Yesaya 29 - Eipomek

Yerusalem mutuku winipnamle ning ati, nyabuk yupu

¹ Se, anggun Yerusalem weik asik dobuka, amutuku noutam ululum nang ara, anggunda bicoe. Na Allah arye, anggun wenena ati, kanye imun ning arepnamsine! Ninye arye, Allah el si erena ati, el aren ning deililbanak ati, mutuku si ara, ‘Ariel’ (mesba) nyanyak bukni, anggunda ikin upnamsile. Tonda, min talak ulamuk ninye deiyoknye, ‘Raja Daud birye, tia talak ati, elce amutuku domuk aik,’ nyanyak bukni, anggun mutuku ara, ikin upnamsile. Aketing tamun, aketing tamun noutam nirya ara, na Allah arye, ‘Na si erebuka kina ati, weik sum ani, ani’ tenebuka, weik kwalya kwalibuka unamlume,’ nyapdeipsise ning ara, tuba wininamlume. Bukni, winipmamunya babye, narye anggunti, wenebuka opnamsin ning ara, dipkoprob winipnamsine! Aning ara, kum bataknamne.

² Dipkoprop, anggunce na si erena ati pil donauk umumnya babye, na Allah arye sik wenena ati, kanye imun ning dopdeipnyeba, anggun mutuku asik dobuka umumnya noutam ara, ikin ning yanamsile. Winipnyopura, anggun amutuku noutam ululum nang nirya arye, kanye imun kanye bobuka, ‘Se’ tenen, malye nyabuka engenamlume. Tonda, anggun mutuku weik asik ara, mesba deice ining barilamle touk, anggun wenen ning arepsinyopura, anggun anyasik noutam nirya ara, ining weik aupnamle.

³ Tonda, Na Allah arye anggun wenena ati, weik asik dobuka ululum mutuku dana-dana tam nirya ara, anggun mal olan nang dopdeipyeba, eitam ap, outam ap, tonda dana-dana tam nirya ap arye, yan warekuka antanap dongobuka opnamsiake. Aning ara, min talak Raja Daud elce winilamuk touk, na babye atonun winipnamsine.

⁴ Narye lo arepnyeba, anggun mal olan nang arye yanuka opsikcopura, anggun Yerusalem mutuku nang arye, winipmanto ara, ninye dibikceba, tuku lukuka tuku pum tam arye, yupu nyalamak touk, anggun yupu ara, mitik tonun nyapnamlume. Winipmanto ara, ninye sakuka, tuku pum tam maptingaura, sik yupu nyaptinga babye, yuk nang arye kum kekelamak touk, anggun babye atonun upnamlume. Tonda, winipmanto ara, akunum deibik nang, sik kanye arye yupu mitik tonun nyalamak touk, tonda dimang maka yupu nyalamle touk, yupu nyapdenamlum bukni, yuk nang arye kum kekepmanto upnamake. Anggun anang arye yupu nyapdenamluma ara, moubuka kum kekepnamsiake. Lukunyan noutam arye, mur-mur an yupu nyalamak touk nyanamluma atia.

⁵ Dipkoprop, anggun mal olan nang arye, yan obuka sirya daknamsiak bukni, anggun dam yanuka opnamsiak yu weik nang, sik ninye asik yin talin nang nirya ara, narye tamubuka opnirye sirya daknamne. Ara, sikce kum bikmacebuk, narye obuka sirya daknamne. Ara, winipmanto, talye karin arye weik kumanya yalirye, butbuta ap, tonda kumanya ap, dopnarye, dua balamle touk uplyeba, anang nirya ara, kum kipdeipnamne. Aning winipnamla ara, kum bikmacebuk, talye karin arye aning nirya winipnamle.

⁶ Anggunce eipnalume. Nara Allah Yahweh, Pia Mikip Weiknye, im deice yin talin malaikat nirya, sik deiyoknye ununa ati, na talye karin arye, weik liman ap, weik mutuku lulukna ap, pia mikip kumanya ap, weik lelim ap, yanirye, anggun mal olan nang nirya obuka, sirya daknamne. Ara, weik uku buk arye, aning-aning nirya diplirye, sice bultakalamle touk, na yanirye anggun Yerusalem mutuku nang nirya ati, lyebuka teleb kipdeipnamsine.

⁷ Anggun Yerusalem mutuku ululum nang ati, olyangasinyak nang ap, anggun olan mutuku nang yala-yala nirya ap, kanye imun ning dobuka, anggun nong deice delisinyak nang ap, yuk-yuk mutuku yu nang arye, ‘Yerusalem mutuku weik asik uluplopnamap’ tenen, yanuka osinyak nang nirya ara, na Allah arye obuka bataknirye, sirya daknamne! Winipnyopura, anggun Yerusalem mutuku nang ati, yanuka olyangasikce ninye, sik yin talin nang nirya ara, pia kum kipdeipnamne. Winipnyeba, sik adiparyuk kum danamake. Winipmanto ara, aning akunum winipnyopura, lukunyan noutam ara, ninye arye lengdar mapmace bukni, akunum bereklyeura, bukikce talak ara, aning nirya pia kum ulamak touk, anggun mal olan nang nirya babye, narye kum kipdeipnamne!

⁸ Aning atouk, anggun Yerusalem mutuku nang ati, ‘Opnuyap’ tenen, bulubuka yanamak nang nirya ara, sik tenepmakca touk, kum upnamle. Winipmanto ara, lengdar mapman talak, din pataplyeba, din dobuka dilamakbuk, bereklya ati, bukice talak ara, adin kum laka kipyleura, din tuba patalamle touk, upnamake. Tonda, winipmanto, lengdar mapmanak, mek pataplyeba, mek dobuka dilamakbuk, berekya ati, bukice talak simaka ulamle touk upnamake. Ara, ‘Sik Sion mutuku deice unyak nang ati, opnamap’ tenen, anggun Yerusalem mutuku nang dam olyangasinyak nang nirya ara, na Allah aryuk anang nirya kum kipdeipnamne ati nyapsine.

Asing kun nang atonun unamaka ati, nyabuk yupu

⁹ Ura, anggunda tuba malye nyabuka, ngaluknauk unamlume. Anggunda, ‘Se yata wiriptibye do?’ tenen, tuba kanye teniltonauk unamlume. Tonda, aning atonun, anggunda, asing kun nang atonun unamlume. Anggunda, yu anggur mek dina kum buk, sik yuk nang arye anggur mek dilamak nang kanya walamak touk, anggun babye atonun, kum tenepmanto unamlume. Tonda, yu mek dina kum buk, anggun kanye walwalapsilyeba, nong walwalapdanin banamlume.

¹⁰ Aning nirya winipnamlum bukni, deiyok ara ani. Ara, Allah Yahweh arye, anggunti, wimana deiyok ning arepsilyeba, mapluknamlume. Tonda, sik asing kun nang atonun unyak nang, sik nabi-nabi nang nirya ara, Allah arye anggun asing akunum lelipdongopsuk. Tonda, aminyan winipnamle ning eibuka, lak nyan deiyok nang babye, Allah arye anggun asok deice akunum sekdongopsuka ati, sik anang nirya arye, kum melibuka lak nyapnamsinge.

¹¹ Na Allah arye an Yesaya biti nyapkine. Arup akunum lak nyapmakin ning nirya ara, aminyan talak winipnamle ning ati, an ap, anggun Israel nang arye, eipmumce, ‘E, aning nong upnamle deiyok ara, atia,’ nyabuka, lak kibuka kum biktume. Anggun dam arye tuba dungnupnamsile. Winipmanto ara, ninye arye buku sekuka kintinipmakce bukni, buku yinipmantonye arebikirye, ‘Aning ara lak sukum arye nyapsululume,’ nyaptinga babye, anang arye, ‘Kume, ayupu ara, kum eibuka nyaptibye. Abuku ara, yo pe arye akunum darapdongamik ati, kukuka kum doptibye,’ nyapnamake.

¹² Tonda, aning atonun, abuku bobuka yinipmanto kumnye, el dam bobibyeba, ‘Yinipnamsil’ tenen, abuku bobinuka areptibye bukni, anye birye nunti, ‘Kume, narye abuku seklamak ning yinina ara, pia kum bikamse ati, asekik yupu ara, kum yinipsiteni, na walwale. Narye yinipmanto kum unune,’ nyaptue.

¹³ Aning-aning nirya ati, Pia Mikip Weik ulye deiyoknye Allah arye, na Yesaya biti nyapnuk. Sik Israel nang ara, yupu deice aryuk, na si ereninyake. Bukni, dipkoprob ara, sik kanye talima noutam arye, nati pia moubuka kum teneninyake. Nati, walwal nang unyaka ati, sikda pia pera ninye asik nang atonun unyake. Tonda, sikce talibuka, si erenyak ning ara, talye nang sik kanye aryuk, ‘Aning-aning talibuka, si erenamlume,’ nyanyak ninguk, sik asok deice deilinyak bukni, sik talima noutam ara, nati moubuka kum tenepnikirye, na si dipkoprob kum ereninyake.

¹⁴ Ati ara, anggun moubuka kekepnululume! Dipkoprop, na Allah arye, ‘Anang ara, lukunyan ilil weik unamak’ tenen, sik anang dam ara, ninye arye winipmanto kum ning winipnamne. Ninye arye winipmanto kum ning ap, weik bikin ning ap winipnyeura, sik anang nirya arye, ‘Se’ tenen, ngalukikirye, ilil asa unamake. Tonda, anggun kan-kan ara, pia bikin nang arye, sik akunum bikamik deiyok ning, walwal kipdeipniba, luba kipnamake. Tonda, ‘E, dipkoprob teleb un ning ara, ani’ tenen, weik tonun bikamik nang, sik bikamik ning ara, sik dam duknupniba, tuba tonap kum tenenamake. Walwalanauk upnamake.

Aminyan doyanamle talak ara, ‘Aning winipnamsile,’ tenepnamaka ati, nyabuk yupu

¹⁵ Ura, Allah arye anggun nirya ati wenepnamsil ati, anggunda bicoe. Ara, anggunce, ‘Kume, nunce nyanyap yupu ara, Allah arye, kekebuka kum biktue. Anggunce, ‘Aning ara, winipnamap’ tenen, duknubuka yupu nyanyap ning babye, Allah arye, nun nyabibye ning ara, kum kekeptue. ‘Elce nun eibuka kum kekepnamsila atia,’ teneplum arye, aning nirya ara, duknunauk ululume. Tonda, anggunce, ‘Kume yata nang do nirya ara, ninye yuk nang ton kum elisinyaka ati, nun nyananyap yupu ara, kum bikisinyake. Sik anang aryuk tenebikirye duknunyake.’ Utenebuka winilulum bukni, anggun dam ikin ning yalyeba, dopropnamluma ati, anggunda bicoe.

¹⁶ Aning nirya ara, anggunce tamultonauk ululume! Moubuka tenipdelulume! Mambul ning ara, dan ning do? Winipmanto ara, kirah tuku arye dobuka, memelulnye bira, mambulnye ulul do? Akumura, kirah tuku koprobauk, mambul ning ulul do? Aning atouk, bikinanye birye, moubuka deibuk kirah tuku makau arye, memena deiyoknye biti, “Nara, ance memep deipmanilama kuma,” nyaptu do?” Tonda, kam una kum ning arye, moubuka kam kintinibuka deililula deiyoknye biti, “Anda aning-aning nirya winipmantonye kum ulyame. Anda weik bikina ning pia kum bikamlume,’ nyabuka, malye nyaptu do?” Kume, aning ara kum winipmanto.

¹⁷ Anggun ton tenipdelulume! Weik bikna yupu deice arye, winipmanto yupu ton nyabuk. Ayupu ara ani. “Pia weik talak ton kum ulamlum bukni, Libanon mutuku noutam bai yo palpal mutuku nirya ara, tamubuka wa windam kipnamle. Wa akunum wilulum mutuku nirya ara, tamubuka yo palpal tiknamle.

¹⁸ Aning nirya winipnamle talak ara, amul kunukna kumce, abuku noutam sekdeipse yupu, duknuna kumce, lak aryuk nukikceba, min kum kekepmanto unyak nang babye, tamubuka teleb kibuka kekepnamake. Tonda, asing kubukba, kunukna akuk unyak nang babye, asing lapdeipleyeba, tamubuka teleb kibuka eipnamake.

¹⁹ Mikip nang arye yanibikiba, ikin kanye bobuka, talye kankan unyak nang ap, tonda bona kum talibikceba, yuk nang arye, ‘Sikda talye nang unyaka,’ nyabuka, malye kinyak nang ara, Allah Yahweh arye, sik kanye tamubuka teleb kipdeipliba, sik kanye delinamake. Ara, Pia Teleb, Lek Deiyoknye, Israel nang sik ni koproba Allah arye, sik pia talye kankan Israel nang ati, tamubuka teleb kipdeiplyeba, kanye teleb deice arye unamake. Sikce elti, ‘Allah ara, pia telebe,’ nyabikirye, pin-pin asa arye, el siuk erenamake.

²⁰ Pia kanye deibuka teleb unamaka deiyok ara, ani. Ara, ninye yuk nang ap ati, ikin ning bobuka, sik deice deilinyak nang ap, anang ati, ‘Anggunda talye nanguk ululume,’ nyabuka, yap-yap anyak nang ap ara, Allah arye, anang kum kipdeipnamle. Yata nang do nirya, ‘E, adiparyuk malye winin ninguk talibuka wininamabe’ tenen, wininyak nang babye, Allah arye, anang kum kipdeiplyeba, kam kum unamake. Allah arye anang nirya ara, obuka sirya daknamle.

²¹ Tonda, ninye yupu lipsisikuka bokolin ati bulubikce talak ara, deiyok kum upmalibuk, sikce yuk nang ati, ‘Sikda malye winipmake,’ nyabuka, lululanyak nang, tonda, malye winipmak nang ati, ‘Sikda teleb winipmake,’ talye nyanyak nang ap ara, Allah arye, anang wenepnamle. Tonda, sik mutuku wekelbana ati, bisik bublan dam bulubikirye, ninye yupu lipsisikuka bokolin ati, pil teleb kibuka kum donyak deiyok nang ati, ‘Aning opnuyabe’ tenen, malye yupu tanyaka deiyok nang ap, Allah arye, sikti, kum kipdeipnamle. Tonda, malye kum winipmacebuk, ‘Sik anang arye morobikce yupu ara, pia kum kekenamabe,’ nyabuka, yanibikirye, lululanyak nang babye, Allah arye, anang ati wenebuka, kum kipdeipnamle. Aminyan talak ara, Allah arye malye wininyak nang nirya ara, obuka sirya daklyeba, kum danamake.

²² Ati, Israel nang, anggun ni koproba Allah Yahweh arye, anggun apu koproba Abraham ikin ulamukba lyeprobuk. Elcuk, Israel nang, anggun apu koproba Yakub birye deibukba, dadeipdanin yangalamikce, deibik nang, anggun Israel nang nirya ati nyapsile. “Na tenen nang, sik Israel nang nirya ara, melibuka lyepropnamna ati, atalak arye dipdongobuka doyanamle talak nirya ara, sik Israel nang, tonap alye kum dakdanamake. Sik babye ton, malye kipse ati, ilil upsilyeba, sik asok deice kanupdongobuka, alye daklamak touk, tuba kum unamake. Kanye deibuka telebuk unamake.

²³ Winipnamaka deiyok ara, ani. Ara, na Allah arye, Israel nang, anggun mapu weik ton tabakuka arepnamsin ning, anggunce eipmunyopura, aning deice arye biknamlume. Bikmunyeura, anggun Israel nang nirya arye, na Allah Yahweh ati, na siuk erepnamnulume. Anggun apu koproba Yakub birye deibukba, dadeipdanin yangalamikce, deibik nang, anggun kan-kan noutam unun, Pia Teleb Lek Deiyoknye, na Allah ati eibuka biknikceura, natibuk na si pia erenamniake. Na Allah arye, anggun Israel yala nang nirya melibuka lyelolamsise deiyoknye biti, eipnikirye biknikceura, natibuk, na si pia erenamniake. Ati atalak ara, anggunce, natibuk ilil una ap, si erena ap unamnulume.

²⁴ Tonda, atalak ara, anggun walwal deice ululum nang ara, nukmunce, ‘E, deiyok ara, ati nyabuka’ tenen, moubuka biknamlume. Tonda, yata nang do, anggunce, ‘Kume aning ara, nun like. Aning ara, kume, se aning winipsutua,’ nyabuka, malye weik nyalulum nang ara, teleb kipdeipsiniba, aminyan talak ara, peteren nang arye peterepsikceba, tuba tamubuka, ‘Aning moubuka peterepsutue’ tenen, kanye deibuka ubikirye, sik babye moubuka biknamake.