Yesaya 39 - Eipomek

Babel Mutuku arye dopdeiamikba, daulamika ani, Yerusalem mutuku tamubuka yayik nang ati, nyabuk yupu

¹ Allah arye Raja Hizkia biti kwetebukba, daulamuka ani, aminyan talak ara, Babel mutuku talibuka ulamuka deiyoknye, el si Baladan, elce deiamuknye, Merodak, elce ninye deiyok talibuka Rajanye ulamuk. El Merodak birye, ninye wibuka dopdeibukba, sikce Raja Hizkia dam biyik. Deiyok ara, yuk nang arye, “Raja Hizkia el kanye imun uk dilamuk ning ara, akunum lopmale,” nyabuka, lak nyabikba kekebuk. Ayupu nyabikba kekebukopura, teleb aren ning dekna ap, surat ap sekuka kintinibuka dopdeibukba, anang arye Raja Hizkia dam bobiyik.

² Babel mutuku Raja arye, ninye bokeipmok nang ara, Raja Hizkia dam biyikba, Raja Hizkia birye, “Teleb yalume,” nyabuka, kanye teleb deice arye yukubuk. Yukubukopura, Hizkia birye, el bona ‘Naʼ tenen ning deiamuk aik kapdeibukba eibik. Ara, elce ‘Naʼ tenen, deiamuk dekna weik ning ap, el pia teleb ning ap nirya ara, anang ati lak kipdeibukba eibik. Ara, Hizkia birye ‘Naʼ tenen, deiamuk dekna weik ning emas ap, perak ap, din ning toh nyana deiyok ning, el si rempah-rempah ap, pia teleb minyak zaitun ap, tonda yin nang arye, ninye olbana ati dolamak ning ap, aning nirya deiamuk aik pum tam weikikce, sik anang ati, ‘Aning dipdelulume,’ nyabuka peterebukba eibik. Raja Hizkia, el aik dam uamuk ning ap, el taleamuk ning yala-yala nirya ap ara, ton batakana kum, anirya lak dem peterebukba, sik anang arye, aning-aning nirya eibik.

³ Aning nirya peterebukopura, aminyan talak nabi Yesaya birye, Raja Hizkia dam biyukce asipdeyuk. “Sik anang ara, dan mutuku arye yanmak do? Tonda, sikce yata yupu nyapmakiyak do?” nyabuka asipdeyuk. Asipbukba, Hizkia birye, “Kume, sik anang ara, pera mutuku Babel mutuku nang yanamake,” nyabuk.

⁴ Nyabukba, Yesaya birye tamubuka Rajanye biti, “Na nio, an aik pum deiplum ning ton eipmangu do? Yata ning nirya peterepmalumba eipmek do?” nyabuka asipdeyuk. Asibukba, Raja Hizkia birye, tamubuka Yesaya biti, “Sikda, na aik pum tam ap, na pia teleb ning dobuka, ‘Naʼ tenen, ning deiamse aik pum tam ap, anyasik noutam ulul ning yala-yala nirya ara, akunum peterepmanba, ebuka kel bikik. Tonok babye, kum duknupse, aning nirya akunum ebuka kel bikik. Narye ‘Naʼ tenen, deilin aik pum tam deiamse ning nirya ara, peterepmanba, sik anang eibuka, kel bikmakce binmake,” nyabuk.

⁵ Nyabukba, nabi Yesaya birye tamubuka, Raja Hizkia biti, “Se, ati ara, Allah Yahweh im deice unyak yin talin malaikat nirya talilula deiyoknye, Pia Mikip Weik Ululnye birye, nyapsil yupu moubuka kekepnamlume. Elce, an Hizkia biti nyapkile. Ara ani.

⁶ Aminyan yanamle talak ara, an ap, an apu yapu nang, anggun nirya ap arye, minop talak arye bulubuka delilyangalamikba, an ap, an ‘Naʼ tenen deilin aik pum tam talibuka deiplum ning nirya ara, aminyan talak ton lo arepnyopura, sik Babel mutuku nang yakirye, opsikirye aning nirya ubula doprobikirye, sik pera mutuku bobinamakca. Aning-aning nirya bobinamaka anya arye, tonok ning babye, ton kum bataknamake. Na Allah Yahweh arye akunum nyapkina ati, aning nirya dipkoprob nong upnamle,” nyapkile.

⁷ Nyabukopura, aning ton dukdongobuka nyabuk. “Ance deiplum mapu noutam arye, yata wiribuka mapu ton, ance deiplumba, dadeipdanin banamak mapu noutam arye, Babel mutuku nang arye, ton nang boyanuka, sik pera mutuku, Babel mutuku bobikirye, amu tamuk deibikirye, ikin pil arebikiba, Babel mutuku talibuka deiyoknye Raja, el aik noutamuk pil donamakca. Allah arye nyapdeipkile,” Yesaya birye nyabuk.

⁸ Nabi Yesaya birye Hizkia biti, yupu nyabukba, Raja Hizkia kekebukce, tamubuka Yesaya biti nyabuk. “Allah Yahweh elce nyapdeipmakil yupu, yanuka nyapnilam ning ara, telebe uka tenepne,” nyabuk. Bukni, Hizkia birye, el kanye talima noutamuk ayupu tenebukce, nyabuka deiyok ara, ‘Kume, na kam tuba unamne talak, amutuku ap, na talipse nang ap, aning nirya talipnamne talak noutam nirya ara, nun nirya kanye deibuka, telebuk neika unamabe. Tonda, nun mal olan nang babye, kum olyanamsiyake. Teleb kanye deibuka, telebuk unamabe,’ tenebukce nyabuk.