Yesaya 3 - Eipomek

Allah arye, “Yerusalem mutuku deiyok nang nirya ara, akunum batakicopura, amutuku nang ikin weik unamake,” nyabuk yupu

¹ Dipkoprob, Allah Yahweh, elda aning-aning nirya deice tam erebuka, pia mikip weik ulul deiyoknye birye, im deice yin talin malaikat nirya talilirye, mikip weiknye ulule. Elcuk, Yerusalem mutuku weik asik ap, Yehuda tam noutam ap, sik amutuku bitinye noutam unyak nang arye, sik din ning ap, mek ap, bulubuka kintinibuka delilamik ning ara, doproplirye, kum kipdeipnamle. Din patana weik upnamsile.

^2-3 Tonda, amutuku ati, mikip arye pi dobuka, pil don nang ap, yin talen nang ap, ninye yupu bokolina deiyok nang ap, Allah yupu laka lena deiyok nang ap, wisi nang arye, ‘Aning-aning winipnamlume, aning ara telebe, aning ara kume,’ nyabuka, laka nyana deiyok nang ap, aminyan upnamle ning ati, eibicakarye lak lena deiyok nang ap, tonda yin talin nang yupa (25) bitinye (50) nang talibuka unyak deiyok nang ap, aweik si eren mutuku talibuka unyakce, ninye arye si erenyak mambul nang ap, asing keten nang ap, “Aning winipnuyabe, aning ara eipmane, aning ara winipnamlarya,” nyabuka, meirye dona deiyok nang ap nirya ara, Allah arye kum kipdeipnamle.

⁴ Na Allah arye, anggun amutuku wel nanguk wipdeipniba, sikce deiyok kibuka, amutuku unyak nang talibuka unamake. Anggun deilinamlum mapu arye, aning-aning nirya kel bikna kumce, kabul winiryuk unmake buk, sik amapu aryuk, ninye deiyok kibuka, Raja atonun kibikirye, anggun mutuku talibuka unamak talak ara, sik kanye arye, ‘Aning winipnuyabe,’ tenebikce ninguk, wininamake.

⁵ Wininamak talak ara, amutuku noutam unamlum nang ara, yanipsiceba, ikin weik unamlume. Ninye deiyok nang arye, yuk nang ati, yupu nyabicopura, aning nirya ton, kum kekepdakirye, sik yupu ara, talye yanilanuk unamake. Aning atonun, ton tam nang arye, sik dam unyak nang ati, yanilanuk unamake. Anggun mutuku mapu arye, anggun mutuku wisi nang ati, ‘Sik wisi nang arye, nyalamsice yupu ara, kum kekenamake. Anggunda, talye nanguk ululume,’ nyabuka, malye yupu nyanamake. Tonda, pia amu tam ukirye, malye-malye unyak nang arye, sik pia teleb, diksukumuk unyaka deiyok nang ati, malye yupu nyabikirye, ‘Anggunda mambul nang kum ululume. Sikda bataknyapeʼ, nyabuka nalinamake.

⁶ Atalak ara, tonye birye, sik ni koproba aik bilirye, el kwit, el yalanye biti doproplirye, ayupu nyapnamle. “Na kao, an diamuk baju teleb ning ongopmalam ati, anti nun pia kanye imun upsilye talak ara, ancuk nun deiyoknye kipsilyame,’’ nyapnamle. “Anyaik ara, yu ati akunum ulubuka bataklopse bukni, ancuk amutuku talibuka, nun deiyoknye unamsilame,” nyapnamle.

⁷ Nyapnamle bukni, atalak ara, el ka koproba arye, tamubuka nyapnamle. “Narye aikin upsilye ning ara, dipkoprob lipsisikuka, pil kum doptinye. Nara, ninye deiyoknye kuma! Tonda, nara din ning babye, ongopmanto baju babye, ato ning ara, kum talenune. Aning-aning nirya kumnye ununa ati, ance, ‘Anda nun deiyoknye upsutume,’ nyabuka, kum wipdeipnutume,” nyapnamle.

⁸ Aning nirya ara, talye ati kum nyapsine. Deiyok ara, dipkoprob Yerusalem mutuku ara, akunum dakuka tukwak sakuk! Atonun, Yehuda mutuku babye, akunum sirya obuka batakuk! Awinibuk ning deiyok ara, Yerusalem mutuku unyak nang ap, Yehuda mutuku unyak nang ap, sikce Allah Yahweh el yupu yaniplobuka, malye kina ap, elti, malye yupu nyana ap, winilamik atia. Tonda, Allah Yahweh el mikip ap, pia teleb ulya ap ati, lak len ning, el weik dirina weik ulula ara, sikce, ‘Aning ara, mambul kume, dauplye,’ nyabikirye, yaniltakanyake.

⁹ Sik amutuku unyak nang arye, kanye erebuka kwalinyak deice arye, tukwak aryuk malye unyake. Sik anang nirya ara, dipkoprob laka deice arye, pia malye unyak talak ara, yuk nang ton, sik urasin eibikcopura, sik malye wininyak ning nirya bikinyake. Ara, ‘Nun malye wininyap ning duknubupe,’ tenena kumce, minop talak Sodom mutuku ulamik nang ara, lak deice noutam arye malye winilamik touk, wininyake. Ati ara, sikda bico! Ikin weik ning, sik nong deice yanamlarya! Ara, sik Yerusalem mutuku unyak nang ap, Yehuda mutuku unyak nang ap ara, sik deiceuk, kanye imun weik ning dobuka deipdayikba, ikin weik unyake.

¹⁰ Ati, sik diksukumuk unyak nang ati, nyapnulyame. “Anggunda, kanye deipnululume. Allah arye anggunti, lyepdopnamle. Ara, sik anang teleb kibuka, pil donyaka deice arye, apil donyak ning ara, nong ning ton doropnamaka atia. Pil teleb kibuka dolonyak touk, dekna ning, pia teleb ning dopropnamake.

¹¹ Bukni, sikce malye ninguk, talibuka winilamice nang ara, nyapnamlulume! “Anggunda bico, anggun wenena ati, ikin ning ton dopropnamlume. Anggunce yuk nang ati, ikin ning delilalum touk, anggun babye, ikin ning anggun dam yalyopura, dopropnamlume. Tonda, anggunce malye-malye pil dolamlum touk, anggun dam ara, ikin pia ning yanuka, anggun nong deice deipsilyeura, doropnamlume,” nyabuka wenepnamlyame.

¹² Malye winin ning talibuka unyaka ati, wini talak ara, mitik-mitik mapu arye, na mutuku nang nirya ati, daralongonyake. Tonda, nara Allah, ‘Naʼ tenen, mutuku nang ara, talye daunyak kilapu arye, deiyok koubikirye, anggun mutuku talepsikirye, ikin kilisinyake. Tonda, na mutuku nang ati, deiyok kibuka talinyak nang arye, sik binmanto bisik babye, walwal kilinyakba, kanye walwal kiplyeba, ‘Teleb winina ati benamap bisik ara, aniʼ tenen, kum bikinyake.

Allah Yahweh arye, el mapu wenepnamle yupu

¹³ Ninye yupu bokna talak arye, yupu nyana deiyok nang tikikirye, lipsisikuka nyan yupu nyalamak touk, Allah Yahweh el bun ning deice bulamlak arye, el tenen nang bukni, sik malye unyak nang nirya ati, “Teleb winilamlum ning ara, ani. Malye weik winilamlum ning ara, ani,” nyabuka, wenen yupu nyapnamle. Tonda, akunum tiklyeura, sik im sirya, mutuku nirya unyak nang, sik malye wininyak ning ati, weneplirye, dekna ning ati, weik ikin ning, sik nong deice deipnamle!

¹⁴ Aning atonun, sik ninye deiyok kibuka, Allah el mapu koproba ati, talikirye, Raja unyak nang ap, tonda sik wisi-wisi nang ap ati ara, Allah Yahweh arye, sik anang ati, yupu nyaplirye, weik arye wenepnamle. Allah arye sik anang ati, “Teleb ulamlum ning ara, ani. Malye weik winilalum ning ara, ani,” nyabuka, wenen yupu nyapnamle. Yupu bokeipnamle talak ara, ayupu ton nyapnamle. “Ninye arye, anggur wa wibuka kouamikca ani, duk weika arye mouplyeura, yuk nang arye yanuka, anggur duk nirya dalubuka dolamak atonun, sik deiyok nang babye, na mapu koproba, sik Israel nang ati ara, akunum malye kipdeiplume. Tonda, anggunce talye kankan nang, sik bona nirya, dalubuka dololamlum ning ara, anggun aik pum tam dungnuba deiplumba, anggun aik ara langdibuke,’’ nyapnamle.

¹⁵ Anggunda, yata deiyok ati, anggunce na mapu koproba ati ara, sik nong deice, kanye ikin ning deiplumce, ikin kililulum do? Tonda, anggunce na mapu koproba bukni, talye kankan nang, sik ning alubuka dololulumce, anggun urasin ara, tuku deice buta noutamuk singnilongolulum do? Nara Allah Yahweh, aning-aning nirya, eitam erebuka, mikip weiknye unune. Tonda, narye sik im deice unamak yin talin malaikat nirya ara, sik deiyoknye unune. Narye anggunti, ayupu akunum nyapsin ati, anggun nirya ara, dipkoprob wenepnamsine!”

“Yerusalem mutuku ulamik kilapu ara, kwalina weik kilapu unyake,” nyabuk yupu

¹⁶ Allah Yahweh arye nyabuk. Sik Yerusalem mutuku unyak kilapu ara, kanye erena deice arye, kwalinyak kilapu unyake! Sikce, ‘Sal eibikirye, nunti kanye deipsikirye, tuba tenenamsiyakʼ tenen, akilapu ara, ngang cang likuka, asok erebuka banmakirye, sal kan-kan dana-dana banmakirye, ninye asing ngikdabanyake. Sik akilapu bakce talak ara, ‘Sal arye, sikda urasin pia teleb kilapu tenepnamsiakʼ tenen, kwalibuka kiminmakirye, erelanyake. Tonda, sik nong ara, dobuka otam, atam kipdakirye, sik yan deice ongonyak ning ara, nyeleng-nyeleng aplirye, lelim lelule.

¹⁷ Wininyaka ati ara, Allah Yahweh arye, sik Yerusalem mutuku noutam malye wininyak kilapu nirya ara, elce wenepnamle. Weneplirye, sik akilapu kisok deice ara, bol kona ap, suse ap taliplirye, sik kisok potong nirya bindoplirye, dilo copnamle.

¹⁸ Akilapu ara, kwalinyakce talima erepdanuka, ‘Daunyak ninye eipsikirye, Se, sikda urasin pia teleb kilapu, tenepsikirye, kanye deipnamsiakʼ tenen, winiyaka ati ara, Allah ara, aning nirya talilirye, mikip pia weiknye ulula ati, elce anggun Yerusalem mutuku noutamak malye wininyak kilapu nirya ati ara, wenepnamle. Allah arye akilapu wenepnamle talak ara, Yerusalem mutuku kilapu sikce, ‘Ninye eibikirye, se, sikda urasin pia teleb kilapu tenepnamsiakʼ tenen, sik urasin teleb kina ati, kwerya ning yala-yala nirya dokirye, kwalinyake. Ati, Allah arye, sik nong deice donyak kwerya ning nirya ara, alubuka dopropnamle. Ara, sik yan deice koupdongobikceba, nyeleng-nyeleng an ning ap, sik kisok kounyak ning, teleb baju ap, sik taram dam karakanyak kwerya ning ap, aning nirya ara, alubuka dopropnamle. Allah arye aning nirya doplirye, batakleba, talye nong yoka dem unamake.

¹⁹ Tonda, Allah arye akilapu wenepnamle talak ara, Yerusalem mutuku kilapu arye, ‘Ninye nirya eipsikirye, se, sikda urasin pia teleb kilapu, tenepnamsiakʼ tenen, sik urasin teleb una ati, kwerya ning yala-yala nirya dobikirye, kwalinyake. Ati ara, Allah arye, sik nong deice ongonyak kwerya ning nirya ara, dalubuka dopropnamle. Ara, sik yan deice koubikiba, nyeleng-nyeleng alamle ning ap, sik kisok kounyak kain teleb ning ap, sun ngang dam kwatibuka karakanyak ning nirya ap ara, dalubuka dopropnamle.

²⁰ Aning atonun sikce, ‘Urasin pia teleb unamsilʼ tenen, sikce donyak kwerya ara, sik urasin koulongon baju, el si Cadar ap, sik ngang dam kwatibuka karakanyak ning, el si kalung ap, tonda amul dam birinyak, el si anting-anting ap, ‘Nun nong nirya nintong teleb nyapnamsilʼ tenen, nintong teleb mek dikilongongyak makau mitik ning ap, ‘Malye ning yanuka opsilyakʼ tenen, memelona ati, pitin kibuka delinyak ning ap, dalubuka dopropnamle.

^21-22 Tonda, ‘Nunda weik sisin kilapu,’ tenepnamsiakʼ tenen, sik taruk duk deice dongolamak ning, el si cincin ap, sik u dam potokuka delilamak ning ap, el si ara anting-anting ap, sik kisok deice kalun kwerya ap, deiyatinga dam kounyak ning ap, sik amul dam potokuka birilamak ning, el si ara anting-anting ap,

²³ urasin pia teleb dekna weik namin baju ap, cang baju ongonyak ning, pia teleb ning ap, baju deice ongonyak buppu cang baju ap, moul li talak ongolamak urasin teleb cang baju, el si ara mantel ap, yo bok lina ati, urasin teleb dompet ap, aling ap, baju amu tam ongolamak ning, pia namin baju, el si kain lenan ap, dalubuka dopropnamle. Tonda, ‘Nunda weik sisin kilapu, tenepnamsiakʼ tenen, sik kisok deice kalun kwerya ap, dekna weik ning ap, ‘Nun urasin eipdatibyeʼ tenen, bolamak ning, el si kaca muka ap ara, Allah arye alubuka dopropnamle. Aning-aning nirya ara, sik akilapu arye, ‘Ninye eibikirye, se, sikda urasin pia teleb kilapu,’ tenepsikirye, ‘Nun ti mambul nyanamsiakʼ tenen, kweirya ati donyak ning nirya ara, alubuka doproplirye, kum kipdeipnamle.

²⁴ Allah arye, akwalibuka kimilanyak kilapu wenepnamle talak ara, sik kweirya teleb ning pununa ati, urasin malye ninguk arepnamle. Ati, sik akilapu tonok ara, wini talak nintong teleb len ning, sik nong deice likinyak bukni, dotalak ara, sik akilapu deice arye, lyun tong welepnamle. Sik akilapu deiyatinga koulongon ning, atalak ara, urasin teleb namin ning arye kounyak bukni, dotalak ara, pia malye kat tapu, basam turya atonun ning arye, punubuka deiyatinga ara, koupnamake. Atalak sik kisok potong siser arye, teleb kibuka lelekuka tapu kounyak bukni, dotalak ara, delo kumupnamle. Atalak ara, sik ongonyak baju ara, dekna weik, urasin pia teleb ning ongonyak bukni, dotalak ara, aning kwiriplobuka, pia malye baju, el si karung goni ato ninguk, ongopnamake. Ati ara, wini talak, sik Yerusalem kilapu ara, urasin pia teleb kilanyak bukni, dotalak ara, sik urasin ara, pia malye upnamaka ati, alye weik dakalamake.

²⁵ Aninguk kum bukni, Allah arye Yerusalem mutuku unyak nang ati, wenepnamle talak ara, Yerusalem mutuku kalikna ati, mikip weik unyak yin talin nang nirya ap, sik amutuku unyak nang nirya ap ara, yuk karin mutuku arye, yu weik nang mal olyakirye, sik parang ya arye, amutuku ninye weika arye obikirye, pia sirya daknamake. Sik olan talak arye, ninye weik dipnamake.

²⁶ Winibiceura, sik Yerusalem mutuku, tuba kam unamak nang arye, anyasik domikce bukni, bisik bublan wekelbanak ati, weik keil poka noutam, bisik bublan potopdeibikak ara, kat ning besi arye, bublan el si, Pintu Gerbang dobik dam, bulubuka wekelbikirye, yupu weik arye malye nyabikirye, engenamake. Winipmanto ara, kilapu baju kwiripdobiceba, bananguk bukikirye, tuku deice bukuka engelamak atouk kibuka, anggun Yerusalem mutuku nang babye wininamlume. Ara, Allah arye wenepsilirye, ikin ning weik arepsilyopura, anggun babye, aning atonun kibuka, imun kanye bobuka, engenamlume. Allah arye, sik Israel yala nang nirya ati, ayupu nyabuk.