Yesaya 40 - Eipomek

Allah arye, el ‘Naʼ tenen, ninye, Israel ninye ati, kanye deipdakirye, tenebuka una ati, nyabuk yupu

¹ Nara anggun ni koproba Allah arye nyasunune. Narye ‘Naʼ tenen, ati wiamse ninye ati ara, imun kanye bobuka unyak bukni, ‘Sik nirya ara kanye deibuka, telebuk unamak’ tenen, anggun kanye talima kwadina ati, teleb yupu nyalbinamlyame.

² Yerusalem mutuku unyak ninye nirya ati, teleb yupu lamapdongobuka arye nyapnamlulume. Anggun malye-malye weik ulamlum ning ara, anggun wenena ati, ikin ning anggun nong deice delilamsisiba, wini talak ara, akunuma. Anggun malye winilamlum ning dekna ati, akunum arelamsise ning ara akunuma. Nara Allah, na si Yahweh arye, anggun malye winilamlum ning wenena ati, ikin ning weika arye anggun deice delilamsise. Tonok malye ning ati ara, wenena ning like bitinye deice arye arelamsise. Bukni aning nirya ara akunuma. Winipmanto ara, ninye arye malye winibikiba, wenena aik pum tam dongobikiba, daulamikca ani, wenen talak akunum kiplyopura, loltaklamak touk, anggunti lyepsinirye, ila tuba tonap, tamubuka teleb kipdeipnamsine.

³ Ninye ton weik yupu arye nyanamle. Ninye kumak, pata mutuku noutamak arye, Allah el si Yahweh arye yanamle bisik ara, teleb ubuka yalinamlume. Nun ni Allah yanamla ati, kwalin bisik nirya ara, diksukum kibuka yalinamlulume. El yanamle bisik ara malye uamlyak nirya, diksukum teleb kibuka yalinamlulume.

⁴ Dan mutuku do nirya, mutuku dana-dana lyu uamlyak noutamak ara, tuku dalubuka asukum deipmunce, erebuka teleb kibuka yalinamlulume. Mutuku kon bukamlyak nirya dalubuka lu kilinamlulume. Luknubuka erebuka kilalye bisik nirya ara, teleb kibuka lu kilinamlulume. Erebuka bukamlye tuku ap ara pubuka yamupmunce teleb kilinamlulume. Ara, ‘Nun ni Allah yanamle bisik ara, pia teleb upnamle’ tenen kintinilinamlulume.

⁵ Aning nirya akunum winipmunyopura, Allah el pia teleb ulya ap, el dirina weik ulye ning ap ara, lakak uplyopura, ninye tukwak nang nirya arye elinamake. Allah el dirina weik lakak kibuka yanamle talak ara, ninye mutuku-mutuku nirya arye, neika eipnamake. Aning ara ‘Winipnamle do, kum do?’ tenena kume. Allah el si Yahweh, elcuk, ‘Winipnamle,’ nyabuka, ayupu akunum nyapdeipmasila ati, ‘Aning nirya ara, dipkoprob winipnamle,’ tenenamlulume.

⁶ Ninye yupu atonun deice arye nyapnuke. “Allah arye nyanamsil yupu ara, lakak arye laka nyanamlulume,” nyabukba, narye, ‘Ati, yata yupu nyanamne do?’ nyabuka asipdese. Asipdesiba, elce nyapnuke. “Tukwak unyak ninye nirya ara, talye palamle mutmuta atonun ululume. Tonda keta on ning keta opmaliba, like bitinyeto, winilyeto ara, urasin teleb upmalya ani, adiparyuk sesal lebuka koluplirye, akapsakliba, kum ulul touk, tukwak ninye nirya babye aning atonun unyake.

⁷ Winipmanto ara, talye palamle mutmuta ap, maning ap, talye palamle ket-keta ning ayala-ayala nirya ap ara, kita popmalya ani, Allah Yahweh arye keting arepliba, keting deiplirye tin upliba, kolubuka saklamle atonun, tukwak ninye babye kam ulamica ani, minopce dibikirye, kum unyake.

⁸ Talye palamle mutmuta ara, keting buppu arye sesal lelule. Tonda, talye palamle keit ning nirya ara, koluplirye sesal lebuka akalsaklamle. Aning ara, talye ninguk ati, winilul bukni, nun ni koproba Allah arye nyasilye yupu ara, asum-asum ati aunamle. Allah el yupu ara, min kum winipmanto ning atia.” Ninye yupu atonun deice arye nyapnuke.

‘Pia teleb ning upnamla ati, ayupu ara, mutuku kon deice arye nyanamlulume,’ nyabuk yupu

⁹ Ura, anggun Yerusalem mutuku umunye ninye ara, weik arye erebuka bukuk mutuku kon deice welebuka binululume. Anggun Sion mutuku umunye ninye ara, pia teleb yupu nyanamlulume. Winipmunyopura, teleb yupu dopropmunce, sik Yerusalem mutuku unyak ninye nirya ati, weik yupu deice mikip arye nyanamlulume. Yerusalem mutuku umunye nang ara, pia teleb yupu nyabuka, weik arye nyanamlulume. Ayupu nirya ara, Yehuda yala ninye kekenak uk laka nyanamlulume. Ayupu nyanamlum talak ara, ‘Ayupu ara nyapnuyap do, kum do?’ tenen, ilil una kume. Sik Yehuda yala ninye unyak mutuku nirya ati, ‘Anggun ni koproba Allah akunum yanmale,’ nyabuka nyanamlulume.

¹⁰ Anggun nirya ara adilulume! Aning-aning deice tam ulirye, Weik Erena Deiyoknye Allah ara, elce, ‘Winipnamne,’ tenelye touk winilule anya arye, el mikip weik deice arye yanmale. El taruk koproba mikip deice arye, im sirya, mutuku sirya nirya unyak ninye ati, malye kibuka talinamle. El taruk mikip deice arye malye kibukce, talinamle ning ap, ninye ap ara, boyanmale. Tonda, el mining mapu, sik dengna ati arenamle ning babye, talibuka boyanmale. Aning-aning nirya menekuka yanganmal buk, el Allah ara aminyan yanganmale.

¹¹ Tonda ninye tonok basam weina deiyoknye birye, el domba basam nirya bulubuka tonokak delilamle touk, Allah el mapu sirika nirya ara bulubuka telebak deipnamsile. Tonda, domba weina deiyoknye birye, domba basam mapu bico tenen, iribuka bobalamle touk, Allah arye el mapu koproba dobuka iribuka bobinamsile. Tonda domba basam mapu nirya sik nin birye, ‘Na mapu na dam nimalyap asa yanamal’ tenen, ‘Yalulume,’ nyapnin balibuk, sik nin yupu kekebuka balamak touk, Allah arye el mapu koproba ati atonun wininamle.

“Allah elda aning-aning nirya deice tam ulirye, weik kel weiknye koproba ulule,” nyabuk yupu

¹² Anggun teneipdelulume. Yatanye birye laut mekwen nirya, el taruk deice yating pulula kibuka biksiting do? Tonda, yatanye birye, tonok taruk aniryuk im deice deibuka, ‘El pala ara ani’ tenen, dekturye, nyapsutu do? Atonun yatanye birye tukwak im sirya, mutuku sirya nirya, tuku ap, tuku butbuta ap dobuka, mitik kiklilen makau pum tam dongoptu do? Yatanye birye mutuku-mutuku bukuk ning nirya ap, mutuku kon ap, dopropturye, ‘El ikin ara yata barye do?’ tenen, timbangan deice kiklibuka dektu do? Kume, Allah elcuk aning nirya winilule, yuk nang ton kume.

¹³ Tonda, yatanye birye Allah el si Yahweh, el Dib Kanye ati, ‘Winipnulyame, aning ara, kum winipnulyame,’ nyabuka petereptu do? Aning atonun, ‘Abisik bitume, apil donamlyame, teleb una ara ani,’ nyabuka, petereptu do? Allah el yupu laka len ati melinanye bira, yatanye do? Kume aning nirya ara kum winipmanto.

¹⁴ Yatanye birye, Allah Yahweh ati, ‘Mambul ning deiyok ning kel kipnul’ tenen, weik kel arye petereptu do? Aning atonun, yatanye birye, Allah ati, ‘E, ninye yupu lipsisikuka bokolina ati, teleb ning ara ani, ani. Winipnamlulume, winibuka yupu lipsisikuka bokeipnamlulume,’ nyabuka laka nyaptu do? Tonda, yatanye birye, Allah ati, weik kel kina deiyok ning nirya petereptupa, kel kiptu do? Yatanye birye, laka nyaptuba, Allah arye, moubuka tenepturye, pil teleb kibuka donamle do? Kume aning nirya ara kum winipmanto ninge.

¹⁵ Dipkoprop nyapsine. Tukwak im sirya, mutuku sirya nirya unyak ninye, ayala-ayala nirya, pia weik daunyak bukni, sik nirya ara, mek kwepmakibuk makau pum tam arye, bitik-bitik abuka saklamle atonun unyake. Atonun tonok mek durumna miklamle tuku deice poulbiliba palilamle touk ulule. Tonda tukwak mutuku unyak ninye ayala ninye, ayala ninye nirya buluptingce, weik timbangan deice deiptinga, ara, talye uku sice butbuta atonun uptinge. Sik ikin ara pia kume. Allah el mikip ap, mambul ap ulya ara, pia weik atia. Laut mekwen noutamak ululba, dana-dana tam nirya mekwen arye sekdongobuk mutuku pia kum nukmanto daulul bukni, Allah arye amutuku nirya tuku butbuta atonun bulubuka doptue.

¹⁶ Libanon mutuku noutamak ulul yo aning-aning nirya ara, pia weik aupmal bukni, ayo aning-aning nirya weptibirye, ‘Nun malye wininyap ning pununa ati, uku dapnamap’ tenen, kintinibuka areptipya babye, ayo sukdongoptibye. Aning atonun, Libanon mutuku noutamak ara, ninye arye weinyak domba ap, kambing ap, sapi ap ara, kum nukmanto, pia weike daunyak bukni, akam ulul ning nirya bulubuka optipya babye, aning babye suktalipsutue. Anyapmana ara, urdem ati kume. Israel ninye sik malye wininyak ning dekna ati, kum punupmanto. Yo nirya ap, kam ulul ning nirya ap kintinibuka, ‘Allah arye nun malye winin ning namin kepsetue’ tenen, Allah ati areptipya babye, aning nirya deice arye, nun malye wininyap ning kum punuptue.

¹⁷ Tonda mutuku-mutuku nirya unyak ninye ara, pia kum nukmanto weik daunyak bukni, Allah el kanye ara, ‘Anang nirya ara, talye uka. Sikda weik mambul kume,’ tenelule. Allah arye pil dolye ning ara, weik mambul bukni, ninye arye pil donyaka ara, nong ton kum upnamla ati ara, sikda weik mambul kume.

¹⁸ Ati ara, sikda yatanye birye Allah el ulul touk uptuba, ‘El anye bira atonun ulule,’ nyaptum do? Tonda, ninye taruk arye puturubuka delilamak ning ara, urasin pia teleb ning babye, Allah asum-asum teleb ulul touk ulul do? Kume, aning ara, dipkoprob kum winipmanto. Allah el tonok anya arye, yata ning ton Allah el ulul touk uptu do? Kume.

¹⁹ Ninye taruk arye, puturubuka deibikirye isa si eren ati delilamak ning ara, yo puturuna kel nang arye, puturubuka deibikceba, yuk kel nang arye, dekna weik ning, kat ning el si emas dopdobikirye, uku dongobicopura, mitang kiplyopura, ayo urasin teleb ning deice arye, taplakuka delinyake. Tonda, dekna weik ning, el si perak ara, weik kel nang arye dopdobikirye, rantai tapu kintinibuka memebikirye, apatung el nong deice delinyake. Winibicopura, aning el si erenyake.

²⁰ Sik bona weik talin nang arye, dekna weik ning dobuka, sik isa si erena ning ati, dekna weik ning deice arye patung puturubuka delinyake. Bukni, yuk nang ara, talye bona utotoa talina kum ninye ara, emas ap, perak ap, kum dekmanto nang ton daunyake. Aning ara, minopce kum lyupmanto yo arye, kat yo dobuka, sik isa si erena ning ati, ayo arye puturubuka delinyake. Winibicopura, sikce aning dona weik kelnye ton ebikirye, eibicopura, ‘Anye birye patung, isa si eren ati, kintinipsilirye, lokuka kum sakmanto ning dopnamsil’ tenen, moronyake. Morobicopura, anye birye isa si eren ning dolbalule. Sik nirya ara bicoe. Si erenyak ning nirya ara talye ning atia.

²¹ Anggunda yata ati bita kel kum kilulum do? Anggunda yata ati kum kekeplum do? Aning-aning nirya deiyok kouna talak arye, yuk nang arye kum laka nyapmasikba, pia kum kekeplum do? Allah arye, tukwak mutuku ap, tukwak mutuku ulul ning ap, deiyok koubuka kintinip deiamuk talak arye, aning moubuka bita kel kum kiamlum do?

²² Na Allah ara, im deice weik bun ning deice bukamsirye, tukwak mutuku nirya bola urasin atonun kibuka kwepdeipsirye, elinune. Tukwak mutuku kwepdeipsirye, tukwak ninye ton kwepdeibuka deipseba, sikce deibikba, dadeipdanin yangalamik ninye nirya ara, pia mitike. Talye kwising atonun unyake. Ninye arye pala baju dobuka, mitik tonun lelilongolamak touk, nara Allah arye, im deice ap, im deice ulul ning nirya ap, kwepdeibuka tonok talak aniryuk deipse. Ninye arye, ‘Cang kain bol arye, doltakna tenda aik unamap’ tenen, pala kain dobuka delilamak touk, na Allah arye, im deice ulul ning nirya, kanam asa aniryuk kwepdeipse.

²³ Tonda tukwak mutuku nang arye, ‘Nun weik deiyok nang unamak’ tenen, wilinyak deiyok nang ap, Raja nang ap ara, ‘Sikda mikip weik nang, pia mambul nang,’ tenenyak bukni, na Allah arye, adeiyok nang nirya malye kipnirye, kum kibuka delinune. Tukwak mutuku ninye deiyok nang kibuka, weik mutuku talinyak nang nirya ara, na mikip aniryuk anang kum kilinune. Sikce, ‘Wininamabe,’ tenenyaka nirya ara, sirya daknirye, kum kilinune. Sik babye talye nang uka.

²⁴ Winipmanto ning ara, ninye arye winiryuk koupmace ning min pana kumce yating panabuka banmalebuk, keting deiplirye tin weik uplyopura, sesal leplirye, kolulamle touk unyake. Ara, ninye arye, aweik nang ati, ‘Nun deiyok nang unamsiak’ tenen, wipdeibikcopura, adiparyuk sik anang arye aning-aning ap, amutuku ap talibice talak aryuk, na Allah arye, ‘Akunuma,’ tenepnyopura, akunum uplyopura, narye sikti, kum kilinune. Kumanya dopliba, talye palamle maning akunum koluplirye, sesal selolamle touk, na Allah arye mambul weik nang babye, kum kilinune.

²⁵ Ati ara, anggunda, ‘E, anye bira, Allah atonun ulule,’ teneptum do? Yatanye bira, na mikip ap, weik mambul ap unun touk ulul do? Nara, pia teleb weik Erebuka eitamnye unye touk, yatanye ton, ‘Allah ulul touk anye ton winilule’ tenen, nyapnutum do? Kume na tonoka ati ara, talye tukwak nang nirya ara, na Allah unye touk kum unyake. Ara, winipmanto kum atia.

²⁶ Wini talak ara, anggunce im deice erebuka dipdemunce, moubuka tenepnululume. Moubuka tenepmunce kel biknamlulume! Yatanye birye keting ap, wala ap, kurya nirya ap kwepdeibukba, im deice ulul do? Im deice ulul ning nirya kwepdeibuknye, elcuk kurya ap, keting ap, wala ap, im deice ulul ning nirya ap ara, kwepdeibukce, sik tonok-tonok, si yuk-yuk arebukce, sik si yuk-yuk sisibuka yukulule. Kurya im deice ulul ning yupa nirya ara, kum nukmanto ulule. Bukni, Allah na si Yahweh ara, na mikip weik deice arye aning nirya talibuka ununa anya arye, tonok ning babye kume, kum datue. Aning nirya tuba awamlye touk, pia unamle.

²⁷ Ati ara, anggun Israel yala ninye ara, yata deiyok ati imun kanye upsiliba teniltolulum do? Anggun apu koproba Yakub birye deibukba, dadeipdanin, yangalamlum ninye ara, yata deiyok ati, anggun talima pum tam arye teniltona uk usilirye, ‘Se, nun yata wiripnamap do? Nun ikin usilye ning ara, nun ni koproba Allah arye kum disulul do?’ nyabuka, malye nyabuka engelulum do? Tonda, anggunce, ‘Se, nun imun usilye ning nirya ara Allah el si Yahweh arye bita kel kum bikisulul do? Nun patapsil ning ara, Allah kum eipsilirye bita kel kum bikisulul do?’ neika bukuka malye yupu nyanululum ning ara, yata deiyok ati do? moubuka kum tenelulumce, amalye yupu nyanululum do?

²⁸ Anggunda yata ati bita kel kum kilulum do? Anggunda yata ati kum kekeplum do? Anggunda yata ati walwal asa ululum do? Nara Allah, na si Yahweh unune. Nara Kam Pia unune. Minop talak arye dipdongobuka, doryanamle talak ara, pia aunamne. Mutuku sirya ap, im sirya ap, anoutamak mutuku nirya kwepdeipsa deiyoknye bira, na uka. Nara Allah ara mikip kum upniliba dikdik sena ton kumnye unune. Weik mambul pil donun bukni, ikin kum upnutuba, dikdik kum senune. Tonda, narye weik mambul ning nong noutam ning nirya akunum kel kiamse ning nirya ara, talye tukwak ninye nirya arye, pia dipkoprob kum teneptinge. Tonda na kel kipse ning sik ton bita kel kum biktinge.

²⁹ Tonda, na Allah arye mikip kum ninye nirya ati mikip kilinune. Nara mikip kum ati ‘Se, yata wiriptinye do?’ tenen, pil batakmanto ninye ati, narye sik mikip tabakuka arenune.

³⁰ Anggun kele. Mikip weik wel nang nirya babye, ikin pil weik dolamiceba, sik mikip kum uplyopura, ‘Se, tuba kum pil doptibye’ tenen, batakuka dikdik senyake. Tonda pera mutuku banyak talak noutamak ara, welena ap, kolukna ap bisik noutamak ara, sik mikip kum uplyopura, sik keil arye yan dum dukliba pounyake.

³¹ Bukni, yatanye do, yata kil do, ninye nirya sik ni koproba Allah Yahweh atibuk, ‘Allah aniryuk melinamsil’ tenen, el uk talibuka unyak ninye ara, diba tenebicopura, narye arepneba, sikda winiryuk mikip dopropnamake. Winiryuk mikip doprobice ninye ara bip maka pol mikip deice arye lakuka erebuka balamle touk, kanam asa aniryuk unamake. Sikda mikip kum daliba, bikbik abuka banamake. Sikce bisik banyak talak ara, sik mikip kum upliba, kisok kum birbir apnamle. Mikip aryuk, talye lukparabuka banamake. Ati ilil una meme. Na Allah Yahweh ati, diba tenenamnulume. Allah arye Israel ninye nirya ati nyabuk.