Yesaya 24 - Eipomek

Allah arye, tukwak mutuku nang nirya ati wenebuka, sirya daknamle ati, nyabuk yupu

¹ Wini talak ara, Allah Yahweh arye tukwak mutuku nang nirya im sirya, mutuku sirya nirya ati, obuka sirya daklirye, sice buklopnamle. Tukwak mutuku nang nirya malye kipdeipnalamle. Winiplyeba, tukwak mutuku nang nirya ara, lo uk upnamle. Tonda, Allah elcuk, mutuku lulukna arepnamsil deice arye, tukwak mutuku urasin nirya ara, tamuplirye, malye-malye kipdeipnamle. Winiplirye, tukwak mutuku sirya, im sirya nirya unyak nang nirya ara, yakdonoklyeba yuk-yuk dabindopnamake. Teleb kibuka tonok mutuku noutam neika kum unamake.

² Tukwak nang nirya ara, sisi nang babye tonda weik nang babye, talye nang babye, ikin weik unamake. Ara, imam nang babye, talye daunyak nang babye, atonun ikin kanye bobuka unamake. Tonda, pil talye dona ati, yo bok kum dolonyak nang babye, sik deiyok nang babye, atonun ikin unamake. Pil talye dobikirye, yo bok kum dolonyak kilapu babye, sik deiyok kibuka unyak kilapu babye, atonun ikin unamake. Bona patan nang babye, abona dekelyanganyak nang babye, atonun ikin unamake. Yo bok tia ati arinyak nang babye, yo bok pataplyeba tia ati yo bok dolonyak nang babye, atonun ikin unamake. Tonda, bona talinyak nang babye, bona talina kum ati talye kankan nang nirya babye, atonun ikin unamake. Allah elce tenebuk touk, winiplyeura, sik nirya atonun ikin ning yalyeba, doprobikirye, ikin kanya unamle.

³ Allah elcuk mutuku sirya, im sirya nirya, tuku urasin ara tamupdeiplirye, malye kipdeipnamle. Tonda, talibuka nyiklopnamle. Allah Yahweh elce, ‘Aning ara akunum winipnamne,’ nyabuka laka nyapdeiamuka ati, aning nirya ara dipkoprob Winipnamle.

⁴ Tukwak mutuku nirya ara, miklirye koulupdopnamle. Mutuku sirya, im sirya nirya ara, ikin kanye upnamle. Tonda, tukwak ap, im deice ap ara, sik nirya malye weik uplyeba, ikin kanye upnamle.

⁵ Tukwak mutuku nirya ara, malye kipdeipnamle. Akunum winiplyopura, tukwak mutuku unyak nang nirya, amalye kipdeiplye mutuku tuku deice uk unamake. Ikin weik unamakak ara, talye ati kume. Deiyok ara, Allah arye, “Anggunda, na nyapdeipsise ning ara, ‘Aninguk pia talibuka unamlume. Aning ara, pia kum wininamlume. Tonda, teleb winin ning ara ani, malye winin ning ara ani,’ nyapdeiamse yupu ara, tukwak mutuku nang nirya arye, aning batakuka unyake. Narye, ‘Aning ara pia ati talibuka unamluma ati, tonoknye babye kum bataknamlume. Tuba talibuka upnamlume nyapdeiamse yupu ara, tukwak mutuku nang nirya arye, aning batakuka wininyake. Wininyaka deice arye sik unyak mutuku nirya ara, mining dam arye, malye kipdeipnamne.” Allah arye nyabuk.

⁶ Tukwak nang arye, pia malye unyakak ati, Allah arye atukwak mutuku sirya im sirya nirya ara akunum subukce malye kipdeibuk. Winibuka ati, amutuku unyak nang, sik malye ulamik ati, akunum Wenebukba, ikin weik unyake. Sik tukwak nang nirya ara, akunum dibinyaka ati, tukwak mutuku nang sirya dakalula ati, wini talak ara, ninye mitik tonunuk tuba kam unyake.

⁷ Aning atonun, anggur duk moulamle tapu ara, sesal selule. Winilula ati, anggur duk babye kum danin balamya ani, anggur duk teikicak arye, kanye walwalanmek ton, kum memeptinga ati, aning babye kum kipnin balule. Tonda, anggur mek ara adiparyuk kum dopropmanto ulula ati, aning dikikirye kanye delinyak nang nirya ara, malye kanye uk bobuka unyake. Atalak ara, sik bouku sukuna deice uk ukirye, pia ‘Se,’ tenenauk unamake.

⁸ Aning atonun, bung-bung ana, el si ara kecapi ap, tabunan ap, rebana ap, bobikirye, lelim nyabikceba, tonap kekelamak touk pia kum kekenamake. Alelim kekebikirye pin-pin upneba, kanye deipnarye, karye olamik ning ara, akunum tunim abuke.''. Ikin weik ulula ati, ninye arye tuba kanye deibuka kum unyake.

⁹ Kanye kum delinyaka ati, anggur mek dipnarye, mot nyalamik touk, tonap pia kum nyanamake. Tonda, yu nyalamle anggur mek dibikceba toh nyaplyeba, kanye delinyak touk, tuba kum ulule. Atalak ara, aning dibikce babye, toh nyalamle touk kum nyanamle.

¹⁰ Weik asik dobuka unyak mutuku noutam nirya ara, aning-aning nirya pia malye uplyeura, amutuku nang nirya ara, ‘Se, yata wiriptibye do?’ tenen, nyalakirye, malye nyabuka, ngalukuka banyake. Ati, anyasik-anyasik dobuka anoutam unyak nang ara, ilil weik uplyeba, ‘Yuk nang arye nun aik weksicak tenen, sik babye malamikce aik nirya ara, bublan nirya akunum tirikdongobikirye, kunci kipdogobikceba, yuk nang nirya ara kum wekmanto unyake.

¹¹ Anggur mek nirya mitik uplyeba, aning nirya dipdobikceura, akunum kum dalya ati, amutuku unyak nang nirya ara, bisik noutamuk bakirye malye nyabuka ngaluknin banyake. Tonda, minop talak kanye deibuka ulamik touk, tuba kum unyake. Amutuku-amutuku nirya noutam ara, kanye deibikirye, teleb Kanye bobuka, pia kum unyake.

¹² Ninye asik dobuka ulamik mutuku nirya ara, akunum ulubuka batakik ati, dola uk ulule. Tonda, anyasik dobuka ulamikak wekelban bisik bublan nirya ara, akunum dakuka, sice buklobuk.

¹³ Aikin upnamle ning nirya ara, dipkoprob winipnamle. Arup nyapman touk, yuk mutuku im sirya mutuku nirya unyak nang ara, sik anang wininamaka atonun, yuk mutuku im sirya, mutuku sirya nirya unyak nang babye atonun Winipnamake. Kiklilena ati ara, Winipmanto ara, zaitun yo duk mouwamlya, dakuka lilamak li talak uplyeura, ayo taruk sekikceba, zaitun duk tukwak saklyeura, zaitun yo duk tonok ning babye, tuba kum ulule. Tonda, anggur tapu duk dakna li talak akunum uplyeura, amou amalye ning nirya dakuka libikirye, sirya dakanyake. Pia tonok duk ton kum batakanyake. Tukwak nang mutuku sirya im sirya nirya ara, aning atonun, mitik tonunuk upnin banamake.

¹⁴ Aminyan talak ara, kanye imun ning noutam arye kam tuba unamak nang ara, sik Kanye deibikirye, weik yupu deice arye mot nyapnamake. Atalak ara, keting komulban tam ulamice nang arye, Allah Yahweh el Weik Erenanye birye, mikip pil dolul ning ap, pia telebuk ulul ning ap atibuk, laka nyabikceba, kekebikirye, Allah ati si erenamake.

¹⁵ Aning ati ara, anggun keting palanyangan tam ululum nang nirya babye, Allah Yahweh ati, si erelulumce, ‘Naio, anda pia telebe nyabuka, el siuk erenamlulume. Aning atonun, weik laut mekwen lilun tam ululum nang babye, Israel nang kalikuka melilul nye, anggun ni Allah el si Yahweh atibuk, ‘Anda pia telebe, pia mikip weik mambul pil dolyame,’ nyabuka, el siuk erenamlulume.

¹⁶ Mutuku sirya, im sirya tam arye, Allah el pia teleb ulul ning ap, mikip pil dolul ning ap ati, yuk-yuk mutuku nang arye, el si sibuka erebikceura, nun Yudea mutuku noutam unyabuk, Allah elce talibuka usulul Israel nang arye kekenamabe. Allah ara, malye un ning tonok ning babye kum ulirye, pia Teleb Diksukum Ulinye ulula ati, dopera mutuku nang arye, el si erenamake. Winipnamak bukni, na Yesaya bira, weik ikin kanye bopnirye, ngalukuka tuba engenamne. Malye kanye bobuka engenamabe, bol malye bopnamnarya! Ara talye ati kume. Deiyok ara, anggun tenena arye tilila yupu nyakirye, yuk nang ati malye weik nyabuka uanyake. Dipkoprob, sik malye unyak nang arye, tuba-tuba tilila yupu nyabica deice arye, yukupdobikcak arye, yuk nang ati malyeuk kilinyake.

¹⁷ Tukwak nang nirya kekeplulume! Mutuku sirya im sirya nirya ululum nango, anggun nirya ati wenen ning ara akunum kintinibukce, anggunti kalikuka disulule nyapsine. Aminyan weik ikin ning yanamsila ati nyapsine.

¹⁸ Yata nang do nirya, ‘Se, aning ara, winipnamsile,’ nyabikceura, weik lelim kekebikirye, bai sakuka binamlanye babye, youn ning, el si ara tapu wen pum bisik weklyeba youpnamle. Aning pum bisik weknamle bukni, lyepdalirye panabuka bilinye bira, tuku deice delinyak wena pum bisik Wekuka, aminyan babye youna uk upnamle. Tonda, im noutam paklirye, mikip weik mok saklyeba, tukwak mutuku nirya ara langdiplirye, weik arye bukuka darapdongobuk mutuku nirya ara loknamle.

¹⁹ Aning nirya akunum winiplyeura, tukwak mutuku nirya ara, weik arye luluknauk ulirye, pia obuka nyiklopnamle. Tonda, tabakuka, tukwak nirya aminyan ara liknamle.

²⁰ Tukwak mutuku nirya loklirye banauk upnamle. Winipmanto ara, yu mek dipmace nang ara, kanye bona kumce, wiring-wareng apdanin balamak touk, mutuku nirya ara loklirye bana uk unamle. Tonda yo taruk arye, mitik dolina aik donmica ani, weik kum yalirye peiyakuka, otam, atam kilirye, lokuka poulbalamle touk upnamle. Tukwak mutuku uluplopnamla ara, ninye arye malye unyaka menenga arye Winipnamle. Tukwak mutuku dakuka bataklyeura, tonap tamubuka ereiplyeba, teleb kibuka yan kum upnamle.

²¹ Atalak aryuk Allah elce, im noutam balamle isa do, yuk malye weik ulye ning nirya do, aning nirya wenebuka opnamle. Tonda, mutuku sirya im sirya nirya ninye deiyok kibuka talinyak bukni, malye weik unyak deiyok-deiyok nang nirya babye, wenebuka opnamle.

²² Sik aning ap, anang ap nirya ara, tuku pum tam arye bulubuka tonokak uk deipnamle. Ara, ninye arye malye winibikceura, deiyok nang arye anang bulubuka, wenen aik dongolamak touk, Allah arye amalye un ning nirya bulubuka tonokak pum tam uk deipnamle. Sik anang ara, asukumuk deibuka bublan tirikdongobuka, weik tonun ton asukumuk daulamikca ani, aminyan talak elce tenyamlye talak akunum kiplyopura, atalak aryuk amalye un ning nirya ap, malye unyak deiyok nang ap wenebuka oplirye, kum kipdeipnamle.

²³ Aning akunum winiplyeura, atalak ara wala dirina ara, mitik tonun kunuknamle. Aning atonun, keting buppu weik ulye ning ara, mitik tonun ikip upnamle. Ara, talye ati kume. Deiyok ara, Allah Yahweh, aning-aning nirya talibuka, deice tam erebuka, mikip weiknye birye, im deice yin talin malaikat nirya talilule. Elcuk aning-aning nirya deice tam ulirye, aning nirya talibuka Raja kipnamle. Elce Raja kibuka, Yerusalem mutuku noutam bukni, Sion mutuku kon unamle. Tonda, Allah Yahweh arye, el pia teleb ulye ning ap, mikip weik pil dolul ning ap, el dirina ap, ‘Ninye nirya eipnamakeʼ tenen, laka kipdeiplyeura, sik Yerusalem mutuku noutam unyak deiyok-deiyok nang nirya arye eipnamake.