Yesaya 36 - Eipomek

Asyur mutuku nang arye, Yerusalem mutuku nang olyanamik ning ati, nyabuk yupu

¹ Raja Hizkia birye, Yehuda tam taleamuka ani, keting tamun empat belas tahun akunum ubukopura, Asyur mutuku ninye deiyoknye, el si Sanherib, aRaja bira, el yin talin nang dopdeibukba, Yehuda tam yayikce, Yehuda nang arye, keil poka antanapdongamikce, mikip weik domik weik asik nirya ara, obuka sirya dakikce, doprobik.

² Raja Sanherib birye, aning nirya akunum winibukopura, el amu tam pil dona weik deiyoknye tonok, weik pangkatnye Rabsake biti nyapdeibukba, anye birye, Asyur mutuku nang arye, obuka sirya dakik asik, el si Lakis mutuku arye dopdeibukba, elda Yerusalem mutuku yanuka, yupu nyabuk. Ara, el ap, el yin talen nang yupa weik tonun ton ap yayik. Yerusalem mutuku yayikce, Yudea tam taleamuknye, Raja Hizkia, ‘El talyanuk ning ara, adiparyuk tabakuka arepnamsilʼ tenen, ayupu nyalyayik. Yerusalem mutuku akunum yayikce, anyasik dam bukni, itam arye mek kwen dam palyamikce kot uamuk sukum, amutuku si ara, Baju Mek Liknak, nyalamik sukum yanuka unmekce, yupu nyapdeibik.

³ Asukum tikuka unmeka ani, ninye si Hilkia birye deiamuknye, el si Eliakim, elda Raja Hizkia ulamuk aik pil don nang, sik deiyoknye ulamuk. Tonye bira, Yudea tam ulamik ning si sekena deiyoknye, el si Penatia Sebna ap, tonda winilye nang yupu nyalamik talak kekebuka, si sekenanye el si Sekretaris Asaf ap, yanuka epdayik. Ara, ‘Yupu talipnuyapʼ tenen, sik Yudea tam awinilye nang arye, Raja Asyur amu tam pil donanye, weik pangkat taleamuknye, el dam yanuka epdayik.

⁴ Akunum yayikba, Raja Asyur amu tam pil donanye, Rabseka birye nyabuk. “Anggunce amutuku taleamuk deiyoknye, Raja Hizkia biti, el dam binuka nyapnamlulume. ‘Asyur mutuku talilul ninye deiyoknye birye nyapmasil yupu ara, ani. Hizkia anda, yata ning deiyok ati, ‘Na ap, na nyalin yupu nyapdapu nang ap, neika melibuka ubibyopura, mikip weik nang unamabe,’ tenemince, ulyam do?

⁵ Anda yata tenepmalam do? Ance, ‘Yuk mutuku nang ap, nun mutuku nang ap, nyalin yupu neika nyaptibya deice arye, tonok nang atonun kipdabirye, nun mal olan nang obuka, sirya daktibye,’ tenepmalam do? Talye yupu deice arye, ‘Winipnamabe,’ nyabuka, mikip kipdatumce, atalak arye, nun ap mal oldana deiyok kouptum do? Anda, yatanye birye, ‘Melipnamnile?’ teneptumce, na Asyur mutuku nang, na yupu ati malye kipnutumce, yanipnutum do?

⁶ Anda moubuka tenipdelyame! ‘Mesir mutuku yin talen nang arye melipnamniyakca,’ teneplumce ulyam do? Bukni, ance ateneminye ning ara, kum winipmanto. Winipmanto ara, nyapkine. ‘Kama bopnamapʼ tenen, kamuma yo winibuka bolamaka atonun upnamlame. Akama ara, subuka saklirye, an mining tarukuk luknamkile. Dipkoprop ning ara, Mesir nang talilulnye bira, aning atonun ulule. Ara, yuk mutuku nang aryuk, ‘El anye birye yanuka melipnamsile,’ tenenyak bukni, ninye deiyoknye Firaun bira, yuk mutuku nang babye melibuka kum lyeptue. Anti melipmanto kum uplyopura, aminyan ara, yata wiripnamlam do? nyabuk.

⁷ Raja Asyur el amu tam pil dona deiyoknye birye, ayupu nyabukopura, ayupu ton dukdongobuka nyabuk. “Akumopura, anggunce, winipmanto yuk yupu ton nyapnutume. Ara, ‘Kume, nun Yehuda tam nang ara, nun ni koproba Allah Yahweh, el siuk erenyap Allah ara, elcuk melibuka lyepdopnamsila anya arye, ‘Elce yata wiripnamsil do?’ tenen, elti, dinauk unyabe,’ nyapnutume. Nyabuka nyapnutumopura, narye tamubuka anggunti, nyapsine. Kume, anggun Raja Hizkia birye, Yerusalem mutuku weik asik unyak nang ap, Yehuda noutam unyak nang ap arye, Allah arena ati, kam ning opnarye, mutuku kon deice binuka, uku dongolbalamikak nirya ati ara, uluplobukce nyabuk. ‘Kume, anggun nirya ara, yuk-yuk mutuku kon deice arye, Allah ati kam ning obuka kum arenamlume. Allah el si erena ati telebak ara, Yerusalem mutuku noutam domupu weik aik, Bait Allah, asukumuk yanuka, arelyanganamlume. Allah el si eren aik damuk yanuka, el si erenamlume,’ nyabuk. Raja Hizikia bira, amutuku nang arye, Allah el si erena ati, kam ning opnarye, uku dongolbalamikak ap, tonda, mutuku kon deice Allah el si erena ati, kintinibuka deiamikak ap ara, elce amutuku nirya kum kipdeibuka ati, nyapsine.

⁸ Ati ara, wini talak ara, Raja Asyur, el si deice arye nyapsine, “Anggunce aning winiptum do, kum do? Narye, kuda basam yupa weik, dua ribu ekor dobuka, anggun Yudea tam yin nang ati arepsitinyopura, anggun birye, akuda basam balye deice bukuka, ninye olbana ati, yin talen nang kintinip deiptum do, kum do? Na kanye ara, anggun atam ululum nang arye, yin nang yupa weik, aning atonun kum kintinip deiptume.

⁹ Anggunce yin talen nang yupa weik kum kintinip deiptuma ati ara, yata wiribuka arye, Raja Asyur el yin talen nang, sik deiyoknye tonoknye babye, obuka sirya daktum do? Aning kum winiptume. Tonda, nun Asyur mutuku talilul Raja, el amu tam pia mitikto nang babye, kum obuka sirya daktume. Aning lak usilya deiyok ara, ani. Sikda, ‘Se, Mesir mutuku nang arye, yin talen nang ap, kuda basam arye libuka bobanyak kereta perang ap, kuda basam ap, kuda basam balye deice bukikirye, ninye olbalamak yin nang ap, kaliksitingopura, adeice aryuk nun ap, sik ap, tonok kipdobibirye, Asyur mutuku yin nang olbitibye. Sik Mesir mutuku nang arye melipnamsiyakca,’ tenemunce, ululuma ati, nyapsine. Kume, angguncuk anggun tam nang ati, kum meliptume.

¹⁰ Aninguk kum bukni, anyapnusin yupu ton moubuka kekepnamlume. Uteneplulume. Nunda, sik mutuku olyanganamaba ara, Allah Yahweh arye kum melisulum do? Anggunce, ‘Kume, Allah arye, sik Asyur mutuku nang ati, lo arebukce, sikti, meliamuka deice arye, nun mutuku yanuka osinyake,’ kum tenepmalum do? Kume, dipkoprob ara, Allah Yahweh elcuk, ‘Yudea mutuku tam bimunce, anang nirya ati, sirya dakmunce, sik ap, sik mutuku ulye ning nirya ap ara, kum kipdeipnamlume,’ nyapdeipsukba, ayanmaba atia! Ayupu nirya ara, Asyur mutuku taleamuk deiyoknye, el amu tam pil dona deiyoknye Rabseka birye nyabuk.

¹¹ Nyabukopura, sik Yudea tam deiyok nang, Elyakim ap, Sebna ap, tonda Yoah ap, sikce Raja Asyur mutuku deiyoknye, Raja el amu tam pil dona deiyoknye, Rabseka biti tamubuka nyabik. “Se, amio, ance Aram yupu deice aryuk yupu nyapnusilyame. Nunce Aram yupu nyapminba, nunce ayupu kel bikamupu anya arye, kekebibirye, kel biknuyabe. Bukni, nun mutuku noutam arye nyanyap yupu, ‘Yudea tam nyanyap yupu deice arye, kum nyapnusilyamʼ tenen, moropkiyabe. Deiyok ara, ance nunti Ibrani yupu deice arye nyapsiminyopura, ‘Nun kayapu nang ton kekepsikcakʼ tenen, nyapkiyabe. Ara, anyasik dobupu ning dana-dana tam nirya, antapdongobuka dobupu cang keil poka deice tikikirye, amutuku kalikinmak nang ton, ‘Ance nyaplam yupu kekebuka, kel biknamakʼ tenen ati nyapkiyabe,” nyabik.

¹² Nyabikba, Rabseka birye, tamubuka nyabuk. “Kume, Raja Asyur birye nyapdeibukba, narye nyalyanman yupu ara, anggun Raja ap, anggun winilye deiyok nang ap, anggun kekena ati buk, yanuka yupu nyapmasin do? Kume, aning kum bukni, amutuku nang nirya ap, acang keil poka deice tikuka kalikina deiyok nang ap, sik nirya ansinibuka kekena ati, yupu nyalyanmasine! Deiyok ara, anggun winilye nang ap, akeil poka deice tikmakce nang ap, anyasik noutam unyak nang nirya ap ara, neika ansinibuka ululum nang ara, aminyan talak ara, nunce obuka sirya daksipyopura, anggun dei diamuk dobuka dinamlume. Anggun lin diamuk kwebuka dinamlume. Asyur mutuku Raja amu tam pil dona deiyoknye, Rabseka birye nyabuk.

¹³ Nyabukce, ayupu ton dukdongobuka, Yudea tam nyalamik Ibrani yupu deice arye, ayupu ton weik yupu deice arye nyabuk. “Raja Asyur birye nyapdeipsuk yupu ara, anggun nirya moubuka kekeplulume!

¹⁴ Asyur mutuku Raja arye nyapsile! “Anggun Yudea tam ululum ninyeo, anggun Raja Hizkia birye, nyapmasil tilila yupu ara, kum kekepnamlume! El Hizkia birye, anggunti melibuka kum lyepsutue!

¹⁵ Anggun mutuku talilul deiyoknye, Raja Hizkia birye, nyapmasil yupu ati, diba kum tenepnamlume. Ara, elce, ‘Anang ara, na yupu kekebikirye, nun ni Allah Yahweh, elcuk melibuka lyepsutueʼ tenen, ‘Allah ati diba tenebikcopura, telebe uka,’ tenelule. Raja Hizkia birye, ‘Kume, Allah arye nun ap, nun mutuku ap dobuka, Asyur mutuku nang, sik taruk deice kum deipnamsile. Asyur mutuku yin talen nang arye, nun tam nang nirya ati, kum obuka sirya daknamsiyake,’ nyabuka nyapdeipnamsil bukni, elce nyapmasil yupu ara, diba kum tenepnamlume. Kume, Allah arye anggunti, kum melibuka lyepdopnmasile.

¹⁶ Na deiyoknye Raja Asyur birye, anggunti nyapsile. Anggun Raja Hizkia, elce nyapmasil yupu ara, anggunce kum kekenamlume. Anggun aululum mutuku arye batakuka, na tamuk yanamlume. Ara, ‘Na ap, anggun ap, oldana kumce, teleb kibuka neika unamapʼ tenen, nyalin yupu nyapdeipdayap ning ara, telebuk unamabe. Winipmunyopura, aminyan talak ara, anggun wa windam kouamunye, anggur dukuk purubuka, amek memebuka, anggun bidamnye dinamlume. Anggun bidamnye dokonamlum kwarang yo duk dakmunce, anggun bidamnye aryuk, aduk dinamlume. Tonda, anggun bidamnye lukamlum sumur mekuk kwebukapmunce, anggun bidamnye aryuk dinamlume.

¹⁷ Winilamunya ani, aminyan talak na tamubuka yanyopura, anggun nirya dobukapsinirye, amutuku arye batakuka, yuk pera mutuku noutamuk bobinamsine. Anggun bobinamsin mutuku ara, anggun mutuku koprop atonun mutuku bobinuka deipsiniba, daunamlume. Abinuka unamlum pera mutuku ara, anggur tapu arye, anggur duk weik moulule. Tonda, gandum duk ton weik moulula anya arye, roti kwaning ton dabuka dinamlume. Tonda, anggur duk purubuka anggur mek ton dinamlume.

¹⁸ Ati ara, anggunda Raja Hizkia birye, nyapmasil tilila yupu ati, kekena kume. Elce anggunti, ‘Allah Yahweh arye melibuka lyepnamsile,’ nyapmasil ning ara, talye tilila yupu uk nyapmasila anya arye, aning ara diba kum tenepnamlume. Anggun ton tenipdelulume! Narye, Asyur mutuku taleamse talak nirya ara, yata mutuku nang ton, kum obuka sirya dakamsirye, sik mutuku kum talinun do? Kume, yuk-yuk mutuku dana-dana tam nirya ara, obuka sirya dakamsirye, sik mutuku nirya alubuka dopromse ati, amutuku-amutuku nang nirya ara, lyepdanmanto kum ulamik. Amutuku-amutuku unyak nang arye, ‘Nun ni aniʼ tenen, si erelamik isa mer arye, anggun ton yanuka melibuka lyepdomsik do? Kume, tonok ning babye, melibuka kum lyepdobik. Amutuku nirya akunum malye kibuka talipse.

¹⁹ Aning atonun, Hamat mutuku ap, Arpad mutuku ap, unyak nang, sik si erenyak ning ara, dan sukum unyak do? Tonda, Separwaim mutuku unyak nang arye, isa si erenyak ning, sik mikip deice arye, Samaria mutuku unyak nang ati, yanuka lyepdobik do? Aisa babye, dan sukum unyak do?

²⁰ Anggun tenipdelulume! Dan mutuku sirya, im sirya nirya unyak nang arye, si erenyak ning, sik bidamnye mikip deice arye, na akunum obuka sirya dakamsirye, wini talak talibuka unun mutuku nang ati, yanuka lyebuka doprobik do? Kume, tonok ning babye, lyepdanmanto kum ulamik. Ati ara, narye, ‘Sik mutuku malye kipnirye, sik mutuku nirya alubuka dopropnamne,’ tenepnyopura, Allah Yahweh ara, el mikip deice arye, Yerusalem mutuku ululum nang ati, lyepsutu do? Kume, tenepne. Asyur mutuku ninye deiyok Raja, el amu tam pil dona deiyoknye birye, ayupu nirya nyabukce, sirya nyabuk.

²¹ Nyabukopura, sik Yerusalem mutuku ulamik deiyok nang arye, elce nyabuk yupu, sik akunum kekebik bukni, sikce ton tamubuka yupu kum nyabik. Deiyok ara, Raja Hizkia birye, “Elce nyapnamle yupu akunum nyapsiliba, kekepmunya babye, anggunce ton tamubuka, yupu pia kum nyapnamlume,” nyamuka ati, sikce yupu ton kum nyalamik.

²² Aning ati, ayupu nyabukopura, Hilka birye deiamuknye, Elyakim ap, amutuku sekretaris Sebna ap, tonda Asaf birye deiamuknye Yoah ap, elda yupu nyapne talak buku noutam arye seken deiyoknye ap, sik awinilye nang ara, Raja Asyur el melinanye birye nyananmok yupu nirya kekenmekce, ‘Se, yata ning deiyok ati, ayupu ara nyapmasil do?’ tenen, sik talima sukunmokba, sik ongopmek baju nirya ara kwilikinmek. Sik baju kwilikmek ninguk, ongopmek touk, Raja Hizkia dam tamubuka yanmek. Tamubuka yanmek nang ara, Raja Asyur el amu tam pil dona deiyoknye birye, nyananmok yupu nirya boyanuka, sik deiyoknye Raja Hizikia dam lak nyalyayik. Ara Rabseka birye, nyananmok yupu lak nyabikba, Raja Hizikia bira kekebuk.