Yesaya 45 - Eipomek

Allah arye, Babel mutuku ninye deiyoknye, Kores wipdeiamuk yupu

¹ Allah Yahweh arye, Babel mutuku ninye deiyoknye, el si Kores bira, narye el sirik taruk talibuka bobinyopura, ‘Na tenepse pil donamle’ tenen, wipdeiamse. Winibukce, ayupu nyalamuk. “Yuk mutuku ninye nirya obuka sirya daknamle. Tonda, yuk ninye deiyok nang nirya obuka sirya daklirye, sik kat baju ongolamice ning nirya ara, kwiriplopnamle. Na Allah arye Kores biti melipniba, bublan tiriklamica nirya ara, pakuka delinamle. Winipnyopura, tonok bublan babye, kum tirikdongopnamake. Raja Kores bira talye lukparabuka weklirye olbanamle.

² Na si ara, Allah Yahweh ununa anya arye, Kores an banamlam bisik nirya ara, kintinilinamkine. Tonda weik mutuku bukamlyak ap, mitik mutuku kon ap nirya ara, ‘Kanam aryuk minopce bitue’ tenen, pia lyu teleb kilinamne. Tonda kat ning el si tembaga arye bublan memebuka tirikilongolamak ning ara, an wekelban ati, narye kukeipnamkine. Tonda bublan wekelban bisik besi ning arye tirikilongolamak ning ara, an wekelban ati daklopnamkine.

³ Na Allah arye, dekna weik ning, yuk duknubuka deiamik ning nirya ara, anti lak kipdeipkiniba, dolonamlame. Winipkiniba, ance, ‘Na mikip kel biknimince, dipkoprob Allah Yahweh ara, Israel ninye talibuka ulule’ tenen, kel biknamlame. Aning kel kipmince, ‘Allah arye na sisibuka, wipdeipnuk,’ tenen, kel biknamlame.” Allah arye Raja Kores biti nyabuk.

⁴ Allah arye Raja Kores biti nyabuk. “Kores anda, na bita kel kum bikamnulum buk, narye, ‘Elda ninye deiyoknye unamle’ tenen, wipdeipkisiba, weik mambul si arepkise. Ara, ‘Na tenena ninye unamak’ tenen, wiamse ninye, sik Israel ninye ara, ‘Ance, na mapu Israel ninye talipnamlam’ tenen, wipkise.

⁵ Allah Yahweh ara, na tonok unune. Yuk Allah ton kum ulule. Nara aning-aning nirya talibuka deice tam ululnye bira, na uka. Ance na bita kel kum bikamnulumce, ‘Allah elda weik deiyoknye, Allah ulule,’ nyabuka min kum nyapnulum talak aryuk, na mikip weik arenamkine.

⁶ Winipniba, keting panalyangan tam arye, dipdongobuka keting kum ulamle tam nirya ara, sik ninye nirya arye, ‘Elda Allah Yahweh ulule’ tenen, kel biknikirye, na siuk erenamniyake. ‘Ara yuk Allah ton kume, el Allah Yahweh ulula atonunye ton kum ulule’ tenen, kel kipnamake,” Allah arye nyabuk.

⁷ Dirina ap, kunukna ap, na Allah aryuk kwepdeipse. Aning atonun, aning-aning teleb kilisununye bira, na uka. Tonda, ninye tukwak ninye ati, weik tonun pirilen ning nirya ara, na Allah Yahweh aryuk kintinilisunune. Na Allah Yahweh aryuk apil nirya donune.

⁸ Na Allah arye, teleb winina ati deiyok ning nirya ara, im deice arye dopkwetepniba, tukwak mutuku noutam mok celamle atonun uplirye, diksukum una deiyok ning tukwak mutuku saklirye, ninye nirya sik talima wekliba, diksukumuk unamake. Aning ati, na Allah arye, akunum kintineipse. Tukwak mutuku, mutuku-mutuku nirya ninye lyen ning arepneba dopdobikirye, diksukum un ninguk weik upra banamle. Na Allah Yahweh arye, akunum keteneipsa ati wininamle.

“Allah arye, aning-aning nirya kwepdibukce, ‘Aning ara, wininamle’ tenen, kintinilina deiyoknye bira, Allah uka,” nyabuk yupu

⁹ Yata ninye do nirya, anggunce Allah ati malye yupu nyanyak nang ara, Allah arye oplopnamle. Ara, Allah el kwelina deiyoknye biti, ton nang arye, “Allah nun like. Anda yata ati aning wininamsilam do?” nyabuka batakanyak nang ara, Allah arye wenebuka opnamle. Allah arye nyabuk. “Sik utenenyak nang ara, winipmanto yupu nyapnune. Ara, kiri tuku arye, memebuka deipmace makau sakuka coplirye, amakau memena deiyoknye biti, ‘Anda yata ati winipnulum do?’ kum nyalul touk, tukwak ninye arye, anggun kwepdeiamsuknye, na Allah ati, wenena yupu kum nyapnitinge. Aning atonun, ninye taruk deice arye kiri tuku tilibuka mek makau kintinilinyak ning arye, ‘Anda, taruk talina kum kintinipmanilama ati, walwal arye winipmalam do?’ kum nyalamle touk, tukwak ninye arye, na Allah ati kum wenepnetenge.” Allah arye nyabuk.

¹⁰ Yatanye do nirya, el li koproba ati, “Naio anda yata ning ati, nara winibuka deipnulum do?” nyabuka asilelulnye bira, Allah arye wenebuka opnamle. Aning atonun yatanye birye, el lin biti, “Nongo, anda yata ning ati, nara winibuka deipnulum do?” nyabuka asilelulnye bira, Allah arye wenebuka opnamle.

¹¹ Na Allah Yahweh arye nyapsine. “Israel ninye sikce na si ereninyaknye bira, pia diksukum pia Teleb Unanye unune. Narye anggun kwepdeiamsisirye, pia kalikuka melisunune. Anya arye, anggun Israel ninye dorupnin banamlum talak nirya ati, yata ati na asilyanmanulum do? Anggunce nati, ‘Aning ton winipsilyame, apil ton dopsilyame,’ nyabuka kum nyanamnululume. Anggunda na mapu ululuma anya arye, narye anggunti pil dosunun ning ara, nati, ‘Yata ati do?’ nyabuka, kum asipdenamnululume.

¹² Na Allah arye, tukwak mutuku, mutuku-mutuku nirya kwepdeipsirye, ‘Amutuku noutam ara ninye unamak’ tenen, tukwak ninye ayala-ayala nirya kwepdeipse. Tonda im deice ap, im noutam ulul ning nirya babye, naryuk, kwepdeipsirye, kurya nirya na tenepse touk deipseba tikilule.”

¹³ “Na Allah arye Babel mutuku ninye deiyoknye, el si Kores biti, ‘Teleb uk unamle’ tenen, wipdeipse. Ati, ‘Kanam aryuk binamle’ tenen, el banamle bisik ara, narye pung uk kilinamne. Narye melipniba el unamle ning nirya ara, telebuk unamle. Na wiamse mutuku, Yerusalem mutuku uluplobicopura, na mikip Kores arepneba, elce tuba tonap punubuka Yerusalem dopnamle. Tonda minop talak Babel mutuku nang arye, Israel ninye obisibikce, anang nirya Babel mutuku bobinamik nang arye deiamik mapu ara, dobuka Yerusalem mutuku boyanamle. Ara, narye melipniba, dekna ton arena kumce, na mapu lyepnamle. Na Allah Yahweh arye aning nirya ara, na tenepse touk dipkoprob wininamle nyapne. Na Yahweh ara, aning-aning nirya deice tam talibuka, im deice yin talin malaikat nirya, sik weik deiyoknye ununa ati nyapne.”

¹⁴ “Na Allah Yahweh arye, anggun Israel ninye ati nyapsine. Israel ninye sikce na si ereninyaknye bira, pia diksukum pia Teleb koprop Unanye unune. Narye anggun kwepdeiamsisirye, tuba kalikuka melisunune. Mesir mutuku ninye wa wiamikirye libuka delinyak ning ap, tonda, Etiopia mutuku ninye sik dekna ati, kintinibuka delinyak ning ap, Syeba mutuku ninye sik cang arye nenyak ninye, sik bon-bona ap weik tonun arelyanganamsiake. Amutuku nang ap, sik talinyak ning nirya ara, anggun dam boyakiba anggun diamuk dopropnamlume. Winipmunce, sik aninye ara taruk balye tam bisik dobuka tapu koubikiba, sikda anggun Israel ninye uk dobolyanamsiake. Sik anang nirya anggun dam yakirye, anggun si erena ati, urasin kanupdongopnamake. Sikce, ‘Allah el tonok ulirye, sik Israel ninye pia melilul’ tenen, kel bikikirye, ‘Sikce nun kum onamsil,’ tenena ati, moronamsiake. ‘Israel nang arye si erenyak Allah ara, pia dipkopropnye ulule. Yuk Allah ton kum ulule,’ nyanamake.” Allah arye nyabuk.

¹⁵ Yeremia birye nyabuk. Sik Mesir mutuku nang ap, Sudan mutuku nang ap, Syeba mutuku nang ap nyanamak yupu ara ani. “Israel ninye si erenyakba sik lyelul Allah ara, laka kum ulule, elda duknubuka ulule.

¹⁶ Winilirye, ninye taruk deice arye, kintinibuka deibikirye, ‘Nun ni koproba,’ nyabuka aning ati si erenyak ninye ati, sikda talye ning si erenyake. Aminyan talak ara, ninye nirya arye aninye ati nalibikiba, sik anang alye upnamlarya. Winiplyopura, sik nirya ansinibuka bindopnamake.

¹⁷ Bukni, Israel ninye nirya ara, Allah Yahweh arye lyepnamle. Winipliba pia kam uk unamake. Tonda yuk mutuku ninye arye, anggun Israel ninye ati, malye yupu nyabuka anggun deice kum lululinamsiake. Ati, pia alye kum dakdanamake.”

¹⁸ Na Allah Yahweh arye nyapsine. “Allah naryuk im babye, im deice ulul ning babye kwepdeipse. Nara Allah tonok unune. Winipsirye, tukwak kwepdeipsiba pia darabuka abukuk. Atukwak mutuku, mutuku-mutuku nirya kwepdeipsa ara, ‘Talya urdemuk aunamle’ tenen, kum kwepdeipse. Aning kum bukni, ‘Aning-aning ayala-yala nirya unamle’ tenen, kwepdeipse. Winipsinye bira, Allah na tonok unune. Yuknye ton kum ulule nyapne.

¹⁹ Na yupu ara duknubuka kum nyanune. Tonda kunuknak arye duknubuka kum nyanune. Tonda na wiamse ninye Israel ninye ati, ‘Talya urdemuk dibuka banamak’ tenen, kum nyanune. Nara, dipkoprob Allah Yahweh ununa anya arye, ‘Diksukum koprop uk teleb kibuka unamak’ tenen, dipkoprob yupu uk nyalinune.” Allah arye nyabuk.

Ninye nirya ati nyapliba, ‘Sik malye wininyak ning batakuka, Allah dam anyuk yanamak’ tenen, nyabuk yupu

²⁰ Allah arye nyabuk. “Yuk mutuku nang arye, bobisipsikce, tuba bataksikba, kam ululum nang ara, na damuk yanganamlulume. Sik bidamang aryuk yo deice arye puturubuka deibikirye, ‘Nun ni koproba,’ nyanyak ninye ara, pia walwal aryuk unyake. Sikce si erenyak ning ara, lyepranmanto kum ning ulule.

²¹ Anggun talye ning si erelulum ninye ara, yupu talipmunce, dotalak wininamle ning laka nyapnamnulume. Tonda anggunce anggun bidamang ati asipdanamlume. Ara, ‘Dotalak winipnamle ning ati, min yuma talak yatanye birye nyapdeiamsuk do? Minop talak arye yatanye birye nyapdeiamsuk do?’ nyabuka asipdanamlume. Ayupu ara, na Allah Yahweh arye, nyapdeiamsise. Diksukum koprop telebuk ulirye, ninye lyelula deiyoknye bira, yuknye ton kum ulule, na Allah tonok unune.”

²² “Anggun tukwak mutuku, mutuku-mutuku nirya ululum ninye, anggun malye ululum ning nirya batakuka, na dam anyuk yanganamnulume. Winipmunyopura, narye anggunti lyelonamsine. Winipnamlum nyapmasina ara, urdem ati kume. Deiyok ara, na ununa atonunye bira, yuk Allah ton, kum ulule.

²³ Dipkoprop, na Allah Yahweh arye akunum nyapsine. Pia teleb koprop diksukum yupu uk nyapmasina ati, kume kum danamle. Na nyapsinye yupu ara, dipkoprob unamle. Na aryuk nyasunun ati, na nyapsise yupu ara, tuba tonap tamubuka kum doropnamne. Ati, ninye mutuku-mutuku nirya arye, na dam yanuka, gutam tuku dipdongobikirye, natibuk si erenamniyake.”

²⁴ “Na si erebikirye, nyanamniake. ‘Teleb kibuka diksukum winina ap, pia mikip arye winina ap nirya ara, Allah Yahweh elcuk ulule.’ Na Allah ara winibuka ununa ati, nati yu tenebuka, malye yupu nyaninyak nang nirya ara, aminyan talak ara na Allah ati eibikirye, alye upliba ilil unamake.

²⁵ Bukni, Israel ninye sikce deibiceba, dadeipdanin banamak ninye nirya, na si Allah Yahweh ati, diba tenepnikiba, narye anggunti diksukum kipdeipsiniba, na si erebuka pia winilinamniake.” Allah arye nyabuk.