Yesaya 2 - Eipomek

Sion mutuku ara, asinilina deiyok mutuku ati, nyabuk yupu

¹ Ayupu ara, Allah arye Yehuda yala ninye ap, Yerusalem mutuku ulamik ninye ap ati, Amos el mi Yesaya biti nyabuk yupu ara, ani.

² Tonda, sirya daknamle talak ara, Allah el si erena ati, domik aik tuba aubuk mutuku deice ara, weik mambul mutuku unamle. Mutuku-mutuku nirya, weik mutuku aubuk bukni, amutuku tonok ara, weik mambul mutuku kipnamle. Yerusalem mutuku dana-dana tam bukuk mutuku ara, mitik mambul bukni, amutuku tonok ara, weik mem mutuku erebuka tiknamle. Winibuka tiklyopura, mutuku dana-dana unyak ninye, ayala-ayala nang yupa weik tonun, bulubuka amutuku dilyanamake.

³ Sik mutuku dana-dana unyak ninye ayala-ayala nang nirya arye, nyanamake. “Kume, amutuku ara, Allah el si Yahweh arye, wipdeiamuk mutuku anya arye, amutuku dilbinuyabe,” nyanamake. Tonda, “Se, Israel ninye, sik apu koproba Yakub biti, kalikuka melilamuk Allah ara, el aik amutuku deice domik ning ara, bulubuka dilbinamabe,” nyanamake. Tonda, “Nun nirya arye, Allah el aik domik mutuku deice welebipye talak ara, Allah arye, ‘Winina telebe, winina ara meme,’ tenelye ning peterenamsile. Ayupu kekebipyopura, elce nyasilye touk, talibuka diksukumuk unamabe. Elce melipsilyeba, el bisikuk dobolbanamabe,” nyanamake. Ati Allah arye, ‘Wininamlulume, aning ara, kum wininamlulume,’ nyabuka peteresilye yupu ara, Sion mutuku arye deiyok koubikirye, mutuku-mutuku nirya peterepra banamake. Allah arye nyasilye yupu ara, Yerusalem mutuku arye nyapsikiba, kekenamlulume.

⁴ Mutuku-mutuku nirya unyak ninye ati, ‘Teleb ninye ani, malye ninye ani,’ nyabuka, Allah arye yupu lipsisikuka bokolinamsile. Tonda, ninye mutuku-mutuku nirya arye, ‘Olanamap’ tenen, yupu deice nyapdeipdakirye, wililalamak ning ati, elce yupu lipsisikuka bokolinamsile. ‘Ninye opnuyap’ tenen, yo tace lubuka, si ketelinyak ning ap, sik parang ya ap, kapak ya ap ara, dopdobikirye, uku dongobikiba, uku diplirye, mitang uplyopura, tuku palin ning memena ati, tekinamake. Wininamak talak ara, mutuku-mutuku nirya unamak ninye arye, tonap kum olanamake. Ton tam nang arye, ton tam nang ati, ‘Olbinuyap’ tenen, ya dobuka kum olbanamake. Tonda, ninye olbana ati, peterelalamak ning ara, tonap tamubuka, kum wininamake.

⁵ Ati, se, Yakub birye deibukba, dadeipdanin yangalamlum ninye nirya ara, yamunba, nun nirya Allah el dirin deiceuk, talibuka unamabe.

‘Allah arye, ninye sik kanye eren nang ati, wenebuka opnamne,’ nyabuk ati, sekuk yupu

⁶ Nabi Yesaya birye, nyabuk. Se, na ni Allah, Yakub elce deibukba, dadeipdanin yangakirye, wini talak aunyab nang, an mapu koproba Israel nang ara, ance akunum bataklume! Batakluma deiyok ara, nun Israel tam aunmab mutuku bukni, otam keting panalyangan tam arye unyak nang, sikce talye ning ati, ‘Dibʼ tenen, taleamikce, malye winilamik ning ara, nun babye aning talibuka dobolbanyabe. Tonda, sik Pilistin nang arye, ‘Aminyan talak, yata wiripnamsil do?’ tenen, isa ak aruklamik deice arye, ‘E, nunda aminyan wininamap ning ara, ani,’ tenepnarye unyake. Awininyaka atonun, nun Israel tam nang babye, atonun wininyabe. Tonda, sik atam unyak nang arye, an Allah ati pia dip kum bikikce, an si kum erekinyak nang ara, epdakirye, ‘E, nun ap, anggun ap, tonok neika unamabe,’ nyabuka, nyalin yupu deice arye, taruk talelalamak atonun, nun babye atonun unyabe. Ara, sik talye daunyak nang arye, amalye ning winilamik touk, nun Israel yala nang babye, atonun winipnyabe.

⁷ Israel yala nang unyap mutuku noutam ara, dekna weik kat ning, emas ap, perak ap ara, weik aulule. Tonda, yuk dekna weik bona yala-yala nirya babye, weik aululba talinyabe. Kuda basam ton nukmanto kum aulule. Tonda, ninye olbana ati, kuda basam deice arye, tapu biribuka lipleba, tuku deice balamle ning, el si kereta perang ap ara, nukmanto kumce, weik talinyabe.

⁸ Aning dem kum bukni, nun amutuku-amutuku noutam, aunyabak nirya ara, nunce, ‘E, aning ara, nun ni koproba aluleʼ tenen, isa si erena ati, memebuka deilinyab ning, patung weik kintinibuka deiamupu ning talinyabe. Tonda, nun taruk arye, ninye urasin atonun kibuka, memebuka deibibyeura, aninguk si erebibirye, el si erena ati, nun asok tuku deice deibibirye, aisa ati, si erenyabe. Nun taruk tatang arye, aning kintinibuka deiamupu bukni, atalye ning ati, si erenyabe.

⁹ Winibuka pia malye weik winilamupu deice arye, Allah ance nun Israel nang nirya ati, amu tam kipdeipsiminyeba, alye dakdapyak arye, an amu tamuk unamabe. Malye unyaba deice arye, nun talima nirya daksaksilirye, amu tam bukipyakarye, an amu tamuk unyabe. Pia alye weik dakalanyabe. Ati nun ni Allah, ance nun kan-kan pia malye unyak nang arye, malye weik wininyap ning ati ara, kum kipdeipnamsilame.

¹⁰ Se, anggun amalye weik winilulum nang ara, mutuku kon bukamuka, amu tam keil bukamukak do, keil deiya pum tam do, amu tamuk weknamlume. Akumopura, sik anang ara, butbuta noutam arye amupdongopmunce, duknupnamlume. Deiyok ara, anggun amalye ululum nang arye, ‘Se, nun malye winin ning ati, Allah el yu weik ning deipsilirye, nun nong deice supnamsilʼ tenen, ilil weik unamlume. Tonda, ‘Allah el mikip weik ap, pia teleb ulya ap adeice arye, el dirine weik ulul ning, nun dam yanuka opsilyakʼ tenen, ilil kanye weik bonamlume.

¹¹ Na dipkoprob nyapsine. Yata nang do nirya, sik kanye erebikirye, sik asing erebuka dilenyak nang ap, tonda, ‘Nunda pia mambulʼ tenen, kwalinyak nang ap ara, Allah arye, sikda amu tam kipdeipnamsile. Winipsiliba, anggun alye dakdamunce, ikin kanye bobuka unamlume. Atalak akunum yalyopura, Allah arye weneplirye, kanye erena deice arye, kwalinyak nang nirya ati, wibuka amu tam kipdeiplye nang, mutuku sirya, im sirya nirya arye, Allah el tibuk, “Se, mambule, pia teleb ululnye bira, el uka,” nyabuka, Allah el siuk erenamake.

¹² Aning ara, talye ati kum nyapsine. Allah arye akunum tenyamuk touk, asum akunum uplyeura, Allah Yahweh aning-aning nirya eitam erebuka, im deice yin talin malaikat nirya, sik weik deiyoknye ulula ati, sik kanye erebuka, kwalibuka unyak nang nirya ara, amu tam kipdeipnamle. Tonda, tukwak nang mutuku sirya, im sirya nirya arye, ‘Se aning ara, weik mambul, aning tonok ara, pia telebeʼ tenen, dipdakirye, kwalibuka talima erenyak nang nirya ara, Allah arye aning nirya yaniplirye, pia amu tam kipdeipnamle. Tonok ning babye, kum bataknamle.

¹³ Tonda, yata nang do nirya, sikce, ‘Libanon mutuku tiklamle yo, cang weik yo kaipyal nirya ap, Basan mutuku tiklamle yo, kat weik yo yala-yala nirya ap ara, pia mambule. Aning ara, pia urasin teleb ulamle touk, nun babye atouk unyabe,’ tenebikirye, sik nong atibuk dipdakirye, erelanyak nang ara, Allah arye sik dobuka, amu tam kiplirye, kum kipdeipnamle.

¹⁴ Atonun, yata nang do nirya, sikce, ‘E, anggun eiplume! Otam cang weik mutuku erebuka bukuk ning ap, weik mutuku kon nirya ap ara, urasin pia teleb, mikip weik ning ulamle touk, nun babye atonun mikip weik nang unyabe,’ tenepdakirye, kanye erelanyak nang ara, Allah arye, pia amu tam kipdeipnamle.

¹⁵ Tonda, yata nang do nirya, sikce, ‘E, anggun eiplume! Otam cang weik aik dobupu ning ap, tonda weik asik dobupakarye, dana-dana tam antanap dongobuka, dobupu cang keil poka ap, aupmasila ati, kalekdabirye, yuk mutuku yu nang arye, yanuka kum opnamsitinge. Telebuk unamabe,’ tenenyak nang nirya ara, Allah elce dakuka bataklirye, anang ara, pia amu tamuk deipnamle.

¹⁶ Tonda, yata nang do nirya, sikce, ‘E, nunce weik kapal laut mekwen deice balamle ning ap, tonda pia urasin teleb kapal nirya ap ara, aupmasile ati, aning arye, bona weik libikirye, yuk mutuku bobinuka dekipyopura, bona pia weik talin nang unyabe,’ tenenyak nang nirya ara, Allah elce dakuka bataklirye, laut mekwen arye diplyeura, elce anang dobuka, pia amu tamuk deipnamle.

¹⁷ Allah arye, aning nirya winipnamla deice arye, sik kwalibuka kiminyak nang ap, tonda kanye erena deice arye, kwalinyak nang ap ara, amu tam kipdeipnamle. Kanye eren nang nirya, wibuka amu tam kipdeiplyopura, atalak ara, ninye mutuku sirya, im sirya nirya arye, yuk nang ati, si kum erenamak bukni, sik nirya arye, Allah el tibuk, “Se, mambul kibuka, pia teleb ululnye bira, el uka,’’ nyabuka, Allah el siuk erenamake.

¹⁸ Winipnamla ati, anggun tukwak nang arye, talye ning ati, ‘Nun ni koproba aniʼ tenen, tukwak ning dobuka, ninye urasin atonun kibuka, memebuka deibikirye, isa siuk erenyak patung nirya ara, Allah elcuk aning nirya, sirya daklirye, kum kipdeipnamle.

¹⁹ Allah arye winipnamle ati, anggun tukwak mutuku sirya, im sirya nirya, ululum nang nirya ara, ilil asa unamlulume. Winibuka umunyeura, mutuku kon bukuka, amu tam keil bukamukak pum tam do, keil deiya pum tam do, tuku paliyamica pum bisik do, wekmunce, duknupnamlume. Ara, sik aninye nirya arye, ‘Se, Allah el yu upliba, mikip weik deice arye wenepsilirye, nun nong deice deipnamsileʼ tenen, weik ilil upliba, duknulbinamake. Tonda, Allah el pia teleb ap, mikip weik ap ulya ati, el weik dirina upnamle ning ara, ‘Kum eiptibyeʼ tenen, duknulbinamake. Atenebuk sum uplyeura, tukwak mutuku sirya, im sirya nirya unyak nang nirya arye, talimauk diplirye, buku daksaklirye, ilil pia weik, asa unamake.

²⁰ Tonda, asum akunum winiplyopura, ninye nirya ara, sikce talilamik dekna weik kat ning, perak ap, emas ap, dopromikce, ‘Isa si erepnamapʼ tenen, aning deice arye, ninye urasin atonun kibuka, memepdeiamik ning, isa si erena ati, talye ning nirya ara, adiparyuk batakuka bindopnamake. Winipnamaka ara, sik anang ulamicak ara, yamba maka ap, bai tam balamle ayam mana ap ulyakuk, isa si erena ati, memebuka delinyak patung ara, batakuka bindopnamake.

²¹ Winipnamaka ara, talye ati kume. Ara, sik im sirya, mutuku sirya nirya, unyak nang nirya ara, ilil asa unamake. Winibikirye, mutuku kon bukuka, amu tam keil deiyok dam do, keil deiya pum tam do, wekelbikirye, duknulanyake. Ara, sik anang nirya arye, ‘Se, Allah el yu upliba, mikip weik deice arye wenepsilirye, nun nong deice deipnamsilʼ tenen, ilil weik uplya ati, duknulbinamake. Tonda, Allah el pia teleb ap, mikip weik ulye ning ap, lak kina ati, el weik dirina upnamle ning ara, ‘Eipnirye, adiparyuk duknupnamneʼ tenen, duknulbinamake. Aning ara, Allah arye, ‘Tukwak nang mutuku sirya, im sirya nirya ati, kanye imun ning, sik nong deice deipnyopura, ilil weik unamakʼ tenen, yanamle sum arye, winipnamlarya.

²² Ati ara, anggun Israel yala nang ap, tukwak mutuku im sirya, mutuku nirya ululum nang ap, ninye sirika arye, deiamikce nang ati, ‘El anye birye, nun ikin upsilye talak ara, melibuka lyepnamsilarya,’ kum tenenamlume. Tukwak unyak nang nirya ara, sik u pum bisik ara, isin deice arye kam unyake. Sikda talye tukwak nang ati, yata wiripting deice arye, anggun tukwak ululum nang ati, melibuka lyepsiting do? ‘Kume, aning ara, pia kum winipmanto ati, dauplye,’ nyapsine. Allah arye nyabukba, nabi Yesaya kekebukce, Israel yala nang ati, laka nyabuk.