Yesaya 30 - Eipomek

Yehuda yala ninye arye, Mesir mutuku ninye ap nyapdanamik ning ati, nyabuk yupu

¹ Allah Yahweh arye nyabuk. “Yehuda yala ninye arye mikip asa unyaka ati, sik bicoe, nyabuk. Anang ara, ‘Yata wiripnamap do?’ tenen, sik mining kanye aniryuk yupu talanyak ning ara, deiyok ton kum upnamle. Ara, narye, ‘Winipnamlulume,’ kum nyapdeipse buk, sik dem aryuk yupu talibika ati, nyapsine. Sikce tenenyak ning ara, ‘Teleb tenenyake,’ kum tenenune. Aning ara, sik dem aryuk, ‘Mesir mutuku nang arye melipsitinge,’ tenebikce, yupu talilbanyaka ara, na Dib Kanye arye, ‘Winiplulume,’ kum nyapdeibuk bukni, sikcuk yupu talilbiyike. Winibika deice arye, sik malye ning weik tonun, tabakuka winipre banyake. Min arye malye winilamik ning ara, akunum aubuk bukni, wini talak ara, tonap weik tonun tabakuka malye wininyake.”

² “Ara, anggunce nati, ‘Mesir mutuku ninye arye melipsiting, tenen, morolbitibye do?’ kum nyamnulum bukni, anggun dem aryuk morolbilume. Tonda, Mesir mutuku ninye deiyoknye Firaun birye, ‘Melibuka kalikinamsil’ tenen, el dam morolbilume. Anggunce, ‘Se, Asyur mutuku ninye arye olyanamsiyaka ati, yata wiriptibye do?’ teneplumce, ‘Mesir mutuku noutam duknulbipyeba, yu nang arye kum eipnamsiyak’ tenen, duknulbilume. Anggunda, ‘Allah arye melibuka lyepnamsil,’ tenepmatum bukni, na batakuka anggunce, Firaun dam nyalbiluma deice arye, anggun malye uplume.

³ Anggunda, ‘Mesir mutuku ninye deiyoknye Firaun birye melibuka kalikinamsil’ tenen, el dam morolbilum bukni, elce melipsutua babye, aminyan olyanamsiyak nang arye opsicopura, alye dakalanamlume. ‘Mesir mutuku noutam duknulbinamabe,’ teneplum ning ara, alye dakalanamlume. Aninye arye, melipsitinga babye, ikin upnamsila ati, alye dakalanamlume.” Allah arye sik Israel ninye ati nyabuk.

⁴ Nyabukce ayupu ton nyabuk. “Firaun el amutuku tam weik deiyok nang ara, Zoan mutuku ap, Hanes mutuku noutam ap, daunyak bukni, anang babye sikce melibuka kum lyepsitinge.

⁵ ‘Yuk mutuku ninye arye melipsiting’ tenen, morolbilum bukni, aninye arye, anggunti kum melipmanto nang unyaka anya arye, amoroplum ning ati, alye dakalanamlume. Mesir mutuku ninye babye, yuk mutuku tam ninye babye, ikin upnamsil ning ati, mitik tonun babye kum melipsitinga ati, alye dakalanamlume. Tonda, yuk mutuku ninye arye, anggun Yahudi yala nang ati, ‘Sikda walwal nanguk unyake,’ nyabuka, malya yupu nyalongonamsiyake.” Allah arye nyabuk.

‘Mesir mutuku ninye melipnamsiyak’ tenen, dekna weik ning, unta basam deice arye, libuka bobiyika ati, nyabuk yupu

⁶ Allah arye nyabuk. “Na Allah arye anggun Yehuda yala ninye arye, dekna weik ning unta basam deice arye, libuka bobilum ning ati nyapnusine. Anggun dekna weik ning libuka, unta basam deice deiplumce, mek pia kumak Negeb mutuku noutam bamunye talak ara, ikin ning ap, imun kanye bon ning ap, ayala-ayala nirya usulule. Ara, amutuku noutam ara, bai singa kus yim ning ap, kil ning ap, weik unyake. Tonda, ninye on kwatima, el si ara kobum kwatima ap, yuk yu weik kwatima ton ninye ona ati, bikbik abuka kaplibalamle kwatima ap unyake. Amalye ning weik aupmalebuk, ‘Mesir mutuku ninye dekelbinamap’ tenen, anggunce sik dekna weik ning nirya, dobuka keledai basam ap, unta basam ap, balye deice deibuka bobalulume. Aning winilulum bukni, aninye ara anggunti kum melipmanto ninye unyake.

⁷ Aning nirya ara, Mesir ninye ati talye binuka areplum bukni, Mesir mutuku ninye arye, melipsitinga babye, ikin ning anggun deice pia weik upnamsile. Ati narye, Mesir mutuku winipmanto si ati, ‘Rahab,’ nyanune. Asi deiyok ara, ‘Akil ara, aning nirya kum winipmanto kil ulule,’ tenena ati nyanune.” Allah arye Yehuda tam ninye ap, Israel tam ninye ap ati, nyabuk.

Talye kanye bobuka unyak ninye ati, nyabuk yupu

⁸ Allah arye Yesaya biti nyapdeibukba sekeipsuk. “Allah arye nati nyapnuke. Wini talak ara, bimince malye wininyak ning nirya ati, tonok keil pala deice seknamlyame. Tonda, domba bol mikamuk ning deice arye, binuka sekeipnulyame. Asekna ning sekuka lakak uk deipminba, sik anang asing arye elinamake. Tonda, doyanamle talak nirya babye, pia unamle. Apia unamla anya arye, sikce deibikiba, dadeipdanin banamak ninye nirya babye, eibikirye kel biknamake.”

⁹ Winibuka sekenamlulume. Amutuku ninye ara, kekena kumce, Allah ati malye kibuka, bisina uk unyak ninye anya arye, sikda talye kanye bobuka, Allah arye, ‘Winiplulume,’ nyabuka, peteresilye yupu kekebuka kum unyake. Aninye ara, tilila yupu uk nyalanyake. Tonda, na Allah Yahweh arye, ‘Winiplulume,’ nyaptinya babye, na yupu pia kum kekeninyake.

¹⁰ Tonda sik anang arye, na yupu laka len deiyok nang, nabi nang ap, tonda narye arepneba, lengdar mapmakce deice arye eibikirye, laka nyanyak nang ap ati, nyanyake. “Anggun si bam bol kitipdongobuka, koulongana atonun wininamlume. Allah arye arepliba, lengdar mapmamunye deice eipmunce, laka lesululum yupu ara, yata ati ayupu nunti tuba nyasululum do? Dipkoprop ikin ning weik upnamsil ning, nyasumunye ning ara, nun lik ati, tonap ayupu kum nyanamsululume. Ikin yupu kum bukni, ‘Kanye teleb upnamsutue’ tenen, yupu uk nyanamsululume. Aminyan kum winipnamle ninguk nyapsutumba, kekeptibirye, ‘Talya kanye bobuka uptibye’ tenen, nyapsiyabe. Nunda pia lik ati, talye kanye bobuka unamabe.”

¹¹ Tonda nyalulume. “Anyasululum yupu ara, nun lik ati, yuk tam yupu ton nyanamsululume. Nun Israel ninye ap, Yehuda ninye ap, talibuka usilinye Allah ara, Pia Teleb uk Ulinye birye, wenepnamsil yupu ara, tonap kum nyanamsululume.” Anggun Yehuda yala ninye ap, Israel yala ninye ap arye, Allah na yupu lak lena nang ati nyalulume. Allah arye nyabuk.

¹² Allah arye nyabuk. “Ati, na Allah Pia Telebnye, anggun nirya talisununye birye, nyapsine. Anggunce na nyasinye yupu ati, ‘Nun like,’ nyabuka bataklumce, anggun mining winin ning atibuk, tenebuka ululume. Tonda, anggunce talye bona utotoa talina kum ninye ati, yaniltamunce, ikin ning sik nong deice delimunce, tilila yupu uk nyalulume.

¹³ Anggun malye winimunye ning ati, winipmanto ning nyapnusine. Ninye arye cang keil poka domikibuk, daklirye dalubuka talye karin arye, sakuka tukwak poulbalamle touk, anggun malye winimunye ninye ara, anggun wenen ning talye karin arye, anggun dam yanamsile.

¹⁴ Winipmanto yupu ton nyapnusine. Mek makau kintinina ati, ninye arye kira tuku dobuka, memep deipmakibuk, saklirye, cobuka atu buklirye, mitik tonunuk danalule. Winilula anya arye, atu noutam arye dopropmanto ning ara, pia kum uptue. Tonda amek makau coplyopura, mek babye kum kwepmantoe. Mekwen makau atu kiplopliba, mitik tonun ulamle touk, anggun wenen ning arye, anggun malye winilulum ninye ati, obuka sirya daknamsile.” Allah arye nyabuk.

¹⁵ Nyabukce ayupu ton nyabuk. “Ati, na Allah Yahweh, aning-aning nirya talibuka deice tam Weik Erena Deiyoknye unune. Narye, ‘Winipnamne,’ tenenye touk wininune. Narye nyapnusine. Nara, Pia Diksukumuk unirye, Israel ninye kalikuka talinunye birye nyapsine. Ara, ‘Allah arye wenepsilirye, obuka sirya daksilyak’ tenen, wininamlum ning ara, nyapnusine. Anggun malye winimunye ning nirya batakmumce, tupto tamubuka na tam kipnamlulume. Winipmunce, nati dib tenepmunce, kanye lamapdongobuka unamlulume. Kanye talima namin deice darapdongobuka upmunce, ‘Nun ni Allah elce lyepnamsil’ tenen, nati dib tenebuka umunyopura, narye mikip kilinamsine. Narye, ‘Winibuka wininamlulume,’ nyapsise bukni, anggun malye umunce, aning bataklume.

¹⁶ Anggunce nyalulume. ‘Nunda kuda basam balye deice welebuka bukibirye, minopce bikbik abuka binamabe,’ nyapmaluma ati, dipkoprob olyanamsiyak talak ara, adiparyuk bikbik abuka bindopnamlulume. Tonda, anggunce, ‘Kuda basam bikbik abuka balamle ning deice bukibirye, bikbik abuka binamabe,’ nyapluma ati, dipkoprob anggunti olyanamsiyak nang ara, anggun balye tam arye, bikbik abuka dobolyanamsiake. Ati, anggunce tenepmamunye touk winipnamlulume. ‘Minopce binuyap’ tenen, banmamun bukni, anggun mal olan nang aminyan dobolyasikirye, opnamsiake.

¹⁷ Aminyan tam, anggun mal olan nang yakcopura, winipnamlulume. Anggun mal olan nang kan-kan, tonoknye ton eipmunyopura, ‘Se, anye birye opnamasile,’ tenen, ilil upliba, anggunda yupa weik 1.000 nang bikbik abuka, bindopnamlulume. Aning atonun, anggun mal olan nang kan-kan, pamubarye nang eipmunyopura, ‘Se, anang arye opnamasiyake,’ tenen, ilil upsiliba, anggun nirya bikbik abuka, bindopnamlulume. Anggun mal olan nang arye, aminyan dobolbanmasikca ani, batakikiba, anggunda yupa weik kum unamlum bukni, tonok-tonok uk, kam unamlume. Winipmanto ara, mutuku deice tonok bendera ikdeibikiba, el yuk tiklamle touk unamlume. Ara, anggunda ninye pia weik ulamlum bukni, akunum opsikcopura, mitik tonun unamluma ati nyapsine.” Allah arye sik Israel yala ninye nirya ati nyabuk.

¹⁸ Nyabukce, ayupu ton dukdongobuka nyabuk. “Anggun malye winimunye ning ati, kanye imun weik ning yanamsil bukni, na Allah Yahweh arye anggunti, tuba tenesununa ara, ‘Aninye ara bicoe, na kanye aniryuk melibuka lyepsitinye,’ tuba tenesunune. Na Allah arye tenelamsinya ani, ‘Atalak winipnamne,’ tenyamse talak akunum kiplyopura, bico tenepsinirye, melibuka lyepnamsine. Winipnamsitinya ara, talye ati kume. Deiyok ara, Na Allah Yahweh, pia diksukumuk ununye birye nyapsine. Ati, yata ninye do nirya, ‘Allah el dem arye melibuka lyepnamsil’ tenen, diba tenebuka dinauk unyak ninye ara, narye teleb kipdeipnamsine. Winipsinyopura, telebuk unamlume.” Allah arye nyapdeibukba, nabi Yesaya birye sekeipsuke.

Allah arye sik Yerusalem mutuku unyak nang ati, “Lyepnamsine,” nyabuk yupu

¹⁹ Anggun Yerusalem mutuku weik asik noutam ululum ninyeo, anggunda tuba-tuba kum engenamlume. Anggunce Allah ati, “Se na nie, anda melipsilyame,” nyabuka moropmunyopura, elce anggun moropmamunye ning ara, kekepsilirye, amoropmamunye touk ubuka, melipnamsile. Deiyok ara, Allah arye anggun malye winilamlum ning ati, talye kanye bobuka oplopsutu bukni, anggunti weik tonun bicoe, tenesulula anya arye, talima namin aryuk, kekepsilirye, lyepnamsile.

²⁰ Dipkoprop, Allah arye anggun kiklilena ap, anggun kel bikna ap ati, wenen ning weik tonun ikin ton, anggunti, tia talak noutam arye arepnamsil bukni, aminyan talak ara, elcuk, anggunti melibuka lyepdopnmasile. Winipmanto ara, roti kwaning dinamlum ning atonun, ikin weik ning anggun nong deice deipnamsile. Tonda, yu mek dina atonun ton, kanye imun ning anggun dam deipnamsile. Winipnamsila babye, aminyan talak ara anggun peterena Deiyoknye tuba kum duknupnamlule. Lak kiplirye yanuka melipsilyopura, anggun nirya ara el pil dolul ning eipmunce, elti, ‘Se, Allah ara nun dam’ tenen, anggun bidamnye arye, kel biknamlume.

²¹ Atalak noutam ara, anggun nirya ara, bisik banmamunce, walwalapdamunye talak ara, anggun balye tam arye do, anggun urasin tam arye do, dibuka kekepmunyopura, Allah arye anggunti, “Teleb banumunye bisik ara atia, abisikuk melibuka banamlume,” nyabuka lak nyapnamsile. Ati el yupu nyapliba, kekenamlume.

²² Anggunce, ‘Nun ni koproba ani,’ tenen, kam kum ulul ning, isa si erena ati, isa urasin atonun puturubuka deipmunce, si erelulum ning nirya ara, malye kipdeipmunce, donoknamlume. Ara, aisa si eren ning patung-patung ara, sik bol deice ara, urasin pia teleb dekna weik ning, el si emas ap, tonda perak ap arye, taplakuka deipmunce, si erelulu ning ara, pia malye kipdeipnamlame. Ati, anggunce, ‘Aning ara pia malye ning,’ tenepmunce, aning dobuka donokmunce, “Sik isa ap, patung ap ara, nun dam pia kum deipnamabe. Sik isa mer nirya ara nun dam batakuka yukak bilulume” nyabuka, donoknamlume. Kwalye bok boyanuka, pia malye ning kilipmunce, bai tam donokolulum touk, aisa si eren ning babye, bobinuka yukak donoknamlume.

²³ Allah arye anggunti, melibuka lyepsilirye, tuba ton ap tamubuka teleb kipdeipnamsil talak ara, anggunce yala donokolulum talak do, wa wipmunce, koun ning koupnamamunye talak ara, Allah arye mok arepsiliba, ayala ning ap, koun ning ap ara, pia teleb kibuka paplirye, duk moupliba, duk weik dakanamlume. Tonda anggunce kam ning weinamlum ning, yala-yala nirya ara, sik din ati, mutmuta ara pia weik wamlye pala weik mutuku kintinip deipsiliba, delilbanamlume. Deipmunyopura, anggun sapi ap, domba ap, kambing ap ara, amutmuta dinamake.

²⁴ Tonda, anggun weilulum sapi yim ap, keledai basam ap arye, wa tuku palin ning libuka bakiba, anggun wa ara wibuka delilbanamsirake. Ati, anggunce akam ning, sik din ati ara, yo mutmuta ap, maning ap, pia teleb ninguk, wibuka yuk kintinibuka deipmunyopura, dinamake.

²⁵ Anggun mal olan nang, sikce cang kat keil poka dobuka antanap dongobikce, ‘Nun mal olan nang yanamak talak eipnamapʼ tenen, apoka deice arye cang keil aik ton memepdeibik ning, ulupnamlu talak ara, ninye weik tonun obuka sirya daknamlume. Bukni, atalak ara, pia weik mutuku dupak ap, mutuku kon ap nirya deice tam arye, pia teleb mek panabuka yanamle.

²⁶ Aninguk kum bukni, atalak babye, wala el dirina ara, keting dirina ulamle touk upnamle. Keting el dirina ara, minop talak arye dirina ulamuk touk tuba kum upnamle. Atalak ara el dirina ara, pia weik upnamle. Aketing dirina pia weik upnamle ara, tonok sum keting duk-duk noutam ara, keting dirina atonun bukni, tekbarye tabaklya deice arye, dirina pia weik upnamle. Ara, Allah Yahweh, el mapu koprop ati, olamikiba dila weik ulamlye ning ati, lipdongoplirye, kweteipnamle. Allah arye sik wenena ati, ikin ning areamukba, sik dila uamuk ning nirya kwetepliba, nipdopnamle.

Allah arye, sik Asyur mutuku tam unyak nang ati, wenepnamle nyabuk yupu

²⁷ Ura anggun nirya dilulume! Allah Yahweh el mikip weik ap, el yu weik ulye ning ap ara, pia pere sukum arye lak kibuka yanamle. Allah El weik yu ara, weik uku buk dilamle touk upliba, tulum weik tonun panaplirye welelamle touk ubuka panapliba eilinyabe. Tonda, Allah elce nyapnamle yupu deice arye, malye unyak nang nirya obuka dipnamla ati, winipmanto ara, weik uku arye aning-aning dilamle touk upnamle.

²⁸ Allah yangaliba, el yu arye nyapnamle yupu ap, el mikip ap ara, weik kum donmaliba, aning-aning nirya dakuka sung-sunga bulamle touk upnamle. Tonda weik balamle mek opnin yanganmalirye, ninye un dam sekdongoplirye, bobalamle touk ubuka, Allah arye ninye mutuku sirya im sirya nirya wenepnamle. Ara, winipmanto, mek opnin yanganmalirye, ninye ap, aning-aning ap, yala nirya babye, diplirye bobalamle touk, Allah el yanamla ara winibuka yalirye, ninye mutuku sirya im sirya nirya ara, weneplirye obuka kum kipdeipnamle. Ninye arye, gandum duk ap, kala talye ap, wibikirye, malye ning donokikirye, teleb ninguk wibuka ‘Naʼ tenen, delilamak touk, Allah arye tukwak nang nirya ati winipdelirye, teleb ninguk dopropnamle. Tonda, ninye arye, sik kuda basam kum bobinmanto ubikcopura, kuda si pum besi ning dongobikirye, tapu arye libuka bobalamak touk, Allah arye sik malye unyak nang nirya ati mikip arye bobinamle. Sikce, ‘Nun like,’ tenepnamaka babye, el mikip arye, weneplirye malye sukumuk bobinamle.

²⁹ Bukni, anggun Allah el mapu koprop, Yudea tam ululum nang ara, kanye deipmunce, kanye deilin mot uk nyapnamlume. Ara, winipmanto ara, ‘Allah el si erebibirye, el si erenak, mutuku kon deice binamapʼ tenen, teleb kanye deipmakirye, kwalina lukunyan talak kwalibikirye, kanye deilin mot nyabuka balamak touk, anggun Yudea tam nang babye, atalak ara kanye deipmunce, kanye deilin mot nyapnamlume. Tonda winipmanto ara, sik Israel nang arye, Allah el si eren aik bunukca ati, bung-bung nyan ning el si seruling bopnarye nyapnin balamak touk, anggun Yudea tam nang babye, atalak uk aning atonun ubuka kanye deilin mot nyapnin banamlume.

³⁰ Kanye deibuka mot nyapnin banamlum bukni, Allah el mikip weik yupu lelim ara, pia mambul weik ulye ning, ‘Sik nirya kekepnamakʼ tenen, el yupu weik tonun nyapnamle. Tonda, Allah el mikip weik taruk arye, malye unyak nang opnamle ning babye, sik nirya eipnamake. El pia yu weik ubuk ning ara, ninye mutuku sirya im sirya nirya ara, eibikirye el mikip weik kel biknamake. Winipmanto ara, Allah el mikip weik ap, el yu weik ap ara, uku buk arye aning nirya dilamle touk ubuka diplirye sirya daknamle. Tonda, weik mok mikip arye celamle touk upnamle. Tonda, liman ap, weik keil duk-duka moul mok, es ap, kum ap, yangalamle touk ubuka yanamle.

³¹ Winibuka yangaliba, sik Asyur mutuku unyak nang ara, Allah el yupu weik nyapliba kekebikcopura, ilil weik upliba sik yok sirimtalipnamle. Sik amutuku nang ara, Allah Yahweh arye, el kama taliplirye, sikti, weik tonun wenebuka opnamle talak ara, sik ilil upliba, talima daksaknamle. Winipnamle ning nirya ara, sik kel biknamake.

³² Allah Yahweh arye el wenena ati kintinip deibuk kama dobuka, sik Asyur mutuku nang ati, opnamle talak ara, Allah el ‘Naʼ tenen, nang Israel ninye kekebikirye, bung-bung nyan ning, el si ara kecapi, lelim nyan ning, el si gendang ap, bobikirye, kanye deilin mot ton nyapnamake. Atalak ara, Allah el taruk aryuk ereplirye, sik Asyur nang uaplirye, wenebuka opnamale.

³³ Dipkoprop minop talak ara, Allah arye Asyur mutuku ninye deiyoknye, Raja Asyur biti, ‘Anye opnirye, el nong dobuka uku dongona ati ara, akunum kintinip deiamuk. Dipkoprop aninye deiyoknye Raja Asyur mutuku nang ati, auku dinamlak akunum kintinip deiamuk. Asukum ara, tuku pum palibuk ning ap, uku dinamlak pala ap, el uku dan yo toubuka deibuk ning ap, akunum weik tonun kintinip deibuk. Aning nirya akunum kintinip deibuka anya arye, atalak ara, Allah Yahweh el yu deice arye, el si mikip arye pong nyapliba, pito weik tonun welepmalya deice arye, auku seklyopura, uku buk weik tonun dinamle.