Yesaya 16 - Eipomek

Moab mutuku ulamik nang ara, mikip weik ulamikbuk, mitang kibuk ning ati, nyabuk yupu

¹ Allah arye, na nabi Yesaya biti nyapnuk yupu ara, sik Moab mutuku nang ati, nyabuk. Anggun Moab ululum nang ara, kekeplulume! Sik ‘Yudea tam nang arye melipsitingeʼ tenen, anggunce, Sela mutuku arye, dekna arena ati, domba basam mapu weika arye dopdeipmunyeba, ninye pia kum, mutuku kata bisik boyakirye, Yehuda tam noutam bukni, Sion mutuku deice, Yerusalem weik asik talibuka, ulamice deiyok nang dam yanuka, arepnamake.

² Moab mutuku nang nirya ara, dobokceba bai sakuka, bikirye walwal uplyeba, ‘Nun mal olan nang arye, obuka sirya daksicakʼ tenen, Arnon mek koubuka, otam mekin uk yanuka dipdekirye, ‘Se, sik Yudea tam nang arye, yata yupu nyapnusiak do, melipnusiak do, kum do?’ tenen, yanuka kekenamake. Winipmanto ara, mi maka, sik nin birye yukupdoplyeba, tukwak saklirye, ilil weik uplyeba, sakuka bai tam balamak touk, winipnamake.

³ Sik anang arye, Yehuda yala nang ati, nyapnamake. “Se, nun winipmap ning ara, yata wiripnamap do? Anggunce, ‘Winiplulume,’ nyabuka, laka nyapsumunyak, kekepnuyabe. Anggunce nunti, melipsululume. Winipmanto ara, keting buppu arye dinmaliba, yo tikamlyak arye, lelilamle pia teleb kibuka, dongolye touk, anggunce nun mal olan nang ati, kalikuka melipsululume. Nunda nun mutuku arye bai sakuka bikbik abuka yapu nang unyabe. Ati, nun moropsiap ning ara, ‘Nun mal olan nang arye opsikcak ati, anggunce duknupdeipnusulumeʼ tenen, moropsiyabe. Anggunce, laka kum kipdeipnamsulume.

⁴ Anggunce nunti, ‘Telebe, nyapsutumbuk, nunda anggun mutuku tia ati, yanuka neika unamabe. Nun mal olan nang yakirye, nun yanuka, obuka sirya daksikcak ati, kaleksumunyeba, nunda anggun amu tam unamabe. Nun Moab tam nang ara, nunti osinyak nang ap, weik ikin ning delisinyak nang ara, ‘Nun nirya obuka, sirya daksicakʼ tenen, ‘Anggun Yudea tam nang arye, nun Moab tam arye, bikbik abuk asukum yanamap nang ati, melipsumunce, kaleknamsulumeʼ tenen, moropsiabe. ‘Kumura, nunti obuka, wenepsikirye ikin delisinyak nang arye, nun nirya ara, kum kipdeipnamsiaka ati, anggun Yudea tam nang arye, melibuka kalikinamsulumʼ tenena ati moropsiabe. Winipsumunyeura, aminyan talak, nunti ikin delisinyak yu nang ara, bindopnamake. Tonda, ayu nang arye, nun mutuku wamlye ning nirya, tuba sice bultakna kum unamake. Aning atonun, nun talinyap ning alubuka dolosinyak nang arye, bindobikceba, tunim apnamake. Aning nirya akunum winiplyeura, anggun Yudea tam nang ara, telebuk unamlume.

⁵ Ara ani. Aning nirya akunum winibikura, Daud birye deibukba, dadeipdanin yangalamik nang arye, pia teleb ulamlinye deiyoknye, erepdeipnamake. Allah arye, anggun Yudea tam ululum nang ati, weik arye bico tenesulule ati, el teleb kanye deice aryuk, pia diksukum ululnye erepdeiplyeba, anye bira, sik ninye deiyoknye Raja kibuka unamle. El anye birye, el mutuku nang nirya ati, bico teniplirye, pia moubuka talipnamle. El anye bira, diksukum winin ninguk talibuka, pil donamle. Tonda, sik kum bukni, minop arye teleb piluk talibuka doplirye, ninye yupu ara, diksukum kibuka bokeipnamle! Allah arye nyapdeipnukba kekepsirye, na nabi Yesaya birye nyapne.

⁶ Se, na nabi Yesaya birye nyapsine. Na ap, nun Yehuda tam noutam unyap nang nirya ap, nun kele. Yuk-yuk mutuku nang nirya arye, “Kume, sik Moab noutam unyak nang arye kwalinyake. Tonda, sikce kanye weik arye, eren nang ukirye, yuk mutuku nang nirya ati, malye yupu nyabuka, talye yupu nalinyake. Tonda, sik Moab nang arye, sikti, ara, ‘Nunda dipkoprop, pia teleb nang unyabe. Nunce aning-aning nirya ara, pil teleb kibuka donyabe,’ nyabuka, kanye deibikirye, kwalibikirye erepdakirye, tilila yupu nyanyake. Bukni nun kele, anyanyak yupu nirya ara, talye ninguk ulule. Nyalamikba, akunum kekebuka, biklamupu bukni, sikce talye tilila yupu uk, nyanyake.

⁷ Aning ati ara, sik Moab mutuku nang ara, nunce kum bico tenepnamabe. Sik yuk daununyake. Sikce malye nyabuka ngalukunyakce, weik arye engenamake. Tonda, sik Moab nang, dana-dana tam unyak nang eibikirye, sik Moab tam nang, ikin weik upnamak ning ati, ‘Se,’ tenebuka engenamake. Sik Moab nang ara, min talak Kir-Hareset mutuku ulamik nang arye, anggur duk dobuka, pia toh teleb din ning kintinibuka deiamikak, dilamlum ning ati, teneplumce, engenauk unamlume. Aning babye kum danamle. Nunce sik Moab mutuku nang batakibyeba, sik babye, ‘Se, se, nunda winilamupe,’ tenebikirye, bouku sukun-sukun deiceuk unamake.

⁸ Tonda, Hesyebon mutuku noutam, wa wilamikce ning nirya ap, tonda Sibma mutuku anggur tapu wa wibuka koulamika nirya ap ara, sesal seprobukba, sik mal olan nang arye, aning nirya kum kipdeibik. Minop talak ara, sik yuk mutuku talibuka, ninye deiyok kilamik nang arye, Moab mutuku noutam kintinip deiamik anggur mek, kanye walwalalamak ning ati, yanuka dekuka dilamikak, kanye pia walawalamik. Bukni, wini talak ara, anggun anggur pia teleb ninguk, wilamlum wa dam nirya ara, akunum kum kipdeipsike. Min talak, anggun anggur wa wilamluma ara, wibinamna ani, karin mutuku si, Yaezer mutuku bindeibukba, keting yangan tam, ninye kum mutuku bobinuka, tonda keting kumulban tam ara, weik laut mekwen, el si Laut Mati koubuka, otam bisipnarye wilamik. Bukni, wini talak ara, aning nirya akunum kum dasile.

⁹ Ati ara, na nabi Yesaya babye, anggunti, ‘Bico,’ tenepnirye engenmane. Ara, Moab tam noutam bukni, Sibna mutuku ap, Yaezer mutuku ap, anggur tapu wa wiamik ning ara, akunum kum kipdeibikba, anggunce engelamlum touk, na babye engenmane. Aning atonun, sik Hesyebon mutuku nang ap, Eleale mutuku nang ap ati, engenmanyeba, na asing maka sakanamnile. Ara, anggun mutuku noutam koulamlum ning ap, libuka delilamlum ning ap nirya ara, ninye olana deice arye, akunum kum kipdeipsike. Anggur duk moun li kiplyeba, kanye deibuka linmakirye, yupu ton kum nyapdenamake. Sik mal olan nang aryuk akunum libuka dibike.

¹⁰ Wini talak ara, tonoknye ton, amutuku noutam, anggur wa wibuka koulamikce, wa dam ulirye, kanye deibuka kum unamle. Tonda, amutuku noutam ulirye, kanye deibuka, mot kum nyanamle. Atonun, anggur duk dakuka deiplirye, anggur duk deice yaniplyeura, anggur mek purubuka, mek kum sakanamle. Ara, Allah arye, sik aulamik nang nirya ara, anggun wenena ati, akunum kum kipdeipsuke.

¹¹ Ati, na Yesaya birye, sik Moab mutuku nang ap, Kir-Heres mutuku nang ap, sik kanye imun ulamice ning, eipnyeura, na kanye pum tam arye tenepnirye, ‘Se, sikda bicoʼ tenen, malye nyalamak touk kibuka, ngalukunamne.

¹² Anggun Moab mutuku ululum nang ara, ‘Se, nunda yata wiriptibye do?’ tenen, pia palibuka, sik si erenyak isa si erena ati, mutuku deice welebikirye, ‘Melipsilyame,’ nyabuka, weik yupu deice morolamikce talak ara, mitang upnamle. Sikce nyabuka moronamak bukni, sikce moronamak ning nirya ara, dipkoprob nong ton pia kum upnamle.

¹³ Aning deice tam akunum nyapmasin yupu ara, minop talak arye, Allah Yahweh elce, sik Moab mutuku unyak nang ati ara, ‘Anggun wenena ati winipnamsine,’ nyapdeibuk.

¹⁴ Bukni wini talak ara, Allah Yahweh arye, nyapdeipsile. “Keting tamun ton ap, winilye akunum uplyeura, Moab mutuku nang, sik talibuka ukceba, anggun ap, yuk mutuku nang ap arye, ‘Se, sikce talinyak ning ap, unyak ning ap, aning ara, pia telebe, pia mambul ulul,’ tenenyak ning nirya ara, narye kum kipdeipnamne. Anggun mutuku noutam nang weik unyak ning babye, kum kipdeipyeba, mitik touk, tuba kam unamake. Sikda mitang nanguk unamake. Aning nirya, akunum winipnyeura, yuk-yuk mutuku unyak nang arye, sik Moab tam ulamik nang ati, ‘Dipdelulume! Sikda, akunum sakik! Sikda, talye nanguk unmaka atia nyabuka nalinamake.” Allah arye nyapdeipmalak, na Yesaya birye, kekebuka sekmane.