Yesaya 21 - Eipomek

Lengdar deice arye, Babel mutuku ap, Edom mutuku ap, Allah arye wenebuka opnamuk ning ati, sekuk yupu

¹ Awenen yupu ara, Allah arye, weik laut mekwen deibuka lilun, mek wininga kan-kan unyak nang, Babel mutuku nang ati, na Yesaya dam yanuka nyapdeipnuke. Weik kanye ikin una deiyok ning yanamle ning ara, winipmanto ara, mikip weik kumanya pu abuka yalirye, dana tam kibuka, dana tam kibuka kilirye, tamubuka yangalamle touk kibuka, iknapye tam arye, (arah selatan) tam, malye weik unyak mutuku, Negeb mutuku noutam arye, ikin weik ning ara yanamle.

² Na Yesaya lengdar mana deice arye eipse ning ara, na ilil upnuke. Alengdar mapsa deice eipse ning ara, yuk mutuku yu nang arye, Babel mutuku nang ara dobuka, sik mal olan nang deice deipnamaka ati eipse. Ton nang arye, yuk nang ati, tenebuka arye tilila yupu nyalamik touk, atalak ara, tuba tenen arye tilila yupu nyanamake. Alengdar mapsa ning ara, ton tam nang arye, yuk mutuku nang ati, sik bona nirya ara, ubula dolamik touk, atalak babye yakirye, ton mutuku nang talinyak bona nirya alubuka dopropnamake. Aning nirya ara, wininmokak eipse. Tonda, Elam amutuku ara yin nang yakirye, Babel mutuku nang olyanamake. Tonda Madai amutuku yin nang yakirye, Babel mutuku nang yanuka, warikuka opnamake. Ara, Babel mutuku nang arye, yuk mutuku nang nirya, ikin ning sik nong deice delilyeba, kanye ikin ulamuka ati, Allah arye Babel nang ati, sik mitang kipdeipnamle.

³ Lengdar mangkau mapmasirye, aning nirya wininmokak eipse ning ap, kekepse ning ap ara, walwal kipnubukba, moubuka kum bikse. Winipse deice arye, nara kanye ikin upnukce, ilil upnuke. Winipmanto ara, mi bomlye kil mi deiya dilyeba kanye ikin ulamle touk upnuke. Winipnuka deice arye, kanye ikin upmanukba, yupu ton kum kekepmanto upse. Tonda, ‘Aning nirya ara, yata winipnamle do?’ tenen, mambul kanye bomse ati, teleb kibuka kum eipmanto upse.

⁴ Aning eipsirye, na kanye noutam ara, mambul upnuke. Tonda awinimukak eipse ning ati, na pia ilil upnuke. Sintam kiptuura, talye kanye bobuka, telebuk uptinye,’ tenepse bukni, alukunyan akunum yayukopura, na kanye teleb kum upnuke. Asum lukunyan noutam ara, ilil pia weik upnuk ati, yok sirim talipnuke.

⁵ Na lengdar mapmasirye dinmase ak, weik kwalya kwalibuka dipnamika ati, kintinipmikak eipse. Ninye asik nang ton yukupmekak, sik aik yan bukuka dinmeka ati, buna teleb amsuna deice kintinibuka deipmek. Akintinibuka deipmeka ara, yukupmek ninye asik nang yukupmek nang ara, anyaik wekuka bukmekce, din ning ap, mek ap dinmek. Ayanuka bukuka dinmek nang ara, kum kel bikmek ning bukni, talye karin arye, “Aninguk winipnululume,” nyabukak kekebik. Ara, “Sik Yin talin nang deiyok kibuka ulamik nang nirya ara, ninye olana ati aning, ‘Mal opsilyak tenen, nong leilin ning, el si perisai bopmunce, aning deice minyak mek likuka deipmunce, aning adiparyuk kintinipnulume,” nyabukak, kekepse.

⁶ Nyabukura, Allah arye na Yesaya biti, “An bimince, Yerusalem asik dobuka unyakak kaliknanye ton, dopdeipminyeba, elce anyaik bisik bublan damuk kaliknulule. Akalikinanye biti nyapnulyame. ‘Ance eipminye ning ara, adiparyuk tamubuka nyalyanulyame,’ nyapdeipnulyame.

⁷ Akalikinanye dinmalya ani, Ninye ton kereta kuda deice bukmakce ak bonamak do, tonda kuda basam balye deice bukuka yanganamak nang do, tonda unta basam balye deice bukuka yanganamak nang do, keledai basam balye deice bukuka yanganamak nang do?’ tenen, aning ati moubuka kaliklirye, pia moubuka dinamlule. Allah arye Yesaya biti, “Ance ayupu nyalbinulyame,” nyapdeibuk.

⁸ Ura, lengdar mapmasirye, eipse ning ara, abisik pum kaliknanye birye, weik yupu deice arye nyabukak kekepse. Ara, “Se, na deiyoknye, nara asum-asum nirya ara, keting noutam babye, lukunyan noutam babye, pia kaliknauk unune. ‘Yu nang arye olyasicakʼ tenen, cang keil arye deibuka, aik domika deice tiknirye dinauk unune,” nyabukak kekepse.

⁹ Tonda, abublan bisik pum kaliknanye birye nyamuk. “Anggun nirya dilulume! Sik yin talin nang ara, kuda basam balye deice bukuka yanganmak nang ara, ninye bitinye-bitinye kibuka, akunum bukuka yanganmak nang ara, ayanganmaka atia!” Tonda, abisik bublan kin-kin kaliknanye biryuk, “Se, Babel mutuku weik asik nirya ara, akunum uluplopmakce, dakuka batakmake. Tonda sik amutuku nang arye si erena ati, patung deiamik ning nirya ara, dakuka batakmakce, sirya obuka tuku deice uk poupmake,” nyabukak kekepse.

¹⁰ Kekepsirye, na Yesaya birye nyapse. “Se, na yala nang, anggun Yudea tam ululum Israel yala nango! Winipmanto ara, ‘Gandum duk saknamleʼ tenen, gandum palamle ning sekukabikirye, ketingak deibikceba, kouluplirye, kala kopsakleba, duk teleb ning ara saklamle touk, sik Babel mutuku nang, sik mal olan nang arye, anggunti ikin ning weik, anggun nong deice deibikce, akunum yanipdongamsike. Tonda, winipmanto ara, gandum duk el bama ara kumanya arye bobilyeba, duk teleb ning dopropnukca ati, ninye arye gandum duk ara erebuka dobikceba, kumanya arye pu abuka, ban ning yalirye, gandum duk welamle touk, Allah arye akunum winyamsuke. Wini talak ara, na Yesaya birye Israel nang anggun ni koproba Allah Yahweh arye laka nyapdeipmuk yupu nyapnusine. Allah Yahweh ara, aning-aning nirya erebuka deice tam ulul mikip weiknye birye, im deice yin talin malaikat nirya, sik deiyoknye ulule. Elce anggun Israel yala nang ati, pia kalikuka disilirye, melibuka lyelosulule. Ati, anggunti teleb yupu na deice akunum nyapnuk ning ara, laka nyapsine.

Doyanamuk talak arye, Edom mutuku wenepnamuk ning ati, nyabuk yupu

¹¹ Dumah mutuku ati, Allah arye, “Winipnamne,” nyabuka, na Yesaya dam nyapnuk. Ara tonoknye, Edom mutuku noutam ululnye birye, nati yukupnukce ayupu nyamnuke. “Se, na kalikinanye, alukunya ara, tuba inipmal do? Berekna ati ara, yata barye talak uplyeba, bereknamal do?” nyabuka asipnuke.

¹² Nyabuka asipnukba, narye tamubuka, el anye biti nyapse. “Berekna ara yanul, bukni aminyan talak ara lukunyan babye tamubuka yanamale. Aning ati, aminyan talak, ‘Ton ap asipdenune,’ tenepminyeura, tamubuka yan asilyanamsilyame,” nyapse.

Doyanamle talak arye, Arab tam mutuku wenepnamle ning ati, nyabuk yupu

¹³ Arab mutuku tam ululum nang ati, Allah arye, ‘Winipnamne,’ nyabuka, na Yesaya dam yanuka nyapnuk. Ayupu ara ani. Se, anggun Dedan yala ululum nang ara, anggun bona dekna ati, Unta basam balye deice bukuka yangalulum nango. Anggunce sik dukunubuka mapnamluma ati, Arab mutuku tam noutam ara, talye palamle taica ning ap, bai tam mutmuta kan-kan ap, asukumuk yanuka dukunubuka unamlume.

¹⁴ Ati, anggun Tema mutuku ululum nango, sik anang dam yangalamnak, mek patanmalye nang ara, anggunce mek kwebuka arelbinamlulume. Tonda, anggunce, ‘Yuk mutuku nang arye yanuka opsicak tenen, anggun mutuku arye batakuka, amutuku tikilyayikce, kata mutuku noutam dukunubuka unyak nang ati, din dipnamak ara, sik Tema mutuku nang arye, din ning bobinuka arenamlyame.

¹⁵ Aning yanuka arenamluma deiyok ara, ani. Sik anang ara, yuk mutuku yin nang arye, ‘Parang ya ap, mal ap arye adiparyuk opnuyap tenen, dobolyayikba bai sakuka yayik nang unyaka atia. Sik anang ara, weik mal olanmeka arye, ikin kanye bobuka, bai tam sakuka bikbik abuka yayikce, asukum yanuka duknubuka unyak nang atia.

¹⁶ Ura, Allah Yahweh arye na Yesaya dam yanuka nyapnuke. “Winipmanto ara, talye pil domikce nang arye, tonok keting tamun deice arye pil dolamak talak atonun, wini talak babye, tonok keting tamun lo noutam aryuk, Arab tam aunyak nang, Kedar mutuku unyak nang, sikce talikirye, kanye delinyak ning nirya ara, adiparyuk kum kipdopnamle. Yuk nang arye, sik Arab tam talilamik ning eililamikce, ‘Se, sikda weik mambul nang unyakeʼ tenen, nyalamik ning nirya ara, kum danamlarya, nyapsine.

¹⁷ Tonda, atalak babye, sik Arab tam noutam unyak nang, Kedar yala nang, sik unyak mutuku ara, mal olana ati, keil weik nang ton aunyake, bukni atalak noutam ara, sik yin talin nang ara, tonok-tonok nanguk kam tuba unamake.” Ayupu ara Allah Yahweh, Israel yala nang pia kalikuka melibuka lyelosululnye birye ayupu akunum nyapdeibuka ati, narye anggunti ayupu nyapsine,” nabi Yesaya birye nyabuk.