Yesaya 23 - Eipomek

Aminyan talak ara, Allah arye Tirus mutuku nang ap, Sidon mutuku nang ap, wenepnamuk ning ati, nyabuk yupu

¹ Tirus mutuku nang wenebuka malye kipdeipnamle ning ati, Allah arye na Yesaya dam yanuka nyapdeipnuke. Ayupu ara, ani. Weik laut mekwen deice balamle kapal, Tarsis pia mambul kanye bobuka engenamlume. Deiyok ara, Tirus mutuku weik asik domik ning ara, akunum ulubuka daklobikce, sice buklobik. Sik laut mekwen deice kapal talin nang ara, otam laut mekwen dana-dana tam dukdongamuk mutuku, el si pulau Siprus arye binamuka, Siprus mutuku dam mekwen deice yanuka deipmek talak ara, Siprus mutuku nang arye anggunti, “Se, otam keting kumulban tam, weik asik Tirus mutuku ara, akunum obuka bataklopnamake,” nyanmikak kekenmek. Tonda, “Tirus mutuku laut mekwen deice ban kapal delilbanak ap, amutuku ninye aik nirya ap ara, dakuka sice buklopnamak,” nyanmekak, sik Tarsis mutuku kapal laut talin nang arye, ayupu kekebuka bikik.

^2-3 Aning ati ara, anggun laut mekwen lilun ululum nang, weik asik si ara, Sidon mutuku ululum nang babye, Tirus mutuku akunum obuka bataklopnamaka ara, tenepmunce anggun kanye pum tam arye tunim abuka engepnamlume. Tonda, anggun Sidon mutuku ululum nang arye, anggun kapal deice bukuka, laut mekwen deice balamlumce, yuk karin mutuku bona dekelbalamlumce, amutuku tamubuka boyangalamlume. Tonda aning dekuka, anggun mutuku tamubuka boyangalamlume. Winibuka pil dolamlum nang ara, anggunce yupu ton kum nyapnamlume. Bukni, yupu nyana kumce, anggun kanye lukdanukapmunce, engenamlume. Anggun mekwen deice balul kapal deice arye, dan mutuku do nirya ara, okaren tam laut deice akunum bana uk ulamlume. Anggunce bona weik dekamlumce, aning bobuka yangalamlume. Winipmanto ara, Mesir mutuku noutam ulul mutuku, Sihor mutuku arye, gandum duk dekuka, anggun mutuku tamubuka boyangalamlume. Aning ara, Mesir mutuku noutam balamuk weik mek, el si Nil mek lilun kounyak gandum duk binuka dekelamlume. Aning pil dolamluma deice arye, sik yuk-yuk mutuku nirya ulamik nang ara, aning wininyamikba, sik bona yala-yala nirya babye, pia weik deklamik.

⁴ Se, anggun Sidon mutuku ululum nang ara, alye dakdanamlume. Ara, weik laut mekwen arye anggunti nyapsile. “Se, wini talak ara anggun alye upnamsila ara ani. Narye anggunti akunum bataksine. Minop talak ara, anggunda na mapu atonun ulamnulum bukni, wini talak ara, sal mapu babye, kilmapu babye, wel nang babye, wel kilapu babye, ton ap pia kum delinune ton kum delinune, tonda kum deipnyeba, kum nenyake.

⁵ Aning ati, aminyan talak ara, yuk nang arye, sik Mesir mutuku unyak nang ati, “Se, Allah arye akunum Tirus mutuku nang ara obukabukce, sik mutuku nirya dakuka sice buklobuke,’ nyabikceura, Mesir mutuku unyak nang nirya, tilila yupu kekepnamake. Kekebikceura, Mesir mutuku unyak nang nirya arye, Tirus mutuku nang ati, pia bico tenebikirye, ikin kanye bobuka, engena uk unamake.

⁶ Se, anggun laut mekwen lilun, Sidon mutuku noutam ululum nang ara, laut mekwen balamle ning, kapal laut wekmunce, bikbik abuka otam mutuku, Spanyol mutuku laut lilun, weik asik Tarsis mutuku dam binamlume. Anggun babye pia engenauk unamlume.

⁷ Se, anggun Sidon mutuku ululum nango! Anggun min arye pia teleb weik asik akunum dobuka deiamlumce, kanye deibuka ulamlume. Tonda, anggun mutuku arye, dekna deiyok nang ton dopdeibikba, anang arye yuk karin mutuku binuka, bona weik dekuka delilamik. Tonda, anggun mutuku koproba nang dopdeiplumba, laut mek batakuka otam karin mutuku binuka, tia talak ati, daulamikce, dekna pil weik dolamik. Bukni, wini talak ara anggunce sik mutuku dipdelulume! Aning nirya akunum obuka batakikce, sice buklobik!

⁸ Minop talak, anggun yuk-yuk mutuku nang nirya arye, sik Tirus mutuku dekna deiyok kibuka taleamlum nang ati, ‘Se, sikda dipkoprob pia mambuleʼ tenen, sikti, si erelamik. Tonda, sik Tirus mutuku nang dekna deiyok talibuka dekenyak nang ara, yuk mutuku sirya im sirya nirya unyak nang arye anggunti, ‘Se, sikda Raja atonun nang unyake tenelamik. Tonda, anggunda pia mikip weik nang ulamluma ati, yuk mutuku noutam arye, Ninye deiyok nang unamak tenen, ninye wibuka erepdeiamlumba, Raja nang ton, deiyok nang ton kibuka ulamik. Winibuka pia teleb ulamlum bukni, wini talak ara, yatanye birye, ‘Tirus mutuku nang ara, wenebuka opnamne tenyamukce, aning akunum winipto do? Anggun moubuka tenidenamlulume!

⁹ Kume dipkoprop, yuknye birye kume. Allah Yahweh, elcuk, aning-aning deice tam erebuka, mikip weik ulirye, im deice yin talin malaikat nirya talibuka, weik deiyoknye ululnye birye, aning ara dipkoprob winipname tenyamukce nyapdeibuk. Aning winibuka deiyok ara, talye ati kume. Deiyok ara, elce, ‘Sik kanye erepdakirye, kwalinyak nang nirya ara, na Allah arye amu tam kipdeipnamne,’ tenyamuk. Tonda sik tukwak mutuku nang arye, ‘Se, anang ara dipkoprob mambul weik nang unyake,’ tenebikirye, ninye si erenyak nang nirya ara, na Allah arye amu tam kipdeipnyeba talye nanguk unamake,’ tenyamukce, aning nirya akunum winipsuke.

¹⁰ Ati se, anggun Tarsis mutuku ululum nang ara, anggun mutuku koproba Tarsis uk, otam bimunce, anggun mutuku koproba dipdenamlume. Wini talak ara, laut mekwen deice balamle ning, kapal laut delinak ara, akunum kum kibuka ati, wini talak ara, anggun mutuku dana-dana tam nirya, noutam arye bimunce, tuku palibuka, wa winamlulume. Winipmanto ara, Mesir mutuku noutam arye, weik balamuk mek, Nil mek koubuka, dana-dana tam nirya balamle touk, anggun babye, anggun mutuku noutam dana-dana tam nirya banamlume. Deiyok ara, anggun laut mekwen deice balulum kapal laut delinak ara, akunum kum kipdeibika ati, wini talak ara, yuk pil talibuka donamlume.

¹¹ Allah Yahweh arye, el taruk ara erebuka, laut mekwen deice tam deibukce, weik kanye ikin pil akunum dopsuke. Tonda, Allah arye laut mekwen lilunak, ninye deiyok kibuka, weik mutuku talinyak Raja ap, sikce talinyak mutuku nirya ara, kanye ikin ning areamukba, sik amutuku-amutuku unyak nang nirya ara, ilil uplyeba, yok sirintalelule. Allah Yahweh arye, yu yin talin nang ati lo arebukce nyabuk. “Aning ara adiparyuk winipnamlume. Ponesia tam noutam ubuk mutuku-mutuku ap, weik asik domikca nirya ara, obuka bataknamlume,” nyadeibuk ati, Ponesia mutuku noutam unyak mutuku, mikip weik uamuk mutuku nirya ara, obuka bataklopnamake.

¹² Allah arye ayupu nyabuk. “Se, anggun Sidon mutuku nango! Anggun ton kanye deibuka, pin-pin asa arye kum unamlume. Anggunda akunum obuka bataksise. Anggun Sidon mutuku ululum nang nirya ara, ikin ning weik, anggun nong deice akunum deiamseba, weik ikin kanye bobuka ululume. Anggunda, ‘Yuk karin mutuku bibirye, otamuk teleb uptibye tenen, anggun mutuku batakuka, otam mutuku, laut mekwen antanap dongobuk mutuku, pulau Siprus mutuku binuka unamluma babye, amutuku noutam ton, dikdik sebuka telebuk pia kum unamlume. Ikinuk unamlume.

¹³ Dipdelulume! Babel mutuku ap, Babel noutam unyak nang ap ati moubuka tenepmunce, dilinamlulume! ‘Asyur mutuku nang ara, mambul nang unyake tenena kume. Deiyok ara, Babel mutuku nang aryuk, ‘Kume, sik Tirus mutuku nang ap, sik mutuku ara, obuka batakibirye, sice buklopnamabe,’ tenebikce, Babel mutuku nang arye, Tirus mutuku nang, sik weik asik dobuka, weik keil poka dobuka antanapdongamika nirya ulubuka sirya dakik. Tonda, Babel mutuku nang arye, ‘Tirus mutuku wekuka obuka sirya daknamapʼ tenen, weik cang keil aik dobuka deipnin balamikce, warikuka kaliklamik ani, sik Babel yin nang arye, Tirus mutuku ninye deiyok nang ulamik aik nirya ara, dakuka batakikce, sik bona deiamik ning nirya ara, alubuka doprobik. Sikce Tirus mutuku ara, akunum dakuka uluplobikba, amutuku ara talye asik ol dem batakik.

¹⁴ Anggun laut mekwen kapal laut deice bukuka balulum nang, anggun Tarsis mutuku arye tamubuka yanmalum nang ara, engenamlume. Deiyok ara, sik mikip weik kibuka ulamuk mutuku, Tirus mutuku ara, akunum ulubuka daklopsikba, asik oldiamuk ulule.

¹⁵ Tirus mutuku obuka, sirya dakikce talak arye dipdongobuka, doyanamle keting tamun 70 tahun noutam nirya ara, ninye arye tonap, Tirus mutuku pia lubakipnamake. Atalak keting tamun tujuhpuluh tahun mapnamak talak ara, winipmanto, tonok ninye deiyoknye Raja birye, el mutuku talibuka ulamlya ani, dipnamle talak atonun deice arye, Tirus mutuku tuba kum kintininamake. Aketing tamun 70 akunum uplyeura, tamubuka tonap telebuk upnamle. Ara, Tirus mutuku anda winipmanto ara, kil tonok ulamlyebuk, ninye nirya arye akiluk ubula yolamikce kil ati, mot sekuka nyalamak ning atonun winipnamlyame. Ara, amot nyanyak yupu atonun upnamkile. Aning ara ani.

¹⁶ “Anda ninye arye talye-talye yolamkika ani, batakikce, an si akunum lubakibkik bukni, wini talak ara, an kecapi bung-bung ana bobuka, amutuku noutam bobuka bamince, teleb-teleb kibuka bung-bung ana bobimince, mot teleb ning weik tonun nyaminyeba, amot kekenamak nang arye, anti tonap tamubuka tenenamkiake.”

¹⁷ Ati, keting tamun tujuhpuluh (70) tahun akunum uplyopura, Allah Yahweh arye tamubuka, Tirus mutuku ati ton teniplirye, tamubuka teleb kipdeipnamle. Tirus mutuku unamak nang ara, minop talak pil dolamik ning, ati tonap talibuka apiluk dopnin banamake. Ara, anggunce kapal laut dobuka kintinipmunce, anggun yuk karin mutuku sirya, im sirya nirya binuka, bona weika arye dekuka dolonamlume. Winipmunce, aning bobuka yuk mutuku nirya binuka, bona dekenamlume. Winipmanto ara, sik talye yolalamak kilapu arye, ninye nirya, talye ansinibuka neika malamak touk, anggun babye bona bobimunce, mutuku sirya, im sirya nirya binuka, dekelbanamlume.

¹⁸ Bukni, atalak arye dipdongobuka, dowinipnamle talak nirya ara, Tirus mutuku nang arye, yo bok weik dekuka dolonamak ning nirya ara, sikce sik ning ton kum moubuka delinamake. Ayo bok wekenamle ning nirya ara, Allah Yahweh el ninguk upnamle ati, Allah el tibuk bobuka arelyanganamake. Tonda, Tirus mutuku nang arye yo bok dolonamak ning ara bobuka, Allah Yahweh el tenen nang, el dam tuba unamak nang ati sik ak arenamake. Winiceura, Allah el mapu koproba, sikda teleb din weik tonun ap, teleb ongon baju ap, tuba dolona uk unamake. Allah arye na Yesaya ati, aning nirya laka nyapnuke.