Yesaya 10 - Eipomek

Allah arye, sik ninye yupu bokolina deiyok nang ati, wenebuka nyabuk yupu

¹ Allah arye nyabuk. Sik amutuku noutam talibuka ulamik ninye deiyok nang, sik yupu bokolina deiyok nang arye, na mapu Israel nang ati, anggunce, “Aning-aning winiplulume,” nyabuka, pil dipmunyakarye, anang dipkoprob wininyak touk, yupu kum bokolilulume. Deiyok kum upmalibuk, sik nong deice, ikin ning dobuka delilulumce, malye weik ululume. Ati anggun babye, ikin ning weik dolonamlume.

² Anggunce, “Aning-aning winina kume,” nyapluma deice, sik talye kankan nang melipmanto ning ara, yupu sekelongolulumce, kum melilulume. Tonda, sik yuk nang arye, anggun kan-kan nang ati, ‘Meliptibyeʼ tenen, kintinip deibikceura, anggun dam ululum deiyok nang ara, yupu sekmunce, malye ning winilamlumba, aikin unyak nang kum meliptinge. Tonda, aning atonun, anggunce youwak kilapu ap, kwaknamne mapu ap, sik talinyak ning nirya, alubuka dololulume. Winipmanto ara, singa kus arye, bai tam kam ulul ning obuka dilamak touk, anggun babye sik kan-kan nang atibuk winilulume.

³ Allah arye anggun nirya ati, wenepnamsil talak ara, anggunda yata wiripnamlum do? Tonda, anggun wenena ati, lo arepsilirye, ikin ning dopdeipsiliba, pia pera mutuku, yu nang arye mal piyanamsiyak talak ara, anggunda yata wiripnamlum do? Allah arye lo arepsiliba, pera mutuku arye, mal piyanamsiyak nang arye yakceura, anggunda dan mutuku nang arye mikip kiptingba, sikce amutuku nang dam binuka, ‘Se nun ton melipsululume,’ nyabuka, moroptum do? Tonda yata tonye biti, ‘Melipsilyame,’ nyabuka moropnamlum do? Tonda, anggunce talibuka umunce, bona talin nang umunye ning nirya ati ara, ‘Duknubuka deiptibiba, ubula kum dopropnamsiyakʼ tenen, dan mutuku duknupnamlum do? Kume, aning kum winipnamlume.

⁴ Anggunce, ‘Se, nun ap, nun talinyap bona ap, duknuptibyeura, sik nun olan mutuku yu nang arye, ubula kum dopropsitinge. Nunda ninye olanak bipyeba, nun ton kum opnamsiake. Tonda, nun ton tomopsikiriye, tapu koubuka, kum bobinamsiyake,’ tenepmalum do? Kume, aning winipsilye babye, Allah arye anggunti, ‘Se, anggunda bicoʼ tenen, kum lyepropnamsile. Tuba wenenauk wininamsile. Ura, Allah arye sik Israel nang ati, ikin ning weika arye, sik nong deice deipnamle bukni, akunum winiplyopura, elce, ‘Yo, akunumaʼ tenen, el yu ara, min kum upnamle. Elce tuba yu upliba, el taruk erebuka, anggun Israel yala nang ati, tuba wenenamsile.

Allah el mikip ara, Asyur mutuku talibuka ulamuknye deice deipnamuk ning ati, nyabuk yupu

⁵ Allah arye nyabuk. Sik Asyur mutuku unyak nang ara, sikti, lo arepnyeura, sikce Israel nang ati, ikin ning deipnamsiyake! Na kayapu koproba, Israel nang arye, malye weik winilamik ati, lo arepnyeba, sikce anang olalbinamak bukni, aminyan talak ara, sik babye wenebuka opnamne. Wini talak ara, anggunda na talinun ning ara, tonda na ninye on kama atonun kipdeipniba, ‘Naʼ tenen nang, Israel nang ati opnamake. Ara, na yu weik upnilya ati derepnye nang ara, sik anang deice deipnamake.

⁶ Na kayapu Israel nang ara, sikce na nyamse yupu kum kekenyakce, narye, ‘Teleb winin ning ara ani,’ nyanun yupu nirya babye, yaniltakanyaka ati, Asyur mutuku nang dopdeipsinyeba, Israel tam nang olbinamake. Israel nang arye, malye weik unyakba, na yu weik upnuka ati, narye sik Asyur mutuku nang ati, “Sik Israel nang ara, adiparyuk olbinulumume,” nyabuka, sik Asyur mutuku nang dopdeipsiniba, na mapu koproba Israel nang ati, obuka sirya daknamake. Tonda, sik anang obikirye, sik talinyak bona ara, binuka dalubuka dopropnamake. Sik Asyur mutuku nang arye, na mapu koproba Israel nang ara, talye bisikak buta yanilongolamuk touk kibuka, obuka yanipnamake.” Allah arye nyabuk.

⁷ Nyabukopura, adiparyuk dukdongobuka, ayupu ton nyabuk. “Bukni, Asyur mutuku taleamuk deiyoknye Raja birye, Allah nyabuk ning ara, kum tenelule. Tonda, elce, ‘Winipnamne,’ tenyamuk ning ara, yuk ulule. Raja Asyur bira, el kanye aryuk, ‘Na babye tenepne ninguk winipnamne. Ara, narye na mikip weik deice arye talipnirye, na dam bukni, ninye dana-dana tam noutam, im sirya mutuku nirya, unyak nang ara, binuka opnirye, sirya dakuka kum kipdeipnamne,’ tenebuk.

⁸ Aning ara, talye ati kume. Deiyok ara, Raja Asyur el kanye erena deice arye nyalule. “Kume, narye talinun ning ara, na amu tam unyak yin talin nang, sik eitam deiyok nang nirya ara, weik eren nang, Raja nang atonun unyake.

⁹ Na ap, na yin talin nang ap, nunce weik asik ulamik nang weika arye, akunum malye kibuburye, obuka sirya dakupu. Ara, Kalno mutuku ap, Karkemis mutuku ap, Hamat mutuku ap, Arpad mutuku ap, Samaria mutuku ap, Damasyik mutuku ap ulamik nang nirya ara, akunum obuka sirya dakamupu. Winyamupu touk, sik Israel tam unyak nang babye, obuka sirya dakmabe.

¹⁰ Na mikip weik arye taleamse talak ara, narye yata barye mutuku noutam, ninye deiyok yuk-yuk kibuka taleamikce, sik weik isa si talibuka, si erelamik mutuku nirya ara, narye obuka sirya dakamse. Amutuku si nyapman tam nirya ara, sik si erelamik isa ara, mikip pia weik ulamik. Bukni, Yehuda tam nang, sik Yerusalem weik asik ap, Samaria tam unyak nang ap, sikce si erenyak ning ara, mikip mitik tonunuk ulule. Ati ara, sik Israel nang babye, kanam aryuk obuka, sirya daknamne.

¹¹ Anggun ton tenipdelulume! Narye Samaria mutuku ulamik nang nirya ap, tonda sik si erelamik isa-isa nirya ara, akunum obuka sirya daksirye, aning nirya, akunum kum kipdeipse. Awinibika atonun, Yerusalem mutuku unyak nang ap, sikce, “Nun ni koproba Allah,” nyabuka, si erenyak ning babye, ‘Binuka kum kipdeipnamnarya,’ tenelirye nyalule.

¹² Raja Asyur bira utenebuka nyalul bukni, Allah ara, aning-aning eitam erebuka, mikip weik ululnye birye, tamubuka nyapsile. Na tenepse ning, Sion mutuku deice ap, tonda Yerusalem mutuku weik asik noutam unyak nang ap, sik wenena ati akunum wenepnirye opnyeura, naryuk tamubuka, Asyur mutuku talibuka ulul deiyoknye, Raja Asyur biti, weik arye wenepnamne. Ara, anye birye, el kanye eren deice arye, dipdanuka kwaliplyak arye, yupu weika arye nyalula ati, narye ikin weik ning dobuka, el nong deice deipnamnarya!

¹³ Anye wenepnamne ara, talye ati kuma! Deiyok ara, Asyur mutuku taleamuk ninye deiyoknye, tilila yupu deice arye nyalule. Kume, sik dana-dana tam ulamik nang nirya ara, na mikip deice aryuk obuka sirya dakse. Tonda, nara kel bikina deiyok ning, weika arye kel biksirye, pia nong pum tam ulul ning kel bikinanye ununa ati, narye amutuku-amutuku nang oplopsirye, sik talilamik tuku wililon mutuku nirya ara, akunum kum kipdeipse. Tonda sik tenen delilamik dekna weik ning nirya ara, akunum alubuka dopropse. Weik sapi basam mikip weik ulamle touk, na babye atonun, mikip weik unirye, Raja ulamice nang ara, ninye deiyok nang bulamakak, tahkta deice bukamik bukni, anang opsirye, na amu tamuk kipdeipse.

¹⁴ Tonda, mutuku im sirya mutuku nirya unyak nang ara, maka aik dobuka duk deiamliba, ninye arye talye binuka dolamaka tonun, narye oplopse nang talilamik bona, dekna weik deimik ning nirya ara, akunum binuka dalubuka doropse. Aning nirya dopropse talak ara, amutuku ulamik nang kan-kan arye, tonoknye babye, ‘Kume, aning ara, winina kume. Aning ara, kum doproptume,’ nyabuka, yupu kum seknike. Winipmanto ara, maka duk deiamlya ani, bataklyeura, ninye arye talye dalubuka doprobikceba, amaka arye yupu nyana kum, tonda lakuka bana kumce, talye tunim abuka bulamle touk ubuka, narye amutuku-amutuku nirya binuka, oplopsirye, sik ning ubula dopromse. Dopropse talak ara, tonoknye babye, sik si akuka, yu yupu ton, mitika babye pia kum nyapnike. Utenebuka, Asyur mutuku taleamuk Raja arye nyabuk.

¹⁵ Nyabuk bukni, Allah arye tamubuka adomon yupu nyabuk. Winipmanto ara, an kapak ya arye, akapak ya talipmalamnye biti, ‘Anda na bopmanilam bukni, weik mambul ning ara na uka,’ nyabuka, kwaliptu do? Kume, ninye arye kapak memenyak atia. Atonun tonda, yo seken ning gergaji ara, agergaji bopmalinye biti, ‘Anda, na bopmanilam bukni, weik mambul ning ara, na uka,’ nyabuka, kwaliptu do? Aning atonun, tonda ninye arye, ‘Kama talibuka binamapʼ tenen, bai tam mitik yo sekuka deibikirye, kintinip deibikceura, sikce delinyak yo, elcuk, ayo kintinipmalinye, el nong dobuka, kum talilule. Aning atonun, kam kum ulul yo kama ara, el sekuka kintinip deipmalinye bira, kam ululnye birye tomoptu do? Kume, aning kum winipmanto bukni, ninye arye akama amemebuka delinyak yo ara, tomobuka talilule.

¹⁶ Ati ara, Allah Yahweh aning-aning nirya talibuka eitam erebuka, mikip weik ululnye birye, im deice yin talin malaikat nirya, sik deiyoknye ulule. Asyur mutuku talibuka ulula deiyoknye, elce kanye eren deice arye, akunum kwalibuka aulula ati, Allah arye anye wenepnamle. Ara, Allah arye Raja Asyur, el amu tam mikip weik unyak yin talin nang ati, kanye ikin weikuk arepliba, sik nong bol deice nirya ara, malye upnamlarya. Sik nong noutam ara, kanye imun uk dipliba, sik nong mikip nirya ara, mitang kipnamle. Atalak ara, Allah arye Asyur mutuku nang nirya ap, sik talinyak bona nirya ap ara, malye kipdeipnamle. Winipmanto ara, ninye arye uku sekiceba, weik pou uku buk arye, aning-aning nirya dibuka, sirya daklamle touk, Allah arye sik Asyur mutuku nang kanye arye, ‘Aning ara mambule,’ tenenyak ning nirya, kum kipdeipnalamlarya.

¹⁷ Allah arye, sik Israel yala nang ati, dirina atonun, kiplya deice arye sik melilule. Elda, sik Dirina Deiyoknye ulul bukni, aminyan talak ara, weik uku buk atonun upnamle. Allah ara, pia dipkoprob ululnye bukni, aminyan talak ara, yu weik upliba, elda weik uku buk atonun upnamlarya. Weik uku buk dilamle touk uplyopura, tonok sum arye, atalye palamle tace ning nirya ap, mutmuta nirya ap ara, el uku arye, atalye ning nirya dibuka, sirya dakdopnamle.

¹⁸ Asyur mutuku noutam ara, bai tam pia teleb weik yo palpal mutuku ulule. Tonda, wa win sukum tukwak weika arye ton aulule. Aning nirya ara, ninye arye, ‘Se, aning ara, pia telebe,’ tenebuka teleb yupu nyanyak. Bukni, ateleb sukum nirya ara, Allah arye, pia kum kipdeipnamle. Winipman touk, dinanye, el uk pia taleamlya ani, dipmanto uplirye, pia bol malye bolamle touk, kipdeipliba, aning nirya pia malye upnamle. Allah arye, Asyur nang sik nong ap, sik kanye ap ara, obuka sirya daknamlarya.

¹⁹ Asyur mutuku deiyoknye birye, taleamuk mutuku noutam tikamuk yo kan-kan nirya ara, mitik tonunuk bataknamle. Batakliba, pia mitik mi arye, ayo ara nuknamle. Ara, mitik tonunuk tuba aupnamla ati, aupliba, mitik mi arye nuknamle.

“Israel nang ara, ninye mitik tonunuk wibuka lyepdopnamle,” nyabuk yupu

²⁰ Aminyan yanamle talak ara, Allah arye Israel nang, sik deice ikin ning deiplyeura, ninye weika arye dipnamak bukni, sik aning kum dopropnamaka nang, tuba kam unamak nang ara, mitik tonunuk unamake. Minop talak ara, yuk karin mutuku ninye deiyoknye, Raja Asyur biti, ‘Elcuk lyepropnamsile,’ tenebikce, elti, morobik bukni, anye birye, sik tam nang weika arye, obuka sirya dakuk. Anye birye, sik obuka yaniplobuk bukni, mitik tonun tuba kam unmak nang ara, elti, ‘Elcuk melibuka lyepropnamsile,’ kum tenenamake. Atonun, Yakub birye deibukba, dadeipdanin yangalamika ani, mitik tonun tuba unyak nang ara, anye biti, ‘Melibuka lyepsutue,’ pia kum tenenamake. Ara, Israel nang nirya, sik ni koproba Allah Yahweh ati, pia dipkoprob diba tenenamake. Allah ara, pia diksukum ulirye, malye ning tonoknye babye pia kum ululnye, Pia Leknye Allah ulule.

²¹ Dipkoprob, Israel yala nang, mitik tonun tuba kam unamak nang, Yakub elce deibukba, dadeipdanin banyakce, tuba unamak nang ara, ‘Nun malye ulampu ning batakibirye, Allah el tibuk diba tenenamabeʼ tenebikirye, sik ni koproba Allah ati, ‘Elda mikip weik ululeʼ tenen, ‘Eluk talibibyakarye, el yupu uk kekenamabe,’ tenebikirye, el damuk tamubuka yanamake.

²² Minop talak ara, Israel nang ara, pia weik, laut mekwen kup-kup keil wininga pia weik ulamle touk ulamik. Bukni, aminyan yanamle talak ara, aninye obuka bobinamikce, tapu koupdongamik mutuku arye batakuka, mitik tonunuk, Allah dam tamubuka yanamake. Allah arye, ‘Asyur mutuku nang wenebuka opnamne,’ tenyamuk talak ara, akunum dam kibuk. Allah ara, dipkoprob pia diksukumuk ululnye ati, dipkoprob amutuku unyak nang ara, sik babye malye unyaka dekena ati, Allah arye, anang wenebuka opnamle.

²³ Diba, Allah Yahweh ara, im deice unyak yin talin malaikat nirya, sik deiyoknye ulula ati, elce ayupu nyapsile. “Tukwak mutuku sirya, im sirya nirya ara, amutuku-amutuku noutam unyak nang nirya ara, obuka sirya daknamne. Nara Allah, na si Yahweh aning-aning nirya talibuka, eitam erebuka, mikip weiknye unune. Narye tukwak mutuku nirya obuka, sirya daknirye, atu buklopnamne,” nyapsuke. Aning ara, Allah arye, ‘Winipnamne,’ tenebuk ning ati, pia kum bataktue. Dipkoprob winipnamle.

Allah Yahweh arye, ‘Asyur mutuku Raja biti, wenebuka oplopnamne,’ tenebuka ati, nyabuk yupu

²⁴ Allah Yahweh, im deice unyak yin talin malaikat nirya, sik deiyoknye ulule. Elce nyapdeipsuke. “Na kayapu koproba, Israel nang bukni, sik Sion mutuku noutam unyak nang ati nyapsine. Sikda, Asyur mutuku nang ati, ilil kum unamlule. Sik Israel nang ara, minop talak Mesir mutuku ulamikba, sik deice ikin ning deibikce, yo kama dobuka, sik nong deice olamik touk, sik Asyur nang babye, atonun winipnamsiak talak ara, anang ati ilil kum unamsile.

²⁵ “Anggun tuba ilil kum unamsile,” nyapsin ning ara, talye ati kum nyapsine. Deiyok ara, na Allah arye, anggun Israel nang arye, malye weik ulamlum ning ati, na yu tenepsise ning ara, mitik tonunuk tuba upmal bukni, aminyan talak min kum upnamle. Sik Israel nang ati, yu ton tuba kum upnilyeura, na yu weik tuba aupnamnil ning ara, sik Asyur mutuku nang ati, sik nong deice deipnirye, anang nirya wenepnirye, obuka kum kipdeipnamne. Allah arye nyapsuke.

²⁶ Allah ara, mikip weik ululnye bira, im deice unyak yin talin malaikat nirya, sik deiyoknye ulule. Elce sik Asyur mutuku nang ati wenepnamle. Ara, kat tapu taliplirye, sik nong deice litukuka wenepnamle. Ara, min talak Midian mutuku tam ulamik nang ara, Oreb mutuku keil donga dam ulamik nang obuka wenyamuk touk upnamle. Tonda, el kama dobuka, weik laut mekwen deice pouklopnamle. Ara, Mesir mutuku nang obuka wenyamuk touk, Asyur mutuku nang babye wenebuka opnamle.

²⁷ Allah arye, sik Asyur mutuku nang opnamle talak ara, sik Israel nang loplobuka lyepdopnamle. Ara, Asyur mutuku nang arye weik ikin ning, sik takunya deice deiamsik ning ap, sik nong deice ikin ning deibuka, darapdongamsik ning ap ara, Allah arye anggunti, melibuka lyepropnamsile. Winipsiliba, sikce ton ap talepsikirye, ikin ning kum delinamsiake.

Sik Asyur mutuku mal pin nang arye olyanamaka ati, nyabuk yupu

²⁸ Asyur mutuku yin talin nang arye, mutuku si Ayat dam akunum olyanmik. Aning ara, sik ayin talin nang ara, Mikron mutuku bisik tam arye kipdobikce yayik. Anyapce dipdongobuka, otam mutuku ara, Mikmas mutuku dam binuka, Asyur mutuku yin talin nang, sik bona ara, Mikmas mutuku noutamuk deibik.

²⁹ Asyur mutuku yin nang ara, mutuku tam bisik arye kibuka yanganmek. Sikda, abisik kibuka yanganmekce, Geba mutuku yanuka, tiya talak mapmek. Mapmeka berekukopura, amutuku dam uamuk mutuku, Rama mutuku ulamik nang nirya ara, ilil unmok. Tonda, Raja Saul deiamuk nang arye taleamik mutuku, Gibea mutuku ulamik nang ara, ilil weik upmokba, sik nong nirya kouluksakmuk. Ilil weik upmuka ati, amutuku nang arye, bai sakuka, bikbik abuka bindobik.

³⁰ Se, sik Galim mutuku weik asik unyak nang ap, Galim mutuku dana-dana tam unmak nang ap ara, sikce, “Se, ayin nang arye opsicak ati, melipsululume!” nyabuka, malye nyabuka, engebuka ngalukunamake! Tonda, anggun Laisya mutuku unmalum nang ara, moubuka kekepnamlume! Anantot mutuku unmalum nang ara, Galim mutuku nang arye moropnamsiak yupu ati, bico tenepmunce, ayupu kekepmunyak arye, Galim mutuku nang ati meliplulume!

³¹ Sik Madmena mutuku unmak nang ap, Gebim mutuku unmak nang ap ara, ‘Asyur yin talin nang arye opsicakʼ tenen, sik unyak mutuku arye batakuka, bai sakuka bindopnyake.

³² Asum babye, Asyur mutuku yin nang ara, Nob mutuku yanuka unmake. Unmakce, sik taruk pinibuka, Yerusalem mutuku weik asik unyak nang ati, taruk kitibuka piplunamake. Ara, Sion mutuku deiceuk unmak nang ati, ‘Anggun moubuka dilulume! Anggun Yerusalem mutuku weik asik unmalum nang ati, nun minopce yanuka opnuyapʼ tenen, winipnamake.

³³ Asyur mutuku yin nang arye, ‘Winipnuyapʼ tenen, kintinipmak bukni, anggun nirya dilulume! Allah Yahweh aning-aning nirya talibuka, deice tam mikip weik ululnye bira, im deice yin talin malaikat nirya, anggun deiyoknye birye, melipnusile! Ara, sik Asyur mutuku yin nang nirya arye, ‘Yerusalem mutuku nang opnuyapʼ tenen, kintinipmak ning ara, yupu seklirye, anang ati, amu tam kipdeipnamale. Winipmanto ara, Allah mikip weiknye birye, weik cang yo tikamukak weleplirye, taruk nirya yangabuka, tukwak dolkwetelamle touk winipnamle. Ara, Allah elce sik Asyur mutuku nang, sik kanye erebuka kwalinyak nang ara, sik wenena ati amu tam kipdeipnamale.

³⁴ Allah el mikip weiknye ulula ati, weik yo kan-kan tikamuk yo nirya wepnamle. Winipmanto ara, ninye arye kapak ya bobikirye, weik yo kan-kan nirya weklamak touk winipnamle. Ara, sik Asyur mutuku nang ara, mikip weik unyak bukni, sikti, amu tam kipdeipnamale. Asyur mutuku yin nang ara winipmanto, Libanon mutuku weik cang kat yo tiklamle touk unyak bukni, Allah arye sik nirya ara, webuka bataknamle.