Yesaya 25 - Eipomek

Allah Yahweh ati, si erebuka mot nyabuk yupu

¹ Se, na ni koproba Allah Yahweh, narye antibuk, an si erepkinirye, anti si erekunune. Tonda, antibuk, ‘Telebe,’ nyabuka, an siuk erekunune. Deiyok ara, Allah ance min talak arye, ‘Apil dopnamle,’ tenyamlum touk, aninguk ninye winipman kum pil, ance akunum dolyame. Allah ance, ‘Aning ara, winipnamne. Aning ton winipnamne,’ tenyamlum touk, dipkoprob winilyame. Ance pil dolyam ning ara, pia ilil weik ning pil dolyama anya arye, aning nirya ara, pia ati unamle. Tonok babye, min kum kum datue. Aning ebuka kel bikisirye, pia weik tonun si erenamkine.

² Tonda, nun mal olan nang arye dolamik weik asik ara, ance akunum malye kibuka, sice bukloplume. Amutuku noutam ara, sikce keil memebuka taplakuka dolamik asik nirya ulubuka batakmunyeba, akeil nirya ara, talye tukwak deiplopmunyeba, aupnamle. Ati, anyasik dolamikak nirya ara, oldemuk upnamle. ‘Yu nang arye olyasikcakʼ tenen, mikip arye dolamik weik asik ara, akunum ulubuka dakloplume. Tonda, sik yuk pera mutuku yala nang arye, sik talibuka ulamuk ninye deiyoknye Raja arye malamuk aik ara, ulubuka daklopmunce, sice buklopbuka, kum kipdeipnamluma anya arye, anyasik ara, tuba ton ap lipsisikuka pia kum dopnamake.

³ Winipmunya ati ara, mikip weik nang, yuk-yuk mutuku daunyak nang nirya ara, Allah anti si erepkikirye, “Se, elda mambul weiknye ulule,’ nyabuka, si erenamkiyake. Tonda yu weik ap, malye kina ap unyak nang ara, sik mal olan nang, talye kanye bobuka olbanyak bukni, an tonok ati ara, weik tonun ilil upmalibuk, unamake.

⁴ Aning babye talye ati kume. Deiyok ara, ance sik mikip mitang nang ap, aning-aning kum talikirye, pia bona utoto kum nang ap ara, ancuk sikti, kalikuka melinauk ulyame. Ati, ‘Elcuk melibuka kalikinamsilʼ tenen, an damuk wekelyanganyake. Aning-aning nirya patanauk unyak nang, sik bona utoto kum nang ara, sik kanye imun ning uplyopura, sikce an damuk wekelyakirye, tunim nyabuka talibukba, telebuk unyake. Weik kumanya ap, mok ap, yanganmalya babye, ancuk sik lelildongonanye ulyame. Tonda, keting buppu weik yu ning upmalya babye, ancuk sik lelilongonanye ulyame. Tonda, pia malye yu nang arye olyanamak talak ara, weik kumanya ap, mok ap arye yangalamle touk ubuka, olyanamak talak ara, ancuk sik mikip kum nang ati, kalikisilyame.

⁵ Winipmanto ara, mek pia kumak, kata mutuku noutam, buppu weik unmanya mikip arye balamle touk, Allah an mikip weik deice arye, nun mal olan nang nirya, mikip arye oplopmince, sirya daknulyame. Yu weik keting dinmaliba, dua arye lelilongolamle touk, ance aning atonun ubuka winisilyame. Ara, sik malye weik ap, malye kina ap, ninye mal olan nang arye, ‘Anang opnuyapʼ tenen, malye nyabuka, weik yupu arye ngalukunmakiba, kekebibirye, ilil weik usulul bukni, ancuk, lelilongosimince, anang kum kipdeipmince, nunti kanye tamubuka teleb kipdeipsilame. Sik yu nang dobuka, an amu tam kipdeipnamlame.

Allah arye weik kalina kwalibuka kintinip deipnamle ning ati, nyabuk yupu

⁶ Asukumuk, Sion mutuku deice, Allah arye, weik kalina kwalibuka kintinip deipnamsile. Allah Yahweh ara, aning-aning deice tam erebuka, mikip weik ulinye birye, im deice yin talin malaikat talilule. Elda, mikip weiknye birye, mutuku sirya, im sirya nirya unyak nang, sik din ati, weik kalina kwalibuka kintinip deipnamsile. Elce pia teleb-teleb din ning, ap, tup kalimna ap, meta ap, yok noutam wamlye ning ap, tonda anggur duk yu mek, pia to ning ap, wibuka teleb ninguk kintinip deiplirye, kwalibuka arepnamsile.

⁷ Tonda, amutuku kon ara, Allah elce, tukwak mutuku, mutuku sirya, im sirya nirya unyak nang dibikiba, baju dobuka, sik nong ongolamak ning dobuka, kum kipdeipnamle. Ara, ninye yala-yala nirya dibikcopura, sik nong ongolamak cang baju doplirye, kum kipdeipnamle. Deiyok ara, ninye mutuku sirya, im sirya nirya unyak nang arye, dibina deiyok ning ati, ilil weik ulul ning ara, Allah arye kum kipdeipnamle! Aminyan talak ara, ninye ton kum dipnamake! Dibina deiyok ning tamubuka yanmanto kum upnamle.

⁸ Dibina deiyok ning akunum kum kipdeiplyopura, Allah Yahweh ara, aning-aning deice tam erebuka, mikip weik ulinye birye, im deice yin talin malaikat talilule. Ati, el mikip deice arye ninye mutuku sirya im sirya nirya ara engenyaka deiyok ning nirya ara, kum kipdeiplirye sirya daknamle. Tonda Allah arye, ‘Na tenen nang unamakʼ tenen, minop talak wibuka akwamsuk nang ara, tuba tonap teleb kipdeipnamle. Ara, yuk-yuk mutuku nang arye, el ‘Naʼ tenen, nang ati, sik nong deice ikin ning weik delilamikba, alye dakuka ulamik ning deiyok nirya ara, Allah arye aning dobuka pia pere sukum donoknamle. Ura, aning nirya ara, Allah Yahweh aning-aning deice tam mikip weik ululnye birye, el bidamnye akunum nyapdeipsuka ati, aning nirya ara, dipkoprob nong upnamle.

⁹ Atalak ara, nunda el ‘Naʼ tenen, nang arye, “Anggun nirya dilulume! Dipkoprop Allah Yahweh, elda nun ni koproba Allah ulule. El siuk erenyabe. Minop talak arye, dipdongobuka atalak noutam babye, nunce, ‘Se, Allah atibuk, dan talak yalirye, nunda lepnamsil do?’ tenen, pia dinauk ulamupu bukni, wini talak ara, akunum yale! Dib Koprop el atibuk, ‘Dan talak melilyanamsil do?’ tenen, dilamupu. Bukni, wini talak ara, el akunum yanmasile. Elda, nun Lyena Deiyoknye usulula anya arye, adiparyuk pin-pin kanye bobuka upbibirye, elti, buk si erebibirye, kil-kil asa unamabe. Ara, elce nun akunum lyepsuka atia.” Aning nyanamabe. Kanye deibuka unamaba ara, talye ati kum bukni, Allah Yahweh, el taruk mikip, amutuku dup, Sion mutuku dup deiplirye, nun lyepdopnamsila ati nyapsine!

Allah arye Moab tam unyak nang wenepnamle ning ati, nyabuk yupu

¹⁰ Aminyan talak ara, Allah elce el mapu nirya ati melipnamle bukni, Moab tam unyak nang ati ara, sik unmakcak uk, yaniplirye, amu tamuk kipdongopnamle. Winipmanto ara, weik pala bental sukum, basam dei ap aupmalyopura, ‘Bental ap, dei ap bolpipsilyakʼ tenen, maning ap, yo mutmuta ap dobuka, bental deice deibikcopura, yanilamak touk, Allah arye sik Moab nang ati, wenebuka yaniptapnamle.

¹¹ Atalak noutam ara, sik Moab nang arye, ‘Se, lyepsutu do?’ tenen, sik taruk erebuka moropnamaka babye, Allah arye anang pia kum melipnamle. Winipmanto ara, ninye arye, ‘Mek kwen danau deice mek kekuka binuyabʼ tenen, sik taruk bibikuka kintinilamak touk, sik Moab nang arye, ‘Allah melipsutueʼ tenen, taruk erebuka moropnamake. Bukni, malye nyabuka moropnamaka babye, Allah arye kum melipnamle. Sik talima erebuka, maknya kintinilamika ara, Allah weneplirye, sik talima amu kipdeipnamle. Winipliba, sik anang ara, alye dakanamake.

¹² Tonda, Moab mutuku nang arye, ‘Yuk mutuku nang arye olyasikcakʼ tenen, cang weik keil dobuka taplakuka deiamikce, cang weik ning ap, keil poka ap, dolamik ning nirya ara, Allah elce ulubuka, tuku deice siplopliba, atu kiplirye, sung-sunga atonun upnamle. Aning nirya pia kum kipdeipnamle!