Yesaya 26 - Eipomek

Aminyan talak, Allah arye, el mapu koprop ati, melibuka lyepnamla anya arye, Yudea tam nang arye, mot nyapnamak ning ati, nyabuk yupu

¹ Allah arye tenyamlye talak akunum uplyopura, Yehuda mutuku noutam unyak nang arye amot nyanamake. Nun weik asik dobuka unyap mutuku ara, Allah el mikip aryuk nunti, melibuka kalikisulule. Nun lyena akuk kintinibuka aresulule. Ara, ninye arye asik dobikirye, dana-dana tam nirya, cang weik keil poka antapdongobuka domikce touk, Allah aryuk, nunti kalikisilirye, lyelosulule.

² Amutuku wekelbana ati, bisik bublan ara, kuklulume! Kukmunyopura, Allah el nyalin yupu uk moubuka talibikce, dipkoprob unyak nang ara, abisik bublanuk wekelyanganamake. Ara, Allah el yupu batakna kumce, sikce, “Nun ni Allah ati, winipnamabe,” nyabuka, dipkoprob aninguk wininyak nang ara, anyasik wektinge.

³ Allah ance nyapdeiplum ninguk, ‘Aninguk talibuka unamne,’ teneplirye, talimak deipnirye, moubuka talibuka telebuk uplinye bira, ance anye el talima noutam ara, ilil asa una kumce, teleb kanye deipnirye, tunim nyabuka una deiyok ning areminba, telebuk unyake. Winiminya deiyok ara, sik anang arye, antibuk, teniltona kumce, diba tenekinyaka ati, ance sikti, teleb kililyame.

⁴ Pia ati Allah Yahweh, el tibuk diba tenebibirye, el tibuk talibibirye, el deiceuk nun kanye deilinamabe. Ara talye ati kuma. Deiyok ara, nun ni koproba Allah Yahweh, aning-aning deice tam erebuka, Mikip Weiknye ulula anya arye, pia melibuka kalikisiliba, el amu tamuk unamabe! Winipmanto ara, weik mutuku bukamlye keil, dama duknul bitibirye, pia teleb kibuka utibye touk, Allah aryuk nunti, melibuka kalikisulule. Allah ara, pia kum bataknamsile!

⁵ Tonda, Allah arye sik talima erepdakirye, maknya kintininyak nang ara, sik weik asik mutuku dup doptinga babye, Allah arye sik domikce asik ulubuka dakloplirye, anang ara, amu tam kililule. Ara, sik anang arye, pia teleb weik asik dobuka unyak mutuku-mutuku nirya ara, Allah elce ulubuka bataklopliba, tuku deice butbuta noutamuk delilule.

⁶ Anyasik-anyasik nirya akunum ulubuka bataklopura, sik talye bona utotoa kumce talye unyak nang ap, ikin upliba, kanye imun kanye bobuka unyak nang ap arye, amutuku uamuk ning nirya deice ara, yanipdongobuka bindopnamake.

⁷ Allah ance nyasiminye yupu talibuka, dipsukumuk unyak nang ara, sikda teleb ulye bisikuk banyake. Welepmana, koulukmana bisik kum banyake. Dipkoprop, anda, pia telebuk, diksukum ulamlinye bira, an yupu talibuka telebuk unyak nang ati ara, Allah ance, sik anang bisik bana ati, akunum telebuk yalilyame.

⁸ Nun ni koproba Allah, ance nunti, “Anggunda aninguk wininamlume, aning ara, pia kum wininamlume,” nyabuka nyalisiminye ninguk, talibuka dobolbanyabe. Tonda nunce, ‘Se, nun ni Allah, el ap, elce mambul weik pil dolul ning ap, ninye mutuku sirya, im sirya nirya kel biktinge,’ teneplirye, nun kanye talima ap, nun tenen ning ap nirya deice arye, antibuk patasiliba, tuba-tuba tenikinyabe.

⁹ Lukunyan talak noutam nirya ara, na kanye dobuka, an deiceuk deipnirye, antibuk tuba tenekunune. Wininmanya ani, atalak-atalak nirya ara, na nong ap, na kanye talima ap nirya dobuka, an deiceuk deipkinirye, ‘Allah dan talak yanuka melilyanamnilʼ tenen, ekunune. Deiyok ara, an tamubuka yamince, tukwak mutuku, mutuku sirya, im sirya nirya, noutam arye, ance, “Aning ara, wininamlume, aning ara, pia kum wininamlume,” nyabuka nyapdeipsulum yupu kekebikirye, kel bikikcopura, anang yala-yala nirya ara, ‘E, diksukum winina ara, ani,’ tenebikirye, moubuka kel biknamake.

¹⁰ Malye ulamlinye biti, bico tenebuka, el malye ulamlye ning ati, kum wenebikirye, elti, telebuk kipdeibikcopura, amalye ulamlinye birye, ‘Teleb winin ning ara ani,’ tenebuka, nukuka kum kel biknamle. Diksukum teleb kibuka ulamak mutuku noutam, yuk nang arye teleb ulamaka babye, pia malye ninguk wininamle. Allah el pia teleb weik winilye ning ap, el mikip weik winilye ning ap ara, moubuka kum kel biklirye, Allah el si kum erenamle.

¹¹ Se, na ni Allah Yahweh, ance sik malye weik unyak nang ati, yu tenipmince, ‘Anang wenepnamneʼ tenen, kintinip deipmalam ning ara, pia kum tenebikirye, kel bikuka kum elinyake. Ance an mapu ati, ‘Bicoe, sikda dipkoprob melibuka kalikinamne,’ tenipmince, melinamlam ning ara, sik amalye wininyak nang kum eilinyaka anya arye, ance aning lak kipdeipminba, eiptingopura, aminyan ara sikce, ‘Se, nun malye wininyabe,’ tenen, ilil upliba, alye dakanamake. Ance sik malyeuk wininyak nang ati, yu weik upkiliba, ance wenebuka opnamalam nang ara, akunum kintinip deipmalam ning ara, sikti, wenebuka opmince, uku buk dilamle touk, anang kum kipdeipnalame.

¹² Nun ni koproba Allah Yahweh, ance nun an mapu koprop nirya ati, pia teleb kilinamsilame. Deiyok ara, nun pil dolamupu ning nirya ara, dipkoprob ancuk nunti meliamsuluma deice arye, apil teleb kibuka domsulume.

¹³ Se, nun ni Allah Yahweh, yuk mutuku nang arye, nun dam yanuka, obuka sirya daksikba, sik ninye deiyok kiamik Raja nang arye taleamsike. Bukni, nun ni Allah, nunda an siuk erekinyabe.

¹⁴ Sik akunum diamik nang ara, akunum dibika anya arye, tamubuka kum kam buknamake. Sik akunum dipmak nang ara, sik kanye tenenanye ara, ton ap kum kam unamake. Aning deiyok ara, sik anang ati, Allah ance weneplumce, akunum obuka kum kipdeiplume. Aninguk kum bukni, yuk-yuk nang arye, amalye wininyak nang tuba teninyaka ara, ance sik teninyak ning ara, ance kum kipdeipmala anya arye, anang ton ap tuba kum teninamake.

¹⁵ Bukni, nun ni Allah Yahweh, ance nunti, an mapu koproba ara, akunum melilamsulumba, nunda tabakuka ton ap akunum teleb kipdeipsiminba, weik unamabe. Nunda Yudea tam unyap nang ara, akunum meliamsuluma deice arye, nunda ton ap tabakdeipsiminba, nun yala nang weik tonun upnin babiba, ninye nirya ara, ‘Se, Allah ara pia telebuk ulule. Elce pil dolul ning ara, mambul pia weike,’ tenebikirye, an si erekinyake. Tonda, nun talinyap mutuku tuku ara, ance weik tonun ton, tabakuka arepsiminyeba, nun tam weik ton upliba, talinyabe. Ati, nun babye, an siuk erekinyabe.

¹⁶ Se nun ni Allah Yahweh, nunda ikin weik ulamupu talak ara, ‘Allah aryuk melipnamsilʼ tenen, anti morolamkupu. Ance nunti akunum wenyapsulumba, kanye imun ulamsuka ani, nunce, ‘Nun ni Allah antibuk, melipsilyame!’ nyabuka, morolamupu.

¹⁷ Winipmanto ara, mi bomikce kilapu, mi deipnukce talak upliba, mi deiya dilirye, uk diliba, ngalukuka dolamak touk, ikin weik ubupu talak noutam arye, nunce Allah an dam ati, ngalukuka moropkupe.

¹⁸ Winipmanto ara, nunda mi bomupu ani, mi deilin talak kibukba, mi deiya uk dibuka, uk dilamle touk upsuke. Bukni, mapu ara, kum deibupe. Talye dei bukun ninguk kibupe. Ati, nunce yuk tukwak mutuku unyak nang, nun mal olan nang ton, kum obuka sirya dakupu. Tonda, mapu weik ton kum deibupeba, yuk mutuku sirya, im sirya nirya, binuka kum ulamik, ton kum unyake.

¹⁹ Nun ni Allah, an mapu koprop bukni, akunum min arye diamik nang ara, aminyan ance kam bukeipminba, kam unamake. Sik deiamik nang ara, akunum tuku palibuka wiamik bukni, sik nong ara, tamubuka kam buknamake! Tamubuka kam bukmunyopura, weik tonun kanye deipmunce, weik yupu weik tonun mot nyapnamlume! Winipmanto ara, mok purye tuku deice saklirye, dua pito weleplirye, dirina arye teleb ulilamle touk upnamle. Aning deiyok ara, Allah ance an mapu akunum diamik ara, tuba tamubuka, kam bukeipnalame.

Allah arye, Israel nang lipsisikuka yupu bokeipnamla ati, nyabuk yupu

²⁰ Se, na kayapu, anggun Yudea tam ululum nang ara, anggun aik noutam wilibuka dopmunye mitik aik ton wekel bimunce, adiparyuk, anyaik bublan tirikdongopnamlume. Tiya talak ati, anggunda asukumuk duknubuka anyaik pumuk unmamunya ani, Allah el yu ubuk ning ara, kum danamle.

²¹ Aning ara, talye ati kuma. Deiyok ara, Allah Yahweh, el unak im deice arye tukwak mutuku yalirye, amutuku unyak nang arye, malye weik unyak ning ati, yanuka wenebuka oplopnamle. Tonda, sik atukwak mutuku unyak nang arye yuk nang ati, duknubuka oltakanyak ning ap, tenipnarye oltakanyak ning ap ara, yanuka lak kipdeipnamle. Tonda, sikce obuka tuku pum weinyak nang babye, Tuku pum danyuk kum unamake. Ton nang arye, yuk nang ati duknubuka olamik nang nirya ara, lak kipdeipliba, ninye nirya ara, kel biknamake. Ninye omikak arye, lak kipdeipnamle.