Yesaya 15 - Eipomek

Allah arye, sik Moab tam ulamik nang ati, obuka sik asik dakuka, sice buklopnamuka ati, nyabuk yupu

¹ Moab mutuku unyak nang ati, Allah arye, “Winipnamne,” nyadeibuk. Ara, “Se, anggun Moab tam ululum nang ara, bicoe. Weik asik dobuka ulamikcak, Ar mutuku ara, tonok lukunyan noutam aryuk, yuk mutuku yin nang arye yanuka, obuka sice buklopmaka ati, Moab tam unyak nang nirya, kanye ikin unamake. Aning atonun, Kir mutuku babye, obuka sice buklopnamaka ati, Moab mutuku ara, akunum malye kipdeipmake. Winibikceba, Moab mutuku noutam ara, ninye tonok babye, amutuku ton kum unamake. Sik mutuku ara, nirya kum kipdeipnamake.

² Dibon weik asik unyak nang ara, sik isa si erenyak mutuku kon deice welebikirye, weik arye engenmake. Sik Moab mutuku unyak nang ara, sik mal olan nang arye, Nebo mutuku ap, Medeba mutuku ap, kum kipdeipmaka ati, pia bico uplyeba, ‘Seʼ tenen, weik yupu arye nyabuka, engenauk unamake. Tonda, sik kisok potong, delo kuknamake. Aning atonun, sik cang bam potong, akunum kopnamake. Ara, amutuku bitinye tenebikirye, bico uplyeba, tonap engenauk unmaka ati, bikilina ati, amutuku ninye nirya arye, sik potong kopnamake.

³ Tonda, pia ikin kanye bobuka unmaka ati, amutuku bisik noutam, bakce nang nirya babye, sik baju ara, pia malye ning, karung koni baju ongobikirye banyake. Ara, ‘Amutuku bitinye dakuka sice buklopnamak ning ati,’ tenebikirye, ‘Bico uplyeba, engenmakirye, biknamake,’ tenena ati, abaju ongonamake. Ongopmakce ning ara, sik asik, kat ning arye, lu kibuka domikce, deice tam welebikirye, engenamake. Tonda, amutuku nang bulubuka yupu sisikinyaka babye, wekelbikirye, laka kibuka, asukum noutam arye engenamake. Tonda, sik aik koproba, pum tam arye engenamake. Amutuku noutam ara, tonoknye babye, talye kanye kum bolule. Sik nirya arye engenmakirye, sik nong nirya mitang upnamle.

⁴ Moab mutuku noutam bukni, Hesyebon mutuku unyak nang ap, Eleale mutuku unyak nang ap ara, sik engenamaka ara, weik arye erebuka engebikikirye, ‘Se, anggun ton yanuka melipsululume!” nyabikceba, alelim ara, otam karin mutuku Yabas mutuku unyak nang babye, sik yupu kekepnamake. Winibikceura, Moab tam yin talin nang arye, ilil weik uplyeba, sik babye, “Se yata wiriptibye do?” nyabuka engenamake. Tonda, sik mikip weik kilanyak ning ara, pia kum upmalya ati, ilil pia weik uplyeba, sik nong nirya mitang upnamle.

⁵ Se, na nabi Yesaya babye, sik Moab tam nang ati, bico tenepnarye, engenmane! Moab mutuku ulamice nang ara, sik mutuku batakuka, bai sakuka bikirye, Zoar mutuku ap, tonda Elgat-Selisia mutuku ap, ‘Duknupnamapʼ tenen, bikbik abuka binamake. Yuk Moab tam nang ara, Luhit mutuku lu bisik welebakirye, engepnin binamake. Ton nang ara, Horonaim mutuku welebacebuk, ikin ning, sik dam akunum yalyeba, sik mal olan nang arye, sik mutuku nirya akunum sice buklomica ati, weik arye malye nyabuka, ngaluknin binamake.

⁶ Tonda, Moab tam mutuku noutam ara, Nimrim mutuku balamuk mitik mek pu babye, akunum cebukaplirye, kum kipnamle. Ati amutuku mek lilun dana-dana tam palamle mutmuta nirya ara, akunum kolulona uk upnamle. Winipnamle talak ara, amutuku mek lilun tukwak palamle ning yala nirya ara, kum papnamle ati, mutmuta imbik ton kum eipnamake.

⁷ Ati ara, Moab mutuku nang, sik bona ap, sik talilamik teleb ning ap ara, mitik tonunuk bulubuka kintinipmikce, ‘Aning nirya, alubuka dopropsicakʼ tenen, amek koubuka, otam binmekce, amek el taruk tam, Harabim mek kin doubuka deibik.

⁸ Dan tam do nirya, Moab mutuku noutam unmak nang nirya ara, weik arye engenmakceba, anggun tam tuku wilinak ara, pia karenak, iknapye tam (arah selatan) unmak nang babye, dabu tam (arah utara) unmak nang babye, kekenmake. Ninye ngalukuka malye nyanmakirye, engena lelimuk nyanmaceak, kekebikirye, ‘Seʼ tenen, malye kanye bobuka, unamake. Angalukuka engenmace lelim ara, Eglaim mutuku ap, Beer-Elim mutuku unyak nang ap nirya ara, kekepnamake.

⁹ Tonda, Dibon mutuku noutam, balye mek nirya ara, ninye obikceba, sik ining ap tabaklyeba, amek ara, ining bi uk kibuka banamle. Allah elce sik amutuku ulamice nang, sik deice ara weik imun ikin ning ton ap dokweteplyeba, pia weik kanye imun upnamle. Allah elce kus atonun ning, weik yu ning, el si singa kus dopdeiplyeba, sik Moab mutuku nang, ‘Obuka sirya daksicakʼ tenen, bai sakuka bindopnamak nang ara, obuka sirya daknamle. Bukni, asukumuk, Moab mutuku noutam daunamak nang, mitik tonun tuba kam unamak nang ara, tuku ton arepnamlarya.