Yesaya 42 - Eipomek

Allah el amu tam ulirye, mambul pil donamlinye ati, nyabuk yupu

¹ Allah el si Yahweh arye nyabuk. Anggun nirya dilulume. Na amu tam ulirye, na mambul pil donamlanye bira, anggun kel bikna ati, erepdeipsine. Narye anye pia melibuka talinamne. Narye anye wibuka deiamsa ati, elti, ara, pia kanye delinamne. Na wiamsinye bira, na Dib Kanye weika arye el deice delinamne. Winipnyopura, elce sik tukwak ninye ayala-ayala nirya ati, diksukum kibuka yupu lipsisikuka bokolinamle. Winiplyopura, sik ikin weik ulamik ning kum kipdeiplirye, ninye weika arye teleb kilinamle. Winipliba, sikda kanye deibuka telebuk unamake.

² Na amu tam mambul pil donamlanye bira, ‘Ninye nirya kekenamak’ tenen, weik yupu deice arye malye yupu kum nyanamle. Elce nyanamle yupu ara, ‘Ninye nirya eipnamniak’ tenen, ninye bisik balamicak uk, kum nyanamle. El nyanamle yupu ara, ninye nirya dilamace sukumuk nyapliba, kum kekenamake.

³ Tonda winipmanto ara, pinatikamlye sukum kumanya doplirye, lontoklamle ning babye, ‘Malye ati bataknune’ tenen kum cepsingipnamle. Aning atonun lampu weisa ara, lapna-tangapna kinmalya ani, tangalamle ning ara, ‘Dauaplye’ tenen, kum bataknamle. Aning kum wininamle bukni, dipkoprob elce, ‘Wininamne,’ nyalul touk, aning nirya ara, dipkoprob pil donamle. Winiplirye, diksukum un ninguk pil dopra balamikce, ninye weika arye teleb kilinamle.

⁴ Elda teniltona deice una ap, bulul takana kanye bona ap, pia kumce diksukum kanye uk bobuka, dipkoprob ninguk unamle. El pil min kum sirya dakmalye talak ara, ninye arye elti, yupu kum sektinge. Tonda, elti, kum optinge. Pil diksukumuk dopra balamlya ani, diksukum una deiyok ning akunum teleb kibuka pil doplyopura, pil bataknamle. Weik laut mekwen lilunak unyak ninye ara, ‘Se, elda dan talak nun mutuku yanuka peterenamsil do?’ tenen, elti, pia kanye deibuka dinauk unamake.

Allah Yahweh arye, el amu tam pil donamlanye biti, nyabuk yupu

⁵ Nara Allah na si Yahweh unune. Narye nyapkine. Im ap, im noutamak ulul ning ap, im deice ap nirya ara, naryuk kwepdeipse. Tonda, naryuk, tukwak im sirya, mutuku sirya nirya ap, tukwak mutuku ulul ning ap, tuku deice arye butukuka palamle ning aning-aning nirya ara, narye kwepdeipse. Na aryuk tukwak ninye ara, anggun isin aresunune. Areneba kam unyake. Tonda, anggun dib kanye babye, naryuk anggun talima noutam dongosunune.

⁶ Ati na si Allah Yahweh arye, anti wibuka yukupkina deiyok ara, ani. Ara nara, malye una pia kum diparyuk, diksukumuk ununa ara, ance, ‘Tukwak ninye nirya kel biknamak’ tenen, lak kipdeipnamlama ati, wibuka deipkise. Ati, anda teleb kanye bobuka, diksukumuk upra banamlame. Narye, an taruk talibuka, pia kalikuka melinamkine. Deiyok ara ani. Ara, ‘Na tenena ninye unamak’ tenen, wipdeiamse ninye ati, narye, ‘Wininamlulume, aning ara kum wininamlulume. Winipmunyopura, narye anggunti wininamsine,’ nyapdeipse yupu, ‘Pia diba tenepnamak’ tenen, an dobuka, sik dam dopkwetepnamkine. Anda, mambul pil dopra balaminya ani, deice arye aninye ara, ‘E, dipkoprob nun ni koproba Allah arye nyasilye yupu ara, nong upnamlarya’ tenen, moubuka kel biknamake. Winipminyeba, sik moubuka kel kina ati, ance sik talima pum tam dirina arepnamlyame. Winipmanto ara, lukunyan noutamak ara, ninye arye weisa ubikirye, menekuka bakibuk, yuk ninye awesa dirina eibikirye, teleb bisik balamak touk, ance yuk-yuk mutuku ninye nirya ati, dirina kipdeipnamlame. Ara, ‘Israel yala kum ninye ara, na dirina eibikirye, diba tenepnamniyak’ tenen, dirin deiyoknye erepdeipkine.

⁷ Ance na mambul pil dopra balaminya ani, sik asing kun ninye ara, asing lalinamlyame. Tonda, sik wenena aik dongolamikba, ulamak ninye ara, bublan pakuka lopdongopnamlyame. Tonda, pia kunukak ulamak ninye ara, ance aninye dobuka teleb dirina ak deipnamlyame. Ara, ikin kanye bobuka unyak ninye nirya, ance pil donamlama deice arye, na Allah arye aninye lyepnamna ati nyapkine.

⁸ Nara Allah Yahweh unune. Na si koprop ara Yahweh unune. Na mikip weik ap, weik dirina ap, pia mambul ning ap ununa ati, ninye arye na si erenamnika ara, yuk nang ton pia kum arepmanto! Ninye nirya arye, na si erepniting bukni, sik bidamnye taruk arye memenyakce, isa si erenyaka ara, pia na like. Na siuk erepniting ning ara, Isa Mutuku Dongonye ati kum areptinge. Winibicopura, narye ‘Dauaplye’ tenen, kum namin kiptinye.

⁹ Minop talak narye nyapsise. ‘Aminyan doryanamle talak ara, dipkoprob winibuka-winibuka winipnamle,’ nyabuka nyalilamse ning ara, wini talak aning nirya nong akunum aulule. Aning nirya min kum uamuk talak ara, akunum nyalilamsise. Wini talak arye dipdongobuka, doryanamle talak winipnamle ning ara, ‘Winipnamlarya,’ nyabuka nyalisunune. Aminyan talak winipnamle ning nirya, akunum kel bikmana ati nyapne. Awinipnamle ning nirya ati, min kum winipmalye talak arye, ayupu ara anggunti nyasunune.

Allah Yahweh arye, ‘Mot sena deice arye, na si weik arye erenamnulume,’ nyabuk yupu

¹⁰ Na Allah arye anggun tukwak ninye nirya ati nyapsine. Anggun nirya arye, na Allah Yahweh ati, kanye deibuka, “Nun ni Allah pia teleb ulule,” nyabuka, winiryuk mot deice arye, na si erebuka si kinamnulume. Anggun mutuku sirya, im sirya ululum ninye arye, na Allah ati, mot senamluma deice arye, na si erenamnulume. Aning atonun, anggun weik laut mekwen deice arye, weik mek liya yo wekuka mekwen deice balamlum nang ap, tonda weik laut mekwen kup-kup ulalum nang ap, na Allah ati, mot senamluma deice arye, na si erenamnulume.

¹¹ Ura mok kum celul mutuku, talye pata lo weik ubuk mutuku ululum ninye nirya ap, amutuku noutamak aik dobuka ulamak ninye ap arye, na Allah ati, mot senamluma deice arye, na si erenamnulume. Tonda, Kedar mutuku noutamak, talye balamak ninye arye, na Allah ati, mot nyanamluma deice arye, na si erenamnulume. Anggun nirya arye, nati, ‘Se, nun ni Allah elda pia teleb,’ nyabuka na siuk erebuka mot senamnululume. Tonda, anggun Sela mutuku ululum ninye arye, teleb kanye bobuka, ‘Nun ni Allah elda pia telebe,’ nyabuka mot senamlume. Na si erepmunce, weik mutuku deice arye mot senamnilyame.

¹² Tonda, weik laut mekwen kup-kup ululum ninye, anggun nirya arye, ‘Nun ni Allah elda pia telebe. Elda dirin ap, si Weik Erenanye ap ulule,’ nyabuka, mot senamnululume. Ninye mutuku-mutuku nirya arye, na Allah ati, ‘Telebe,’ nyabuka, mot nyabikirye, si erebuka, na si erenamniyake.

¹³ Nara Allah Yahweh arye, ninye mal olan nang arye, ilil kum aniryuk, malye kiplirye sik bikuka mikip arye ninye olbalamaka atonun, unune. Nara, yin talina deiyok nang arye, sik mal olan nang ati, yu upliba, mikip arye, weik yupu deice nyabikirye olalbalamak touk unune. Na Allah ati, ‘Nun like,’ tenen, malye nyaninyak ninye nirya ara, mikip weik aryuk, olbanune.

Allah arye tukwak ninye ati, wenena ap, melina ap, winipnamle ning ati, nyabuk yupu

¹⁴ Minop talak arye dipdongobuka, danoutam talak dipdongobuka, atalak babye, ‘Naʼ tenen, ninye Israel yala ninye ikin ulamik touk, na Allah arye na yupu ton kum nyalamse. Talye kanye bobuka, lamapdongobuka ulamsebuk, wini talak ara aning akunum upmala ati, atalak ara na yupu mikip arye nyanune. Ara, kilapu mi bomica ani, mi deipnuce talak mi deiyok dipliba, weik tonun ngalukuka malye nyalamak touk, nyanamne.

¹⁵ Na tenen ninye lyelona ati, ninye arye aik dakuka uku sice kiltakanyak touk, na Allah arye weik mutuku ap, mitik mutuku kon ap, malye kipdeipnirye, kum kipdeipnamne. Amutuku deice unyak ning ap, talye butukuka palamle ning ap nirya ara, kolupdeipniba, kum danamle. Tonda mutuku-mutuku balamle mek ap, mekwen ap nirya, kum kipdeipniba, sesal seplirye mutuku nirya ara lak kiplopnamle.

¹⁶ Na mapu sik asing kuamlye ninye ati, narye melibukapnirye sik min balamikirye bita kum bikamikce bisik ara, narye sik taruk talipnirye, menekuka banibuk, sik banamake. Kuna sukumuk balamice ninye ara, sik binamak sukum narye dirina kipdeipniba, dirin arye eibuka teleb ubuka banamake. Tonda, ‘Kanam aryuk binamak’ tenen, kot dam bisik nirya teleb kipdeipnamne. Winipnyopura, talye lukparabuka teleb bisikuk banamake. Diba aning-aning nirya ara, narye sikti, winibuka melinamsine. Na wipdeiamsiba, ‘Naʼ tenen, ninye, Israel yala ninye ara, pia kum bataknamne. Kalikuka melinauk unamsine.

¹⁷ Na mapu ara, lyepnamne bukni, yata ninye do nirya, sikce, talye ning memebuka deibikirye, ‘Aning ara nun ni ulula anya arye, aning arye melipnamsile,’ nyabuka si erenyak nang nirya ara, wenepnyopura, alye weik dakdanamake. Sik winilamice ning nirya, nong kum upliba, imun kanye bobikirye, alye dakdanamake.

Allah arye, ‘Sik Israel ninye ara, asing kuna ap, amul kunukna ap, unyak ninye atonun unyake,’ nyabuka wenebuk yupu

¹⁸ Allah arye, Israel ninye ati nyabuk. Se, anggunda amul kunukne ninye atonun ululum ninye ara, kekepnululume! Se, anggunda asing kun ninye atonun ululum ninye ara, wini talak dilulume!

¹⁹ Na mapu Israel ninye ara, weik tonun asing kuamlye ninye atonun unyake. Na Allah Yahweh arye sikti, ‘Na yupu dobuka yuk pera mutuku ninye laka nyalbinamak’ tenen, wipdeiamsise bukni, sikda amul kunukne ninye atonun unyake. Israel ninye ara, amul kunukna ap, asing kuna ap, unyak touk, yata mutuku nang ton aning atonun unyak do? Kume, sik uka.

²⁰ Narye mambul weik pil dolamseba, anggun Israel ninye weik tonun elilulum bukni, moubuka kum tenelulume. Anggunce ‘Dauaplye’ tenen, moubuka kum elilulume. Anggun nirya amul pakuka deiyok kekelulum bukni, ‘Deiyok ani,’ tenen, moubuka kekena kum ati, moubuka kel kum kilulume.

²¹ Na Allah Yahweh unune. Nara malye winin ning tonok babye, kum unirye, pia diksukumuk unune. Diksukumuk ununa anya arye, narye Israel ninye ati, ‘Aning wininamlulume, aning ara kum wininamlulume,’ nyapdeiamsise ning ara, pia teleb kibuka nyalamsise. Ayupu ara, pia teleb dirina weik kililamle yupu ulule. Winipsa ati, na kanye deiamse.

²² Winibuka pia teleb yupu arepsise bukni, aning nirya bataklum ati, yuk pera mutuku nang arye, yanuka anggunti opsikce sirya daksike. Obuka sirya daksikce, anggun talilamlum ning nirya ubula dopropsike. Tonda, ton tam nang ara, tomobikce, tapu koubuka, wenen aik tuku pum tam dongobuka deiamsik. Ton tam nang ara, yuk wenen aik pum tam tapu koubuka delilbinamsike. Winilamsikba, anggunti lyepmantonye ton kum ulamukba, tuba ikin uk ulamlume. Anggun talilamlum ning nirya ubula dololamsikce, ‘Sik ning arye, tamubuka areplulume,’ nyapmantonye ap, tonda lobuka lyepnamsutunye ton kum ulamuka ati, tuba ikin uk ulamlume.

²³ Min arye ikin wamsuk ning ati, anyapmasin yupu ara, anggun noutamak arye yatanye amul pakuka deiyok moubuka kekenamal do? Anyapmasin yupu kekepturye, ‘Se, aminyan talak babye winipsilyak’ tenen, yatanye birye, kekepturye, moubuka kel kipnamle do? Minop talak ikin upsuk ning, moubuka utumopura, aminyan talak yanamsil ning babye, moubuka teniptume. Bukni, anggun noutamak arye, yatanye birye kekepturye, kel kiptu do? Pia kum ati nyapsine.

²⁴ Yata deiyoknye birye, weik lo arebukba, yu ninye arye yanamikce Israel yala ninye sik talilamik ning nirya ubula dolamik do? Aning atonun, yata deiyoknye birye, lo arebukba, yu nang arye Yakub el yala ninye, obuka sirya dakikce, ikin ning sik nong deice delilamik do? Aning ara anggunce moubuka bita kel kum bikamlum do? Weik lo arebuka deiyoknye bira, na Allah Yahweh arye winipse. Winipsa ara urdem ati kume. Deiyok ara, anggun Israel ninye arye na yupu yaniptaplum deice arye, nati bataknulume. Narye anggunti, ‘Aning ara wininamlulume, aning ara kum wininamlulume,’ nyabuka laka nyalamsise yupu ara, anggunce yaniptaplume. Narye, ‘Teleb una ati, diksukum banamlam bisik ara ani,’ nyabuka arelamsise yupu ara, angguncuk, ‘Aning ara nun like,’ nyabuka batakamnulume. Ati, ikin usilye ning ara, deiyok anggun uka. Na Allah aniryuk kume.

²⁵ Anggun Israel ninye arye, na yupu nirya bataknuluma ati, yu weik upnukce, narye anggun wenena ati, pia kanye imun weik ning arepsise. Winibuka na yu deice arye, anggun mal olan nang ati lo arepsiba, yayikce anggunti, obuka sirya daksik. Winipsika deice arye, winipmanto ara weik uku arye aning-aning nirya dilirye sirya dakuka dilamle touk, upsuk bukni, anggunda tuba moubuka kum teneplume. Na Allah arye, Israel ninye anggun wenena ati, weik imun kanye bon ning arepsisiba, sirya dakmanto kipsuk bukni, tuba moubuka kum tenelulume. Ikin upsutuba, adeice arye na tam tamubuka yanutum bukni, winipsuka babye, aning nirya moubuka kum tenelulume.