anggun nong deice yanamle!

¹³ Anggun Babel mutuku nang ara, yata wiribuka talak arye, anggun mutuku kel pia weik nang ap, asing len nang ap ati, ‘Se, aminyan talak ara, yata wiripnamsil do?’ nyabuka, asina uk ululum bukni, sik anang arye kum melipsikiba, anggunda lik upsiliba, ‘Daupmalye,’ kum tenelulume. Anggun mutuku kel nang arye, anggun dam ayupu uk tuba-tuba nyalyangasinyaka deice arye, anggunda lik weik akunum usulule. Bukni, anggun mutuku nang arye, ‘Aminyan winipnamsil ning biknamapʼ tenen, im noutam ulye ning nirya moubuka eibikirye, tenilenyake. Aning atonun, sikce im noutam kurya tikinyak ning babye eibuka, ‘Kel biknuyapʼ tenen, pirilenyake. Tonda, winiryuk wala panabuka tikilyalye ning eibikirye, winibikca deice, sikce, ‘Aning-aning winipnamsile. Aminyan winipnamsil ning ara, ani,’ nyabuka, anggun dam lak nyanyake. Winibuka unyaka anya arye, anggunce winipmunyeba, alaka nyapsikce nang diamuk, dotalak anggun deice yaliba, dopropnamlum ikin ning nirya ara, sikce, ‘Aning-aning yanamsile,’ nyabuka, lak kibuka lak nyanamsiyake.

¹⁴ Bukni, anggun moubuka kekepnamlume! Anggun mutuku kel nang arye, ayupu atonun ning tuba nyapnamsiyak bukni, anggun nirya eibuka, kel bikilulume! Kurya tikmakiba, eibuka bikinyak nang ap, dotalak winipnamle ning eibuka, bikinyak nang ap, sik asing len nang ap, sik nirya ara, anggun mutuku nang melina ati, ton ap tuba yanuka, kum lak nyanamsiyake. Sik anang ara, winipmanto ning nyapnusine. Mutmuta kel-kel nyamlye ning, uku buk minopce dipliba, sikce bultakalamle touk, unyake. Weik uku arye aning-aning nirya dipnamle touk, sik anang babye, aminyan kanye imun weik ning yanamle ning arye, sik ton dibuka, sirya daknamle. Sik wenena ati yanamle ikin ning ara, weik uku atonun unamla anya arye, anang babye, kum lyepdanamake. Tonda, winipmanto, weik uku buk arye, yo mutmuta nirya diplirye, sikce buklopliba, uku kalum dem tuba upliba, ninye arye, ‘Nun nong peiknamapʼ tenen, auku sice dam bukuka kum peiklamak touk, anggun mutuku weik kel nang arye, ‘Aminyan winipnamsil ning ara ani, ani,’ nyabuka, talye yupu uk nyanyake. Ati, sik anang arye nyapmakce yupu ara, dipkoprob kum melipnamsile. Aning nirya arye, kum lyepdanamlume.

¹⁵ Aning atonun, sik im deice ulul ning ap, kurya ap, eilinyak nang ap, asing len nang ap, sik Babel mutuku nang ati, teleb kum kipdeipnamsiyake. Sik nirya ara, talye uka. Anggun mutuku ululum nang nirya ara, anggun wel talak arye nyapnin yangalamsikba kekelamlum bukni, sikce, ‘Dotalak ara aning, aning winipnamsile,’ nyanyak yupu ara, nong kum upnamsile. Talye yupu uk nyanyak bukni, walwal nang arye, anang ati, yo bok tuba arenyake. Sik anang ara, yuk-yuk bisik eibuka dobolbanyak bukni, sik talye nang nirya ara, sik Babel mutuku nang ati, tonok ning babye kum melibuka lyepdopsitinge.” Ayupu ara, Allah arye, sik Babel tam nang ati nyapdeibukba, nabi Yesaya kekebukce, ayupu sekdeipsuke.