Yesaya 22 - Eipomek

Aminyan talak ara, Yerusalem mutuku nang wenepnamuk ning ati, nyabuk yupu

¹ Na ulamse mutuku ara, Allah arye, “Do talak ara aning-aning winipnamle,” nyabuka, laka nyalyangalamuk talak ara, lu sukum mutuku unmase talak arye, ayupu yanuka nyapdeipnuke. “Se, anggun Yerusalem mutuku ululum nango, anggunda pia malye ululume. Ara, yata deiyok ati lukdanuka adiparyuk, ‘Pin-pin kanye bobukabikirye, lelim weik nyanamapʼ tenen, anggun ululum aik kat aik duma deiceuk welebalamlum do?

² Yata deiyok ati, anggun Yerusalem mutuku ululum nang ara, kanye deipmalumce, wini talak weik yupu arye nyanmalum do? Anggun mutuku noutam akunum opmik nang nirya ara, ninye olan talak parang ya arye, kum onmekba kum diamike. Kume, mal olanak arye, parang ya arye obikceba, kum dipnamake.

³ Anggun Yehuda tam ululum nang ara, anggun mutuku talibika deiyok-deiyok nang nirya ara, ‘Yu nang arye opsicak tenen, ilil ubukura, bikbik abuka bai sakuka bindopmake. Adice arye, sik yin deiyok nang ara, mal ton kum dopmak buk, adiparyuk yanuka opmasiake. Sik mutuku deiyok nang, mikip weik unyak nang babye, bai sakuka akunum karenak binmacebuk, sik mal olan nang arye dobolbinuka ona uk upnamake.

⁴ Aning ati ara, narye nyapsise. Anggunce na Yesaya biti, dinina kume. Nara, ikin kanye bopnirye, mikip weik arye engenamne. Anggunce nati, ‘Se, nun kwit bira, ikin kanye bopmala ati, nunce el kanye tamubuka teleb kib deipnune,’ tenena kume. Ara, na mutuku nang koproba nirya ara, weik arye bico tenenun bukni, yu nang arye anang akunum obuka kum kipdeipmaka ati, mambul kanye bopmane. Bukni, anggunce nati, ‘Se, nun ka el kanye baripnamabe,’ tenena kume.

⁵ ‘Nun ka el kanye kwadipnuyabeʼ, kum tenepnamluma deiyok ara nyapnusine. Ara, Allah Yahweh, aning-aning nirya talibuka, deice tam erebuka, mikip weik ulul nye, elce im deice yin talin malaikat nirya talilule. Dipkoprob nyapsine. Elce akunum tenyamuk sum tonok ton kipnamle. Asum akunum uplyeura, Yehuda yala nang nirya ara walwal kiplyeba, yupu pia weik nyapnamake. Ara, sik olan yin nang ara, yupa weika arye, Yerusalem mutuku wekuka yakirye, amutuku nang nirya obuka bataklopnamake. Tonda, alu mutuku nirya ara, pia malye kipdongopnamake. “Aning ara dotalak winipnamle ati, nyalyangalul mutuku, lu sukum arye upnamake. Sik mal olan nang yakirye, amutuku antanap dongobuka, dana-dana tam weik cang keil poka dobik ning nirya ara, ulubuka dakiceura, bataknamake. Atalak ara, Yerusalem mutuku unyak nang arye, “Se, melilyasilyame!” nyabuka, ngaluknamak ning ara, mutuku deice unmace nang babye kekepnamak bukni, kum yanuka melipnamake.

⁶ Sik Siria mutuku yin talin nang ara, ninye olbana ati kuda balye deice bukikirye yanamake. Ton yin nang ara, kuda basam arye libuka, tuku deice banyak ning, el si kereta perang, deice bukukabikirye yanamake. Atalak uk, sik Elam mutuku nang babye, mal ap, yin ap kintinibuka boyanamake. Tonda sik Kir mutuku yin nang babye, ‘Nun mal olan nang arye marapsicakʼ tenen, sik nong lelin ning, el si perisai, kintinibuka bobikirye, yanamake.

⁷ Se, Yehuda mutuku nango, Yerusalem mutuku dam bukni, sik tuku teleb lu sukum nirya ara, urasin pia teleb uamuk bukni, wini talak ara, mal olan talak ati, kuda basam arye libuka, tuku deice banyak ning, el si kereta kuda aryuk binuka deipmace ak, amutuku nirya ara langdipnamle. Tonda, yuk yin nang arye kuda balye deice uk bukuka binamak nang weika arye, Yerusalem mutuku weik asik weken bisik bublan damuk binuka kaliknamake.

⁸ Yehuda yala nang arye, ‘Nun mutuku noutam mal olana ati, yuk mutuku nang arye yanuka opsicakʼ tenen, kintinibuka deiamica nirya ara, Allah Yahweh, elcuk aning akunum kum kipdeipmale. Ura, yuk mutuku yu nang arye olyanmik talak ara, anggun Yerusalem mutuku ululum nang nirya arye, ‘Aning bopmunyakarye, melipdatibyeʼ tenen, anggun mutuku ninye deiyoknye Raja birye el aik dobukce, olan talak una ati deiamuk ninye on ninguk teneplume. Ara, Raja el un aik noutam wilibuka domuk aik, el si ara, ‘Gedung Hutanʼ pum tam, ‘Ninye on ningʼ tenen, weik arye deiamuk ning ati, ‘Aning melibuka lyepropsutue,’ tenyamlume.

⁹ Tonda atalak ara, anggunce Yerusalem mutuku noutam bukni, minop talak Raja Daud birye domuk asik, dana-dana tam weik cang keil poka dobuka lipdongamik ning nirya ara, dipdemunce, kin-kin weik tonun uamuk ning eipmunyeura, ‘Se, nun olyangansinyak nang arye, akinkin arye nun mutuku wekuka opsicak ati, awamuk kin-kin ara, lipsisikuka dopnamabe,’ teneplume. Tonda, ‘Nun yin ap, mek ap, kum dasilyak tenen, angguncuk, Yerusalem asik noutam balamle mek nirya bulubuka tonokak outam mekwen pum tam uk deipmalume.

¹⁰ Tonda, Yerusalem weik asik dana-dana tam antanap dongobuka domlum keil poka uamuk kin-kin dipdemunce, ‘Awamuk kin-kin nirya dukdongobuka lipsisikuka dopnamapʼ tenen, Yerusalem mutuku noutam dolalum ninye aik nirya, dipdenin banmalume. Ara, dan keil aik anyak nun keil poka uamuk kin-kin nirya lipsisikuka doptibye do?’ tenen, dipdenin banmalumce, uluplopmanto aik nirya ati nukunmalume.

¹¹ Tonda atalak ara, anggunce amutuku asik dolulum noutam ara, ‘Nun din mek kum dasilyakʼ tenen, anggunce winiryuk mek kwen ton lokdeipnamlume. Ara, min arye minop talak lokamlum mekwen arye, mek boyamunce, winiryuk loknamlum mekwenuk, yanuka dongopmalume. Amekwen ara, minop talak domik keil poka otam, winiryuk domik keil poka atam, anoutam arye winiryuk mekwen ton loknamlume. Apil nirya akunum dopmalum bukni, anggunce Allah ati moubuka kum tenepmalume. Ikin ning anggun dam yangalul ning nirya ara, nun ni koproba Allah, elcuk kintinibuka deiamuknye bira, anggunce elti, kum erenamlume. Tonda, anggun mal olan nang yanmangu ning ara, Allah aryuk lo arebuk arye, ‘Winipnamakʼ tenen, akunum tenyamukce, lo areamukba, anggun mal olan nang arye yanganmeke. Anggunce, ‘Yata wiriptibya deice arye lyepdatibye do?’ tenelamlum bukni, minop talak arye, sikce, ‘Winipnamake, na ton winipnamne akunum,’ tenyamuka deiyoknye Allah ati, anggunce ton, elti, moubuka kum tenyamlume.

¹² Allah Yahweh, aning-aning nirya talibuka, deice tam erebuka, mikip weik ulul nye, elce im deice yin talin malaikat nirya talilule. Atalak ara, Allah arye anggunti nyapsuke. Ara, “Engepnulume, weik arye ngalukmunce, engepnamlume. Tonda, engepnamluma ati, anggun kisok potong koplulume! Koplopmunye ning ara, anggunce ikin kanye bopmunyakarye, malye baju el si karung koni ongopnamlume. “Aning nirya ara, ‘Se, nun babye malye ulamubuʼ tenen, bikilina ati aning winipnamlume,” Allah arye nyapdeipsuke.

¹³ Nyapdeipsuk bukni, anggun Yerusalem mutuku ululum nang ara, teleb kanye bobuka pin-pin upsukba kanye deipmunce, weik kwalya kwalilulume. Anggunce sapi basam ap, domba basam ap, weik tonun opmunce, tup dobuka diplume. Tonda anggur mek dobuka diplumce, ayupu nyaplume. Anggunce, “Kume, anggun nirya yalulume! Nun nirya ara, anggur mek ap, teleb tup ning ap dibibirye, talye kanye bobuka unmanbe. Winibuka dibibirye, mapmapya bereklye sum ara, nun nirya dipnamabe. Ati ikin kanye bona kume,” nyabuka kanye deibuka winipmalume.

¹⁴ Allah Yahweh, aning-aning nirya talibuka, deice tam erebuka, mikip weik ululnye, elce im deice yin talin malaikat nirya talilule. Elcuk, na Yesaya dam yanuka laka kibuka yayukce nyapnuke. “Dipkoprob nyapne, Yehuda mutuku nang, anggun malye upmalum ning ara, kum lyepdopnamsine. Batakyeba, anggunda adiparyuk dipnamlume. Ayupu ara, na Allah Yahweh, aning-aning nirya talibuka, deice tam erebuka, mikip weik ununye birye, im deice yin talin malaikat nirya talinune. Naryuk ayupu nyapsine,” Allah arye nyabukura, na Yesaya birye kekepse.

Raja un aik kalikuka melinanye el si Sebna, wenepnamuk ning ati, nyabuk yupu

¹⁵ Allah Yahweh aning-aning nirya talibuka, deice tam erebuka, mikip weik ululnye birye, im deice yin talin malaikat nirya talilule. Elcuk na Yesaya dam yanuka nyapdeipnuke. Ara ance Sebna dam biminyeura, epdanamrume. Sebna bira ninye deiyoknye Raja, el un aik pil don nang nirya, sik deiyoknye ulule. Anyaik ning nirya kalikuka melilule. Aning ati ara, ance na Allah nyapdeipman yupu ara, el dam binuka nyapnulyame.

¹⁶ Seba biti nyapnulyame. “Allah arye nyapkile. Sebna, anda yata deiyoknye birye anti, ‘Winipnalyame,’ nyapkukba, aning winilyam do? Anda yatato deiyoknye ulyama ati, aning pil donmalam do? An kanye aryuk, ‘Nara weiknye ati, mambul deiyok nang dibikceba, amutuku keil deiya pum tam uk weinyaka ati, na dipnyeura, na babye asukumuk weipnamniake,’ teneplumce, an keil deiya wein sukum ati, ance akeil deiya pum tam palibuka kintiniplum do? Winipmalama ara, malye ning winipmalame.

¹⁷ Se, nara Allah Yahweh arye, anti, malye kanye bobuka ununa ati, moubuka tenenipnilyame! Na Allah Yahweh arye, an nong mikip arye talepkinirye, anda ninye deiyoknye pil dona ati, ninye deiyok kin ning arepkise ning ara, mikip arye alubuka dopropnirye, aning kum kipdeipnamkinarya.

¹⁸ Tonda, narye an ninye deiyok nang bunyak kursi deice arye dopropkinirye, bai tam dopkwetepnamkinarya. Na taruk mikip arye, an talibukapkinirye, bola dobuka donoklamak atonun upnamkine. Narye an bobuka pia karenak, pala mutuku noutamuk donoknamkine. Narye an bobuka, bai mutuku tam donokinyeura, anda amutuku anyuk binuka, dipnalame. Dipminyeba, ninye olbana ati dobuka delilyam ning, an kuda basam arye libuka, tuku deice balamle ning, el si kereta perang kintiniplum ning nirya ara, asukumuk pia daupnamle. Sebnao, an tam nang ap, an mapu silip ap aryuk, anti tenepbikirye, ‘Se, wini talak ara, nun deiyoknye akunuma. ‘Pia amu tamuk unmaleʼ tenen, anti alye weik dakalanamake.

¹⁹ Ati ara, na Allah arye an pil dona ati deiyok arepkuk ning ara, kum kipdeipnamne. Tonda, narye an weik bukna ning kursi deice buminya ara bobuka, dopkwetepnamkine.

²⁰ Winipkinye talak ara, narye na amu tam pil donanye Elyakim biti winipnamne. Elyakim el li koprop ara Hilkia ulamuk.

²¹ Narye Sebna an ninye deiyoknye bikilina ati ongon baju, bai tam ning ap, deiyatinga ap ara, dopropnirye, Elyakim el deice deipnamne. Ara Raja una ati, bikilina ati baju ap, deiyatinga ap ara, an pil talibuka dominya ara dobuka, el arepnamna atia. Na Allah arye an Sebna biti, ‘Ninye deiyok pil donamleʼ tenen, pil dona deiyok ning areamse ning ara dobuka, anye Elyakim elti, arepnamne. Ati, Elyakim bira, Yerusalem mutuku weik asik noutam unamak nang ap, Yehuda mutuku tam unamak nang ap nirya ara, sik ni koproba atonunye, sik deiyoknye unamle.

²² Na Allah arye, anggunda Daud birye deipsukba, dadeipdanin yangalulum nang, anggun duweit ululum aik bublan kukna kunci dobuka Elyakim biti arepnamne. Elda mikip weik arye anyaik talepnamleʼ tenen, bikilina ati, akunci arepnyeura, aning dobuka, el takunya deice diripkwetepnamle. Winipyeba, Elyakim elce akunci dobuka, anyaik bublan kukeiplyeura, yuk nang arye ton yanuka bublan kum tirikdongopnamake. Tonda, Elyakim birye anyaik bublan kunci kibuka tirikdongoplyeura, yuk nang arye ton kum yanuka bublan kukeipnamake.

²³ Na Allah arye, Elyakim elce amutuku nang deiyok kibuka talipnamle mikip ara, winipmanto ninye arye abilinga deice kirikil kwetenyak atonun kibuka ati, delin ning una deipnirye elti, mikip kipdeipnamne. Winipyeba, Elyakim elce amutuku nang mikip arye, teleb kibuka talipnamle. Tonda, amutuku nirya pia teleb kibuka taleplyeura, el li koproba Hilkia ap, el li koproba arye deibukba, dadeipdanin yangalamik nang ap, el tam nang sik duweit nirya ap ati ara, yuk mutuku nang nirya arye, aning eibikirye, ‘Se, elda pia telebuk pil dolula ati, mambul weiknye ululeʼ tenen, elti, si erenamake.

²⁴ Elyakim birye, pia teleb kibuka, amutuku ning nirya taleamlye buk, el mapu silip unamaka noutam arye, sik patan ning ap, sik ikin unamle ning nirya ap ara bobuka, el deice uk delinamake. Elcuk aning nirya pil donamle. Ara, Elyakim el si erebuka kina ati anggun anang weik ikin upsilye ning babye, mitik ikin upsilye ning babye, patana babye, el deice uk bobuka delinamake. Deiyok ara mitik ning babye unamle nyapne ning winipmanto ara, mangkok ap, panci mek yun makau ap atia. Ara, wisi nang babye, wel nang babye, weik nang babye, talye nang babye, sik nirya el deice kanye delinamake.

²⁵ Bukni, nara Allah Yahweh, aning-aning nirya talibuka, deice tam erebuka, mikip weik ununye birye, im deice yin talin malaikat nirya talenune. Narye nyapsine. Doyanamle talak ara, Elyakaim el mikip weik unamle ning ara, kum danamle. Winipmanto ara, ninye arye belanga yuna ati, dirilkwetelamaka atonun kibuka, mikip arye dobuka deiamik abilinga deice mikip kibuka deibikce ning ara, aminyan talak mitang uplyeba, saklamle touk, Elyakim babye, el mikip kum danamle. Winiplyeba Elyakim bira, kupsaknamle. Winiplyeba, ninye nirya, aning-aning nirya ap, Elyakim el deiceuk ulamice nang ara, sirya opnamake. Aning ara talye kum nyapsine. Nara Allah Yahweh ununa ati, narye nyapmasin touk, dipkoprob nong upnamle. Na Allah arye akunum nyapdeipsine, Allah arye nyabuk.