Yesaya 34 - Eipomek

Mutuku sirya, im sirya nirya unyak nang arye, ‘Allah ara nun like,’ tenenyak nang nirya ati, Allah arye wenepnamle ati, nyabuk yupu

¹ Ninye mutuku sirya, im sirya nirya, asukum yamunce, yanuka bulupmunce, wekuka kekeplulume! Tukwak mutuku ululum nang nirya moubuka kekeplulume! Tukwak mutuku sirya, im sirya nirya, noutam unyak nang ap, atukwak mutuku noutam ulye ning nirya ap ara, yanuka wekmunce, kekeplulume.

² Ara, talye ati kum nyapsine. Deiyok ara, Allah Yahweh arye, mutuku sirya, im sirya nirya, unyak nang ap, anggun mapu silip nirya ap, anggun yin talin nang yupa weik unyaka ap, anggun nirya ati, Allah arye yu tenesulule. Allah elce sik anang nirya ara, oplirye kum kipdeipnamle. Ara, lo arepliba, yu mal olan nang arye yanuka, sik nirya obuka, sirya daknamake.

³ Obikcopura, sik nong nirya ara, kum weipnamak bukni, asukumuk batakikceba, dauamlya ani, lyuplirye tonguk welepnamle. Tonda, sik anang opmakce talak ara, sik ining nirya ara, weik mek obuka balamle touk, sik ining obuka bilirye, mutuku-mutuku nirya binmale.

⁴ Tonda, im noutam ulamle ning nirya, keting ap, wala ap, kurya ap nirya ara, Allah arye obuka, sirya dakliba, sung-sunga buklopnamle. Im ara, amsuna kitibuka koulamak touk ubuka, kitibuka koupdongopnamle. Keting ap, wala ap, kurya ap nirya ara, yo bok koulubuka, tukwak saklamle touk uplirye, kulubuka tukwak saknamake. Yo duk moulamle yo, sesal sepliba, el duk kouluplirye, tukwak saklamle touk, im noutam ulye ning nirya babye, tukwak saknamle.

⁵ Winipmanto ara, ninye arye mek weik tonun dibikiba, mitika nun ton kum dipmanto upliba bataklamaka touk, Allah babye, el ninye on ya ara, im noutam ap, im deice ap, wamlye ning akunum obuka, sirya daklyopura, aminyan talak Edom mutuku ton yanuka, amutuku unyak nang ton, obuka sirya daknamle. ‘Edom mutuku nang wenebuka opnirye, kum kipdeipnamneʼ tenen, Allah minop talak akunum kintinip deiamuk ning ara, atalak sik deice uk yaliba dopropnamke.

⁶ Allah el ninye on parang ya arye, ninye weik akunum oplyopura, aya deice ara, Edom mutuku nang, sik ining ap, meta apuk, weik palipnamle. Winipmanto ara, Allah arena ati, ninye arye kam ulamle ning, domba basam mi ap, kambing basam ap, uniryuk yim domba basam talima ap, obuka sekmakiba, aning arye ining ap, meta ap, sik ya deice palilamle touk, Allah el ya babye, atonun kibuka akunum winipnamle. Deiyok ara, Allah arye, sik Edom tam unyak nang obukce, sik mikip deiyok mutuku, Bosra mutuku nang babye, akunum obuka sirya dakuk. Dipkoprop, Edom tam mutuku unyak nang babye pia weik tonun akunum oplobuke.

⁷ Allah arye sik Edom mutuku nang obuka, sirya daknamle talak ara, domba basam ap, kambing basam ap, sapi basam ap, tonda talye bai ulamle sapi basam ap, tonda sapi basam mi ap, akunum uniryuk nebuk sapi basam ap, nirya neika opnamale. Edom mutuku tam ulamuk sesal semuk tuku nirya, atuku deice aining weik tonun ap, kalipdoba meta ap sakukba, ining atonun akunum upmale. Tonda kalipdoba meta uk, weik tonun langdipnamle.

⁸ Aning nirya ara, talye ati kum upnamle. Deiyok ara, ani. Atalak ara, Allah elce Sion mutuku unyak nang, sik tam kiplirye, anggun mal olan nang arye, ikin ning weik tonun, Sion nang deice deilinamaka nirya ati, sik dekna areplirye, sik anang ati, kwang daknamle.

⁹ Tonda, atalak ara, Allah arye Edom mutuku balamle mek nirya ara, tamubuka malye weik kipdeipliba, malye kat ning, dipmanto kum ning, el si ara, ter upnamle. Tonda, Edom mutuku tuku nirya ara, tong nyaplirye, malye upnamle. Winipliba, Edom mutuku noutam nirya ara, tuku kipdongobuka, uku sekikiba dilamle touk ubuka, Allah arye uku arepliba, uku arye sik tuku nirya dipnamle.

¹⁰ Aweik uku dinamle ning ara, pia kum bataknamle. Keting noutam babye, lukunyan babye, tuba dinauk unamle. Amutuku nirya, uku dilamlya ani, atulum ara, pia ati tuba panabuka weleplirye banamle. Amutuku tuku ara, malye weik upliba, batakikcopura, talye lo dem upnamle. Ninye kumak oldemuk upnamle. Winiplirye, dadeipdanin banamak nang nirya babye, amutuku noutam pia kum unamake. Tonda, atukwak ara, aminyan talak unamak nang babye, amutuku noutam bisik yanibuka kum banamake.

¹¹ Amutuku ara, pia oldemuk upnamla anya arye, ninye kum unamak bukni, talye ning dilamle maka, sik si Undan maka ap, Landak maka ap, amutuku noutam unamdake. Tonda Gagak maka ap, Kout maka apuk amutuku unamake. Atalak mutuku nirya ara, Allah el kiklina tapu arye, ‘Teleb ulul do, kum do?’ tenen, kiklipdelirye, ‘Amutuku nirya ara, talye-talye kiplirye, kum kipdeiplirye, pia malye kipdeipnamle. Winiplyopura, amutuku nirya ara, talye lo dem upnamle. Ninye ara, teleb kibuka kum upmantoak upnamle.

¹² Amutuku ara, pia oldemuk upnamla anya arye, ninye arye deiyok kibuka, Raja kibikirye, ton ap amutuku talibuka kum unamake. Ninye deiyok-deiyok nang ap, sik amu tam pil dona deiyok nang ap nirya ara, akunum kum kipdeipnamla anya arye, amutuku pia kum unamake. Ninye kumak, talye lo mutuku dem unamle.

¹³ ‘Nun mal olan nang yanuka opsikcakʼ tenen, cang weik keil arye domik asik nirya ara, takce-takce ning arye paplirye, anyasik nirya papnamle. Tonda, sikce keil arye kat asik dobuka ulamikak nirya babye, talye takce ning ap, yo mutmuta apuk, anyasik deice papnamle. Amutuku noutam ara, bai tam ulamle yu kam ap, sanip maka ap, bai basam apuk unamake.

¹⁴ Tonda, bai tam talye kam unyak ning, bai yu kam ap, bai balamle kambing ap, ton yuk yala-yala bai ning nirya ara, amutuku noutamuk ukirye, banamake. Lukunyan noutam ara, akunum diamikce nang, sik kanye ap, asukum yakirye, weik yupu nyakirye, sik dikdik sen sukum ati buk, unamake.

¹⁵ Amutuku noutam ara, ninye weilamak ayam maka olamle maka, el aik doplirye, duk deibuka, el mapu ati iriplirye, kaliknamle. Tonda, alap-alap nyalamak maka ap, kot maka ap ara, akunum diamlye ning dilanle maka ap, weik tonun bulubuka, asukumuk yanuka unamake.

¹⁶ Allah Yahweh, elce el yupu nyapdeibukba, sekdeibik buku noutamuk enamlume. Tonda, ayupu yininamlume. Asi nyapman kam ning nirya ara, kil ap, yim ap, bulubuka daunamake. Tonok kibuka unamak ning ara, ton kum ilil upnamle. Deiyok ara, Allah Yahweh arye, ‘Aning ara, wininamake,’ nyabuka akunum deibuka ati, el Pia Teleb, Lek Dip Kanye arye, aning nirya bulupdeipnamle babye, ton kum kum danamle.

¹⁷ Awinipnamle ning nirya ara, Allah elcuk ‘Amutuku ara, sik bura tam kam unyak ning, yuk-yuk bokdeipnyeura, Edom mutuku tam nirya doprobikirye, talibuka unamake. Ninye arye kum bukni, sik bura tam kam ulamle ninguk, amutuku noutamuk, pia tuba unamake. Atuku ara, sikcuk talibikirye, sik mapu deibikiba, dadeipdanin banak ning ara, amutuku dem pia unamake. Asukum ara, ninye kum unamake.