Yesaya 18 - Eipomek

Allah arye, Sudan mutuku nang wenepnamuka ati, nyabuk yupu

¹ Kus mutuku noutam bukni, outam lilun ara, Sudan mutuku unyak nang, imun kanye bopnamake. Sudan mutuku noutam ara, talye kam ulirye, pol arye lakuka balul ning, sik pol lelim weik nyalul mutuku unyaka ati, aning pol lelim nyaplyeba, sik kekepnamake. Sik mutuku ara, weik laut mekwen dam ulule.

² Sik Sudan mutuku unyak nang arye, weik balul mek, el si Nil, amek deice, mek bukna yo deice bukuka yangana ati, ninye ton wipdeibikirye, mek lilun talye tiklamle mutmuta atonun ning dobuka, mek bukna yo atonun ning moubuka kintinipnamake. Adopnamak mek deice ban ning ara, sik wipdeibikceba, yupu nyalyanamak nang ati, ‘Yupu nyalbilulume,’ nyapdeipnamake. Ara, adiparyuk anggun yupu nyapmunyeba, kekenamak mutuku nang ara, nong potong pana kumce, pia teleb bol bobuka unyak nang ap, tonda nong weik cang arye nebuka unyak nang ap, mikip weik ap, ninye onyak nang unyakak ati, ninye ona ati, weik kel arye kama ap unyaka deice arye, yuk mutuku nang nirya anggunti, ilil weik usululule. “Amutuku nang ati, adiparyuk yupu bobuka nyalbinulyame,” nyapdeipnamake. Sik anang unyak mutuku ara, mek arye wilipnin biyuka deice arye, sik mutuku yuk-yuk bokuka unyake.

³ Tukwak mutuku sirya im sirya nirya ululum nango, anggun nirya arye dipdelulume! Mal olan deiyok koubica ati, ninye nirya bulupnamak talak biklina ati ara, bendera weik mutuku deice ikuka deibikceba, anggunce moubuka eipnamlume. Tonda, anggunce pong-pong ning, el si terompet, lelim weik arye nyabikceura, kekepnamlume. Ayupu lelim kekepmunyeura, anggun tukwak mutuku ululum nang nirya arye moubuka kitininamlume.

⁴ Allah Yahweh arye na Yesaya dam yanuka nyapdeipnuke. “Na unak im deice arye, narye aning nirya biknamne. Winipmanto ara, pia weik keting tin unmalya ani, kumanya ton minop balamle touk winipnamne. Nara Allah Yahweh tunim abuka unamne. Winipmanto ara, wa wibuka kouamikca ani, lin talak li kiplyeba, mok purye tuku deice saklyeba, keting tin arye dua tunim abuka welelamle touk winipnamne. Ara, amutuku nang winipnamak ning eipnye babye, narye tamubuka aning-aning ton kum winipnamne. Diplopnamne.

⁵ Bukni, anggur duk moun li akunum dam uplye talak ara, anggur duk min kum moupmalyebuk, el kita opmalya ani, dakde sakalamle bukni, anggur duk min kum ekmalyebuk, murukuk kibuka saklamle touk upnamle. Tonda, winipmanto ara, na Yahweh arye wa win ya dobukapnirye, anggur dola kwena ati, taruk mitik ning sekeltakanamne. Ara, na Allah arye, amutuku nang arye dobuka deipmanyebuk yanmace yin talin nang nirya ara, obuka malye kipnamake.

⁶ Na Allah arye amutuku yin nang obuka, sik nong nirya tuku deice talye tukwak abataknamne. Winapnamna ati, sik oplopnamne nang, sik nong dobuka dina ati, talye balamle maka ara buppu li talakuk yakirye, yanuka dobuka, sik nong tup dipnamake. Aning atonun, ikip li talak kiplyeura, talye bai tam kam ulamle yu ning yakirye, sik anang nong tup dipnamake.” Allah arye nyapnuke.

⁷ “Atalak aryuk amutuku nang arye, pia teleb aren ning bobuka, Allah Yahweh ati arelyanganamake. Anang sik urasin ara, pia teleb bol bobuka unyak nang ap, tonda nong weik cang arye nebuka unyak nang ap, mikip weik ap, ninye onyak nang unyakak ati, ninye ona ati weik kel deice arye kama ap bonyaka deice arye, yuk mutuku nang nirya arye anggunti, ilil weik usululule. Sik anang unyak mutuku ara, mek arye wilipnin biyuka deice arye, sik mutuku yuk-yuk bokuka unyake. Sikce teleb aren ning bobuka boyanamak mutuku ara, Allah Yahweh aning-aning nirya deice tam, mikip weik arye erebuka ulula ati, elda im deice yin talin malaikat nirya talilule. El ti aning arenamake. Ara Sion mutuku, Allah Yahweh arye, Na si asukumuk deipnamne. Amutuku ara ‘Naʼ tenen, mutuku,’ nyapdeiamuk mutuku dam boyanamake. Allah Yahweh ara, aning-aning nirya deice tam mikip weik arye erebuka ulula ati, elda im deice yin talin malaikat nirya talilule. El Allah atibuk bobuka arelyanganamake,” nabi Yesaya birye nyabuk.