Yesaya 43 - Eipomek

Israel ninye, sik Lyena Deiyoknye bira, Allah el tonok ati, nyabuk yupu

¹ Allah arye Israel ninye ati nyabuk. “Anggun malye winilamlumba, wenepsise bukni, winipsisa babye tuba moubuka kum tenelulume. Bukni, wini talak ara, nara Allah Yahweh arye nyapsine. Na aryuk, anggun apu koproba Yakub wipdeipsirye, kintinip deiamsiba, elce deibukba, dadeipdanin yangalamlum ninye, ‘Naʼ tenen, ninye ululume. Anggun Israel ninye ara, naryuk anggunti kintinip deiamsise. Ati, anggun ilil una meme. Ara, urdem ati kum nyapsine. Kume, narye, ‘Wininamne,’ akunum tenelamse ning ara, anggun malye ululum ning ati, wenebuka opsitinye bukni, bico ati anggun malye ning namin kipnirye, lyepropnamsine. Narye anggun si akunum kel kiamsisirye yukupsisa ati, anggunda na mapu koproba ululume. Anggunda ‘Naʼ tenen, ninye ululume.”

² “Ati, anggunce weik mek koubuka banamlum bukni, mek noutam banumunye talak babye, narye melipnamsina deice arye, amek optua babye, mek koubuka banmamunye talak arye, kum dopnamsile. Tonda, weik uku buk pakanmalyak banamlum bukni, uku buk noutam banmamunye talak babye, narye melipnamsina deice arye, auku weik arye diptua babye, uku noutam bamunyeba, auku arye kum dipnamsile. Atonun ton, yuk asilen ning nirya anggun dam yangasilya babye, malye kum kipnamsine.

³ Aning nyapmasina ara, urdem ati kum nyapsine. Deiyok ara, Israel ninye anggun ni koproba Allah, na si Yahweh unune. Israel ninye, anggun kalikuka melina deiyoknye, Pia Telebnye birye, anggunti lyepnamsina ati nyapsine. Israel ninye anggun Lyena Deiyoknye unune. Anggun malye winilulum ning ati, wenebuka oplopsitinye bukni, amalye umunye ning pununa ati, Mesir mutuku ulamik ninye ap, Etiopia mutuku ulamik ninye ap, Syeba mutuku ulamik ninye ap ara wenebuka oplopse. Winipsirye, anggun Israel ninye ati lopdeipsise.

⁴ Winipsa deiyok ara ani. Narye anggun Israel ninye ati, pia bico tenesunune. Na kanye ara, anggunda ‘Naʼ tenen, ninye ululume. Anggunda akunum wipdeiamsa ati, narye lukparabuka wenebuka kum oplopsise bukni, anggun pununa ati, yuk pera mutuku ninye wenepsirye oplopse. ‘Israel ninye tuba kam unamak’ tenen, yuk mutuku ninye weik, punubuka wenepse.” Allah arye nyabuk.

⁵ Nyabukce ayupu ton nyabuk. Ati anggunda ilil una meme. Narye, anggunti pia kalikuka melinamsine. Na ap, anggun ap neika uk unamabe. Kum bataknamsine. Anggunda yu nang arye tomobuka dana-dana tam mutuku, pera mutuku bobinamsik bukni, na melilamsisa deice arye, keting yangan tam ap, keting wekelban tam ap arye, anggunce deiplumba dadeipdanin yanganamak nang weik tonun, lo arepneba bulubuka yanganamake.

⁶ Wininamna ati, narye nyapniba, outam mutuku unyak ninye ap, itam mutuku unyak ninye ap, malye kipsikce, tomobuka bobinamsik ninye ara, bataknamake. Narye, ‘Minopce bataklulume,’ nyapniba bataknamake. Narye, ‘Na mapu ara, pia pera mutuku arye boyanamlulume,’ nyapnyopura, batakikceba yanganamake. Aning atonun, narye, ‘Na kilmapu ton, mutuku sirya, im sirya bobinamikba daunyak mutuku arye boyalulume,’ nyapnyopura, batakikceba yanganamake. Kum tunim apnamake.

⁷ Ati, narye na si arelamsisirye, ‘Na tenena ninye ululume,’ nyabuka wipdeiamsise ninye nirya ara, narye kwepdeiamse. Aninye nirya ara, “Na pia teleb ununa ap, diksukumuk ununa ap, dirina weik ununa ap, aninye deice deipniba, sik unamak deice arye, laka upliba, yuk ninye nirya eibuka kel kibikirye, na Allah ati, ‘Se, Allah elda pia telebe. Weik Erebuka eitamnye ulule,’ nyabuka na si erenamniyake. ‘Wininamak’ tenen, anggun Israel ninye wipdeiamsise.” Allah arye nyabuk.

Allah arye, ‘Israel ninye ara, moubuka kel biknamake,’ nyabuk yupu

⁸ Allah arye nyabuk. “Na mapu nirya ara, asing tuba aubuk bukni, sikda asing kubuk nang atonun unyake. Tonda, sik amul ara tuba aubuk bukni, sikda amul akunum kunukuk ninye atonun unyake. Ati, narye nyapniba adiparyuk bisibuka na dinak tikilbinamake.

⁹ Narye nyapniba, mutuku-mutuku nirya daunyak ninye bulubuka tonok mutuku ansinibuka unamake. Yata ninye do nirya arye, ‘Aminyan talak winipnamsile,’ nyabuka laka nyalamsik do? Tonda, ‘Minop talak Allah arye pil dolamsuk ning ara, ani,’ nyabuka, aning nirya min kum uamuk talak akunum laka nyalamsuk do? Yatanye do, aminyan aupnamle ning eibuka kel bikamting toura, laka nyapsutu do? Sikce laka nyalamikba, sik yupu kekelamik ninye awininyak ning, anggun eipmunye ninye arye bulubikirye, ‘Diba, aning min kum uamuk talak ara, anang arye akunum laka nyapsike,’ nyabuka laka nyapsitinge. Aning nyapting toura, yuk nang ton kekeptingce, ‘Aning ara diba’ tenen, kel biktinge. Winibiceura, sik nirya kekebikirye, ‘Diba aning ara, atonun akunum uple,’ nyapnamake. Bukni tonoknye babye, aning nirya kum laka nyaptue.”

¹⁰ “Se, na mapu anggunda na unun ning ati, laka nyan nang ululume. Tonda, ‘Na mambul pil melibuka donamle’ tenen, wipdeipsinye ap, anggun ap arye laka nyapmunyopura, anggunce kel biknamnulume. Ara, ‘Dipkoprop, Allah elda tonok ulule,’ tenebuka kel kipnamlume. Allah nara pia min yuma talak ap, atalak ap, aminyan doryanamle talak ap nirya ara, nara pia aunune. Yuk Allah ton pia kum ulule. Ati, yuk nang arye, ‘Allah min kum ulamuk talak ara, nun si erenyap ning akunum uamuk,’ kum nyaptinge. Tonda, na pia aunamne ati, yuk nang arye, ‘Allah akunum kum danamle talak ara, nun si erenyap ning apia unamle,’ kum nyaptinge. Nara, pia min kum winipmantonye ununa atia. Min talak babye, aminyan doryanamle talak babye, na uk ulamse touk, pia aunamne. Allah ara na tonoka.

¹¹ Allah Yahweh ara na tonok unune. Yuknye bira Ninye Lyena Deiyoknye ton pia kum ulule, na tonoka.

¹² Anggunda yuk ning ap, isa si ap, deiyok kibuka min kum erelamlum talak ara, na minopce ulamse. Nara peterena ap, lak lena ap, ninye lyena ap, teleb ulina ap deiyoknye bira, na aunune. Yuk ning ton kum ulule. Anggunda na yupu lak len ninye ululume. Anggun kel bikimunce, laka nyalulume. Nara Allah Yahweh unune.

¹³ Minop talak donirye dipdongobuka, wini talak babye, nara Allah pia unamne. Na taruk deice arye pil donamne ning ara, yatanye birye yupu seknutu do? Yatanye birye nati bisipnutu do? Narye talinye ning ara, yatanye birye doproptu do? Narye pil akunum dopnyopura, yatanye birye, kum kipdeiptu do? Kume aning nirya ara, ninye arye kum winiptinge.” Allah arye nyabuk.

Allah arye, Babel mutuku ninye malye kiplirye, Israel ninye lyepnamla ati, nyabuk yupu

¹⁴ Nara, Allah Yahweh arye, anggun Israel ninye ati nyapsine. Nara, pia Teleb uk unirye anggun Israel ninye ati pia kalikuka melisunune. Anggun malye winina ati opsitinye bukni, anggun pununa ati, dekuka lyelosunune. Narye nyapsine. Anggun lyena ati, narye nyapniba yuk pera mutuku pia yu weik yin talin nang arye, Babel mutuku unyak ninye ati, olyanamake. Bikirye, wenena aik pum tam bublan tirikdongopnin biyik ning ara binuka ulubuka paklopnamake. Babel mutuku ninye ati obuka sirya dakikirye, sik Babel mutuku ninye tapu koubikiba, sik Babel mutuku ninye ara weik tonun engebuka malye nyanamake. Wini talak ara, kanye talima erepdakirye, kwalibuka banyak bukni, aminyan ara imun kanye weik bobuka engenamake.

¹⁵ Nara Allah Yahweh unune. Nara, pia Teleb uk unirye anggun Israel ninye ati pia kalikuka melisunune. Israel ninye, anggun ninye deiyoknye, Raja usunune. Narye kwepdeipsisirye pia talisunune.

¹⁶ Nara Allah Yahweh arye, ‘Weik laut mekwen noutam ara, na mapu tuku mikroplibuk tuku deice bisik binamak’ tenen, narye nyapsiba, mek dana-dana tam kiprobukba, tuku deice uk yanibuka binamlume. Laut mekwen ara, pia weik mekwen lonting-lonting anmokba, awamuk bukni, atalak ara narye bisik kintinibuka yapdeipsisiba, teleb bisik deice binamlume.

¹⁷ Na aryuk nyapsiba, Mesir mutuku weik deiyoknye ap, el yin talin nang weik tonun, sik kuda basam arye libuka, aning deice bukuka tuku deice balamik ning, kereta kuda ap, sik kuda basam weik tonun arye, ‘Israel ninye olbinuyap’ tenen, anggunti bikbik abuka dobolyasik bukni, narye opse. Ara, mikip-mikip nang nirya arye olyasik bukni, binuka opseba akunum dibikopura, tuba tonap tamubuka mikip kum donamake. Weisa uku buk pakuka dinmalibuk, deiyoknye birye ‘Akunuma’ tenen, tangalamle touk, na Allah arye aninye nirya obuka sirya dakse.

¹⁸ Ati, nyapsine. Minop talak winilamuk ning ton pia tuba kum tenenamlume. Minop winilamik ning ara, tonap tenebuka bana kume.

¹⁹ Anyapmasina ara talye ati kume. Deiyok ara, narye winiryuk ning ton winipnamsina ati nyapsine. Ati, aning pil dopneba, anggunce moubuka tenipmunce kum eipnamlum do? Otalak ara, apil akunum deiyok koubuka pil donmane. Narye mek kumak ati, ninye kum unyak mutuku, pata mutuku noutam bisik yapdeipnamsine. Tonda mek kumce talye bukamlye mutuku noutam ara, mek arepneba, mek pu dobuka banamle. Ati anggunda ‘Kabul do?’ tenen, bita kel kum bikmalum do?

²⁰ Narye mek kumak ati, ninye kum unyak mutuku, pata mutuku noutam mek kintinibuka delinune. Tonda mek kumce talye bukamlye mutuku noutam ara, mek arepneba, mek kutukuka balule. Amambul pil donuna ara, ‘Na wipdeiamse ninye, Israel ninye, ‘Naʼ tenen, ninye unamak,’ tenelamse ninye arye, ‘Amek dibuka, teleb ulamikirye, na si erebuka, nati si erenamniyak’ tenen, wininune. Wininuna ati, ninye arye talibuka kum weilamak ning, bai tam talye ulul ning ayala-ayala nirya ap, bai kam ap, bai ulamlirye lukunyan noutam balamle kupmana obuka dilul maka ap arye, nati si ereninyake. Amek balyopura, na wiamse ninye ati arepneba, dinamake.

²¹ Aninye ara, kwepdeipsirye, ‘Narye sikti, kanye deipniba, sikce na si erebuka mot senamniyake. Winibuka nyalamikiba, yuk mutuku ninye kel biknamak’ tenen, Israel ninye kwepdeipse. Allah arye nyabuk.

Allah arye, sik Israel ninye malye winilamik ning ati, wenebuka nyabuk yupu

²² Allah arye, Israel ninye ati nyabuk. Na Allah arye, anggun apu koproba Yakub birye deibukba, dadeipdanin yangalamlum ninye ara, weik tonun arye meliamsise bukni, dipkoprob anggun Israel ninye ara na si ton kum erenululume. Na si erebuka, nati si erena ati, anggun Israel ninye arye, nati, ikin pil dolalumba, mikip ara mitang kum upsuke.

²³ Ara, anggun malye winipmunye ning ati, ‘Kam ning obuka, Allah ati arebibyeba, elce namin kipnamsil’ tenen, domba obuka, kum boyanganumunce, uku kum dalulume. Tonda, anggunce na si erena ati, mambul ning dobuka kum arenululume. Tonda, narye anggunti, ‘Diba tenepnulumce, anggun kouamunye ning nong upliba, ton tam ning libuka, na si erena ati, urdem ati aeinamnululume,’ kum nyapsise. Aning atonun, narye anggunti, ‘Na morona ati, siltong teleb ning dobuka uku dapmunba, uku dilyopura, tulum welepliba, asiltong kekepsinya deice arye, anggunti kanye delinamsine,’ nyabuka, ikin ning anggun nong deice kum delisunune. Narye anggun malye winin ning namin kina ati, ikin ning weik anggun deice kum delisunune.

²⁴ Tonda, ‘Nun ni Allah kanye deipsitue,’ tenen, anggunce nati siltong teleb ning dekuka kum boyanganululume. Tonda, anggun malye un ning dekna ati, ‘Anggun weilulum ning obuka nong kalimna teleb ning boyanganamnululume,’ nyabuka anggun deice kum deipsiseba, aning na arena ati kum boyanganululume. Aning nirya ara na ton kum patanulule. Bukni, anggunce malye winiluluma deice arye, nati ikin ning delinululume. Tonda, angguncuk tenepmunce, malye winilulum ning nirya ara, na lik weik unulule. Allah arye nyabuk.

²⁵ Nyabukce ayupu ton dukdongobuka nyabuk. “Yatanye birye, anggun malye winilulum ning namin kipsilirye, aning kum kilisulul do? Na Allah aniryuk, anggun malye umunye ning nirya ara, kilibuka namin kisunune. Wininuna deiyok ara, ‘Sik malye wininyak ning deice arye, na si malye kipdeipnicak’ tenen, namin kisunune. Narye anggun malye winilulum ning nirya ara, tuba kum teninune. Akunum namin kipnirye, kum kilinuna ati, aning tuba kum teninune.

²⁶ Anggun ap, na ap arye, neika tenipdenamabe. Anggun minop talak malye winilamlum ning ara, tuba tonap tenipdenamabe. Anggun malye winilulum ning ara, yupu neika talipnamabe. Anggun Israel ninye arye, ‘Kume nun malye una kumce, telebuk ulamupu,’ nyapnumunyopura, kekepnamsine. ‘Nunce malye winin ning tonok babye kum winilamupu,’ nyapnutumba, kekepsitinirye, ‘Dipkoprop ulamike,’ teneptinye bukni, aning kum nyapnutume.

²⁷ Minop talak anggun deiyok kounanye babye malye weik winilamuk. Aning atonun, anggun apu ap, anggun deiyok nang ap, na yupu laka len nang, sik nabi-nabi nang ap, sik nirya arye, malye winipra yangalamikce, na yupu nirya yaniltana uk ulamik.

²⁸ Ati, Allah si eren aik pum tam pil dona deiyok nang, sik imam-imam nang ara, na akunum batakse. Sikce na si eren aik pum tam wekuka, nati si kum erepnitinge. Tonda, narye nyapniba, yuk pera mutuku nang arye, anggun Israel ninye ati obuka sirya daksikirye, tapu koubuka bobinamsiake. Winipsicopura, anggun Israel ninye nirya ara, alye weik dakalanamlume. Anggun Israel ninye ara nati malye-malyeuk winimunya ati, Yakub birye deipsukba, dadeipdanin banyak ninye nirya ara obuka sirya daknamne. Anggunda alye weik dakuka imun kanye bobuka unamlume.” Allah arye nyabuk.