Yesaya 32 - Eipomek

‘Pia diksukum una ati, ninye deiyoknye yanuka unamle,’ nyabuk yupu

¹ Allah arye nyapdeibukba, nabi Yesaya birye sekeipsuk. Pia dipkoprob aminyan yanamle ninye deiyoknye bira, el malye winin ning tonok babye kum winilirye, elce nyanamsil yupu nirya ara, dipkoprob ninguk nyanamsile. Ninye deiyoknye ulirye, ninye mutuku-mutuku nirya talinamsila ara, diksukumuk wininamle. Tonda el amu tam ubikirye, ninye yupu lipsisikuka bokolina ati, nyanamak nang nirya babye, dipkoprob ninguk nyanamake. Ninye wininyak touk dipkoprob yupu uk lipsisikuka bokolinamake.

² Sik adeiyok nang arye, yuk ninye nirya ati, teleb kibuka melilana uk unamak anya arye, winipmanto ning ara nyapnusine. Ara, pia mikip weik kumanya yaliba, lelimboka tam tikilbalamak touk, wininamake. Tonda, mok cena kum yini mutuku noutamak arye mek pu dobuka batuba, ninye nirya arye kanye deipting touk, wininamake. Tonda, yini mutuku noutamak ara, yo pia kum anya arye, keting tin weik upliba, weik keil deiyok keting koa bulbalamak touk wininamake. Ara, sik diksukum unamak deiyok nang arye, yuk talye ninye nirya teleb kibuka melinamaka ati nyapsine.

³ Aning nirya winplyopura, asing auamlye ninye ara, aning nirya teleb arye elinamake. Asing kum kupnamle. Aning atonun, amul auamlye ninye ara, moubuka kekebikirye teleb arye kekenamake. Amul kum kunuknamle. Ara, na Allah arye nyanamne yupu ap, mambul pil donamne ning ap ara, moubuka kel biknamaka ati nyapne.

⁴ Atalak babye winipnamle. Ninye ton yupu tabnuce talak ara, kanye pum tam arye tenilena kumce yupu talye weleyaliba, talye nyaltakalamak nang babye, aning batakikirye, moubuka teneipdekirye, teleb yupu uk tanamake. Tonda, atalak ara, yupu teleb ubuka tana kumce, dakalburun yupu nyanyak nang ara, teleb kibuka diksukum yupu uk tanamake. Yupu nyanamak talak ara, ninye nirya arye teleb arye kekepmanto yupu uk nyanamake.

⁵ Aning-aning nirya teleb kipdeipnye talak ara, minop talak tenebuka malye winilamlum ning ara, kum danamle. Ara, kanye pum tam arye tenena kum yupu, talye weleyaliba, talye nyaltaklamak nang ati ara, anggunce, ‘Anang ara teleb uka,’ nyalalum ning ara, bataknamlulume. Tonda, pia malye-malye una ap, tilila yupu tana ap, unyak nang ati ara, anggunce, ‘Anang ara, erepdeipnamabe,’ nyalamlum bukni, aning ara ila tuba erelina kumce, bataknamlulume. Diksukum winin ninguk si erenamlulume.

⁶ Aning nirya bataknamluma ara, talye ati kume. Deiyok ara, nyapnusine. Ara, malye yupu uk nyalulnye bira, el talima pum tam ara malye ninguk ulul ati, kanye bona kumce talye yupu uk nyaltakalule. Aninguk kum bukni, tonda, yata ning do nirya, el winilul ning ap, nyalul ning ap nirya ara, Allah el si Yahweh ati, tilila yupu uk nyalulba, walwal nang kekebikirye, ‘Aning ara diba,’ tenenyake. Tonda, tenepce arye talye tilila yupu uk nyalula deice arye, din patanmaliba imun kanye bobuka unyak ninye ati din kum arelule. Aning atonun, mek patalibuk imun kanye bobuka unyak ninye ati, mek kum arelirye, mangkau kilolongana uk ulule. Anang nirya batakalongona uk ulule.

⁷ Tilila yupu nyanyak nang ara, sik wininyak ning ap, tenenyak ning ap nirya ara, malyeuk wininyake. Sikce ‘Winiptibye,’ tenenyak deice arye ninye ati malye winilikirye, bona utotoa talina kum ninye ati wilibuka bokolinyake. Sik talye bona utotoa talina kum ninye arye, ‘Nun ton melinamsulume,’ nyabuka morobibye ning teleb ning uptua babye, kum melinyake.

⁸ Sik malye-malyeuk wininyak nang ara, yuk nang ati yaniltana uk unyak bukni, teleb kanye uk bobuka unyakce tenenyak nang ara, sik wininyak ning ap, nyanyak yupu ap nirya ara, telebuk unyake. Allah arye nyabuk.

Yerusalem mutuku ulamik kilapu ati, nyabuk yupu

⁹ Allah arye ayupu nyapnukba na Yesaya birye nyapsine. Se kekepnululume. Anggun Yerusalem mutuku noutamak ululum kilapu ara, talye kanye bobuka ululum bukni, wini talak ara, na nyapnusin yupu moubuka kekepnululume. Anggun kilapu arye, ‘Kume amutuku noutamak unyap kilapu ara, malye nang arye yanuka kum wekmanto ak unyaba ati ara, yuk mutuku nang arye, amutuku yanuka kum olyasitinge,’ tenelulum bukni, na nyapnusin yupu ara, moubuka kekepnululume.

¹⁰ Wini talak ara teleb kanye bobuka ululum bukni, tonok keting tamun ton akunum kiplyopura, ilil upsilirye sirim talipnamsile. Ara, ‘Nunda, teleb mutuku uk unyaba ati, kum opsitinge,’ tenelulum kilapu ati nyapsine. Ilil weik upnamsila deiyok ara, anggur tapu duk moulamle ning nirya kum danamle. Ninye arye wa wibuka koulamak ning yo duk aning-aning nirya babye, duk kum mouplirye, kum danamle.

¹¹ Se, Anggun Yerusalem mutuku noutamak talye kanye bobuka ululum kilapu ap, tonda, anggunce, ‘Kume amutuku noutamak unyap kilapu ara, malye nang arye yanuka, kum wekmanto ak unyaba anya arye, yuk mutuku nang arye, amutuku yanuka kum olyasitinge,’ tenelulum kilapu ap, imun kanye winin ning akunum upsilyopura, ilil upsilirye sirim talipnamsile. Akilapuo, yuk talak ara weik ikin ning yanamsila ati ara, anggun urasin teleb baju kwiriplopmunce, malye ati bataklamaka baju dobuka, anggun deiyating delilamakak koupdongopnamlulume. Ara, talye ati kume. Winibuka koupdongopmumce, pia engenamluma ati nyapsine.

¹² Winibuka ulamunce engebuka dola kwebuka ulamunya ani, anggun kouamunye anggur tapu nirya, teleb kibuka duk kum moupnamle. Tonda anggun wa wibuka kouamunye ning nirya nong pia kum upnamle. Winipnamsila ati ara, anggunce anggun mining nong taram uk olamunce, engenamlume.

¹³ Tonda, narye ‘Naʼ tenen, ninye ati, ‘Pia teleb mutuku arenamsine,’ nyapdeiamsisirye, arelamsise mutuku ara, aminyan talak ara, pia malye upliba, dana-dana tam nirya ara, kirikna tapu ap, tace ning aning-aning nirya betekuka papnamle. Tonda, ‘Anyaik noutamak arikal dona ap, malye-malye winin ning aning-aning nirya ap, anyaik pum uk unamap’ tenen, domik aik nirya ara, ulubuka atu kiplopnirye, kum kipdeipnamne. Winipnamna ati, anyaik ap, anyaik umunye ninye ap ara, engenamlume. Anyasik, Yerusalem mutuku noutamak anyaik weik unamla ati, imun kanye bonamlume.

¹⁴ Anggun ululum mutuku olyanamsiyak talak ara, ‘Yu nang arye kum weknamak’ tenen, weik keil poka wibuka keil aik dolalum ning ap, anggun bidamnye un aik nirya ap, yuk pera mutuku yu nang yakirye, ulubuka atu kiplopsikiba, kum danamle. ‘Nun deiyok mutuku’ tenen, weik keil aik dolamlum ning ap, ‘Malye nang arye nun mutuku duknubuka weksikcak’ tenen, dolalum cang aik ap nirya ara, ulubuka atu kiplopnamake. Winibikiba, anggun mutuku nirya ara, talye banang diamuk upnamle. Ninye ara amutuku noutamak tonok ton kum unamake. Batakikiba, dauamlya ani, amutuku kon nirya mutmuta uk paplibuk, pia ati basam wein tuku uk kipdeipnamake. Winibikiba, bai keledai basam ap, domba basam ap, dobuka deibikcopura, talye kanye bobuka mutmuta bok dinamake.

¹⁵ Anggun ulamlum mutuku ara, malyeuk dauamlya ani, Allah arye el Dib Kanye im deice weika arye arepnamsile. Arepsiliba, mek pia una kum mutuku nirya, tuku teleb kiplirye, wa tuku pia teleb upnamle. Teleb upliba, wa wibuka koubikiba, paplirye, duk moun ning ayala-ayala nirya pabuka duk mouplirye, pia weik upnamle anya arye, talye bai mutuku palamla atonun unamle.

¹⁶ Allah arye anggun mutuku ila tuba tamubuka teleb kipdeipsilyopura, minop talak mek pia kum mutuku kiamicak ara, ninye arye yupu diksukum kibuka lipsisikuka bokolinamake. Tonda, tuku teleb upliba, wa wibuka koubikiba, paplirye, duk moun ning aning-aning nirya papnamle mutuku ara, ninye nirya arye malye winin ning batakuka, diksukumuk unamake.

¹⁷ Diksukumuk unamake ati, ton tam ninye arye, yuk tam ninye ati, yu upliba kum olanamake. Teleb kanye bobuka neika uk unamake. Ninye nirya talima dukdongobuka diksukumuk unamake ati, amutuku nirya telebuk unamle. Tonda, amutuku noutamak unamak ninye nirya ara, kanye bokoltona kumce, talye kanye lamapdongobuka unamake.

¹⁸ Winibuka ubikirye, Allah el mapu nirya teleb kanye bobuka, dakeiyam asa unamake. Tonda teleb aik dobuka ubikirye, yuk mutuku ninye nirya arye, yanuka kum alupdopnamake. Talye dikdik selamak touk unamake.

¹⁹ Danoutam talak ara, dipkoprob Allah arye nyapliba, anggun wenena ati, kanye imun ning anggun deice yanuka unamsile. Allah arye mok purwu weik ning dopkwetepliba, weik yo palpal nirya saklirye, amutuku nirya yo kirye diplirye banang uk kiplopnamle. Tonda, yuk pera mutuku yin talin nang, yu nang arye, anggun umunye mutuku Yerusalem asik nirya ulubuka sice kiplopnamake. Winipnamak bukni, aminyan talak ara, Allah lyepsilirye, teleb kipdeipnamsile.

²⁰ Allah arye anggun ap, anggun mutuku ap ila tuba tamubuka teleb kibuka deiplyopura, pia telebuk unamlume. Ara, sik yala ning kounamak sukum nirya ara, mek aulyeba teleb kibuka papnamle. Tonda dan mutuku do nirya, anggun weinamlum ning nirya babye maning bok dibuka unamake. Tonda, anggun weinamlum ning aning-aning nirya ara, ‘Yukak biliba ubula opsicak’ tenen, poka kum dopnamlume. Talye mole kwapmunba, banamake. Allah arye nyapnukba, na Yesaya birye nyapsine.