Yesaya 41 - Eipomek

Allah arye, Israel ninye ati, kalikuka melilulnye birye, nyabuk yupu

¹ Allah arye nyabuk. Na nyasinye yupu kekebukapmunce, pia darabuka unamlume. Se, anggun dana-dana tam, laut mekwen arye sekdongobuk mutuku umunye ninye nirya, tonda anggun yuk-yuk mutuku winimunye, ninye ayala-ayala nirya ara, mikip kum ulamlum bukni, narye anggun mikip, ila tuba tonap arepnamsine. Ati, anggun nirya ara yamunyeba, na ap yupu talipnamabe. Yupu awapsilyopura, anggunce nyapnamnulume. Yupu lipsisikuka bokolina deice, bulubukapbibirye, yupu talipnamabe. ‘Weik mambul pil dolulnye bira, yatanye do?’ nyabuka, yupu talinamabe.

² Anggun teneipdelulume. Yatanye birye yukubukba, keting panalyangan tam arye weik yin talina deiyoknye kekebukce yanganmal do? Yatanye birye anye binyak, ‘Na amu tam ulirye, na tenelamse pil donamle’ tenen, mikip kililulba yanamle do? Yatanye birye ayin talina deiyoknye biti, mikip kipliba yuk mutuku nirya unyak ninye ati bisibuka opra yanganmal do? Atonun yatanye birye, anye biti mikip arebukba, el parang ya ap, el yin ap boplirye, yuk mutuku ninye deiyok nang nirya, yaniptabuka obuka sirya daknamle do? Aninye nirya obuka sirya daklirye, nirya daknamle. Winipmanto ning ara, kumanya doplyopura, kel-kel alamle tuku erebuka balule. Tonda, kumanya arye doplye talak ara, maning kolupmaliba, kumanya yalirye bobuka balamle touk, yuk mutuku weik nang nirya babye, atonun winipnamake. Aning atonun, anye birye, yuk yala ninye ap, sik ninye deiyok nang ap ati, obuka sirya daklyopura, aninye nirya kum danamake. Winibuka olyalyopura, amutuku nirya ara obuka uku sice buklopnamle.

³ Aminyan yanamle weik yin talinye birye, sik yuk mutuku ninye ayala-ayala nirya ati, ‘Obuka sirya daknun’ tenen, pia ati dobolsusunamle. Elce minop talak kum balamuk bisik bukni, abisik deice uk binamle. Sik yuk mutuku ninye ona ati, dobolsusunamle bukni, el bidamang ati ara, ikin ning tonok ning babye, kum upnamle.

⁴ Aning nirya ara yatanye tenelamuk touk apil dipkoprob donamle do? Yatanye birye aning-aning min kum uamuk tam arye dipdongobuka, anoutam talak nirya ara, ‘Ayala ninye ara, unamake. Sik yuk yala ninye ara, wininamak,’ tenelamuk touk, keting tamun, keting tamun nirya arepliba, tukwak unyak ninye nirya elce tenelye touk, dipkoprob aninguk unyak do? Anye bira, yatanye do? Na dipkoprob nyapsine. Nara, Allah, na si Yahweh unune. Aning-aning nirya min kum kwepdeamse talak ara, minop talak na akunum ulamse. Tonda, aning-aning nirya ati, sirya nirya dakne talak kum uplyopura, na pia aunamne. Nara Pia Kam unanye birye, amambul pil nirya donirye, pia donamne.

⁵ Tonda weik laut mekwen arye dana-dana nirya sekdongobuk mutuku nirya, sik weik yukak unyak ninye nirya arye, na mambul pil dolamse ara, elinyake. Ati aning-aning winipneba eibikirye, nati ilil ulule. Na mambul pil doniba, mutuku sirya, im sirya daunyak ninye ara, eibikcopura, lukdakirye, ‘Se’ tenen, sirim talilule. Winiplyopura, sik nirya tonokak bulubuka, na dam yanamake.

⁶ Winibice talak ara, ton tam nang arye, ton tam nang ati, melibuka dukdongobikirye, sik mikip kum nang ati, ‘Na kwit capu, mikip kipdalulume.’ Nyabikca deice arye talima mikip kilinamkiyake.

⁷ Tonda yo dopdobikirye, isa si eren ati, urasin teleb ning memen nang, pia kel nang arye, sik kat ning el si emas arye urasin teleb ning memen nang ati, talima mikip kilinyake. Aning atonun, besi martalok arye, yuk besi ning ‘Urasin teleb upnamle’ tenen, bongoplinye birye, el kwit capu, besi ning deice deiplirye, topnong ap, parang ap kintinibuka memen nang ati, ‘E na ni kayapu, pil teleb kibuka donamlume,’ nyabuka, talima mikip kililanyake. Anang nirya arye, sik kwit capu ati, isa si erena ning kintinibuka memen talak ara, ‘E na ni kayapu, urasin teleb ning dopmap atia,’ nyabuka teleb yupu nyalanyake. Nyanyak bukni, sikce isa si erena ati, memebice ning ara, ‘Lokuka saklyak’ tenen, aning buknamlyak ara, ‘Lokna kumce, pia darabuka tiknamle’ tenen, paku arye dakanyake.

⁸ Sik anang ara, talye-talye piluk donyak bukni, na Allah arye nyapsine. Na Allah arye, anggun Israel ninye ati, ‘Na tenena ninye ubuka, na amu tam unyakce, na pil donamniak’ tenen, wipdeiamsise. Anggunda, Yakub birye deibukba, dadeipdanin, yangalamik ninye ululume. Anggunda, na wipdeamse ninye, na kwit koproba, anggun apu Abraham arye deibukba dadeipdanin yangalamik ninye ululume. Winiluluma ati, narye bico tenesenun bukni, anggunda malyeuk tuba ululume.

⁹ Ura na ni kayapo, anggunda mutuku sirya, im sirya daulalum bukni, narye wibuka dopropsise. Tonda narye mutuku-mutuku nirya yukak daulamlum bukni, narye nyapsiseba kekeplumce, yangalalume. Narye anggunti, ‘Anggunda, narye wibuka dopropsisa ati, na pil don nang unamlulume,’ nyapsise. Narye, ‘Anggunda na amu tam pil don ninye unamlum’ tenen, narye wipdeipsise. Winipsisirye, pia kum bataklamsise. Pia kalikuka melinauk ulamsise.

¹⁰ Ati ara, narye nyapsise. Anggunda ilil una meme. Nara anggun dam unirye, pia melinamsine. Nara, anggun ni koproba Allah ununa ati, anggun kanye teniltona kum unamlume, Imun kanye bobuka kum unamlume. Nara anggun ni Allah unirye melinamsine. Na aryuk mikip arenamsine. Tonda nara, malye ning tonok ning babye ton kum ununye birye, na sirik taruk deice arye, pia talinamsine. Winibuka melipsinya deice arye, aning-aning nirya malye kum kipnamsine.

¹¹ Nara anggun ni koproba Allah arye, pia melinamsina ati ara, yuk yala ninye nirya arye, yu upliba anggunti ‘Yanuka optibye’ tenen, piripdenamsiaka babye, anggun deice ikin ning kum deipnamsiake. Narye melipsiniba, anggun mal olan nang ara, alye weik upnamle. Tonda, yuk mutuku nang arye anggun mal olan nang ati, ‘E, anang ara, talye nang uka,’ nyabuka wabuka nyanamake. Yuk mutuku ninye arye, anggunti, ‘Anang optibye,’ tenenamak ninye nirya ara, narye melipsiniba, anang dipnamake. Anang ati obuka sirya daknyopura, aninye kum upnamake. Anggunce, anang ati, ‘Sikda pia talye nang uka. Sik mambule kume,’ tenenamlume.

¹² Anggun Israel nang arye, anggunti, ‘Anang optibye,’ tenen, piripdenamsiak ninye ara, ‘Dan mutuku unyak do?’ tenen, eprenamlum bukni, anggunce anang ara kum eipnalume. Anggun ona ati esinyak nang nirya ara, narye kum kipdeipniba, anang ati tuba kum tenenamlume.

¹³ Aning nirya nyapmasina ara, urdem ati kum nyapsine. Deiyok ara, nara anggun ni koproba Allah Yahweh unune. Narye anggun sirik taruk talipsinirye, anggunti, ‘Na mapu, anggunda ilil una kume,’ nyasunune. Narye anggunti pia kalikuka melinamsina anya arye, anggunda ilil una meme.

¹⁴ Anggun apu koproba Yakub birye deibukba, dadeipdanin yangalamik ninye, anggunda el yala nang ara, anggun ilil una meme. Yuk yala ninye arye anggunti, ‘Sik Israel ninye ara, mitik ap, mikip kum ap unyaka anya arye, sikda, talye kwising ap, kuluma ap atonun ninye unyake. Sikda mambule pia kume,’ nyabuka nalinamsiyake. Nyapsica babye, aning tenena meme. Deiyok ara, nara Allah Yahweh arye nyapsine. Narye anggun Lyena Deiyoknye unune. Nara Allah Pia Telebnye unirye Israel ninye ati, lyelona ap, kalikuka melina ap deiyoknye usunune.

¹⁵ Na mapu Israel nango, anggunce na yupu kekepnululume. Winipmanto yupu ton nyapnusine. Anggunda, ‘Gandum bama labibirye, el duk ning wibuka dopropnamap’ tenen, weik ikin yo, gandum deice deibuka teiklamlumba, el duk labuka poulbalamle. Atonun el bama babye, yuk labuka saklamle. Winiplyopura, ninye arye gandum bama yuk, gandum duk yuk, wibuka delilamak touk, upnamlume. Weik ikin yo deice, kat yo arye tace lubuka tuku deice lukmunyeba, tuku palilamle touk, upnamlume. Ara, anggunce weik mutuku dup ap, mitik mutuku dup ap, adeice unyak ninye nirya ara, opra balamunce, obuka sirya daknamlume. Ara, anggunce anggun olan ninye nirya ati, obuka sirya daknamlume. Winipmunyopura, ninye arye wa tuku palibuka bataklamaka touk, sik yuk mutuku nang ati, oplopnamlulume. Tonda, diklanye duk labikirye, kala saklye ning ara, kumanya arye bobuka balamle touk, anggunce anggun mal olan nang nirya ati, obuka kum kipdeipnamlume.

¹⁶ Winipmanto ning ton nyapnusine. Ara, gandum duk ninye arye yupnukca ati ning yangabuka deibikirye ninye taruk dana-dana talibuka lulukikiba el kala biriring albalule. Anggunce anggun mal olan nang ati, winipra banamlume. Winipmanto ning ara, gandum duk teikikiba, bama saklibuk, weik kumanya mikip yalirye bobuka, talye-talye bobalirye, bataklamle touk, anggunce, anggun mal olan nang ati atonun upra banamlume. Winibuka winipmunyopura, nara anggun ni koproba Allah, na Yahweh atibuk kanye deibuka, si erenamnulume. Nara Allah, Pia Telebnye unirye anggun Israel ninye ati, kalikuka melisunune. Ati ara, anggunce, ‘Se, nun ni Allah ara, pia teleb, weik mambulnye ulule,’ nyabuka na si erenamnulume.

¹⁷ Tonda, yatanye do nirya, anggun talye bona utotoa talina kum ninye ap, mek kum upliba, mek pataplirye si bam bol sesal lepliba, imun kanye bobuka, ‘Mek dan do?’ tenen, pia elinamak bukni, kum eipnamake. Winibikirye, ikin kanye bobuka nati morobicopura, narye kekepnamsine. Nara Allah, Israel ninye anggun ni koproba unirye, anggunti pia kalikuka melisununa ati ara, narye anggunti melibuka lyepnamsine. Narye anggun Israel ninye ati pia kum bataknamne.

¹⁸ Na melipsinirye, mutuku deice, keil si lak uk upmalyak babye, amutuku dup arye mek panapdeipnirye mek arenamsine. Mek kutukeipniba mutuku dou tam nirya, mek oplirye banamle. Aning atonun, mutuku dongo tam, mek puak deipniba, mek weika arye welebuka banamle. Tonda, mek kum ati, ninye kum unyak sukum ara, mek deipniba, weik mekwen lakak upnamle. Aning atonun, mok kum celul mutuku, pia sesal lemlya mutuku noutamak ara, narye mek teleb kipdeipnamne. Winipniba sesal lemlya tukwak nirya mek banamle.

¹⁹ Mek kum ati, ninye kum unyak mutuku, pata mutuku noutamak nirya ara, narye urasin teleb yo aning-aning nirya koupnamne. Ara, kepyal yo ap, zaitun duk moulamle yo ap, murad yo ap, akasia yo ap, sanobar yo ap, kasoari tonda el si eru nyalamak yo ap, nirya, narye amutuku dok sukum nirya koupnamne. Urasin teleb yo kepyal yo ap, zin yo ap koupmanye sukumuk ayo nirya tabakuka koupnamne. Ayo-ayo ayala-ayala nirya ara, minop talak pia sesal lemuk tuku anyuk koupnamne.

²⁰ Winipnamna deiyok ara, urdem ati kume. Winipnyopura, ninye nirya eibikirye kel biknamake. Ara, ‘Allah el si Yahweh, el taruk mikip deice arye winibuke’ tenen, moubuka teneipnamake. Ninye nirya eibikirye moubuka tenenamake. Ara, Allah Yahweh, Pia Telebnye ulirye, Israel ninye ati kalikuka melilule. Sik nirya arye, ‘Allah elcuk aning nirya kwepdeibukba aulule’ tenen, moubuka kel biknamake.

Allah arye, Isa Mutuku Dongonye si erelamik ninye ati, nyabuk yupu

²¹ Allah el si Yahweh arye, Isa Mutuku Dongonye ati nyabuk. Israel ninye walwal arye isa si erenyak Isa ap, ninye urasin atonun ning memebikirye, delilamak ning nirya ara, na dam yanamlulume. Nara, Yakub birye deibukba dadeipdanin yangalamik ninye, sik ninye deiyoknye, sik Raja unune. Ati ara, anggun isa si eremunye nang bulubuka na dam yamumnyopura, anggun tenelamunye ning ara, lak nyapnamnulume. ‘Deiyok ara ani,’ nyabuka dipkoprob laka nyapnutumopura, kekepnusine.

²² Ura anggun Israel ninye anggun isa si erelulum ning nirya dobuka, na dam boyamunba, atalye ning arye ‘Laka nyapsiting do?’ tenen, kekepnamabe. Ara, aminyan doryanamle talak winipnamle ning ara, yata wiripnamle do? Tonda minop talak akunum pil dolamlumba, upnin yangalamuk ning nirya ara yanuka laka nyapsikiba, nun nirya moubuka teneipdebirye, ‘Deiyok ani,’ tenen, kel kipnamabe. Tonda, minop talak umauk ning, laka nyapsumunyeba kekebibirye, ‘E, aning ulamuka ati, aminyan ara el nong winibuka upnamlarya’ tenen, kel kiptibye. Aminyan talak winipnamle ning babye, laka nyapsutumopura, kekebuka kel kiptibye.

²³ Anggun isa si eren ati memepdeiplum ning arye, yupu nyaptingopura, aminyan doryanamle talak winipnamle ning laka nyapsitingopura, anyaptinga deice arye, ‘E, diba aning ara, Allah el mikip ap, kam una ap atonun ulule,’ teneptibye. Bukni, aning kum nyapsitingopura, ‘Ara talye ning uka,’ tenenamabe. Tonda, aning deipsumunba, sikce mambul pil teleb ning do, malye ning do, dipkoprob doptingba, nun asing arye eiptibirye, ilil weik upsutopura, ‘E, sik si erenyak ning ara, dipkoprob mambul ning ulule,’ teneptibye.

²⁴ Aning ara, ‘Laka nyapsululume,’ nyapmasin bukni, nun kele, isa si erena ati, ninye taruk arye memebuka delinyak ning ara, kam kum ulule. Aning nirya ara, talye ning uka. Sik pil tonok ning babye kum pil dopmanto unyaka ati ara, talye diamuk ulule. Ati ara, yatanye do nirya, ninye taruk arye memebuka deibikiba, isa si erena ati, aning talibuka si erenyak ninye nirya ara, na Allah arye, ‘Aninye ara pia na like. Sik wininyak ning ara, pia malye weik ulule. Na dam kum winiptinge,’ tenebuka nyasunune. Isa si erenyak ning ayala-ayala nirya ara, talye ning uka.

²⁵ Anggun Israel ninye ara, malye weik winimunya ati, narye anggun wenena ati, anggun ululum mutuku arye dipdongobuka outam mutuku ululnye, yu weiknye ati yukupniba, yanamlarya. Nyapnyopura, elda keting panalyangan tam arye yanamlarya. Anye birye, ‘Winipnamlulume,’ nyapnamle yupu noutamak ara, na si ton nyapnamle. Anye bira, yuk yala ninye nirya obuka malye kipnamlanye ulula anya arye, winipmanto ara, kel nang arye kira tuku yanibikirye bental upliba dobuka sik tenebice ning memenyak touk, ayu deiyoknye birye, yuk mutuku deiyok nang ap, Raja nang ap ati, yanibuka darapsiliba, sirya daknamsile. El tenelye touk talye lukparabuka winipnamlarya.

²⁶ Narye yukupsiba, yanamle yu weiknye bira, ‘Aminyan talak olyanamsile,’ nyabuka laka nyapdeiamsuknye, yatanye birye minop talak arye ayupu laka nyapdeiamsuk do? Aning nirya ara, min kum ulamuk talak arye, laka nyalamsukba, aning nirya akunum upsilyopura, ‘E, aning winipnamsila ati, laka nyapdeiamsuknye bira, dipkoprob yupu nyapdeiamsuke,’ nyapnamtumnye bira, yatanye do? Dipkoprop nyapsine, anggun isa si erena ati, memebuka delilulum ning, tonok ning babye, ‘Yu weiknye olyanamsile,’ nyabuka kum laka nyalamik. Isa si eren ati ninye taruk arye memelulum ning aning-aning nirya ara, yupu kum nyapmanto ning anya arye, yupu tonok ning babye, kum laka nyalamik. Talye yupu kum asa unyake. Anggun isa si erena ati, delimunye kan-kan noutamak arye, tonok ning babye, yupu nyalilamtumba, kekebuka kel bikamtum do? Kume aning ara, kum winipmanto atia.

²⁷ Kume, nara anggun ni koproba Allah arye, anggun Yerusalem aululum ninye ati laka nyalamsise. Na Allah arye min yuma anggun Sion mutuku ululum ninye ati lak teleb yupu nyalilamsise. Narye, ‘Anggun elilulume, ayanamak ninye ara, akunum dam yanmak atia,’ nyabuka laka nyamsise. Tonda, naryuk, anggun Yerusalem ululum ninye ati, ‘Lak teleb yupu nyapnamle’ tenen, laka teleb yupu nyalbana ati, anye bira naryuk ninye ton wipdeipsirye, anggun dam dopdeipsise.

²⁸ Na Allah arye anggun Israel ninye kan-kan noutamak, “Aminyan upnamle nong ara, ani,” nyabuka, ‘Lak lena yupu nyapmantonye aulul do, kum do?’ tenen, dilamseba, anggun isa si erelamlum ninye kan-kan, tonoknye babye, lak lena yupu nyapmantonye ton kum ulule. Tonda, narye, ‘Teleb una ara aning do, aning do?’ tenen, laka nyapnululume. ‘Aning deiyok ara, ani laka nyapnululume,’ nyabuka, anggun Israel ninye ati asipdesine talak ara, ninye tonok ning babye kum nyanululume. Anggunce kum laka nyapmanto ninye umunya atia.

²⁹ Deiyok ara ani. Anggun Israel ninye ara, Isa Mutuku Dongonye si erelulum ninye nirya ara, tilila yupu nyana ninye uk ululume. Anggunce dolulum pil nirya ara, dipkoprob nong ton kum ulule. Anggun taruk koproba arye memelulumce, isa si erena ati delilulum ning aning-aning nirya ara, talye ning uka. Winipmanto ara, kumanya arye doplibuk talye-talye urdemuk balamle touk, isa si erelulum ning babye aning atonun ulule. Tonda, ninye arye, ‘Yata wiripnuyap do?’ tenen, kanye walwal upliba, kanye teniltona uk ulamak touk, isa si erelulum ning babye aning atonun ulule. Aning nirya ara, talya, kum winipmanto ulibuk wininyake. Allah arye, sik Israel ninye ati wenebukabukce, nyabuk.