Yesaya 1 - Eipomek

Nabi Yesaya birye, Yehuda yala ninye malye winilamik ning ati, nyabuk yupu

¹ Abuku sekamuk ning deiyok ara, Yehuda yala ninye ap, Yerusalem mutuku ulamik ninye ap arye, winilamik ning ati, Allah arye el yupu lak lena deiyoknye, nabi Yesaya biti, nyabuk. Yesaya el li bira, el si Amos. Anyabuk ning ara, Yesaya lengdar malamuk ning ap, Allah arye el talima pum tam yupu nyalilamuk ning ap ati, Yesaya birye sekuk. Atalak ara, Yehuda yala ninye, sik ninye deiyok nang, sik si ara Uzia ap, Yotam ap, Ahaz ap, Hizkia ap, ulamik talak noutam, Allah arye Yesaya el talima pum tam, laka len yupu nyalilamukba, ayupu nirya kekelamukce seklamuk. Ayupu ara, Yehuda yala ninye ulamik ning ap, aminyan talak winipnamuk ning ap ati seklamuk.

Allah arye, el mapu Israel ninye ati, “Malye winina meme,” nyabuka wenebuk yupu

² Nabi Yesaya birye nyabuk. Se, Allah Yahweh arye, mambul yupu akunum nyapmasila ati, anggun nirya kekenamlulume. Anggun tukwak mutuku umunce, malye winimunye ninye nirya ara, moubuka kekenamlulume. Anggunda pia bicoe. Im deice ululum ninye nirya ara, moubuka kekenamlulume. Se tukwak mutuku ululum ninye nirya ati, Allah el si Yahweh arye nyabuk yupu ara, ani. Se, sik Israel ninye ara, ‘Na tenen ninye unamak’ tenen, wipdeiamsirye, pia melinun bukni, mitik mapu arye, talye-talye yupu nyaltakalamak touk, sikce nati batakaninyake. Sikce nati yaniniyake.

³ Winipmanto ning ara, sapi basam babye, sik weilamak deiyok nang kel bikinyake. Atonun keledai basam babye, sik weilamak deiyok nang kel kibikirye, sik din arin sukum kintinililamak ara, akunum bikinyak bukni, sik Yehuda yala ninye ara, nati moubuka tenena kumce, sikce bita kel kum bikininyake.

⁴ Ati, sik malye wininyak ninye ara, bicoe. Sik donirye deipdanin yangalamik ninye arye, malye ning weik tonun winipra yangalamikce, na yupu yaniltalamnike. Aning atonun, sik mapu babye, malye-malyeuk wininyake. Na Allah Yahweh, aning-aning nirya talibuka, deice tam Weik Eitam Ununye birye, na nyanun touk unune. Nara, pia telebnye, malye una kumnye birye, Israel ninye ati, pia kalikuka melinun bukni, sikce batakaninyake. Sik nirya ara, na dam kum unyakce, nati donga aninyakce, yuk pera sukumuk unyake.

⁵ Anggunda yata ati tuba-tuba malye ninguk winipra balulum do? Winipmanto ara, anggun kisok ap, anggun kanye talima pum tam ap ara, pia weik uk akunum disulule. Ati ara, yata deiyok ati, anggunce, ‘Nun wenena ati, ikin weik ning tonap deipsutue’ tenen, se tenemunce, winilulum do?

⁶ Winibuka uk disilya ara, yan dam arye dipdongobuka, nong nirya nepra welepsilirye, kisok dam balamsil touk winilulume. Tonoknye babye teleb ton kum ulule. Anggun nirya ara, malyeuk ululume. Anggun nong deice nirya, suse dibuka nepsilirye yabung uk turuklamsile. Winipsilirye, suse dinamsil ning ara, obat arye likuka kwetepsikiba, dila kum ninamsile. Tuba malyeuk winimunye touk, tuba wininamlume.

⁷ Aning atonun, anggun mutuku nirya ara, yuk pera mutuku yu weik nang arye, akunum opsike. Anggun aik dolamlum ning nirya ara, akunum uku dongopsikba, uku dibuka sirya daksuke. Yuk pera mutuku ninye arye, anggun taleamlum mutuku dalubuka dopropsikce, anggun wa wibuka kouamlumba, palamuk ning nirya ara, alabuka dololanyake. Anggun mining dam dinmamunyak arye, malye winilisinyake. Anggun ning nirya dibuka sirya dakanyake. Winibikirye, anggun mutuku nirya obuka atu kiplopsike.

⁸ Domon yupu deice arye, Sion mutuku kil mi nyanyaka ara ani. Anggun Yerusalem mutuku ululum ninye ati nyapsine. Anggunda, anggur tapu wa win dam doltakna aik domikca ani, bataklamaka atonun ninye ululume. Tonda, asum wa win dam doltakna aik domikca ani, bataklamaka atouk, ninye ululume. Tonda, yuk pera mutuku yu weik nang arye, ‘Amutuku ninye opnuyap’ tenen, warikuka antanap dongobikiba, malye kanye bobuka bulamak touk ululume. Winimunya ara, narye bataksisiba, imun kanye bobuka umunya ati nyapsine.

⁹ Allah el si Yahweh arye im deice yin talin nang, malaikat nirya talibuka ululnye birye kum melipmasutopura, sik yu weik nang arye, nun yala ninye nirya akunum obuka sirya dakmasitinge. Ninye mitik tonun babye ton kum bataksutue. Nun yala nang nirya, obuka sirya dakmasitingba, nunda Sodom mutuku ap, Gomora mutuku ap nirya, obuka sirya dakamuk touk, winipmasitinge. Bukni, nun ni koproba Allah Yahweh arye, ninye mitik anun ton lyepsukba, tuba unyabe.

¹⁰ Se, anggunda Sodom mutuku ap, Gomora mutuku ap, pia malye-malye weik winilamik ninye atonun ululume. Anggun Yerusalem mutuku talibuka umunya deiyok nang ap, anggun amu tam unyak ninye ap nirya ara, Allah el si Yahweh arye nyasilye yupu moubuka kekeplulume. Allah arye peteresilye yupu kekebuka dobolbanamlulume.

¹¹ Allah el si Yahweh arye nyasulule. Anggunce na arena ati, kam ning asum-asum nirya obuka uku dalyangaluluma ara na like. Tonda na si erena ati, domba basam yim ning ap, sapi basam mi nong kalimna teleb ning ap, boyangalulum bukni, na like. Tonda, yim sapi ap, domba ap, kambing ap opmunce, ining na dam boyangamunye ning ara, na kum patanulule. Ara, sik malye wininyak diparyuk, na si erena ati boyanganyak ning ara, na kanye kum delinuna ati, nyapsine.

¹² Tonda yatanye birye winiplulume nyapsukba, anggun kam un ning aning-aning nirya bobuka na dam delilyanganululum do? Anggunda talima pum tam nati, dib tenena kum nang anya arye, anggun aning-aning nirya boyangamunba, yan lelim nyaplirye, na dikpikinulule. Na si eren aik dam, aning nirya yanilyanganyaka ara, na lik unulule.

¹³ Anggunce delilyangamunye ning nirya ara, talye dem ati boyangalulume. Winibuka boyangamunye ning nirya ara, dukna dukikiba, tong ati ukinikilongolamak touk, usunune. Narye anggunti lik upniliba, kum dilisunune. Anggunce wala tikilongon talak ap, Sabat sum ap, weik mambul sum ap upliba, Allah yupu kekena ati, bulubuka wekelyangamunyak ara, na like.

¹⁴ Wala tikilongon talak ati, kwalya kwalilulum ning ap, tonda, na Allah arye, ‘Asum mambul sum ati, bulunamlulume,’ nyapdeiamsise ning ati, kwalya kwalilulum ning babye, pia na like. Anggun malye winimunye diparyuk, weik kwalya kwalemunyeba, ikin kanye bonirye, na lik unulule. Ara, anggun malye winipra yangalulum ning arye, na kanye talima namin kum upnutue.

¹⁵ Tonda, anggunce taruk erebuka, Allah moromunye ning babye, narye moubuka kum dilisunune. Anggunce, ‘Winibuka melipnamsil’ tenen, moronumunye ning ara, na kum kekesunune. Aning deiyok ara, anggun taruk deice ara, ninye ining weik upsuka ati, nyapsine.

¹⁶ Ati, anggun malye winimunye ning nirya kwiriplopmunce, telebuk unamlume. Anggun malye winimunye ning nirya batakmumce, yuk sukumuk donokonamlulume. Winipmunyopura, malye un ning tonap kum wininamlulume.

¹⁷ Winipmunyopura, teleb ninguk winipra banamlume. Ara, diksukum un ninguk, kel bikra banamlulume. Ninye ati yupu lipsisikuka bokolin nang babye, diksukumuk nyanamlulume. Tenepce arye, tilila yupu nyabuka, kum nyanamlulume. Winipmunyopura, youwak kilapu do, kwaknamne mapu do, yuk nang arye, sik nong deice ikin ning delinamak talak ara, angguncuk lipsisikilinamlulume. Sik bidamang arye kum melipdanmanto ninye ati, melipnamlulume.

¹⁸ Na Allah Yahweh arye nyapsine. Anggun ap, na ap yupu talipnuyabe. Ara, ‘Anggun moubuka teneipnamlum’ tenen, nyapsine. Winipmanto ara, anggun malye ning ara, kapye yo kita moulamle talak, ining bi ulamle touk usulule. Bukni, anggun malye winin ning batakmunba, narye amalye ning kilipsinyopura, kurun teleb ning atonun unalume. Aning atonun, anggun malye winimunye ning ara, cunang tapu kita moulamle talak, ining bi ulamle touk ulul bukni, anggun malye ning batakmunba, narye amalye ning kilipsinyopura, ngarye maka potong lelamle touk, telebuk unamlume.

¹⁹ Tonda, anggunce nati, ‘El yupu kekebuka, el amu tam dobolbanamabe,’ tenepnumumnyopura, anggun amutuku ulul ning pia teleb ning ara, weik tonun arepsinyopura, aning talibuka dinalume.

²⁰ Bukni, na nyapsinye touk kum winipmunce, na yupu yaniptabuka malye upmunyopura, narye nyapniba, mal olan deice arye, nirya opsikiba dipnamlume. Na Allah Yahweh arye nyapsine.

Yerusalem mutuku ulamik ninye deice wenebuk yupu

²¹ Minop talak Yerusalem mutuku ulamlum ninye nirya ara, ‘Na ka,’ tenebuka tonok kanye bobuka, nati kanye talima dukdongobuka ulamnulum bukni, wini talak ara, na bataknulumce, talye-talye yolalamak kilapu atonun ululume. Minop talak ara, diksukumuk ulamlumce, pia telebuk ulamlume. Ninye ati yupu lipsisikuka bokolilamlumce, teleb yupu uk nyalamlum bukni, wini talak ara, olan ninye uk ululume.

²² Atonun, minop talak Yerusalem mutuku ulalum ninye winilamlum ning ara, urasin teleb ning perak atonun ulamuk bukni, wini talak ara aning atonun kum ulule. Ninye arye, ‘Aning ara malye ning’ tenen, talye bai donoklamak touk akunum ululume. Tonda, minop talak ara, anggur tapu duk mek piato teleb lelamle ning atonun ulamlum bukni, wini talak ara, talye mek weik tabakuka dikdongobikiba, mitang ulamle touk akunum ululume.

²³ Ura anggun Yerusalem mutuku talibuka ululum ninye deiyok nang nirya ara, na yupu bisimunce, ubula don nang ap neika ululume. Anggunce ninye ati, yupu lipsisikuka bokolin talak ara, malye wininyak diparyuk, ‘Nun patasilye ning ara arepsitingopura, sik tenenyak touk, yupu lipsisikuka bokeipnuyabe,’ tenemunce, winilulume. Utenemunya deice arye, youwak kilapu ap, kwaknamne mapu kilmapu ap ati, sik ikin uplya babye, diksukum yupu kum lipsisikuka bokolilulume. Anggunda, ‘Nun patasilye touk arepsitinge’ tenen, winimunya ati nyapsine.

²⁴ Ati, na Allah Yahweh, aning-aning nirya talibuka Pia Mikip Weik unirye, narye, ‘Winipnamne,’ tenenye touk unune. Nara, im deice yin talin malaikat nirya, sik weik deiyoknye unune. Narye nyapnusine. Nara, pia telebnye ununye birye, Israel ninye ati pia kalikuka melisununye, na Allah arye nyapnusine. Se, Israel ninye anggunce nati, mal pinululuma ati, narye anggun wenebuka opnamsine. Nati, ‘Nun like,’ tenenikirye, malye yupu nyaninyak ninye nirya ati, tamubuka kwang daknamne.

²⁵ Na yupu yanibuka malye winimunye ning ati, ikin ning anggun deice deipnamsine. Tonda kat ning el si perak urasin pia teleb uamlya ani, butbuta palilamle ning, uku dongobikiba, malye ning kum dalirye, teleb ulamle touk, narye, anggun malye winin ning kum daneipnamsine. Anggun malye winilulum ning nirya ara, kilibuka bataknamsine. Winipsinyopura, anggun nirya telebuk unamlume.

²⁶ Ati, minop talak teleb deiyok nang arelamsisa atonun, wini talak ara, narye ila tamubuka teleb kibuka, yupu lipsisikuka bokolina nang ap, ‘Winibuka unamlulume,’ nyabuka, yupu lipsisikuka nyan nang ap, wipdeipnamsine. Winipnyopura, yuk mutuku ninye nirya arye, anggun Yerusalem mutuku ululum ninye ati, ‘Amutuku unyak ninye ara, pia teleb ninye unyake,’ nyanamsiyake. Tonda, ‘Yerusalem mutuku ninye ara, Allah el tibuk, batakna kumce, pia talibuka dobolbanyak ninye unyake,’ nyanamsiyake.

²⁷ Na Allah Yahweh ara, malye ning tonok babye, kum wininirye, diksukumuk unune. Ati, narye, Yerusalem mutuku unyak ninye arye, ‘Se, nun dipkoprob malye winilamupu,’ nyabikirye, sik malye un ning batakikcopura, aninye ati lyepnamne.

²⁸ Bukni, na yupu bisibuka malye unamak ninye ap, nati bataknikirye, malyeuk upra banamak ninye nirya ara, wenebuka opnyopura, dipnamake. Na Allah Yahweh ati, bataknice ninye nirya ara, opneba pia dipnamake. Kam pia kum unamake.

²⁹ Aminyan talak ara, dipkoprob anggun nirya alye dakalanamlume. Ara, weik yo tikamuka deiyok dam, Isa Mutuku Dongonye si erelamlum ning ara, alye dakanamlume. Aning atonun, Isa Mutuku Dongonye si erena ati, nyalamlum wa win dam ati, alye dakanamlume.

³⁰ Anggunda, weik yo tikamlirye, yating mek pum bisik wekna kum arye, el bok kolulamle atonun, wininamlume. Aning atonun, wa wibuka din yala kouamikca ani, mok cena kum arye, sesal lebuka kolulamle touk, unamlume. Ara, anggunce Isa Mutuku Dongonye si erelamlum ning ati, narye wenepsiniba, anggun nirya bol malye bonamlume.

³¹ Narye anggunti wenepnamsin talak ara, min yuma talak mikip weik nang ulamik bukni, sekne elima atonun unamake. Aning atonun, sekne panmaca ani, pubikiba, uku buk palamle touk, sik mambul pil dolamik ning nirya ara, winipnamle. Ara, narye sik malye wininyak ninye nirya wenepnirye, uku pakalyak dongopniba, uku arye dibuka, sirya daknamle. Amalye wininyak ninye ap, sik pil dolamice nang ap nirya ara, uku dipnamle. Auku ara ninye arye, kum tangaptinge. Pia dinamle.