Yesaya 11 - Eipomek

‘Ninye Lyena Deiyoknye bira, aminyan yanamle,’ nyabuk yupu

¹ Minop talak ulamuk ninye deiyoknye Raja Daud, el li koproba Isai ulamukce, deibukba, dadeipdanin banamak ninye noutam arye, weplomice yo sirika tupto, tamubuka kwapu winiryuk ning, youbuka paplirye, duk moulamle touk, Daud el yala nang deice arye, ninye deiyoknye yanamle.

² Ayanamlanye bira, Allah el si Yahweh, el Dib Kanye el nong deice aunamle. Allah el Dib Kanye arye, weik kel bikna deiyok ning ap, pia kel deice arye, aning-aning nirya teleb kibuka una deiyok ning ap, mikip weik kina deiyok ning ap, ‘Wininamlulume,’ nyabuka, kanye talima kwadina deiyok ning ap, anye biti arenamle. Winibuka areplyopura, anye birye, Allah el si Yahweh ati, el piluk dolirye, elti, si erelirye, kanye deilinamle.

³ Winilirye, kanye deibuka unamle ning ara, Allah el si Yahweh ati, ilil tenebuka kanye lamapdongobuka unamle. Anye birye, ninye ati yupu lipsisikuka bokolinamle talak ara, talye nong bol deice ninguk eibuka, yupu kum lipsisikuka bokolinamle. Aning atonun, talye amul deice kekeplye ninguk, ‘Akunuma’ tenen, yupu kum lipsisikuka bokolinamle.

⁴ Aning kum bukni, elce bona utotoa talina kum ninye ap, mikip kum ninye ap ati, el diksukum ulye deice arye, yupu lipsisikuka bokolinamle. Bona weik talin nang arye, talye bona utotoa talina kum ninye ati, yaniltanyakba, bona kum ninye arye, ‘Se yata wiriptibye do?’ tenen, malye kanye bobuka moronyak ninye ati, pia telebuk ulinamle. Winipmanto ning ara, kama mikip asa arye, tuku deice olamak touk, sik malye wininyak ninye ati, weneplirye oplopnamle. Malye winibuka ulamikce ninye ara, el yupu nyanamla deice arye, wenebuka oplopnamle.

⁵ Winipmanto ning ara, mikip weik nang arye, urasin teleb deiyating moubuka delilamak touk, el pil donamle ning ap, wininamle ning ap ara, diksukumuk wininamle. Tonda, ninye deiyok nang Raja nang arye, pia teleb namin baju, cang ning arye, deiyok deice deibuka koulongolamak touk, anye birye, ‘Wininamne, winibuka melipnamsine,’ nyabuka, nyasilye yupu nirya ara, pia dipkoprob ninguk winipnamsile. Tonok ning babye, kum bataknamle.

⁶ Aminyan sirya talak, aning-aning nirya akunum teleb kipdeipsilyopura, yu weik bai kam ap, domba basam ap, olana kumce, neika ansinibuka unamdake. Aning atonun, pia yu weik bai kuse, el si macan tutul ap, kambing basam ap, olana kumce, neika ansinibuka unamdake. Atonun, sapi basam mi ap, yu weik bai singa kam ap, olana kumce, neika ansinibuka unamdake. Akam ning ap, yu ning ap, neika unamak talak ara, tonok mitik mi menekuka balibuk, aning nirya olana kumce, el aminyan tam dobolyanganamake.

⁷ Tonda, sapi basam maning bok dinmalye talak ara, bai yua basam atonun kam ning ap, neika ansinibuka maning bok dinamdake. Winipdikcopura, sik mapu babye atonun, neikauk manamake. Tonda bai yu weik kuse, el si ara singa kuse babye, sapi basam maning bok dilamle touk, dinamle. Yuk kam ning obuka dilamuk touk, kum wininamle.

⁸ Mitik mapu arikal donmakirye, sik taruk ara, ninye on kwatima, el si ara kobum kwatima, mapmalyak taruk talipnamake. Winipnamak bukni, akwatima anirye, si kum topnamle.

⁹ Allah arye talinamle mutuku nirya ap, ‘Pia Telebak upnamle’ tenen, wipdeiamuk mutuku, Sion mutuku deice ap ara, pia kum olanamake. Amutuku nirya ara, malye winin ning ap, talima pum tam arye, ‘Malyeʼ tenen ning ap ara, pia kum unamle. Telebuk unamaka deiyok ara, ani. Ara, mutuku-mutuku nirya ara, Allah Yahweh el nong ap, el winin ning ap ati, moubuka kel bikikirye, pia telebuk unamake. Winipmanto ara, weik laut mekwen deibuka langdibukba, yuk ning nirya, kum ulul touk, sirya daknamle talak ara, mutuku-mutuku nirya, Allah Yahweh el winilul ninguk weik upliba, yuk ning ton pia kum upnamle.

Israel nang, yuk mutuku bobuka, delilbinamnyebuk, Yerusalem tam tamubuka yanganamaka ati, nyabuk yupu

¹⁰ Allah arye tenyamuk talak akunum kiplyopura, Daud birye deibukba, deipdanin yangalamikca ani, deibikceba, aminyan talak Raja kipnamlanye biti, im sirya, mutuku nirya unamak nang arye, el tibuk dinamake. Sik im sirya, mutuku sirya nirya, unamak nang nirya ara, el anye ulamlyakuk yakirye, ‘Se, anye nun ton biktibyeʼ tenen, el dam yakirye, el tibuk, si erenamake. El anye unamla ak ara, pia telebuk upnamle ati, ninye mutuku sirya, im sirya nirya eibicopura, ‘Se, el ulyak ara, pia telebe,ʼ tenenamake.

¹¹ Aning nirya lakak upnamle talak ara, Allah ara, aning-aning nirya talibuka, mikip weik ululnye birye, el taruk bibiklirye, tupa ton ap bitinye talak deice, Israel yala nang taliplirye, el mapu koproba lyeplirye, sik dana-dana tam unamakak arye, sik mutuku tamubuka bobanamle. Ara, Asyur mutuku ap, Mesir mutuku ap, Patros mutuku noutam ap, Sudan mutuku ap, Elam mutuku ap, Babel mutuku ap, Hamat mutuku ap, tonda weik laut mekwen lilun ap, daunyak mutuku, pia lowak ap, tuba ton aunamak Israel nang ara, tamubuka, sik mutuku koproba, noutam bobanamle.

¹² Allah Yahweh elce sik Israel yala kum nang, im sirya, mutuku sirya nirya unyak nang eibicopura, kel biknamakʼ tenen, laka kilina ati winiryuk ninye deiyoknye erepdeipnamle. Ara winipmanto, ninye arye, ‘Asukum ara, ninye nirya bulubuka dilyanamakʼ tenen, bendera cang weik yo arye ikuka, im dup noutam delilamak touk, Israel yalanye ton, winiryuk ninye deiyoknye erepdeipnamle. Tonda, min talak yu nang arye, Israel tam ulamik nang ap, Yehuda tam ulamik nang ap, obikce bobuka yuk pera mutuku bobinamikba, tukwak mutuku dana-dana tam nirya daulamik. Bukni, Allah arye, im sirya, mutuku sirya dana-dana tam ulamice sukum arye, anang dobuka, sik mutuku boyalirye, yanuka bulubuka deiplyeura, tonok kibuka unamake.

¹³ Atalak ara, sik Israel yala nang nirya arye, Yehuda yala nang wininyak ning ap, talinyak ning ap ati, ‘Se, sik wininyak ning ap, sikce talinyak ning ap ara, nun ninguk upsutueʼ tenen, kanye uk dilamle ning ara, tuba kum wininamake. Tonda, sik Yehuda yala nang arye, Israel yala nang nirya ati, tuba ton ap kum mal pilanamake. Talya kanye bobuka, nama asa neika unamake.

¹⁴ Winibikceura, sik abitinye yala nang neika kipdobikirye, sik Pilistin nang olbana ati, keting kumulban tam neika mal pibinamake. Tonda, sik bitinye yala nang arye, otam keting panalyangan tam unyak nang ara, sik talilamikce bona nirya ara, binuka alubuka dopropnamake. Israel yala nang ap, Yehuda yala nang ap, sikce Edom mutuku unyak nang ap, Moab mutuku unyak nang ap, binuka opnamake. Winibikceba, Amon yala nang nirya ara, sik abitinye yala nang, sik amu tamuk unamake.

¹⁵ Allah arye Mesir mutuku dam weik laut mekwen deiamuk sukum ara, cepdeipliba gelal sepnamle. Allah elce weik ubuk kumanya dopdeipliba yalirye, otam weik balamle mek, el si Efrat mek ara, bokuka kan-kan tekbarye kibuka, mitik mek deiplirye, mek kaurwe kum kipnamle. Mekwen ara, dala upnamle ati, winiplyopura, ninye ara, yan baning arye, amek cepdoplya deice yanibuka, mek koubuka, otam talye mangkaua binamake.

¹⁶ Aminyan talak ara, Allah arye aning-aning nirya winipnamle talak arye, Allah el mapu koproba, Israel nang ton, tuba kam unamak nang ara, Asyur mutuku arye, weik bisik yok kintinibuka deiplyeura, sikda abisikuk yanamake. Ara min talak, Allah el mapu koproba Israel nang, Mesir mutuku noutam ikin weik ulamik bukni, Allah arye sik bobuka yanamuk atonun, aminyan talak babye, aning atonun ton ap winipnamle.