Yesaya 44 - Eipomek

Allah Yahweh, Weik Erenanye birye, Israel ninye wipdeibuka ati, nyabuk yupu

¹ Allah el si Yahweh arye el pil donanye, Yakub biti nyabuk. “Se, anti ‘Na tenenanye unamle’ tenen, wipdeipkisiba, an si Israel nyabuka si dopkise. Ati, na yupu uk kekenamnilame.

² Ara, nara Allah, na si Yahweh arye an nin min kum deiamkuk talak arye, mun pum tam tuba ulamlumbuk, kintinp deiamkisirye wiamkise. Winyamkisa ati, tuba melikunune. Ati, ance nati ilil una kume. Israel anda, ‘Na amu tam ulirye, na pil donanye unamle’ tenen, akunum wibuka kintinip deiamkise.

³ Ati, an unamlam mutuku selal selamle tukwak nirya ara, narye mek dikeipkiniba, mek balamlirye telebuk unamle. Tonda, selal selamle tukwak mek arepneba banamle. Na Dib Kanye ara an deice deipkiniba, ance deipminba dadeipdanin banamak ninye sik deice deipnamne. Na mikip sik deice deipniba, teleb kipdeipnamsine. Winipnya deice arye, sik un ning nirya telebuk upliba, sik aninye ara yupa pia weik upra banamake.

⁴ Sik aninye unamak ning ara, mek kup-kup ak mutmuta paplirye, teleb kibuka tiklamle atonun unamake. Tonda kwilim yo atonun, el si ara gandarusa yo, mek kup-kup tiklirye mek pum tam yating dongopliba, bok teleb ubuka palamla atonun, ance deipminba dadeipdanin banamak ninye babye teleb ubuka weika tonun upra banamake. Tonda sik mikip weik upra banamle.

⁵ Teleb ubuka ukiba eibikirye, aninye nirya tonok-tonok, ‘Nara Allah el tamnye unune’ tenen, na siuk nyanamake. Ton nang ara, ‘Yakub el yalanye unune,’ tenebikcopura, sik aninye ara Yakub ance deipminba, dadeipdanin banamak ninye tam uk kilyanganamake. Winibicopura, anang sikce seknamaka ara, ‘Nara, Allah Yahweh el tamnye unune,’ tenebuka, sik taruk deice arye sekenamake. Tonda sikce sik bidamang ati, ‘Nara Allah el tamnye, el tenenanye unune,’ tenen, Israel si nyanamake.

‘Isa si erenyak ninye ara, walwal asa wininyake,’ nyabuk yupu

⁶ Nara aning-aning nirya talibuka deice tam unirye, Weik Erebuka mikipnye birye nyapnukine. “Nara, Yahweh arye nyapkine. Nara, Israel ninye anggun ninye deiyoknye, Raja unune. Israel ninye anggun malye winina ati, opsitinye bukni, anggun malye ning pununa ati, namin kipsisirye, deksise. Na amu tamuk unamake. Nara, Weik Erenanye bira, na tonok unune. Na Allah Yahweh, aning-aning nirya talinirye, im deice yin talin malaikat nirya, sik weik deiyoknye ununa ati, nara deiyok kouna ap, sirya dakna ap nirya ara, weik deiyoknye, na uka. Yuk Allah ton kum ulule. Allah na tonok unune.

⁷ Yatanye do, na atonunye ton aulamlyopura, nyapmunyeba na dam yalirye, ‘Na aunune,’ nyapnamnile. Winiplirye, na Allah arye ‘Anang ‘Naʼ tenen, ninye unamak’ tenen, Israel ninye wiamse talak arye dipdongobuka pil dolamsa ani, wini talak pil donun ning nirya ara, laka nyapnutu do? Aning atonun aminyan doryanamle talak, pil donamne ning nirya babye, yuknye birye laka nyapnutu do? Kume, aning kum uptinge.

⁸ Ati, na mapu anggunda ilil una meme. Minop talak do winipnin yangalamuka ani, wini talak winilul ning nirya ara, narye ‘Winipnamle’ tenen, pia moubuka kel bikamsirye, kintinip deipse ning kum winilula ati do? Anggunce na winilamse ning eibuka kel bikamnuluma ati, wini talak babye eibuka kel kinululume. Anggun patasulye ning ati melin nang ara, yuk nang ton usinyak ak, kel bikamtinyeura, dipkoprob kum ulula ati, bita kel kum bikse.” Allah arye nyabuk. Nara weik mutuku yangan keil pia abukukce, bukuk touk unamne. Aning atonun, na babye pia aunune. Na aryuk kalikuka melinamsine.” Allah arye nyabuk.

Kam una kum ning ati, ‘Nun ni koproba,’ nyabuka si erenyak ninye ara, Allah arye, ‘Pia malye unyake,’ tenelula ati, nyabuk yupu

⁹ Allah arye nyabuk. “Ninye taruk deice aniryuk kintinibuka deibikirye, si erenyak ning nirya ara, deiyok ton kum ulule. Ara, talye ning atibuk “Nun ni koproba,” nyabuka si erenyake. Aning ara, kanye bona ap, kekena ap, kel bikna ap ara pia kume. Ara, talye ninguk ulule. Anya arye, sik aning talibuka unyak ninye ara, asing kun ninye atonun unyake. Pia walwal nanguk unyaka ati, sirya talak ara, alye weik dakdanamake.

¹⁰ Sik taruk deice koproba aniryuk aning kintinibuka deibikirye, “Nun deiyoknye ani,” nyabuka, si erenyak ninye ara, pia talye urdemuk nyanyaka ati, alye weik daknamake.

¹¹ Dipkoprop, ninye nirya arye, isa si erenyak ninye nirya ara, alye dakdanamake. Ara, talye ning kintinibuka deibikirye, “Nun ni koproba,” nyabuka si erenyak ning nirya kintinibuka delinyak nang ara, talye ninye koprop aniryuk unyake. Ati, “Anggun nirya buluplulume,” nyapmunyeba, bulubicopura, aninye nirya eibikirye, ‘Allah arye opsilyak’ tenen, pia ilil unamle. Yuk nang nirya arye aninye ati, ‘Sikda talye ning atibuk si erelamika ati, sikda talye nang uka,’ nyabuka malye nyabikiba, talye ning si erenyak nang ara, alye weik dakdanamake.

¹² Kat ning kintinina kel nang ara, sik mining mikip arye sekuka bumang kibikirye, uku dongobikiba, uku diplirye, tin weik upliba, mitang kiplyopura, anye birye teikin ning, palu arye teikukabikirye, pil donyake. Winibuka pil donmaca ani, memelinyake. Apil donmakce talak ara, kwaning ap, mek ap pataplirye, mitang upmalye babye, kum dinyake.

¹³ Aning atonun, yo arye dobuka, memenyak kel nang ara, yo sekuka binuka deibikirye, ayo sekicak ara, ‘Winibuka memenamabe’ tenen, tuku arye sekuka, aning urasin atonun gambar kibikirye, sekna tapu deice arye kiklipdebuka yanuka deibukabikirye, ninye urasin atonun ubuka, kiklipdeipmace touk bobikirye, memen ning arye urasin pia teleb kibuka memelinyake. Aning urasin teleb kibuka memebicopura, ‘Aning isa si erepnamap’ tenen, adiparyuk aning bobuka, sik mining aik noutam delilbanyake.

¹⁴ Amemenyak yo ara, wabum yo ap, yuk kat yo ap nirya ara, buru mutuku tikamliba, webuka boyanganyake. Tonda mitang yo ton aik dam koubikiba mok ceplirye, pabuka weik tonun nelamle yo arye memenyake.

^15-17 Tonda, amemenyak yo tonok aniryuk dobukabikirye, ninye uku peikna ap, roti kwaning dana ap, tup ning dana ap, ayo uk bokuka uku sekuka dabikirye, kanye deibuka unyake. Tonda ayo aniryuk bokuka, uku sekuka, tup ning obikirye dabuka dibikiba boulule. Ayo aryuk bokuka, uku sekuka uku peiklamiceba, sik nong teleb kiplirye, dipmace ning ara teleb ulilule. Bukni, ayo aniryuk ton ning ara, talye ning ati kintinibuka deibikirye, “Nun ni koproba Allah,” nyabuka, gutam tuku dipdongobuka, isa si erenyake. Tonda, ayo deice aniryuk kam kum ulul ning ati moubuka deibikirye, “Nun ni koproba, ance nunti, lyepsilyame,” nyabuka moronyake.

¹⁸ Sik aninye ara, dipkoprob walwal nang atonun unyake. Sik asing lelilongona ap, talima bublan tirikina ap atonun ninye unyake. Wininyaka deice arye, moubuka bita kel kum kinyaka deice arye, talye ninguk si erenyake. Sikda bicoe, moubuka kum tenenyaka atia.

¹⁹ Yo arye ninye urasin atonun kibuka memenyak nang ara, pia moubuka kum tenenyake. Ara, ‘Ayo aniryuk, uku dabikirye, peikna ap, roti kwaning dana ap, kam ning ap, dabuka dinyap ning,’ kum tenenyake. Ara, ‘Wininyap yo sirya aniryuk dobukabikirye, ninye urasin atonun ning kintinibuka deibibirye, si erenyaba ara, talye urdemuk unyabe,’ kum tenenyake. Moubuka tenena kumce, talye kanye uk bonyake. Tonda, ‘Nun si erenyap ning ara, talye ning uka,’ kum tenenyake.

²⁰ Awininyak nang ara, mining uku sice dobuka dilamak touk wininyake. Aninye ara, sik walwal tenenyak deice arye, sikce sik mining ati malye winililanyake. Ati, kum melipdatinge. ‘Ayo tonok deice arye na taruk deice talibuka pil donun ning ara, tilila yupu nyalinulule,’ kum tenenyake. Ati, aninye ara ‘Talya ninguk si erenyaba,’ kum tenenyake.

‘Allah el si Yahweh ara, kwelina ap, lyena ap nirya, deiyoknye ulule,’ nyabuk yupu

²¹ Allah el si Yahweh arye Israel ninye ati nyabuk. “Yakub birye deibukba, dadeipdanin balamik ninye, anggunda na wininye ning ara, pia luba kum kinamnululume. Pia moubuka tenemunce unamlulume. Anggunda, na amu tam pil don nang ululume. Na kel biknamnululume, ara narye anggun wipdeiamsesirye, kwepdeiamsise deiyok ara, ‘Anggunda na mapu, ‘Naʼ tenen, ninye unamak’ tenen, wipdeiamsise. Anya arye, Israel ninye anggunda, narye luba kum kipnamsine.

²² Ati anggun malye ululum ning nirya yamubuka dopropniba, dua balamle atonun upnamle. Tonda, kumanya mikip arye pubuka dopliba, dua yukak bobalamle touk, anggun malye winilulum ning nirya yukupdopnirye, kum kipdeipniba, anggun dam kum unamle. Anggun malye winilamlum noutam arye, dekuka lopdeipsisirye, lyepsisa ati, na dam tamubuka yanganamnulume.” Allah arye Israel ninye ati nyabuk.

²³ “Ura, im deice ulul ning nirya ap, tukwak mutuku noutam ulul ning nirya ap ara, na Allah Yahweh arye apil nirya dolamse ati, na si erebuka kinamnululume. Aning atonun, mutuku-mutuku nirya ap, yo palpal ap, talye palamle yo ap nirya ara, kanye deibuka mot sepmunce, na si erenamnulume. Wininamluma deiyok ara, na Allah Yahweh arye, Yakub yala ninye nirya ara, akunum lobuka lyelamse. Akunum lyelamsisa ati, na si erenamnulume. Na teleb kibuka dirina weik unilye ning ara, Israel ninye noutam lak kilinune.” Allah arye nyabuk.

Israel ninye batakamik bukni, ila tamubuka Yerusalem mutuku yanuka unamika ati, nyabuk yupu

²⁴ Ura, na Allah Yahweh arye, anggun nin yapu min kum deiamsik talak arye, mun pum tam tuba ulamlum talak, kintinip deibuka wiamsise. Winyamsisa ati, tuba melisunune. Nara, anggun Lyena Deiyoknye usunune. Na Allah Yahweh arye aning-aning nirya kwepdeiamse. Winilamsirye, naryuk im deice ulul ning nirya kwepdeibuka lilipdeiamse. Aning atonun, naryuk tukwak mutuku noutam ulul ning nirya babye, kwepdeibuka lilipdeiamse. Yuk nang arye ton kum meliamnike. Na aryuk apil dolamse.

²⁵ Na Allah aryuk, aminyan talak winipnamle ning laka lena deiyok nang bukni, sik tilila yupu nyanyak nang ara, sik tilila nyanyak yupu ati malye kibuka yaniltanyake. Sikce, ‘Winipnamle, winipnamle,’ nyanyak yupu ara, narye yupu sengneba, nong kum ulule. Tonda, Isa mikip deice arye, akunum diamice ninye kanya ap yupu talinyak ninye arye nyanyak yupu ara, narye yaniltanune. Sik nyanyak tilila yupu yaniptapnyopura, yuk nang arye, ‘E, anang ara walwal nang arye nyanyake’ tenen, kel kinyake.

²⁶ Bukni, na amu tam pil donyak nang, sikce nyanyak yupu ara, narye melipniba dipkoprob nong ulule. Aning atonun, narye wipdeipsiba, na nyanye yupu laka nyana deiyok nang, sik dipkoprob nabi nang ara, anang arye nyanyak yupu ara, narye melipniba dipkoprob nong ulule. Ati, na Allah Yahweh arye, “Yerusalem mutuku ati, minop talak ara, yu nang yanuka obuka sirya dakikba, amutuku batakamik bukni, ila tamubuka ‘Naʼ tenen, ninye tamubuka yakirye, Yerusalem mutuku noutam yanuka unamake,” nyabuka nyalinune. Tonda, “Yehuda tam noutam ulamik mutuku domik aik daklomik ning ara, tuba tonap tamubuka dopnamake,” nyabuka nyalinune. Yehuda mutuku noutam domik aik, yuk nang arye daklomikba, kum danamuk ning ara, naryuk lipsisikuka donamsine,” nyabuka nyalisunune.

²⁷ Tonda narye nyapnyopura, weik laut mekwen deibuk ning nirya ara ceproptue. Atonun “Mek nirya cepdoplyame,” nyaptinyopura, amek nirya cebuka lokoproptue. Yata ning do nirya na nyanun touk ulule.

²⁸ Anggunda Babel mutuku ninye deiyoknye Kores biti, ‘Se, elda weik mambulnye,’ tenelulum bukni, elda na amu tamuk ulule. Ati, narye Babel mutuku ninye deiyoknye, el si ara Raja Kores wipdeipsirye nyapse. Winipmanto ara, domba weina deiyoknye ulamle touk, narye nyapniba, Kores birye na mapu Israel ninye talibuka unamle. Aning ara na tenepse touk apiluk donamnile. Narye el kanye talima tamuplyopura, Raja Kores birye, ‘Yerusalem mutuku asik nirya ara, tuba tonap lipsisikuka dopnamlume,’ nyapdeipnamle. Tonda na Allah, na si eren aik ati, ‘Anyaik ayukumna ati keil deibuka domik ning ara, tuba tonap punubuka dopnamlume,’ nyapdeipnamle. Ayupu nyaplyopura, apil donamake.