Yesaya 17 - Eipomek

Allah Yahweh arye, Siria mutuku noutam nirya bukni, mutuku si Damasyik mutuku unyak nang ati, wenepnamuk ning ati, nyabuk yupu

¹ Allah arye, Yesaya dam yanuka nyabuk, “Damsyik mutuku ara, weik asik dobuka tuba unyabe,” kum nyanamake. Deiyok ara, aminyan talak ara, narye anyasik domikce nirya ara, ulubuka sikce buklopnirye, kum kipdeipyeba, asik oldemuk upnamle. Anyasik nong nirya ara, kum kipdeipyeba, talye keil yoka upnamle.

² Winipnyeura, Siria mutuku noutam unyak mutuku nirya ara, ninye ton kum unamake. Pia ati bataknamake. Winibikirye, asukum ara ninye arye kam ning domba totoa weinak kipnamake. Akam ning unamakak ara, ninye tonoknye yalirye kum yanuka yakwetepnamle ati, adomba basam ap, kambing basam ap ara asukumuk mabikirye ilil kum unamle.

³ Ati ara, Damsyik mutuku nang arye, ninye deiyok kibuka taleamikce nang ara, kum kipnamle. Winipnamneʼ’ talak ara, Efraim mutuku noutam arye, ‘Nun mal olan nang olyasicak tenen, weik kat keil arye cang poka dobuka ulamice mutuku babye, narye lo arepnyeura, yu yin nang arye aning nirya dakuka sice kiplopnamake. Sirya tam mutuku noutam unyak nang ara, pia weika arye oplopnamak bukni, amutuku tuba kam unamak nang ati, yuk nang eibikirye, ‘Se, sikda mitang nang unyake. Sikda mambul pia kume,’ nyabuka, malye nyanamake. Sik Siria mutuku nang ara, yuk Israel yala nang ati, akutubuka malye nyanyak touk unamake. ‘Aning ara, dipkoprob winipnamle, talye kum nyapne, biknamlumʼ tenen, na Allah Yahweh aning-aning nirya talibuka deice tam erebuka, mikip weik ununye birye akunum nyapdeipse. Nara im deice yin talin malaikat nirya, sik deiyoknye unune.

⁴ Atalak kiplyeura, Yakub birye deibukba, dadeipdanin yangalamik nang, sik Israel nang talilamik bona ap, bona talilamik ning ap, pia teleb kibuka pil dolamik ning nirya ap ara, na Allah arye kum kipdeipnamne. Winipnyeura, sikda pia talye kankan nang ukirye, bol malye bopnamake. Winipmanto ara, pia weik uk taleamlinye bira, bol malye bolamle touk upnamake.

⁵ Atalak kiplyeba, sik Israel nang babye, mitik tonunuk tuba kam unamake. Winipmanto ara, gandum wa Rafaim mutuku lusukum wibuka kouamikak, yuk nang arye yanuka, agandum sekicak arye, libuka dipdobikba, kum danamuk touk, upnamake. Ara kam tuba unamak nang ara, mitik tonunuk tuba unamake. Weika arye kum unamake. Dipkoprob, ninye arye kouamikce ning sekikcak arye, libuka dibikceba, gandum mitik tonunuk tuba kilamle touk, sik Siria tam nang babye, mitik tonunuk tuba kam unamake.

⁶ Atalak ara, sik Siria tam noutam unyak Israel yala nang ara, mitik tonunuk unamaka ati, Winipmanto ning ton nyapnusine. Ara, gandum duk akunum libikce talak ara, duk mitik tonun ton tukwak saklamle touk upnamake. Tonda, zaitun yo duk mouamlyak, weik tam dakdobikirye, ayo deice tam yo duk sirik ning bataklamaka touk upnamsiake. Ayo deice tam ara, yo duk bitinye atonun, winilye atonun tuba ulamle touk, atalak ara Siria tam mutuku noutam ara, Israel yala nang mitik tonunuk batakikceura, tuba kam unamake. Weik kume. Aning ara dipkoprob upnamle ati, nara Israel yala nang, anggun ni koproba Allah Yahweh arye akunum nyapsine.

⁷ Sirya tam nang wenepnamne talak ara, atalak unyak nang nirya ara, sik ni koproba Allah, sik nong ati kintilina deiyoknye biti, moubuka tenenamake. Tonda, Israel nang pia melilulnye, malye una kumce, pia Diksukum Ululnye, Pia Teleb Leknye, el tibuk, diba tenebikirye, moubuka bikinamake. Sikce ni koproba Allah ati, ‘Se, melipsilyame,’ nyabuka, moronamake.

⁸ Atalak ara, sik ninye nirya ara, sik taruk deice arye, memebuka delinyak ning, isa si eren ning ati, ‘Nun ni koproba melipnamsilarya,’ kum tenenamake. Tonda, atalye ning si erena ati, mesba-mesba moubuka deibikirye, kam ning obuka, uku dongolamicak, ton kum tenenamake. Sik taruk arye memebuka deiamica nirya ap, siltong teleb ning, isa ati uku dongonyakak ap, tonda isa si Asyera, aisa kil el urasin atonun memebuka deibikirye, si erenyak ning babye, tuba diba tenebuka kum unamake.

⁹ Atalak akunum kiplyeura, Israel mutuku noutam weik asik dobuka ukirye, ‘Nun mal olan nang yanuka opsicakʼ tenen, cang keil poka dobuka, mikip kibuka deibikirye, kalikinyak mutuku nirya ara, narye lo arepnyeura, yu nang arye aning nirya dakuka, sice buklobikceura, aik olemuk upnamle. Winipmanto ara, min talak, Israel nang bayikak, Hewi yala nang ap, Amori yala nang ap, sik ulamik mutuku obuka, sice buklokbik touk, anggun mutuku babye atonun upnamle. Aning-aning nirya ara, sirya dakuka kum kipdeipnamne.

¹⁰ Israel nango, anggun nirya kekeplulume! Na Allah arye, aning nirya winipnamsina ara, talye ati kuma. Deiyok ara, ani. Allah arye anggun nirya lyepromsuk deiyoknye bira na uka. Tonda, na Allah arye anggunti tuba melilamsirye, nara weik keil mutuku dup erebuka buklyeba, ninye arye, ‘Yu nang arye opsicakʼ tenen, akeil deice welebikirye duknulamak touk, ulamsise. Naryuk anggunti, pia melibuka kaleklamsise. Bukni anggunce nati akunum lubakipnulume. Aning ati ara, anggunce sik isa si erena ati, ‘Nun isa arye melipnamsiakʼ tenen, urasin teleb yala ning dobuka, wa wibuka koululume. Aning atonun, teleb pamlye ning taruk ton sekmunce, aning isa si erena ati tuba koululume.

¹¹ Bukni, anggunce koululum ning ara, akoupmamunye talak aryuk sik kum, adiparyuk butukuka kwapu bongobuka paptu babye, aning arye duk kum moupnamle. Tonda, yuk yala ning ton koupmunyeba, kita ara, asum aryuk optu babye, akoun ning el nong ara, dipkoprob pia kum kilule. Atalak arye, nong atonun ulye ning ap, duk mouamlye ning ap ara, imun, kanye ikin deice una ap, tonda uk dina deice una ap uk, tuba unamsile. Narye wenepsinye deice arye, aning nirya ara kum kipnamle.

Israel yala nang, sik mal olan nang arye, opnamak talak ati, nyabuk yupu

¹² Anggun kekeplulume! Anggunda bicoe! Yuk-yuk mutuku unyak nang ara, yupa pia weik bulubuka wekelbikirye, yupu weika arye nyapnamak! Sik abulupka wekmace nang ati, yupu weik arye nyapnamaka ara, winipmanto laut mek ombak weleplirye, anggun dam yanuka saklyeba, lelim weik nyalamle touk upnamake. Kekeplulume! Sik abulupka wekmace nang arye, yupu nyapnamaka ara, winipmanto, mok pia weik cenmalyeura, weik mek oplirye, lelim pia weik nyalamle touk nyapnamake.

¹³ Diba, sik ona ati, yuk mutuku nang yanamak ning ara, mek obuka yangalamle touk kibuka, lelim weik nyabikirye yanamake. Winibikce talak ara, Allah arye sik yuk mutuku arye yanamak nang ati, yupu weika arye nyabuka wenepnirye, yupu sekdongopnamle. Winiplyeura, sik ayanganamakce nang nirya ara, kwarabuka karen-karen uk bikbik abuka bindopnamake. Sik anang ara, an dum duk koproba wepdobikirye, el kala batakikceba, kum arye bobuka balamle touk wininamake. Tonda buta ara, kumanya yalirye, pu abuka bobalamle touk, anang babye atonun upnamake.

¹⁴ Bukni, asum ara, lukunyan talak ara, anggun mutuku yanamak yin talin nang ara, anggun mutuku tuba ulamice talak ara, sik anang dam ara weik ilil un ninguk winipbikceba, sik ilil weik upnamle. Bukni bereklyeura, sik ayin nang nirya akunum kum kipdopnamle. Awinipnamle ning nirya ara, nun ning alubuka dolosinyak nang, Allah arye sik deice deipnamle. Tonda, nunti, sice buklopnamsiak nang ara, Allah arye sik nong deice weik kanye ikin ning arepnamle.