Yesaya 14 - Eipomek

Yuk pera mutuku dadonoklyeba, binamikce ani, Yudea mutuku tamubuka yanganamaka ati, nyabuk yupu

¹ Allah Yahweh, elce wipdeiamuk nang, sik Yakub yala nang ati, weik arye bico tenebuka melinamlarya. Tonda, sik Israel nang ati, tamubuka tonap wiplirye, sik anang ati tamubuka teleb kipdeiplirye, bobuka sik mutuku koproba noutam tamubuka deiplyeura, kanye deibuka, telebuk unamake. Sikda, Allah el tam nang tuba unamake. Allah arye, anang tamubuka boyalyeba, sik mutuku yanuka unamak bukni, yuk mutuku ninye asik nang babye, amutuku noutam yakceura, sik Yakub yala nang ap, neika unamake.

² Minop talak, sik Babel mutuku ulamik nang arye, Israel nang obuka, Babel mutuku bobinamik bukni, aminyan talak ara, yuk mutuku nang weika arye, sik Israel nang melibikceba, sik ni Allah arye, sikti, min arye areamuk mutuku tamubuka yanamake. Atalak ara, sik Israel nang arye, sik bobinamik nang ati, sik amu tam deibiceba, Israel nang, sik ikin pil melibuka donamake. Tonda, sik mutuku koproba, neika unamak talak ara, yuk yala ninye asik nang, sal babye, kilapu babye, sik Israel yala nang ati, sik amu tam kibikcopura, dekna dolona kum aryuk, talye pil melibuka donamake. Ara wini talak, Israel nang ati dobuka, wenen aik dongobikce nang ati ara, kwang dakuka tomobikirye, sik amu tam deibikceba, daunamake. Tonda, Babel mutuku nang arye, Israel nang ati, ninye deiyok kibuka taleamikce, ikin ning, sik nong deice delilamikba, kanye imun asa ulamik touk, aminyan talak ara, sik Israel nang ninye deiyok kibuka talibikirye, sik Babel tam nang deice, ikin ning deibikirye, darapnamake.

‘Raja Babel bira, ninye dibiceura, bobanyakak unamle,’ nyabuk yupu

³ Anggun Israel nang nirya ara, kekeplulume! Dipkoprob minop talak ara, Babel nang arye opsikce, weik ikin ning dobuka, anggun nong deice delilamsikce ati, imun weik kanye bobuka, ikin pil weik donamlum bukni, aminyan talak ara, Allah arye akunum teleb kipdeipsilyeba, kanamuk unamlume. Min talak ara, yuk mutuku nang arye, anggun Israel nang ati, anggun deice ikin pil deiamsikca ati, weik ikin kanye bobuka ulamlum bukni, aminyan talak ara, anggun ni Allah Yahweh arye, aning kum kipdeiplyeba, anggunda dikdik sebuka, telebuk unamlume.

⁴ Atalak ara, Allah arye anggun Israel nang lyepropsilyeura, anggun Israel nang arye, Raja Babel biti nyabuka nalipnalume. “Babel mutuku taleamuk malinye bira, akunum sakmale! Raja birye nunti, yu ubukba, kwalibuka erepdayukce, nun deice ikin ning delilamsuk bukni, aning nirya ara, aminyan talak ton, pia kum upnamle. Elce tonap, ikin kum deipnamsile.

⁵ Ninye deiyok kibuka talilamikce nang arye, malye-malye weik ulamik nang nirya ara, ninye deiyok kina ati, bikilin ning talinyak kama ara, Allah Yahweh arye, akunum dopropmalce, ninye deiyok talinyak nang ara, akunum kum kipdeipmale.

⁶ Min talak ara, sik amalye ninye deiyok nang arye, pia yu upnukba, yuk mutuku nang nirya ati, tuba-tuba sik deice ikin ning deibuka olamik. Tonda, aninye deiyok nang arye, mutuku sirya, im sirya nirya ulamik nang nirya ati, ‘Anang ara, nun amu tam deipnamabeʼ tenen, yu ubukba, batakna kumce, anang ati pia tuba-tuba onauk ulamik.

⁷ Bukni, Allah arye amalye una deiyok nang, akunum amu tam deibuka ati, tukwak mutuku sirya, im sirya nirya unyak nang arye, ‘Se, yata wiripnamap do?’ tenena kumce, talye kanye deibuka, telebuk unamake. Anang-anang nirya ara, olana kum diparyuk, kanye deibikirye, mot nyanamake.

⁸ Aninguk kum bukni, Winipmanto ara, Libanon mutuku noutam tikuk kat yo, el si Sanobar yo ap, tonda Wapum yo ap ara, kanye deipnamake. Ara, Babel mutuku taleamuk malye winilamuk deiyoknye bira, akunum obikba dibuk! Tonda, yuk mutuku nang arye, anye akunum obikce, amu tam teleb kipdeibika ati, atalak arye deiyok koubuka, anoutam talak nirya ara, ‘Weik cang kat yo wepnuyapʼ tenen, pil don nang ton, nun dam tamubuka, kum yanganyake. Nun dam ton kum yakirye, nun ton winipsikirye, kum obuka sirya daknamsiake,” nyabuka, kanye deibuka nyanamake. “Wini talak ara, telebuk unyabe,” nyanyake.

⁹ Ninye akunum diamik nang unyakak, el si Sheol, amutuku ulamice, diamik ninye kanya arye, Babel mutuku taleamuknye biti, ‘Se, kanye deibabe. Apia malye ulamuk deiyoknye akunum obika ati, amutuku yanamle ati, kanye deibuka kitinibabe,’ nyanamake. Sik kinipmacak arye, ‘E, nun kwit asukum yanule,’ nyabuka, yukupdopnamake. Aning atonun, sik minop talak akunum diamik nang, sik kanya bukamlirye, Raja Babel ap elana ati, yanamake. Sik amalye-malye ulamik Raja nang nirya ara, tukwak mutuku talibuka, Raja-Raja nang ulamik bukni, sik akunum dibika ati, Sheol mutuku unyakak arye, Babel mutuku taleamuknye, sik dam yanamle talak ara, el dam yakirye, yukupdopnamake.

¹⁰ Sheol mutuku noutam akunum diamik Raja nang, sik kanya nirya arye, Raja Babel, sik dam yanamlanye biti, nyapnamake. “Se, nun kwit, wini talak anda nun winilamupu touk, akunum winipmalame. Nun mikip kum upsukba, pia amu tam ulamupu touk, an babye mitang kipkile!

¹¹ Min talak ara, ninye arye anti, kecapi bung-bung ana bopnarye, si erelamikba, anda kanye deibuka kwalilamlume. Bukni, wini talak anda ninye dibin nang unyakak, pia tunimanak akunum yalame. Ati, an manak kipnulyame. An amsuna kalubuka mapnamlamak ara, an nong deice selimut atonun upnamkil ning ap, an amu tam amsuna atonun deice mapnalamak ap ara, akunum diamik nang, sik nong lyuplyeba, kuluma amulul ning ara, an nong deice ap, amu tam ap, pia aupnamkile.

¹² Se, Babel mutuku talibuka, ulamlum Rajanye, min talak ara ance, ‘Nara pia mambul weiknye ununa ati, nara bereknulye talak tikilyangalamle dirina weik kurya atonun unune. Tonda, nara beren tam talak keting panaplirye, dirina weik ulamle touk unune,’ tenyamlume. Bukni, Allah arye lo arebukba, yuk mutuku nang arye, an akunum opkikba, sakluma ati, wini talak ara, pia amu tamuk ulyame. Winipmanto ara, dirina weik kurya, im deice arye tukwak saktu ura, dirina kum uptue atonun, an babye akunum upkuke. Minop talak ara, ance ninye mutuku sirya, im sirya ulamik nang nirya olamlum bukni, wini talak ara, Allah arye akunum opkukce, tukwak amu tamuk akunum pia deipkuke.

¹³ Min talak ara, an kanye pum tam arye, ‘Kume, nara im deice welepnirye, na bunak ara, Allah arye weik arye erebuka, alip tam tikilye kurya deiamuk ning, aning deice tam bukamne. Na Raja kina ati bun ning, el si tahkta, im deice deipnirye, aning nirya deice tamuk bunamnarya. Tonda, dabu tam, (arah utara) bukni, weik mutuku weik bukuk mutuku kon deice, el si Sapon mutuku, pia mambul dewa-dewa bukikce,’ yupu talinyakak ara, ‘Na babye asukumuk buknamnarya!’ tenelamlume!

¹⁴ Aninguk kum bukni, an kanye pum tam arye, aning ton tenelamlume. ‘Dua ara, im noutam ulule bukni, nara erebuka, alip tam bukni, eitam ton unamne ati, dua deice welepnamne. Winipnirye, Allah arye aning-aning nirya deice tam erebuka ulirye, Mikip Weiknye ulul touk, na babye atonun unamnarya!’ tenelamlume.

¹⁵ Utenebuka ulamlum bukni, wini talak ara, anda Allah arye akunum dobukapkukce, tuku pum tam akunum dokwepkuke. Ara, tuku amu tam, akunum diamik nang kanya unyakak, amutuku si ara, Sheol, akunum dokwetepkukba, asukumuk ulyame.

¹⁶ Akunum dibuka, Sheol binamak nang, sikce dipdebuka, anda eipnamkiake. Eipkikceura, sikce anti, ‘Se, yata wiribuka uptu do?’ tenen, mambul kanye bobuka, asipdenamake. “Tukwak mutuku sirya, im sirya nirya ulamik nang yala-yala nirya arye, anti, si erelamkiknye bira, an akunum do? Tonda, amutuku-amutuku talibuka ulamik nang ap, sikce talilamik nang ap nirya arye, antibuk ilil weik ulamukba, sik nong sirim talilamuk bukni, dipkoprob anda asukumuk aunmalam do?’ tenen, asipdekikceura, sik kanye lopnamle.

¹⁷ Tonda, ayupu ton nyapnamake. “Kume, el anye dip tukwak mutuku noutam, weik asik dobuka ulamik nang nirya ara, obukapnarye, asik oldemuk kililamuknye bira, anye do? Tonda el anye birye, amutuku-amutuku nirya olamukce, ninye dobuka, wenen aik delilamuk nang ara, minop lopdeibuka, ‘Anggun mutuku tamubuka bilulume,’ pia kum nyalamuknye bira, anye do? El tomolamuk nang ara, wenen aik pum tamuk dongamukba, asukumuk binuka ulamik. Amalye ulamuknye bira, asukum aunmalanye akunum do?

¹⁸ Tonda, sik yuk mutuku nang nirya ara, sik talibuka ulamik deiyok nang, Raja-Raja dibiceura, sikce, ‘Se, nun deiyoknye dipsileʼ tenen, weik arye engebuka, sik Raja-Raja nong kanye deibuka, urasin teleb bobuka, weilban sukumuk weilbanyake. Raja-Raja nirya, yuk-yuk bukni, teleb sukumuk weibikirye, anang ati, tuba si renyake.

¹⁹ Bukni, an Raja Babel mutuku talibuka ulamlumnye, an weinak ara kum ati, an nong ara dobuka, teleb weinak ara, kum dongopkik bukni, bai tamuk tuku deice talye dopkwetebuka, batakike. Ara winipmanto, talye lyun ning dobuka, tuku lukamikca noutam dolkwetelamak touk, akunum winipkik. Tonda, anggun kan-kan yin talin nang, mal olanak arye, parang ya arye obikceba, dipnamak nang ara, awinipmace touk, sik nonguk tonokakuk, tuku pum tam do, kata tuku deice do, talye deliltakanyak touk, an nong babye dobuka, tuku deice deiplopkikceura, an nong deiceuk, yuk weiamik nang dobuka, teikdongobik. Winipkika ara, winipmanto ara, talye ning dipneura, ninye arye, ‘Aning ara, mambul ning,’ tenena kumce, aning nong deice yaniplobuka, talye balamak touk, winibik.

²⁰ Tonda, an malye weik winilamlum deice arye, an mining mutuku koproba ulamik nang nirya babye, obuka sirya dakamlume. Aning ati ara, anda yuk ninye deiyoknye, Raja-Raja nang diamikba, anggun tam nang arye, pia moubuka weilamik touk, kum weipnamkiake. Ara, an nong bobuka, wein sukum teleb ning pum tam kum weipnamkiake. Deiyok ara, ance taleamlum mutuku noutam nirya ara, akunum kum kipdeiamlume. Aning ati ara, anda pia malye weik ulamlumnye ap, an mapu silip ap ara, ninye arye anggun si tuba kum bikinamsiak ati, an yala nang ara, pia luba kipnamkiake.

²¹ Ati, wini talak ara, anggun nirya kekeplulume! Raja Babelnye, elce deiamuk mapu ap, elce deibukba, dadeipdanin yangalamik nang nirya ap ara, anang nirya ara, sik ona ati, akunum kintiniplulume! Ara talye ati kuma. Raja Babel birye deibukba, dadeipdanin yangalamik nang nirya ara, anggun ni yapu arye, malye winilamik ning ara, pia weik ati, anggun mapu nirya obobyeba, dipnamake. Ara, min obuka sirya dakmunyeura, sikce deiamik mapu ara, aminyan talak, sik yala nang ton weik upnin bakirye, ninye deiyok nang tuba kibikceura, tonap, mutuku sirya, im sirya nirya, talipnamakca! Ayala nang arye, ninye deiyok kibikcopura, tukwak mutuku sirya, im sirya nirya noutam arye, weik asik ton dobikirye, daunamaka ati nyapne. Ati, Raja Babel, el yala nang nirya, anggunce obuka, sirya daknamlume!

Allah arye, “Babel mutuku ap, amutuku unyak nang nirya opnirye, sice buklopnamne,” nyabuk yupu

²² Allah Yahweh aning-aning nirya talibuka deice tam erebuka, mikip weiknye bira, im deice yin talin malaikat nirya, sik deiyoknye ulule. Elce ayupu nyabuk. “Narye Babel mutuku noutam unyak nang nirya ara, obuka sirya daknamne. Amutuku ap, amutuku unyak nang ap, sikce deibikba, dadeipdanin yanganyak mapu nirya ap, sikce deiamik mapu ap, sikce deipnamak mapu ap, sik nirya obuka kum kipdeipnamne. Anang nirya akunum opnyeura, tonok nang babye kam tuba kum unamake. Winipnyeura, yuk mutuku nang nirya arye, Babel mutuku nang, sik si tuba kum tenenamake. Ninye nirya arye, ayala nang, sik si lubakinauk upnamake. Na Allah Yahweh arye, ayupu nirya ara kunum nyapsine ati, aning nirya ara, dipkoprob winipnamne.

²³ Babel mutuku ara, na Allah Yahweh arye, malye kipdeipyeba, ninye pia kum kibuka, lo uk uplyeba, malye mek kwen lu kipdeipnyeba, amutuku noutam ara, ninye una kumce, kout maka dem unamake. Winipmanto ara, Babel mutuku dana-dana tam nirya ara, amsuna bun ning arye, buta welelamle touk winipnamne. Winipnyeura, amutuku noutam wamlye ning nirya ara, kum kipdeipnirye, sice buklopnamne. Ayupu ara, na Allah Yahweh aning-aning talibuka, deice tam erebuka, mikip weiknye unirye, im deice yin talin malaikat nirya, sik deiyoknye unune. Narye ayupu ara nyapsine ati, aning nirya ara, dipkoprob winipnamne.” Allah arye nyabuk.

Allah arye, Asyur mutuku noutam wamlye ning nirya, kum kipdeipnamle ati, nyabuk yupu

²⁴ Nara Allah Yahweh, aning-aning nirya talibuka, deice tam erebuka, mikip weiknye unirye, im deice yin talin malaikat nirya, sik deiyoknye unune. Nara, nyalin yupu deice arye ayupu nirya ara, nyapsin ati, dipkoprob aning nirya ara winipnamne. Tonda, narye, ‘Winipnamne,’ akunum tenyamse ning nirya ara, dipkoprob winipnamne! Aning atonun, narye, ‘Aning ara, akunum winipname,’ nyapdeiamse ning nirya ara, kum batakanune, tuba winipnyeba aulula ati, dipkoprob aning nirya ara, winipnamnarya.

²⁵ Narye, ‘Winipnamne,’ nyapdeipse ning ara, ani. Asyur mutuku nang bukni, na kanye deipse mutuku, Yudea tam mutuku noutam unyak nang ara, opnirye kum kipdeipnamne. ‘Naʼ tenen mutuku, Yudea tam noutam unyak Asyur nang ara, Yudea mutuku deice opnirye, bataklopnamne. Asyur mutuku nang arye, na mapu koproba, Israel nang ati, obikirye ikin ning weik, sik nong deice delinyak ning nirya ara, kum kipdeipnamne. Tonda, sik Asyur nang opnamne deice arye, sikce ikin ning dobuka, Israel nang deice deibikce, ikin pil dilamik ning ara, aning babye dopropnirye, kum kipdeipnamne.

²⁶ Na Allah arye, ‘Tukwak mutuku sirya, im sirya nirya ati, winipnamne,’ tenepse ning ara, akunum laka nyapmasine. Tonda, na Allah arye, mikip weik taruk erebuka talipnirye, mutuku sirya, im sirya nirya unyak nang nirya ati ara, na tenepnye touk, dipkoprob winipnamnarya!

²⁷ Nara Allah Yahweh, aning-aning nirya talibuka, deice tam erebuka, mikip weiknye unirye, im deice yin talin malaikat nirya, sik deiyoknye unune. Narye, ‘Winipnamne,’ nyabuka, aning nirya nyalin yupu deice akunum nyapmasina ati, yatanye birye, na yupu seknutu do? Kume, aning ara, kum winipmanto. Nara Allah, na mikip weik taruk akunum erebuka talipsirye, ‘Asyur mutuku nang ara, wenebuka opnamne,’ akunum nyapse ati, yatanye birye, na taruk lidopnutuba, aning kum wiriptinye do? Narye, ‘Winipnamne,’ nyapdeiamse yupu ara, yatanye birye yupu seknutu do? Kume, ninye tonoknye babye, yupu kum seknetinge.

Allah arye Pilistin yala nang ati, kum kipdeipnamle ati, nyabuk yupu

²⁸ Ayupu ara, Raja Ahas dibuk keting tamunuk, Allah arye nabi Yesaya dam yanuka nyabukba, elce laka nyabuk. Ayupu ara, ani.

²⁹ Anggun Pilistin yala nango, anggunce, ‘E, Raja Ahas nun olamsuknye, tonok yo kung atonunye bira, ninye arye kat yo kama dobikirye, yuk nang, sik nong deice olamak touk ulamsuknye bira, akunum dipmale,’ teneplumce, pin-pin kanye bobuka, kum unamlume. Deiyok ara, Raja yu kwatima arye, ulamle touknye ulamsuk bukni, akunum dipmal ati, yu kwatima arye duk deiplyeura, aminyan talak pataplye ning ara, ninye on kwatima ton, pia yu ning panabuka balamak touk, aminyan talak ara, pia weik yunye ton tiklirye, min talilamsuknye, el punupnamle. Anye bira, pia weik imun kanye kipdeipnamsilanye tiknamle. Aning atonun, apia yu ninye on kwatima arye, duk deiplyopura, aminyan talak aning ton usupliryeura, ninye on kwatima ton, pia yu ning ton, panabuka balamle. Aning arye si topsilyeura, ninye adiparyuk dibinyake. Ati sirya talak yanamle yunye bira, weik kanye imun ning, anggun nong deice deipnamsil. Anggun Pilistin nang ara, weik kanye imun upnamsile.

³⁰ Atalak ara, Allah el mapu bukni, pia talye kankan ulamice nang babye, sik weinyak domba basam din ning eibikirye, dobuka arebikceura, dinamake. Tonda, atalak aning-aning nirya, kum talinyak nang babye, aminyan talak teleb aryuk dikdik sebikirye, mapnamak talak babye, ilil kumce, talye kanye bobuka unamake. Sikce domba basam ap, kambing basam ap, weina deiyok nang unamake. Bukni, Allah arye, anggun Pilistin nang ati ara, din weik patana deiyok ning arisilyeba, din dina kumce, mitang upsilyeba, dipnamlume. Atalak arye kum dipmunce, kam tuba unmalum nang babye, Allah arye wenebuka oplirye, sirya dakanamle. Anggunce deipmunyeba, dadeipdanin yanganamak nang babye, opsilyakarye sice buklopnamle. Anggun nirya babye, sirya dakanamsile. Aminyan talak ara, anggun yala pia kum kipdeipnamsile.

³¹ Atalak anggun Pilistin mutuku noutam, weik asik dobuka ululum nang ap, anyasik dolamik bisik bublan wekelban dam bulubuka, yupu sisikilulum deiyok nang ap nirya ara, talima uk dipsilyeba, engepmunce, “Se, yatanye birye melipsutu do?” nyabuka, ngalunamlume. Deiyok ara, anggun mal olan nang, sik yin nang yupa weika arye, iknapye tam arye (arah utara) kintinibuka yangakirye, tuku deice yanibiceba, tuku buta welepnamle ning ara, dua bum kibuka, welelamle touk upnamle. Sik ayin nang ara, tonoknye babye, namin arye kum yanamle. Sik mal olan nang nirya, neikauk bikbik abuka yaceba, eipmunyeura, ilil weik upnamle.

³² Aning ati ara, sik Pilistin mutuku nang arye, dobuka deibikceba, nun dam yupu asilyanganamsiak nang yakirye, asipdesikceura, anang ati, yata yupu nyapnalum do? Kume, na nabi Yesaya birye, na kanye ara, ani. Sik adopdeibikceba, yanganamak nang ati ara, nunce nyapnamabe. “Allah arye elcuk, el tenen nang, sik melina ati, Sion mutuku akunum teleb kibuka tamupdeipmale. Ati, Allah Yahweh, el mapu ikin deiceuk ulamik nang ati ara, amutuku upceba, kalikinamla ati, talye kanye deibuka, telebuk unamake,” nyabuka, laka nyapnamabe. Nabi Yesaya birye nyabuk.