Yesaya 19 - Eipomek

“Allah arye Mesir mutuku unyak nang ati, ikin ning deipnamle,” nyabuk yupu

¹ Ayupu ara, Mesir mutuku unyak nang ati, Allah arye, na Yesaya dam yanuka ayupu nyapnuke. “Na Allah Yahweh ara, sike pia kum bukni, pola balamle dua deice welebuka buknirye, Mesir mutuku dam bikbik abuka yanamne. Mesir mutuku nang arye, isa urasin atonun kibuka memebuka deibikirye, isa si erenyak ning nirya ara, na Allah ati ilil weik uplyeba, sirim talipnamle. Tonda, sik Mesir mutuku unyak nang nirya ara, pia ilil weik uplyeba, sik talima dakalsakanamle.

² Na Allah arye sik Mesir mutuku nang nirya ati, sik talima noutam pil dopnyeba, sik nirya arye, sik kayapu nang koproba bukni, ‘Likeʼ tenelana ap, olana ap deiyok ning arepnamne. Winipyeba, sik kayapu nanguk, sik kayapu nang ati, olanauk upnamake. Atonun el kwit koproba bukni, otam asiknye birye, el kwit ton tam asiknye biti, ‘Like,’ tenepdakirye olanauk unamake. Atonun ton tam mutuku noutam weik asik unyak nang arye, ton tam weik asik domik mutuku nang ati olbanamake. Tonda atonun, ton tam nang deiyok kibuka talibikce unyak nang arye, otam nang ati, olanamake.

³ Na Allah arye, sik Mesir mutuku noutam unyak nang arye, ‘Winipnamabe,’ tenenyak ning nirya ara, kum daneipnamne. Tonda, sik kanye pin-pin asa arye teleb kibuka unamaka babye, kum daneipnyeba, sik talima dakalsakanamle. Sik anang arye, sik si erenyak isa berhala-hala ati, ‘Nun melipsilyame,’ nyabuka moronamake. Tonda, sikce ‘Nun yata wiriptibye doʼ tenen, aning-aning winipmunce, melipsululume,’ nyabuka moronamake. Atonun tonda, sik asing keten nang ati, ‘Laka nyapsilyame,’ nyabuka, ton moronamake. “Tonda ninye kanya ati, laka nyapsilyame,” nyabuka ton moronamake.

⁴ Na Allah arye Mesir mutuku unyak nang deiyok kibuka talipnamle Raja, kanye tenen ning arepnyeura, aRaja elce sik Mesir mutuku nang ati, tulum deice aryuk talipnamle. Nara Allah Yahweh, mikip weik arye aning-aning nirya erebuka, deice tam ununye birye, im deice yin talin malaikat nirya, sik deiyoknye unirye, na tenepse touk nirya wininune. Narye ayupu akunum nyapsina ati, dipkoprob nong upnamlarya, nyapsine.

⁵ Atalak ara, weik arye balamuk mek, el si Nil mek ara, cepropnin balamya ani, aminyan talak cebuka sesal sepdopnamle. Winipnyeura, amek kum dalyeba amek pum tuku nirya mikuka sesal sepnamle.

⁶ Weik Nil mek arye, kwa lekuka el bisik weik bokuka balamle mek nirya ara, mek cepdoplirye mitik touk bataklye noutam arye, malye tong nyapnamle. Tonda amek lilun talye pabukablirye beteklamle mutmuta nirya ara yalakuka koulopdopnamle. Tonda, weik Nil mek arye bokuka, mitik tonun balamle mek nirya ara, cepdoplirye kumdanamle.

⁷ Nil mek biyuka lilun, winiryuk wa wibuka kounyak ning ara, kouloplyeba kumanya arye, pu abuka yalirye, bobuka bindopnamle. Tonda, Nil mek dam ara, tuku teleb sukum ati, ninye arye wa wibuka koulamik ning nirya, koulupdoplirye, kum kipninbenamle.

⁸ Tonda, aNil mekin ikan yangabuka tomonyak ning nirya ara, ikan nirya dibikceba, kanye ikin uplyeba, ikin kanye bobikirye engepnamake. Aning atonun, tapu ap, taica ning ap arye, ikan enyak nang nirya babye, ikan tomon ning el si jala arye tomonyak nang nirya babye, engepnamake. Nil mek pum tam ulamle ikan nirya kum danmala ati, ‘Kum tomoptibyeʼ tenen, malye kanye bobuka unamake.

^9-10 Tonda kain lelan baju wilamika deiyok nang ap, tonda anamin kain wina deiyok ning, amek dam arye betekelul ning, el si erami halus sekenyaka deiyok nang babye, engenamake. Sikce namin kurun baju wina deiyok nang ap ara, kanye ikin uplyeba engenamake. Ara, lenan baju winyaka deiyok nang ap, namin kurun baju mouna deiyok ning ap nirya ara, kum kipmalya ati, ikin kanye bobuka, engebikirye ikin kanye bobuka unamake. Tonda, sik pil dobikceba, sik deiyok nang arye, yo bok weik arebikceba, dolonyak nang nirya babye, ikin weik upnamle ati, sik babye engebuka unamake.

¹¹ Mesir mutuku noutam, weik asik, el si Zoan mutuku talibuka unyak deiyok nang nirya ara, pia walwal kipdakirye, walwal nanguk unamake. Tonda, Mesir mutuku ninye deiyoknye Raja ulul weik asik, amutuku el si Memfis mutuku talibuka unyak deiyok-deiyok nang babye, weik kel bikna nang ulamik bukni, atalak ara, Mesir mutuku taleamuknye Raja Firaun biti, Aning-aning nirya winiplyame,’ nyabuka yupu areptinga babye, anyapnamak yupu ara, pia walwal uk upnamla ati, nong teleb ubuka kum unamle. Ati ara, sik anang nirya ara, yata wiribuka sik mutuku ninye deiyoknye biti, ‘Nunda amutuku weik kel bikamupu nang unyabe. Minop talak amutuku taleamik deiyok nang arye, deiamikak, dadeipdanin yangalamik nang arye deibika ati, nun yupu kekepsilyame,’ nyaptum do?

¹² Se, anggun Mesir mutuku nango. Anggun weik kel bikna deice arye, Aning-aning nirya winipnamlume,’ nyabuka, yupu areamse weik kel nang ara, wini talak dan unyak do? Sik mutuku weik kel nang tuba ulamtingura, sik anang arye anggun mutuku deiyok nang ati, ‘Allah elda aning-aning nirya deice tam erebuka, mikip weiknye ulirye, im deice malaikat nirya talilulnye birye, elce tenyamukce aminyan talak winipnamsil ning ara, ani,’ nyabuka, laka nyaptum do? Kum do? Mesir mutuku noutam weik kel nang tuba aukceura, anggunce, sik Mesir mutuku nang ati, ‘Allah arye aning-aning nirya ton winipnamle nyabuka, anggun dam laka nyapsitinge. Kumopura, kume.

¹³ Kume, weik asik el si Zoan mutuku unyak deiyok nang nirya ap, Mesir mutuku talibuka ulye Raja bira, weik asik, el si Memfis mutuku ap unyak deiyok-deiyok nang ap nirya ara, akunum pia walwal nanguk unyake. Dipkoprob sik anang ara, ninye deiyok kibuka ukirye, sik Mesir mutuku yala nang nirya teleb kibuka kum talinyake. Wini talak ara, sikce taleamik nang nirya ara, malye bisikuk talibuka banyake.

¹⁴ Allah Yahweh, elce sik Mesir mutuku nang deiyok kibuka talinyak nang ati ara, kanye walwalamak ning arebukba, kanye boktobukce walwal asa uk unyake. Winibuka ati, sik Mesir mutuku talibuka ninye deiyok nang nirya arye, walwal uk ukirye, Mesir mutuku unyak nang nirya ara, talye bisik bobuka binamake. Winipmanto ara, yu mek din nang, kanye walwalabuka, bisik banmace talak obinuka, abinuka balamake. Tonda, sik mining dukna deice uk malamak touk, Mesir mutuku deiyoknye babye atonun, pia walwal kanye bopnamle.

¹⁵ Ati ara, Mesir mutuku nang arye ninye deiyok kibuka talibikirye, Mesir mutuku unyak nang ati, melibuka teleb kum kipdeipnamsiake. Aning atonun, amutuku noutam ara, pia amu tam ululnye bira, tonoknye babye, amutuku nang kum melipnamle. Ati, anggun mambul nang babye, mambul pia kum nang, talye kankan nang babye, Mesir mutuku unyak nang ati, Teleb kiptibye ning ara ani,’ nyabuka pia kum laka nyapnamake. Pia walwal kanye bopnamake. Telebnye ton weleplyeba, ninye deiyoknye ulirye, amutuku nang ati, ton teleb kum kipdeipnalamle.

“Doyanamle talak ara, Mesir mutuku unyak nang arye, Allah ati ilil weik unamle,” nyabuk yupu

¹⁶ Atalak akunum kiplyeura, Mesir mutuku noutam unyak nang nirya ara, kilapu ulamak touk, mitang asa ubikirye, ilil weik upnamle. Deiyok ara, Allah Yahweh, el mikip weik taruk erebuka, sik amutuku unyak nang deice deiplirye, sikti, wenebuka oplyeura, sik amutuku nang nirya arye eibikirye, yok berber abuka, ilil upnamle. Deiyok ara, Allah Yahweh elda aning-aning nirya talibuka, deice tam erebuka, mikip weiknye ulirye, im deice yin talin malaikat nirya talilule.

¹⁷ Atalak ara, Mesir mutuku unamak nang ara, Yehuda mutuku noutam unamak nang ap, amutuku nang arye wininamak ning ap, kekebikirye, ilil uplyeba, sik yok sirir birbir apnamle. Ara, sik Mesir mutuku nang arye tamubuka tenepnamake. ‘Se, Allah Yahweh elda aning-aning nirya talibuka, deice tam erebuka ulul mikip weiknye birye, im deice yin talin malaikat talilula ati, nun Mesir mutuku nang ati, obuka wenepnamsile. Allah arye tenyamuk ning nirya, dipkoprob nun deice deipnamsila atia,’ tenebikirye ilil pia upnamle.

Allah arye Mesir mutuku ap, Asyur mutuku ap, Israel mutuku ap, ila tamubuka teleb kipdeipnamla ati, nyabuk yupu

¹⁸ Allah arye aning nirya pil dopnamle talak ara, Mesir mutuku noutam ara, ninye arye domik weik asik pamubarye unamak nang ara, sikce Ibrani yupu uk kel bikikirye nyanamake. Sik amutuku unamak nang arye, Dipkoproba, Allah Yahweh, aning-aning nirya deice tam erebuka, mikip weik ululnye birye, im deice unyak yin talin malaikat nirya, sik deiyoknye ulule. Ati ara, el si atibuk, si erenamabe,’ apnamake. Apamubarye mutuku noutam ara, tonok weik asik dobuka unamakak el si ara, keting Mutuku nyanamake.

¹⁹ Atalak ara, Mesir mutuku noutam koproba ara, Allah Yahweh el si erena ap, el si erekirye kam ning obuka arena ap ati, pala keil taplakuka deibikirye, weik mesba dobuka deipnamake. Tonda, Allah Yahweh el si tuba tenena ap, erena ap ati lakakilina ara, Mesir mutuku tuku ara atam, yuk mutuku tuku ara otam wililamik dam ara, weik cang keil arye dobuka iknamake.

²⁰ Amesba ap, weik cang keil iknamak ap dobuka deipnamaka ara, Allah Yahweh aning-aning nirya talibuka deice tam erebuka, mikip weik ululnye bira, im deice yin talin malaikat nirya talilulnye bira, Mesir mutuku noutam ulyeba, ‘Allah el siuk ernamabeʼ tenen, lakakilina ati dobuka deipnamake. Winipnamaka ati, Mesir mutuku nang ati, yuk mutuku nang arye yanuka, ikin ning deibikirye, ‘Anang obibyak arye, talipnamapʼ tenebica babye, Mesir mutuku nang arye Allah ati, ‘Se, nun dam yanuka melipsilyame!’ nyabuka morobiceura, Allah elce ninye ton dopdeiplyeba, yanuka sik mal olan nang nirya ara oplirye, melibuka lyepdopnamle.

²¹ Atalak ara, Allah Yahweh, elcuk, ‘Sik Mesir mutuku unyak nang arye, nati biknamakʼ tenen, sik dam laka kipdeipnamle. Adeice arye, sik Mesir mutuku nang arye Allah Yahweh el si ap, el winilul ning ap, bikikirye, el siuk erenamake. Sik Mesir mutuku nang arye Allah el si erena ati, domba ato ning obuka yakirye uku dongolyanganamake. Tonda, el si erena ati, teleb ning bobuka, el tibuk arelyanganamake. Mesir mutuku nang, sikce Allah Yahweh ati, ‘Ura na nio, an damuk unamabe. An si erena ati, winipnamabe, winipnamabe,’ nyabuka nyalin yupu nyapdeibikirye, ‘Winipnamabe,’ nyabuka nyapdeibikce touk, dipkoprob sikce wininamake.

²² Allah Yahweh arye Mesir mutuku nang, sik malye un nang ati obuka wenepnamle. Akunum obuka weneplyeura, elcuk tamubuka sikti, ila tamubuka teleb kiplirye kweteipnamle. Mesir mutuku nang ara, tamubuka Allah damuk yanuka moropnamake. Sikce Allah ati, ‘Naio, melipsilyame,’ nyabuka moropnamak talak ara, elce sik melina ati, sik ikin ning kum kipdeiplirye, sikti, kwetelinamle.

²³ Atalak ara, Mesir mutuku ap, Asyur mutuku ap, danoutam ara, weik bisik ton yapdeipnamake. Weik pala bisik yapdeibiceba, amutuku bitinye noutam unyak nang ara, abisikuk obimana, atam yanmana kinamake. Sik abitinye mutuku unyak nang ara, Mesir mutuku nang ap, Asyur mutuku nang ap, sik neika Allah el yupu kekebikirye, el siuk erenamake.

²⁴ Tonda, atalak ara, Israel nang mutuku unyak nang ara, Mesir mutuku nang ap, Asyur mutuku nang ap ara, neika weik mambul tenebuka unamake. Sik nirya arye, Allah el si erena ati ansinipnamek. Sik awinilye mutuku unyak nang ara, tonok keprobikirye, neika ubica deice arye, Allah Yahweh elce, sik yuk mutuku im sirya, mutuku sirya nirya, unyak nang babye, teleb kipdeipnamle.

²⁵ Allah Yahweh, aning-aning nirya talibuka, deice tam erebuka, mikip weik arye talibuka ululnye birye, im deice yin talin malaikat nirya, sik deiyoknye ulula ati, elcuk sik anang nirya teleb kipdeiplirye, ayupu nyapnamle. “Mesir mutuku nang, anggunda na mapu unyaka ati, narye anggunti teleb kipdeipsine. Asyur mutuku nang, sikda narye kintinip deiamsise ati, narye anggunti teleb kipdeipsine. Israel nang, anggunda narye wibuka akwamsirye, ‘Naʼ tenen, nang kipdepsisa ati, narye anggunti teleb kipdeipsine,” nyapnamle. Nabi Yesaya birye ayupu nirya nyabuka sekuk.